2008-07-02

小心！熊出沒！

7月1日，周二。6月份英國住房樓價較一年前跌6.3％，平均每單位售172415英鎊，跌幅係1992年11月以來最大，較5月份回落0.9％。根據英國全國建築協會資料，英國樓價已連跌八個月，擔心因此將英國經濟推向衰退。

英倫銀行本周一宣布5月份獲批樓按只有四萬二千宗（4月份五萬八千宗），較一年前減少64％，係1993年英倫銀行開始每月公布樓按數字中最低，令英國出現衰退機會進一步上升。

歐羅區6月份CPI 升幅4％，已超過歐洲央行目標通脹率2％嘅一倍，令周四加息四分一厘，見4.25厘機會極大。

美經濟復甦遙遙無期

美國億萬富翁Eli Broad（今年七十五歲）認為，美國經濟係佢成年後最差嘅時段，佢擔心美國樓市距離復甦期須以年計。佢作為美國最大房屋建築公司KB Home嘅創辦人，佢唔認為美國經濟响大選前可改善，但唔會重演1930年代大蕭條，因為安全網好多，只係距離下一次經濟復甦則遙遙無期。

7月1日滬深三百A股指數跌3.35％，收2698.35。人行行長周小川表示，儘管投機資本流入令人擔憂，提高利率仍然不失為對抗通脹嘅一種選擇。美國次按危機令全球經濟增長率下滑，中國周邊國家經濟惡化，加上高油價壓力，中國經濟亦面對前所未有嘅困難。《中國證券報》估計，今年中國GDP增長率將放緩到10.3％（去年11.9％），今年第一季GDP增長率只有10.5％。依家A股P/E已接近二十倍水平，因機構投資者對市場前景悲觀，未見入市支持。

日本短觀發表6月份日本製造商情緒指數跌至5點（3月份11點），係連續第三季下跌。美國製造業6月份進入第五個月收縮，指數見48.5（5月份49.6）。佢地估計，雖然6月27日政府發放783億美元退稅支票，面對油價上升，但對其他項目消費刺激唔大。

國際結算銀行組織（BIS）要求各國政府提高利率，協助打擊全球通脹。通脹壓力對新興市場影響較OECD國家大，令滬深三百A股6月份跌幅高達25.15％，印度Sensex指數亦跌19.88％；反之，美國道指只跌10.19％，日經平均指數只跌6.5％（恒指6月份跌11.3％）。

今年5月市場上仲充斥住信貸危機最壞時期已過去嘅樂觀論調。自從道指由5月19日13136點再次回落後，上述言論又漸漸靜下來。當油價屢創新高及道指跌穿3月10日低點11736後，市場參與者及學術界對美國經濟前景看法轉向悲觀和現實得多，認為全球經濟及金融市場面對太多不確定因素。美林首席美國經濟學家羅森伯格上周再次提出：我地仍處於一個泡沫後期嘅去槓桿化初期，並認為美股早已由去年11月就開始進入熊市，接下來嘅一段時間，市場唔可能亦唔容許樂觀，因企業盈利持續下降！投資者已意識到今年下半年企業盈利大漲已唔可能（原先估計第三季度企業盈利可上升25％）……；上述分析成為華爾街主流。6月30日道指以11350點即上半年接近最低價收市，由於道指由去年10月高峰回落，跌幅已超過20％，技術分析證實係熊市。

花旗周一發布報告指出，隨着全球經濟降溫衝擊企業盈利，亞洲股市今年下半年仍將持續下跌；MSCI亞洲指數可能跌至420點，即較家吓水平再跌13％。跟蹤2150億美元離岸亞洲基金嘅研究機構EPFR提供最近數據顯示，一直支持亞洲股市嘅全球基金，上周出現資金淨流出（即賣出多於買入），擔心亞洲股市面臨新一輪沽壓。上述基金仍增持原材料股、能源股及半導體股，但大幅減持中國及韓國股市。機構投資者糾正今年5、6月份對下半年過分樂觀嘅分析，擔心恒生指數响7月份有機會測試3月18日20572點低點。

雷曼兄弟美國首席經濟學家哈里斯表示，依家認為股市已開始尋底似乎太早，未來一段時間市場仍會劇烈波動及缺乏明顯方向，因商品價格高企情況可能長期化，令整體經濟大環境不容樂觀。

金融機構已變成恐龍

《巴隆氏》周刊指出，由於VIX指數只有24％，唔似今年1月及3月見30％以上，即美股短期反彈乏力。

大摩6月29日發布名為「計算熱錢」嘅報告中指出，今年5月前熱錢流入中國嘅影響被誇大，6月認為熱錢外逃而動搖內地銀行系統嘅擔心亦毫無根據。大摩估計，2005年至今熱錢流入中國只有3109億美元（其中1476億美元响今年1月至5月流入）。中國政府有高達1.8萬億美元嘅外滙儲備，完全可以應付熱錢一旦流走所造成嘅負面影響。不過，海通證券高級宏觀經濟分析師陳勇唔同意上述睇法，佢認為，熱錢數量好難準確量度，一個偶發事件可引發熱錢外逃，越南就係最好例子，中國應該以此為戒（1998年香港特區政府亦坐擁巨額外滙，但國際熱錢一樣離港股而去，造成恒生指數响1998年1月至8月急跌）。

