2008年11月22日 星期六

2008-11-22

通縮下生存三招

11月21日,周五。恒生指數升360.64,收12659.2,成交504.44億元。11月期指升319點,收12516點。中國人行同財政部宣布,計劃把500億元人民幣嘅中央國庫資金存入各商業銀行,令銀行得到更多資金。香港金管局表示,香港銀行內地分支機構亦可從人行獲得流動資金。呢個消息令滙控(005)升1.9%,收77.05元、中銀香港(2388)升7.8%,收8.29元,以及建行(939)升6.1%,收3.81元。資金將喺11月26日存入六個月定期,至明年5月26日止,大大增加咗內地銀行流動資金。

A股可能見底

  滬深三百指數雖然回落0.61%,收1920.73;因已從11月4日起回升,並升穿長期下降軌;加上RSI背馳【圖】。即滬深A股有機會喺11月4日見底!

  10月28日至11月10日恒生指數反彈32%,然後又回落前升幅三分二,今天最低見11814.81,係咪第二個底?事後先知道。無可置疑係中國正受到環球性經濟衰退影響,但同樣無可置疑嘅係中國經濟將會第一個站起來!因為中國政府有嘅係錢。4萬億元人民幣刺激計劃喺未來兩年可創造五千萬個新職位,令中國GDP額外增加4%(出口方面令GDP增長率減少幾多?便木宰羊)。明年中國政府保八未必成功,但GDP可保持7%增長則好肯定;明年係投資界進軍中國市場嘅日子(至於係邊一季仲未清楚)。

  我老曹冇水晶球亦冇black magic,有嘅只係小心觀察同細心分析技巧。林治曾說過:「Charts are great for predicting the past.」(走勢用嚟預測過去最準);股聖畢非德亦講過:「When I turned the charts upside down and didn't get a different answer.」(我把圖表倒轉嚟睇,結果都係一樣)。過去分析股票,分技術分析同基礎分析兩派;兩派一度勢成水火且互相指摘。近年演變出嚟嘅係我老曹常用方法,即集兩者之優,例如先找出:一、趨勢(Trends)。利用基礎分析再配合技術分析,找出股市大方向;二、策略(即我老曹所講嘅論戰)。把投資市場看成一場戰爭,點樣攻城略地、幾時進攻及撤退,依照戰略進行,以點樣打贏呢場仗為目的(甚至可以喺小戰役中小敗);三、便是最近新書所講論性。由人性角度去評估未來,簡單D講係市場心理學,找出買入點及退出點。結合三點即係論勢、論戰與論性;可以講係改革後嘅走勢同基礎分析法。既係走勢亦非走勢;既係基礎分析又非基礎分析。一如李小龍嘅截拳道,既係詠春又非詠春;既係西洋拳又非西洋拳。透過兩者相結合而自成一派。

美股拋售潮未完

  明年開始,我老曹步入半退休期;最近一年把我老曹四十年所學,集結成三本書──即《論勢》、《論戰》與《論性》;極有可能係我老曹告別傳媒行業之作(日後可能仍再寫書,但唔會再同投資有關)。12月將推出精裝本(一式三書),並作為農家女學校籌款之用,希望一直支持我老曹嘅讀者到時多多捧場,作為珍藏之用。天下無不散之筵席,我老曹自1968年加入股票市場,明年退出後,一共四十年。江山代有人才出、各領風騷數十年;明年開始從事自己心中嚮往嘅其他事,唔再為五斗米而折腰。

  伊朗上周六宣布把外滙儲備轉為黃金。估計伊朗外滙儲備800億美元,相信今年7月份起,逐步把它轉為黃金。呢個係近期油價回落及金價保持強勢嘅理由。

  金價由3月17日1032.7美元回落到10月24日682.41美元,如非伊朗吸納,相信家吓金價早已見估計中水平(630至650美元)。伊朗吸納會唔會改變金價短期走勢?一時之間好難答。

  散戶10月份淨購入互惠基金800億美元(9月淨拋售1630億美元),但股票基金仲有淨流出640億美元(9月份230億美元);固定收入基金淨流出 410億美元;Money Market基金淨流入1850億美元(9月淨流出1410億美元)。從呢D情況睇,10月份美股仲有人大量拋售,但債券及短期存款票據基金已見資金流入。

  展望美國樓市係No Gain, More Pain。明年下半年見底後,相信亦冇反彈。未來投資策略係點樣喺通縮環境下生存甚至搵食?一、首先唔好負債。因為喺通縮環境中借錢可以冇命;二、唔好追逐急升項目;三、投資策略宜保守,最多動用全部資金30%,目的係Keep your feet wet!以便日後落水。

每隻熊嘅性格唔同

  日本公布10月份出現貿赤,係七年內首次。因出口亞洲地區轉弱尤其係中國,係三年半以嚟首次。10月貿赤達639億日圓(6.595億美元),出口減少 7.7%,係2001年12月下跌14.5%以嚟最大跌幅(出口美國下跌19%,係連續第十四個月回落;美日貿易盈餘減少28%,至5192億日圓;出口亞洲減少4%)。入口上升7.4%,日本經濟已確認進入衰退(連續兩季GDP負增長)。

