2008年11月12日 星期三

2008-11-11

波浪理論等同事後孔明

11月10日,周一。恒生指數升501.2,收14744.63,成交607.1億元。即月期指升537點,收14737點。滙控(005)為美國次按再撥備43億美元,但有足夠資本應付而唔使英國政府幫手。2003年滙控收購Household後,一度成為次按最大貸款戶,但因及早止蝕,所受影響喺可控制水平;今年股價只回落11%,係六十九間歐洲大銀行中表現第二出色銀行;理由係佢吸收存款能力強勁,而唔使好似皇家蘇格蘭銀行、HBO及萊斯銀行等,要出售370億英鎊股份畀英國政府去增加股本。今年第三季滙控業績已較去年同期更出色,第一級資本比率(Tier one)高達8.9%,超過國際標準8%水平。

內地又見政策市

中國鋁業(2600)宣布,把氧化鋁售價由每噸2900元人民幣下調至2600元人民幣,今天股價升19%;中鐵建(1186)升20.2%、建設銀行(939)升7.6%、安徽海螺(914)升31.4%及中石油(857)升8.2%。不過,聯想(992)跌13.5%,因摩根士丹利睇淡。

由去年10月30日恒指31958點回落到今年3月18日20572點,總共下跌11386點,反彈至今年5月5日26387點,上升5815點,升幅係前跌幅51%。呢次由今年5月5日回落到10月27日10676點,下跌15711點,如反彈前跌幅31.8%約5000點,上望15676點(最少升幅)。如反彈前跌幅50%,可見18531點。10月27日至今恒指已上升35%。
特區政府提供100億元(特別信貸保證計劃)為中小企信貸作出擔保,中小企可獲50萬元循環貸款,其中70%由政府擔保,信貸計劃12月推出,為期兩年;另一貸款計劃貸款額達1200萬元,由政府擔保50%。上述計劃周三交立法會審批,如通過,12月可實行以協助本港中小企解決資金周轉困難。


用波浪理論分析大市,今年3月18日20572點係浪1;5月5日26387點係浪2;10月27日10676點係浪3,依家行緊浪4,估計喺15767至18681點之間任何一點完成,然後再行浪5(即終極一跌。細波浪分析由今年7月24日23369點起計,到10月27日已完成1、2、3、4及5下跌浪,家吓喺a、b及c反彈浪)。我老曹1978年起學習波浪理論,到1997年前放棄,因發現波浪理論事後解釋幾好,但用佢推算未來,就錯漏百出。初期以為自己學藝未精,後來發現國際級波浪大師Prechter亦錯得離譜;咁樣我老曹只用作印證已發生嘅事,唔再用嚟預測未來。

七十及八十年代係我老曹最醉心走勢時刻。例如GANN(江恩理論)、ARIMA、TORGUE(扭力走勢)及Cycle Timing(循環理論)等都曾經研究過,甚至較偏門嘅走勢分析如Square Root of Sharpe及Stone's and Okham's Ratio亦有研究,但1997年後反璞歸真,重新相信基礎分析,另配合各種各類技術分析;最常用係Cycle Timing。基礎分析有如力與健,任何功夫如無氣力及健康身體,一切皆枉然。技術分析已集各派武功取其優,一如李小龍嘅截拳道,做到後發先致。旺市莫估頂、淡市莫估底,搵到頂或底後先攻擊。例如去年10月見頂後,11月先睇淡,因為太早睇淡及太早睇好都係死罪。請唔好再扮先知。

滬深三百指數今天升7.38%,收報1801.67,創下七周來最大升幅。三百間成分股中有四分一漲停,主力有鋼鐵廠、水泥廠及機械股,只有兩間下跌,屬典型政策市。政策市通常只會支持三幾天,小心大升後又再回落。

奧巴馬上台後,對美國經濟是禍是福?透過增加稅收去擴大政府開支,如果上述方法成功嘅話,又點解釋1990年到依家日本經濟嘅停滯期?分配財富同創造財富,自古兩難存:鼓勵創造財富必帶嚟社會兩極化;着重分配財富,經濟又往往停滯不前。奧巴馬亦跳唔出呢個框框。