今年上半年恒指下跌20.5％，好多公司上市計劃被取消咗，香港股民哭了，因為股神死了、基金病了，大行推介冇人信了。所謂股市專家，原來十之八九都係「大隻廣」（big mouth）。今年上半年已過去，但所有麻煩事仍未開始退潮，睇落冇quick fix之法。過去二十多年美國透過信貸膨脹製造出嚟嘅虛假繁榮，令美國人生活水平遠離現實太耐，叫佢地重新腳踏實地接近唔可能。一如高盛證券所講，歐美銀行業嘅變壞情況遠較一般人估計為差，而轉角點肯定唔會係不久將來嘅事。花旗亦話金融機構計劃出售嘅項目有水蛇膥咁長……。今天嘅金融機構係咪已變成恐龍，晒士太大以至難以生存？未來經濟肯定冇V形反彈，甚至U形反彈機會亦唔大。至於尋底日子要幾耐？事後才知道。過去每次油價高企皆引發衰退，1973至74年係咁、1981至82年亦係咁，甚至1990至91年亦出現軟着陸，呢次又點可例外？經濟繁榮太耐矣，我地已忘記咗「lean and mean」兩個字。

祝印度投資者好運

香港股民請唔好喊，比起內地股民，我地仍算幸福，佢地剛剛先玩完過山車！滬深三百A股由2006年8月7日1221點升上2007年10月17日5891點，喺十四個月內股市上升382％，然後A股响一片歡呼聲中往下衝，至今已回落54％。內地股民首次嘗到泡沫經濟。不過，內地投資者似乎十分富有，起碼有人願畀200萬美元同畢非德食飯！如此豪花，香港投資者自愧不如，連美國投資者亦咋舌。

仲有，印度投資者至今亦虧損36％，加上印度股市2005年開始嘅上升軌失守，下望10000點【圖】。我老曹喺度只有禱告，祝印度投資者好運。事前我老曹已作出警告，印度股市如3月低點14700點失守便好麻煩，要見10000點才完成前升幅50％調整，而且已係好低要求。5月份我老曹曾去日本北海道幾天，喺參觀日本熊時順手買咗個牌返來，可能啱各位用——「小心！熊出沒！」。

我地早已進入瘋狂世界。股價隨時上升100％或回落超過50％亦好少人理會。响電視機前嘅分析員，只用技術性調整輕輕帶過就算，而唔知道任何人如買入跌幅50％嘅股份而冇及時止蝕，已係慘痛經驗。今天距離高價50％股份已唔局限於二線股，同時包括唔少熱門股。油價一年前低於70美元一桶，依家超過140美元，上述亦唔係加DD燃油附加費便可抵銷。以美國為例，每年用油六十六億桶須多付4000億美元一年，上述或遲或早喺消費市場反映出來。今天仍冇人相信美國將進入深而長嘅衰退期，一如1990年日本，有邊個相信下一復甦期係2003年4月一樣！又或1966年嘅美國，有邊個相信下一復甦期係1982年8月？唔少人甚至相信今年3月熊市已結束，而唔相信今年3月到5月上升只係熊市中反彈。舊年8月貝南奇利用再膨脹（reflation）去對抗次按危機，結果只令油價上升100％及美元滙價大跌；到咗今天，貝南奇亦束手無策。如通脹率再上升多少，可引發美國長期債券大熊市。衰退對整個經濟發展而言有其需要，一如夏季中嘅暴雨為驕陽降降溫一樣。但聯儲局自1982年8月起一再阻止衰退出現，令人擔心下一個衰退除非唔出現，一旦出現便再唔係驕陽中嘅暴雨，而係十號風球！

散戶不宜沾手乾貨輪股

寶鋼集團與澳洲力拓達成2008年度鐵礦石價格協議：PB粉礦及楊迪粉礦上漲79.88％、PB塊礦上漲96.5％，加上乾貨輪租金大上升（海運費用佔入口鐵礦石成本50％，令煉鋼生產製造成本上升26％左右），即入口海外鐵礦石加上運費高漲，令煉鋼廠製造成本升55％。5月內地熱軋、冷軋及熱鍍鋅鋼調高咗200元一噸，6月1日起再調高300至600元一噸（因焦炭漲價令生產成本上升200元一噸）。由於中國經濟增長面對減速，鋼鐵廠未必能將成本上升完全轉嫁畀消費者，即今年下半年內地鋼鐵廠面對邊際利潤壓力。波羅的海乾貨輪指數去年10月見10800點後急跌至今年2月5500點，跌幅相當大，然後又再急升到今年5月11800點新高，最近回落又令上升軌失守，今年5月似乎只係一次假突破，乾貨輪指數係咪已見頂？機會存在。我老曹認為，散戶不宜再沾手乾貨輪股票，小心駛得萬年船。美國個人電腦亦進入滯銷期，因此亦要小心電腦生產股。

唔好同趨勢作對，唔好追隨群眾走向極端，仍係今時今日要遵守嘅格言。响熊市中，保本為首重項目，因為我地仍唔清楚油價到底會升上170美元抑或重返80美元。

本周一開始，巴基斯坦宣布取消汽油補貼（上年度補貼用掉240億美元）。上周日巴基斯坦話，油價已上升至75.69盧比一公升（相等約1.11美元），官方估計取消補貼後，油價可再升20％，但油渣卻會上升55%至58％，火水上升75%至80％。

周二見報圖中嘅貨幣單位應為美元，合此更正。