11月2日，周日。上周全球股市平均P/E一度跌至十點三倍（以歷史性純利計），即重返七十年代嘅P/E水平；國企股平均P/E九倍（去年10月二十七倍），印度股市十倍（去年9月二十五倍）。日經平均指數10月27日更跌至二十六年內新低，P/E只有十一點五倍，1990年P/E為八十倍……。問題係2008及09年上市公司純利仲可能較2007年跌40％至50％，今日嘅低P/E會否係明日嘅高P/E?!
1972年耶魯大學心理專家Irving L. Janis曾寫Groupthink一書，可解釋點解大部分專家今年都犯咗致命錯誤，此所以我老曹一再強調遠離群眾。好多金融災難皆源自集體思考（當人人想法一樣，即人人都冇思考），2007年明知泡沫形成，但邊個敢睇淡？依家股市漸漸進入便宜區，但邊個敢睇好？股價往往由一個極端走向另一極端。
恒久熊出沒？
美國最後、最大嘅泡沫叫地產泡沫，去年已經爆破，令雷曼兄弟垮掉、兩房被託管、AIG陷入破產危機中。Leuthold從事五十年投資業務嘅專家接受《巴隆氏》周刊訪問時警告，Perma-bear已經出現！人們只知BB熊、媽媽熊、爸爸熊，好少聽過「恒久熊」，因為只喺日本股市出現過恒久熊。恒久熊分兩階段：第一階段一如正常熊市，例如2007年第四季經濟見頂回落引發熊市，到今年10月止，唔少人相信已反映未來經濟衰退，未來八至九個月實體經濟衰退，股市應上升。第二階段係因為呢次股市回落破壞咗金融體系，產生流動性凍結環境，令牛市無法形成，例如三十年代美國及九十年代日本，令股市進入Capitulation期（即每次反彈後帶來更大拋售），而令恒久熊出現。聽落真係幾得人驚！10月出現二十九年內最大單月跌市，只有1987年10月跌幅才較呢次大。10月份投資者從美股提走咗750億美元（9月份560億美元），道指跌14％、標普跌17％、納指跌18％。全球股市已失去95000億美元市值。
Happy Halloween。鬼節之後，恐怖片應該落畫啦，跟住係感恩節同聖誕節。恒生指數應由10月27日10676點開始出現a、b、c反彈浪，11月股市反覆向好嘅機會都幾大。「Get-rich-quick」心態好快又蔓延，將港股（尤其係極度低殘嘅二線股股價）再度推高，正是結了傷疤忘了痛。上周道指升10％，係1982年以來升幅最大嘅一星期，好多時美股全年升幅亦不外如此。1929年道指急跌42％後，亦曾出現大反彈；2007年11月道指回落42％後，會否一樣出現大反彈？10月11日VIX見103.41，只略低於1987年10月20日股災嘅172.79，上周五VIX才回落到62.9，係咪代表未來日子一如1987年11月一樣，會出現大幅波動？
10月份金價表現係二十八年內最差。年初至今金價回落14％（單係10月份跌18％）。白銀表現仲差，年初至今跌35％（10月份跌21％）。
澳元、紐元表現亦甚差。10月份澳元兌美元跌15％，見67.38美仙；兌日圓跌21％，見66.28日圓。紐元跌12％，見57.78美仙，係1984年以來最大跌幅；兌日圓跌19％，見57.78日圓。原因係材料價格下跌，令澳元及紐元繼續睇跌。加元10月份跌11％，為1950年來跌幅最大嘅一個月。原油出口佔加拿大總出口極大比重。上周五一加元只能兌82.88美仙（全周回升6.3％）。歐洲10月份通脹率跌至3.2％（9月份3.6％），估計11月6日再減息。明年歐洲通脹率相信可低於2％而歐羅利率响明年3月中將見2.5厘，歐羅滙價繼續睇淡。日本央行10月31日決定減息0.2厘，令日圓滙價大幅回落，兌美元一度急挫5％，創1974年以來最大單日跌幅，結束咗日圓兌美元近日升至十三年高點、兌歐羅曾見六年半高點嘅強勢。
掛鈎理財產品生意淡薄
日圓強勢告一段落，可見2001年3月以來日本央行首次下調利率嘅威力，反映日本經濟面臨嘅通縮威脅不斷加大，亦反映風險偏好急速降溫（de-risk）。全球去槓桿化進度加快，加上資金離開新興市場嘅趨勢，令道指表現較恒指出色。美元再次被睇好，主因係去槓桿化及找尋避難所嘅心態上周五又再恢復。上月美元兌日圓回落7％、歐羅兌日圓回落16％，隨住歐羅明年利率走向2.5厘，估計大量資金將回流美元。
