2008-07-12

奧運後一切弱點表面化

7月11日，周五。恒生指數升362.77，收22184.55，成交700億元。7月期指升350點，收22200點。

美國經濟面對低增長、高通脹，對於聯儲局應先處理低增長定係高通脹，經濟學家意見好分歧。五十三位經濟學家中二十二位認為應對付經濟增長、二十一位認為應先對付高通脹，認為如果唔好好處理高通脹問題，將令經濟進一步下滑，估計今年CPI升4%（年初估計只有2.3%）。不過，雷曼兄弟分析員Ethan Harris認為，呢次唔係七十年代式工資與價格互相追逐而引發高通脹，而係油價及食物價格呢項聯儲局無法控制嘅因素；反之，樓價下跌及脆弱嘅資本市場如果唔加以應付，極有可能令美國進入九十年代日式衰退。高盛分析員Jan Hatzius認為，刺激方案早已發放，包括減息及減稅，已經令經濟下滑放緩，但無法改變大方向，反而如控制通脹成功，有助美國經濟早一點復甦，情況有如歐洲央行。睇嚟下半年經濟方向都幾混亂。

放寬信貸難再刺激股樓

次按危機去年8月爆發至今快一年矣。過去二十年，無論1987年10月股災、1990年波斯灣危機、1994年墨西哥金融危機，1997年亞洲金融風暴、1998年俄羅斯危機、甚至2000年科網股泡沫爆破、2001年「九．一一慘劇」，英美兩國只要透過信貸膨脹令人民借多D蚊年消費，問題便迎刃而解，雖然同時產生貧富不均現象：製造業面對新興工業國競爭，令工人收入1980年起至今停滯不前；而投資銀行及對沖基金經理收入卻十分驚人。

但呢一次卻行唔通也，放寬信貸不但不能再刺激樓價及股價上升，反令油價直奔150美元一桶，繼而整沉世界經濟，情況幾令人擔心。類似1990年代日式經濟係咪已喺美國開始？

中國6月份外貿盈餘減少20%，只有213.5億美元，因出口增幅由5月份28.1%降至6月份17.6%。中國經濟漸由出口、製造業帶動轉為內部消費，入口增加31%。中國經濟只係轉型，出現硬着陸機會唔大。

滬深三百A股微跌0.68%。國航跌1.9%，南方航空跌1.5%，因航油佔中國航空企業去年總成本10%，油價上升4.1%嘅影響好大。鞍鋼亦跌2.2%，因今年純利可能減少1.26億元人民幣，寶鋼亦跌2.5%。中國鋁業升2.9%，雲南鋁業升3%，因十九家鋁業同時減產5-10%，令鋁價升6%，至3380美元一噸。

花旗推介中國海外（688），估計今年每股獲利75仙，減少28.8％，P/E十八點一倍，目標價16.83元；中國中材（1893）每股獲利20.8分人民幣，上升6.3％，P/E二十五點三倍，目標價7.35元；建滔化工（148）估計2008年度每股獲利3.77元，升16.8％，P/E九點二倍，目標價44.9元。

油價高企令阿拉伯海灣國家每日收入20億美元（其中一半歸沙地阿拉伯所有）。未來阿拉伯國家點樣運用石油賺番來嘅美元？由於沙地擔心伊朗威脅，由以色列出手炸掉伊朗核設施機會極大（除非可循外交途徑解決）。

8月8日北京奧運，中國經濟卻四面楚歌。政府官員貪污事件因四川汶川事件而激化、金融業內部失調、地區主義抬頭、無法繼續下去嘅能源補貼、中國食物價格與國際食物價格差距……上述能否藉奧運而降溫？不然，奧運之後，一切弱點都將表面化。今年第四季中國情況令人擔憂。

土耳其變得愈來愈進取（例如入侵伊拉克北部而美軍無法阻止）；以色列同敍利亞亦急於達成和平協議，以便減少伊拉克嘅另一威脅。殊仔必須响11月大選前解決中東一連串問題，呢方面如取得伊朗合作會容易得多。從呢點睇，以色列近日所做一切可能係逼伊朗走上談判桌上，同意美國嘅限核條件。如伊朗合作，將可穩定伊拉克，然後穩定中東，咁樣油價才會回落。油價升降可主宰第三季全球經濟大氣候。

高油價令俄羅斯經濟復元，俄羅斯希望重奪往日地位，因此响國際舞台上採取強硬態度，已令歐洲各國不安。中俄之間經濟互相依賴，亦令美國看在眼裏、恨在心裏，擔心中美關係甚至中歐關係因此走下坡；美歐可能聯手限制中國產品入口……。

港人只能聽天由命

換言之，今年第三季有好多因素變緊，變好變壞將影響明年全球經濟。油價如長期保持140美元以上，明年將有愈來愈多國家經濟陷入不景氣。中東緊張局勢如能降溫，又係另一回事。中國奧運之後，點樣解決內部問題亦好重要，例如減少（甚至取消）汽油補貼，同時抽緊銀根、向貧窮省份提供更多援助、向富裕省份抽多D稅，以及化解來自歐美嘅貿易保護主義、平息民憤、懲治貪官……都係十分艱巨嘅工作，小胡能否一一化解？