  台灣第三季GDP收縮1.02%,係七年內首次。台灣經濟過分依賴出口,尤其係電子產品如晶片、手提電腦及手機,已連續兩個月出口下降。大選後至今過咗六個月,股市回落40%。台灣未來經濟情況亦幾令人擔心。

  國際結算銀行公會周四公布,進一步收緊銀行條例,以防止過去金融市場動盪事件重演。對未來全球金融業不利。

  花旗銀行三天之內冇咗三分一市值。以市價計已淪為美國第五大銀行;U.S. Bancorp成為美國第四大。本月花旗冇咗53%市值,最低見6.4美元,係十三年半內低位。美國政府透過TARP計劃向花旗注資250億美元,可能需要進一步增加。

  10月份美國CPI較上月跌1%,係1947年開始計算CPI以嚟首次出現單月咁大跌幅,主因油價回落及其他原材料價格回落。今年年初投資者仲擔心緊通脹,今年11月卻開始擔心通縮。

  周四美國國會並未批准三大汽車集團Bailout,引致道指創下呢次熊市新低,但日經平均指數同恒生指數並冇跟從,出現絕地反彈。證明每一隻熊都有本身性格,美國熊不但同日本熊唔同,亦與香港熊唔同(香港嗰隻可能係人人鍾意嘅大熊貓)。熊與熊之間既有相同性格,亦有本身嘅特性,例如美國樓市2006年第三季起回落;英國樓市去年8月起回落;香港樓市今年5月起回落。最終美國國會係咪批准三大汽車集團Bailout?要留到12月2日決定。美國汽車業三十年前已走下坡,1979年佳士拿因國會10億美元貸款而生存落去(1973年美國每二十輛汽車中,只有一輛係入口,1980年每五輛汽車中已有一輛係入口)。佳士拿喺1980年盈利8億美元及清還政府欠款,因此唔少人認為美國汽車工業仍有作為;家吓佳士拿只有七萬個員工(1977年十六萬五千個)。 1973年石油危機後,日本同歐洲車廠鑽研慳油汽車,而美國冇理會;理由係日本同德國政府向汽油抽重稅。以1999年原油價格最便宜時期計,一加侖汽油响美國賣1.26美元、响日本賣3.26美元及响德國賣3.62美元。今天美國每加侖汽油稅46美仙及歐洲8美元;如美國汽油稅加至每加侖3美元,美國政府一年稅收可增加5萬億美元,對美國三大汽車廠可能係致命打擊。只好怪底特律由1973年石油危機開始至今,整整三十五年仍生產耗油量大嘅SUV而唔係慳油汽車。如美國政府每加侖汽油抽3美元,不但大大改善美國政府財赤,同時可令全球石油供應過剩;油價每桶低於40美元及可逼三大汽車集團申請破產保護令,而停止生產耗油量大嘅汽車,改為生產慳油汽車,有一天可同日本及歐洲車廠一爭長短。美國三大汽車集團過去已害全人類用咗三十多年貴油,畀佢地申請破產保護令罷啦(又唔係死人冧樓,只係叫你去戒毒啫)。單單呢個消息已令油價低於50美元。佳士拿1979年獲國會貸款10億美元時,公司CEO艾科卡宣布年薪1美元。不過,福特CEO穆拉利去年收入超過2200萬美元;通用汽車公司CEO瓦戈納去年已減薪一半,年薪達1570萬美元;佳士拿CEO納爾代利雖然去年年薪係1美元,但其他福利(包括私人飛機)仍然極好。

政府救市拖長危機

  美國政府四大智庫之一——華盛頓加圖研究所副所長湯姆.帕爾默博士認為,金融危機源自克仔上台後,為咗令美國中下階層也能買得起房子,將首期由20%降至15%、10%及5%,最後係零首期,最終釀成危機,呢次次按危機出現唔係自由經濟失效,反而係政府干預結果。

  危機因政府干預而起,亦因政府救市而延長。

  1919年美國曾發生一場金融危機,因政府冇採取任何措施,市場自己响兩年內完成調整後再次上升。

  1929年美國同樣發生金融危機,由胡佛總統興建大水霸到羅斯福總統下令銀行放假及限制美國人持金。令呢個危機到1938年第二次世界大戰開始,資金由歐洲流向美國才結束,總共長達九年;日本1990年至家吓長達十九年。

  奧巴馬上台如保護美國汽車產業及實行貿易保護政策,不但唔會解決到問題,反而係延長危機。不過,佢嘅經濟顧問哈佛大學經濟學教授薩默斯等人,都反對貿易保護主義,相信奧巴馬上台後唔會實行貿易保護政策。

沒有留言:

張貼留言