雷曼毒債券事件，令曾經風光一時嘅銀行掛鈎理財產品面對嚴厲監管，監管當局已下發通知，要求本港各商業銀行對結構性理財產品進行全面自查。事實上，銀行嘅掛鈎理財產品銷售成績响10月份較8月份減半，睇嚟掛鈎性理財產品仍有一段日子「生意淡薄」，銀行來自呢方面收益大減勢必無法避免。外資銀行或金融機構減少發行亦係原因之一，加上雷曼事件對銀行造成負面影響，而且股市大幅滑落，唔少投資者資金被綁，令明年各銀行純利進一步睇跌。
上周六美國加州Freedom Bank成為今年內第十七間被接管嘅銀行。依家超過20％美國住宅業主已成為負資產，美國物業市場仍在惡化中。
美國將捨棄小政府大市場政策
美國2007／08年度財政赤字估計超過7500億美元；2008／09年度更大，估計達1萬億美元或等於2008年GDP 7％。下屆總統肯定會致力減少財赤。相信奧巴馬响11月5日宣布大選勝出，由於民主黨控制參眾兩院，共和黨已無力阻止，「小政府、大市場」政策漸被遺棄。1980年列根總統上台，令美國從政府過分干預經濟中解放出來；二十八年後今天又再返轉頭—即大政府時代自2009年1月21日起又再開始。列根時代透過減稅刺激經濟復甦嘅時代結束，向富人抽重稅津貼窮人嘅時代又再開始。Invest correctly, you'll make millions. Make the wrong move. 好易一鋪清袋也。大選後嘅奧巴馬會否一如希臘神話中嘅Hercules？Hercules負責清理地獄嘅馬廐（由於唔知幾多年已冇人打理，早已一塌糊塗），最後因工作不力而被罰將大石推上山，但每次大石推上山頂後，又由另一邊碌落山，只有重新再推過。
2003至06年，美國超過2％甚至3％ GDP增長率來自樓價上升，係美國人將物業加按提款去消費所造成。依家冇咗呢方面刺激，美國GDP未來點樣增長？家吓唔係經濟係咪陷入衰退嘅問題，而係點樣令佢復甦？過去十二個月消費者只獲商業銀行貸款890億美元，其中650億美元係信用卡貸款。今年11月起美國商業銀行宣布減少信用卡貸款，因為壞賬率太高（今年第三季達4.1％，去年同期2.5％），未來美國消費者欲增加信用卡貸款去消費亦無能為力矣；加上過去十二個月股市蒸發12萬億美元市值，其中唔少係美國人嘅退休金，更何況美國富人中有75％係經營小企業，依家處境極之困難。今年第三季起美國經濟已陷入衰退，而復甦則遙遙無期。
奧巴馬上台後，只要唔延長美國減稅方案，明年12月31日止美國股息稅已自然上升20％、資本增值稅由15％上升到20％，上述兩點皆不利明年美股表現。唔少投資者趁2009年未來臨前，响2008年12月31日前減持，只有咁樣才可享受15％資本增值稅，此乃道指10月10日見7882點嘅背後理由。上周道指被過分拋售引發反彈，能否突破前高點即10月4日9794點？本周可留意。如升破9794點，11月短期可睇好。無論如何，2009年1月21日之後，美國再唔係投資者值得留戀嘅國家（英國亦一樣）。美股10月10日開始反彈，只因道指過分拋離200天線（11697點），如今向其靠攏而已。
利用滙控與恒指關係觀察熊市
恒生指數又點睇？家吓已拋離250天線（23395點）好多，亦可支持一次大反彈，例如接近或略破50天線（17756點），完成a、b、c反彈浪。另一方面，去年10月開始嘅下降通道今年9月失守（15500點）後出現大跌【圖】，至10月27日10676點係咪見底？我老曹木宰羊。上次熊市結束前，滙控（005）响2002年10月7日見78元後反彈上2002年12月2日92.5元，再回落到2003年4月1日79.5元，唔再創新低，才結束港股上一次熊市。同期恒指2002年10月10日見8772點，反彈至2002年10月3日10246點，再回落2003年4月25日見8331點新低，才結束呢個熊市（即滙控較恒指先一步見底）。利用滙控與恒指之間嘅關係，即假設上周滙控75元已見底，反彈到100元以下將遇阻力再回落，如明年4月滙控股價仍不低於75元，港股熊市才有機會結束。我老曹上述分析，應可回應大部分人嘅疑問：10月27日恒指10676點見底未呢？
沒有留言:
張貼留言