2008-11-24

強力反彈就在眼前

11月23日，周日。上次恒生指數响1998年8月13日6544點見底反彈，本港經濟則要到2003年4月才見底；呢次會否歷史重演？雖然恒生指數有機會响2008年10月27日10676點見底反彈，但本港經濟未來幾年可能繼續衰落去。須知股市可discount，現水平係咪已discount未來兩年極之惡劣嘅前景，抑或只係一次技術反彈？我老曹木宰羊，只知上周五叫大家唔好睇得太淡係一個good call。

對沖基金拋售或停止

上周五標普五百VIX達 66％。响1929至32年，每逢VIX達68％都可以出現一次大反彈（1987年10月股災後亦只有64％）；上周四美股VIX更高見80.9％！博反彈乃資深投資者嘅遊戲，散戶不宜，情況有如10月27日嗰次，必須快買快賣，並非做中長線嘅時刻。上周五道指最低見7449點，極之接近2002年10月低點7197點，然後才反彈。2002年10月10日開始道指進入牛市，呢次又如何？標普五百由去年10月至上周五已回落52％，出現一次大反彈好正常，因利率已由4.25厘降至依家1厘，估計响12月15至16日再降至半厘。點解利率咁低D人仲唔肯借錢？因為過去一年人們發現Debt同Pain都由四個英文字組成；負債嘅結果係痛苦！

今天Commercial-mortgage Securities 3A級亦有15厘息，垃圾債券平均有20厘息。响咁情況下，信貸市場早已陷入癱瘓；甚至美國地方政府發嘅Muni（市場約5000億美元），亦需要10厘息或以上先至有人買，有D已被降為AA，部分更只有A評級，只有聯邦政府所發嘅債券才有人信，形成債券市場兩極化。咁亦係聯儲局不斷向銀行系統注資而信貸市場仍然收縮嘅理由。

銀行唔敢借錢出街，因為唔知道自己揸住嘅CDS或CDO到底值幾多錢，令聯儲局搏命減息亦冇用。

點解我老曹上周五突然睇好？各位請睇附圖：2007年10月11日道指由14198點跌至2008年11月21日7449點，跌幅47.53％，已十分接近美股响1973年1月11日至74年石油危機嘅跌幅及2000年3月9日至2002年10月科網股泡沫爆破嘅跌幅【圖】。1929年道指下跌49.9％後，亦大幅反彈40％後才再回落，有得博也。

上周五道指出現高低腳，恒指亦出現高低腳（即10月27日10676與11月21日11814點），滬深指數更升穿下降軌，都支持一次強力反彈在眼前。經10月份拋售後，散戶拋售力量响11月已減弱，11月份嘅拋售來自對沖基金，因擔心投資者贖回（估計今年有七百多隻對沖基金結業），呢類拋售隨時可停止。

上周五道指由低點反彈6％，理由係奧巴馬委任新財長（市場已唔再信保爾森）。以花旗為例，Tier one ratio達10.4％，代表財政健全，但單係市場謠言已可將其股價推冧50％，可見市場對銀行信心幾差。投資者今時今日以安全第一先行。

次按危機下，商業地產貸款開始纏擾銀行，成為住宅危機後第二隻下跌嘅鞋；未來銀行業前景較1974年更惡劣！

為恢復信心，美國政府宣布為總額14000億美元嘅銀行債務提供擔保！同時放寬私人投資者收購倒閉銀行嘅措施，希望藉此為銀行間拆借解凍。FDIC亦為無利息嘅交易戶口內所有存款提供擔保，截至明年年底止，情況有如香港及新加坡政府希望重新恢復銀行間嘅拆放。

里士滿聯儲銀行總裁拉克上周五响馬里蘭州嘅Tech會議上話，經濟喺2009年某些日子可改變方向。

巴郡1965年起由畢非德管理後，漸漸成為萬人景仰嘅投資公司，但上周評級卻由3A降為3B。今年9月30日前巴郡售出17.3億美元合約，賭2019至2027年標普五百指數及其他三大指數唔會低於今年9月，到期時巴郡可贏48.5億美元，不然便損失370.4億美元，但10月份賬面虧損已達90億美元。除上述外，9月止巴郡亦持有107.8億美元不履行合約垃圾債券（Junk bond defaults），而2007年年底只有46.6億美元；穆廸估計垃圾債券不履行合約率將由今年10月嘅2.8％升至2009年年底嘅10.4％。巴郡有投資嘅美國運通、可口可樂、Conoco Phillips、P & G、富國銀行等股價皆下跌，睇嚟近期畢非德都幾傷。九十年代科網股一役畢非德完全錯過晒，造成呢次急不及待，犯咗太早入市嘅毛病。去年10月金融從業員乃天之驕子，今天卻變成過街老鼠。巴郡股價响八個交易天內下跌30％，上周四見74100美元，較去年12月11日嘅151650美元回落51％，不過上周五已重返90000美元。世事多變幻又一例子。

恒指P/E進入熊三水平

後市展望：一、短期因太多人睇淡引發反彈，情況一如10月27日。二、恒指P/E已進入熊三水平（八倍以下，雖然最低可見六倍）。三、股市走喺經濟之前三至九個月，當經濟出現最惡劣日子前，股市早已見底。四、預測非我老曹專長，而且一向反對做預測，因為預測唔係可靠指標，如你睇啱便賺錢，睇錯便輸錢。因此，現階段仍然只宜動用全部資金30％做買賣，因為只係牙骹戰。

如果今天你已跌落水，可以做嘅事有：A、放棄掙扎而浸死，從此out咗。B、努力保持自己喺水面等人救（當然未必等得到，但較放棄好）。C、學習某君咁，向有燈光嘅地方滑浪（surf），最終响香港上岸。Timing從來唔容易，你事前有冇想過油價升上147美元後又跌穿50美元？請唔好往自己面上貼金。人人都只能做事後孔明。