英倫銀行上周四減息一厘半後,未來世界各大銀行嘅減息消息再不能引起太大刺激嘞。

日本政府上周五宣布,放寬本地銀行資本負債比率。根據國際會計標準,日本銀行必須把未兌現虧損60%由Tier one核心資本中扣除。如果係咁,可引發日本另一次信貸收縮。上周日本政府批准銀行喺2012年3月前可以唔遵守國際會計標準入賬,以及毋須把虧損按市值入賬,令周一日經平均指數上升。

能源股未來最傷

本周有二十一隻標普五百成分股公布今年第三季業績,其中兩隻係道指成分股,擔心業績公布令投資者失望。根據Thomson路透統計,今年第三季標普五百企業純利上周五估計數字係負增長13.9%(對上一周係負11.7%);金融業負107%(上周係負94%)。至11月7日止已有四百二十二間企業公布業績,59%較預期高、10%同預期近接及30%較預期低。對第四季純利展望估計可上升24.7%(7月1日時估計可上升59.1%)。較對上周前估計升28.8%又降低。第四季P/E為十一倍(前四季平均P/E十三點三倍)。標普五百指數中,有四百二十二間公司已公布第三季業績,純利平均減少14%,係連續第五季減少;呢個情況只喺2001至02年曾出現。業績仲未包括雷曼兄弟破產所帶嚟嘅衝擊,因為公布時已接近9月底,衝擊大部分喺10月份才出現。分析員估計,今年第四季純利只上升25%(之前估計上升47%)及明年第一季只上升6%(一個月前估計上升25%)。明年純利上升13%嘅機會相信好微(如衰退出現)。根據MKM Partners分析員Michael Darda統計,喺衰退期分析員純利前景估計通常高估30%至35%。參照過去情況,Darda估計,明年標普五百純利應該回落13%,而唔係上升13%。Ablin Harris Private Bank分析員相信,大部分分析員仍假設明年經濟會出現V形反彈,但佢相信隨住油價回落,明年企業純利進一步下跌嘅機會好大。今年最傷嘅行業係金融服務業,未來應係能源股。大部分投資者希望透過政府強力干預去阻止經濟進一步下滑,能否成功呢?以三十、七十及八十年代熊市P/E見底時都係單位數去睇,依家明年P/E估計仍高達十三倍;加上企業邊際利潤2006年第三季見頂,但家吓正在收窄。P/E十三倍唔算貴,亦唔見得便宜。

惠譽估計,明年第一世界GDP收縮0.8%,係第二次世界大戰後最嚴峻一次收縮期,引發金屬及石油需求增長率及價格下降;而且流向新興市場嘅資金亦大減。近日聯儲局、英倫銀行、歐洲央行及IMF倡導減息,希望減少短期流動性收緊壓力。雖然係咁,但面對嘅衰退,相信係1980年至今最嚴峻一次。嗰D愈依賴外資流入嘅新興市場所受影響較大,對外資依賴度唔高者所受嘅影響較少;其次係對商品依賴度細嘅新興市場所受影響應唔及對商品出口依賴度高嘅國家。甚至中國亦無可避免受影響。惠譽估計,明年中國GDP增長率只有7.2%,係近十年內最低,但已係全球最高GDP增長率國家。中國政府宣布,推出4萬億元人民幣刺激經濟方案,相等於去年中國GDP 16%或2006年中央及本地政府全部開支。項目包括房產、農業、基建、醫療、社會福利及向資本開支上升嘅公司退稅,以維持明年GDP增長率有8%,以壯本周六中國參加G20會議時嘅聲威;呢個方案較美國政府年初推出1680億美元刺激經濟方案大三倍,何況1680億美元只佔美國GDP 1%,而中國呢個方案卻相等於中國GDP 16%。甚至較日本550億美元方案大十一倍。中國政府呢次真係財大氣粗。摩根士丹利認為,如冇刺激經濟方案,明年中國GDP增長率可能回落到只有5%至6%,將引發好多問題,有咗刺激方案可令明年GDP增長率保持喺8%至9%之間,同時可確立中國喺美國及歐盟之外嘅另一股勢力。1998年面對亞洲金融風暴,中國政府亦大力增加投資對抗境外需求減少,家吓面對相同問題,中國照辦煮碗。有人建議中國政府取消(或降低)增值稅,可令企業開支每年減少1200億元人民幣一年,大大刺激內需。