至於地處中西方夾縫嘅香港，如中美關係良好，我地左右逢源；反之，兩國關係淡化，我地香港遭殃。上述變化非港人所能控制，睇嚟只有聽天由命，可做嘅事極少，只能見步行步。


美國前財長魯賓對世界經濟前景抱悲觀態度。OECD組織最近將三十個成員國GDP增長率改為1.8％，係2002年以來最細嘅升幅。美國今年上半年GDP升幅只有0.8％，係近五年內最差嘅六個月。魯賓擔心次按問題仍會惡化，並相信其他國家領袖將繼續向人民幣施壓。

房利美及房貸美股價分別再跌24％及34％，因瑞銀分析員認為兩公司集資有困難。聖路易聯儲銀行前主席普爾認為，房貸美負債已大於資產52億元，房利美則只有資產淨值122億美元，有可能响第三季成為負資產（現年七十一歲嘅普爾今年3月才退任聯儲局成員，早喺2006及07年已要求政府關注此事）。兩公司為6萬億美元嘅美國房貸作擔保，一旦出事，可令美國經濟陷入類似日本1990至2003年嘅情況！貝南奇及保爾森已發言，美國政府負擔唔起兩間公司破產，估計政府好快有挽救計劃出台，例如向兩公司購入1.5萬億美元有問題負債。

倫敦樓價呈兩極化

呢次G8選擇响日本北海道溫莎酒店（Windsor Hotel Toya）做開會地點，實在令人費解。該酒店响1990年計劃興建，1993年開業時取名Hotel Apex Toya。最大貸款銀行北海道拓殖銀行（Hokkaido Takushoku）1997年11月宣布破產，酒店因此停業。2002年改名溫莎酒店才重開。呢次G8响度開會，係咪向世人啟示美國將踏入日式衰退──即低增長或冇增長長期化？7月8日同樣喺日本主持亞洲會議嘅朗尼陳，亦擔心未來十年G8 GDP進入低增長期；反之，新興工業國保持GDP高增長機會甚大。

1990年起，日本嘅「貧窮工作者」（指年薪200萬日圓即14.5萬港元）急升到2007年嘅一千萬人，大部分係兼職員工。日本今天兼職員工、臨時工及非終身僱用員工已佔日本工作人口三分一以上，大部分係二十來到三十來歲，因佢地無法搵到長工。日本一如其他西方國家，收入差距在擴大，低收入工作者不但貧窮而且被社會孤立，冇朋友甚至冇家人，好容易傾向自殺、犯罪及離婚，大部分唔打算生兒育女，並成為憤怒青年，例如最近便發生揸車到大城市斬死途人事件。面對全球化競爭，日本不能好似1990年以前咁，企業為員工提供晉升機會及良好福利，令呢個家吓仍係全球最富有國家之一嘅日本，社會愈來愈不安全。

halifax報告指出，6月份英國住宅樓價下跌2%（5月份跌2.5%），即英國樓價已由高峰回落8.7%，但仍較去年6月升1.2%。（根據F.T.樓價指數），如唔包括倫敦，今年6月只較去年6月升0.4%。

倫敦樓價一如香港兩極化，例如Kensington及Chelsea豪宅區仍較一年前升22.1%，City of Westminster及Canden分別升17.7%及17.2%；反而，Ceredigion已回落5.4%，Blackpool跌4.4%。

似乎全世界都走向兩極化。

深圳市「城市總體規劃2007-2020」响7月3日獲廣東省政府常務會議批准。呢次係深圳市喺城市發展上一個重大突破，依家正爭取獲國務院批准。由於國家副主席習近平提出「粵港澳」計劃，相信年內可獲中央批准，成為粵港澳合作先行、先試、先導者。包括推進深港之間金融深度合作、積極建設深港創新圈、擴大雙方在高新技術產業、現代物流及高端服務業合作，喺重大基建、跨境開發、兩地機場、河套上合作，擴大跨境人流，由依家每日四十二萬二千提高到一百萬，加快港深兩地經濟融合。

中式企業唔夠砌有因

中式管理就係「權力向上集中、責任向下發放」，即使聰明如諸葛亮亦得「揮淚斬馬謖」。無論國有企業及私營企業，改革開放後權力仍係向上集中。從來冇部門主導領導引疚辭職，亦冇企業領導人受責處罰，出咗事責任便向下推，完全由下屬承擔。唔單止咁，薪酬更係兩極化，權力集中喺上層收入幾級跳，承擔責任嘅下屬有事便下崗，無事亦冇人工加。而中國企業領導者大都有多疑、監視下屬、強調忠誠、口密腹劍嘅性格。

企業嘅制度係畀下屬守嘅，老闆往往凌駕公司制度之上。例如遲到早退永遠係老闆唔係員工。最唔遵守公司制度就係老闆或公司領導層。老闆嘅觀點成為企業嘅規條，員工升職由老闆個人喜好及厭惡決定，同員工勞動價值無關，形成拍馬屁者升職、努力為公司者唔受重視。老闆喜歡叫下屬做事但唔授權，令下屬成為無權司令；表面上在發號施令，其他人聽或唔聽冇關係，反正人人都知道權在老闆手中。咁情況點叫下屬領導公司其他員工？有D部門主管同下屬稱兄道弟、團結一致，將自己部門由公司中「割」出來，自成一「國」，其他部門插針不入、潑水不進，搞割據形成自己勢力，唔理公司死活。

上述種種都係中式管理嘅毛病，亦係中式企業一旦大起來便唔夠外資企業砌嘅最基本理由！