1966年1月18日道指首次升穿1000點後，結束由1932年開始嘅超級大牛市，歷時共三十三年。喺往後跌市中，道指最低係1974年12月初見577.6，而真正牛市要到1982年8月，道指才响776.92起步；調整市前後共十六年（呢段日子金價由每盎斯35美元升到1980年1月850美元，喺1982年8月再次跌穿300美元）。如以金錢購買力計，美股並非由1966年1000點回落到1982年8月776點，下跌22.8％，因1982年美元購買力只及1966年十分之一，所以實際上美股跌幅十分大。1982年8月道指由776.92上升到2007年10月11日14196點，歷時整整二十五年，雖唔及1932至66年嗰段日子長，但未來熊市日子應唔會短。1966年1月18日至1974年12月初，道指下跌42.24％之後反彈。如上述有參考價值，2007年10月11日下跌至2008年11月21日7449點，跌幅47.59％，相信已差唔多，未來走勢可能一如1974年12月至82年11月21日，即整整八年就在577點之上、1000點之下牛皮。未來美股有機會從2008年11月20日起喺7506點至14196點之間牛皮幾年，但真正牛市可能响數年後才出現。一如上一次牛市要到1982年8月才開始一樣，但道指卻喺1974年12月初見最低點。

恒生指數由1967年67點升至2007年10月30日31958點，無論時間及升幅皆超過美股由1932至66年1月（美元响呢段日子並冇失去購買力，如將1967至2007年港元購買力貶值嘅因素計算在內，兩者升幅其實差唔多）。由2007年10月30日31958點回落到08年10月27日10676點，跌幅66.59％，幅度遠遠超過1966至74年12月美股跌幅（當時美元購買力貶值速度十分大）。淡市莫估底乃我老曹所教，呢次各位亦唔好估底（從來冇人摸底成功），不過到咗現水平，唔好因市場氣氛太淡而令自己睇法一面倒。請記住，每片烏雲都有銀色嘅邊。至於真正底部响邊度？讓市場自己告訴你！依家只須保持樂觀心態便可。

保持微笑度過困難日子

喺困難時期保持樂觀，响歡樂日子保持冷靜，此乃我老曹1974年後學番嚟嘅性格。希望大家喺黑暗中Staying Afloat，情況有如响大海中遇難、喺救生艇中受苦之時，不妨幻想一吓自己正在度假。上述做法的確幾阿Q，但到咗今天如不作如是想，又可以點？請改變一切可改變嘅事，並接受一切無可改變嘅事實，並希望上天賜給自己呢方面智慧，知道乜嘢可改變、乜嘢不可改變。今時今日最好少睇電視財經台甚至少睇經濟報紙，改睇肥皂電視劇及八卦周刊，務求得啖笑，因保持微笑乃求度過困難日子嘅最佳策略。

呢次信貸周期衰退（credit cycle recession），情況有D似日本1990年代出現嘅資產負債表衰退（balance sheet recession），唔排除大市反彈完成後再跌。1929年9月美股市值相等於當年GDP 200％，到四十年代只係GDP 40％；1966年美股市值係GDP 115％，1982年又重返GDP 40％；2007年10月美股市值係GDP 170％，家吓係59％。從呢點睇，美股長遠仍未見底。

至於港股，大循環為期九至十一年，1997年港股見頂後，2007年再見頂；1998年恒生指數响8月13日6544點見底，呢次恒生指數會否喺10月27日10676點見底？上次香港經濟要到2003年第二季才見底，呢次係咪亦係五年後？恒生指數响1998年8月至2003年4月炒上炒落，真正牛市到2003年4月才開始。呢次恒指由2008年11月開始，會否亦進入另一段非牛非熊市，而經濟則繼續衰退落去？

如果你擁有國際視野，明白次按危機炸彈已喺去年10月爆咗，過去一年各國政府所做嘅事只係努力阻止（或減少）呢個金融炸彈威力擴散到實質經濟，依家可能只係午夜，遠遠未到黎明。無論投資者或政府均已相當疲倦，企業開始大裁員，為未來世界經濟進入低增長做好準備。資金由OECD國家流向新興工業國，情況一如1966年起資金由美國流向香港等地區一樣，呢次資金由美國、歐洲、日本齊齊流向中國、印度、巴西同俄羅斯。

外國金融股未來表現最差

未來表現最差嘅估計係外國金融股（例如花旗銀行等），一如2000年起表現最差係科網股，唔排除金融股喺未來日子繼續有新低價出現。例如高盛已跌破1999年上市招股價；花旗一星期內股價下跌50％；兩房宣布由11月29日起到1月9日止唔接管斷供物業。

作為政府，應該bailout出事銀行，因為銀行營運一直受銀監監管，政府有責任；何況萬一銀行出事，可累及無辜存款戶而引發社會恐慌。但政府應唔應該bailout銀行以外任何行業包括汽車工業？社會有可能因此一塌糊塗！

GM嘅失敗：一、生產不及時宜嘅汽車（耗油量大）。二、生產成本太高，美國汽車工人每小時薪金35美元，同樣工作喺上海汽車廠每小時只賺1.5美元。GM依家每月要消耗20億美元，政府注資100億美元，只能延長公司五個月壽命，理由係GM員工每小時工資70美元，CEO年薪2400萬美元。各位仲記得英國利蘭（Leyland）嗎？或者MG及Jaguar等牌子汽車？七十年代英國政府曾動用165億美元去挽救它，三十年後今天Leyland點樣？答案係早已破產；165億美元只令該公司延遲破產十年，最終英國車廠仍要退出國際市場。