中國經濟學家常修澤表示,擴大內需有兩個方向:一個係消費性內需;一個係投資內需。前者較後者難度要大,因為城鄉老百姓收入唔大幅提高,點樣增加消費?去年佔六億人口嘅農民年收入只有4000多元人民幣,點樣增加內需?至於投資內需主要嚟自政府及企業,4萬億元人民幣刺激經濟方案主要係基建設施、環保及創新型投資,對消費性內需唔一定有利。

中國擴大內需有難度

中國內需市場好細,消費只佔GDP 36%(美國超過70%),投資反佔42%;投資主要係服務出口需求。點樣擴大只佔GDP 36%消費性內需去抵銷出口方面嘅增長率萎縮?去年大量資金湧入中國,炒人民幣升值,刺激A股及樓價暴升,今年無論A股及樓價皆暴跌。去年雙盈餘(貿易及資金淨流入盈餘),造成流動性泛濫,央行曾大量發債及提升存款保證金率兼加息,仍無法全部吸收過剩資金,而引發資產價格膨脹。今年外貿盈餘減少,流入資金亦大減;加上美元至今年6月前貶值,令中國外滙儲備相對冇咁值錢。全球流動性進入退潮期,未因各國刺激方案推出而改變方向。

日本政府好擔心通縮重臨;如唔包括新鮮食品,估計未來一年核心通脹率已降至零,而唔係先前估計1.6%。美林證券日本分析員Takuji Okubo估計係負0.4%。通縮令日本自1999至2005年經濟不前,由於日本利率已接近零,無法再利用減息對付通縮,而近日日本滙價一升再升,擔心2003至08年上半年嘅經濟增長期又告一段落。大和證券分析員Teizo Taya擔心類似情況將喺美國出現;日本經濟陷入通縮背後理由係日本工資甚至喺企業獲利上升期無增長,以便同中國及其他鄰近國家競爭;呢個情況令日本人消費欲下降,企業為咗刺激營業額上升,只有推出低價產品去競爭市場,引發通縮。

全球GDP齊萎縮

全球經濟正步入衰退期,最大理由係銀行Tier one資本在萎縮中。喺金融危機發生前,全球金融機構Tier one資本約5萬億美元,其中美國同歐洲佔3.3萬億美元,去支持一個43萬億美元嘅借貸市場。今年如全部投資按市價入賬(mark to market),全球金融市場Tier one資本將減少85%,引發去槓桿化。雖然大金融機構不斷向外集資甚至政府向銀行注資,仍無法填補過去一年金融機構Tier one資本虧損。金融危機前,美國同歐洲金融機構借貸比率係Tier one十三倍,家吓已超過二十六倍,即金融危機前槓桿比率早已偏高;加上世界經濟進入每增加4至5元信貸,才可刺激GDP增長1元;換言之,世界必須每年增加10%至15%信貸,才可令GDP增長2%到3%。唔好話信貸收縮,甚至信貸無增長,世界GDP已面對萎縮期。响金融危機中,已知虧損1.7萬億美元,已入賬7000億美元,即未來仍有9000億到1萬億美元虧損要入賬(今年唔少政府批准銀行可不按市值入賬)。各金融機構透過集資及政府注資,依家Tier one資本大約23萬億美元,即年底槓桿比率仍超過十八倍,大大超過國際結算銀行公會要求(十二倍)或以下,即借貸市場仍要萎縮37%先合格(已假設金融機構喺未來唔再虧損)。第一世界國家至今仍無法擺脫信貸收縮,咁嗰D新興國家能否背道而馳(Decouple)呢?去年10月Decouple論好流行,我老曹去年已指出,一旦衰退,新興市場所受影響較第一世界有過之而無不及(因為當有錢人唔食鮑翅時,窮人往往冇飯食)。今天第一世界响去槓桿化之時,自然減少資金流向新興國家,甚至將資金由新興國家抽回;加上第一世界國家家庭及企業負財富效應亦大大影響新興工業國產品出口,家吓已波及原材料及能源生產國。

沒有留言:

張貼留言