2008-11-29

學習上落市中搵食

11月28日，周五。恒生指數升336.18，收13888.24；成交423.69億元。12月期指成13988點，升408點，高水，代表後市可進一步睇好。

花旗推介滬杭甬高速（576），估計今年每股獲利47.5仙，較去年減少2.4％，P/E六點八倍，目標價5元。

滬深三百指數跌2.17％，收1829.92。11月26日人行決定下調一年期人民幣存貸款基準利率1.08個百分點；12月5日起下調存款準備金率1個百分點，但滬深指數11月27日只微升，28日又下跌。到底上述公布係利好抑或利空？

截至家吓為止，人行已減息三次，一年期定存已下降1.62個百分點；相信中國經濟到明年下半年將再現曙光。估計明年一年期存款利率將降至1.44厘，不過2009年CPI可能係負0.1％，即實際利率仍高。

呢次減息令五年以上貸款利率降至6.12厘，對購房人嚟講最低貸款利率更可低至4.284厘，係十年內住房按揭貸款利率最低嘅水平。對首次購房者而言，月供減少412元；對持有二套房貸者而言，月供更下降722元，有助刺激購房需求。客觀因素正在改善中，但政府態度能否轉化為老百姓嘅置業欲？主要睇能否改變老百姓對房價進一步下降嘅預期，要大部分人都唔信樓價會再跌，情況才可扭轉。

股市方面，今年第四季上市公司業績仍下降，例如電力、鋼鐵、航空、化工、地產、紡織等，相信需要一段日子A股指數才能穩定下來。

1986年10月14日，紐約證券交易所董事長約翰．范爾森來中國訪問，鄧小平贈送咗一張面值50元嘅上海飛樂音響股份有限公司股票畀佢。呢次係中國最高領導人第一次向世界發出明確訊號：中國要發展股份制度！有咗股票，麻煩同時出現，例如到邊度交易？要唔要設立證券交易所？有咗證券交易所後，中國仲算唔算社會主義？就算決定發展證券交易所，中國卻冇證券法……。响一片爭論中，深圳股票交易所已暗中成立，1990年5月25日到6月27日，深圳市五隻上市股票都漲瘋了：深圳發展升100％、萬科升380％、原野漲210％、金田漲210％、安達漲380％。全世界記者都來了，外國記者問深交所首任負責人王健，家吓有冇公司法、證券法、會計法，以及過戶處响邊？問到王健口啞啞。响咁嘅情況下不得不請示中央。1990年11月，當年大舊江坐飛機到深圳傾咗兩個多小時，最後決定股票市場還是要保留下去。有咗呢句話，深圳證券交易所1990年12月1日正式開業；為保險起見，開業典禮訂喺1991年7月3日。反而上海證券交易所卻老實不客氣响1990年12月19日正式開業，爬咗深圳頭。

雖然交易所已開業，但爭論仍然不休。1992年春天鄧小平南巡講話中指出：「證券、股市這東西究竟好不好？有沒有危機？是不是只有資本主義才可以有、社會主義能不能用？都要堅決地試。看對了，繼續搞下去；看錯了就糾正，糾正不了關了就是。怕什麼？」有咗鄧小平呢段講話，交易所便放心搞落去。

1992年8月7日，由中國人行深圳分行、深圳市工商局、公安局、監察局聯合發布《1992年新股認購抽籤發售公布》，新股上市以公開抽籤決定。8月9日及10日兩天，新股申請表發出五百萬張，每張100元，結果全國各地人民都嚟深圳排隊攞抽籤表。8月10日，攞唔到申請表者開始示威、遊行，焚毀公安人員值勤巡邏車。最後中央喺1992年10月20日由五部分組成國務院證券委員會，由上海朱出任第一屆主任，由財政部借出200萬元租咗一間辦公室，中國證監會宣布成立，由劉鴻儒出任第一屆主席。1993年第一部證券法出台，同年12月29日《中國公司法》頒布，到此中國證券交易才有咗雛形。1995年年底，國務院領導去到上交所，留下八字題目：「法制、監管、自律、規範」。到1999年6月2日，國務院發布《期貨交易管理暫行條例》，期貨第一部法規產生了。

未來經濟呈U形反彈

中國股票市場由最初「暗中操作」到「堅決地試」，到依家監管，已走過十八年。家吓面對嘅國有股減持而引發大熊市，未來日子如何？一如1992年第一屆證監會主席劉鴻儒講：股漲上頭有意見、股跌下面有意見；不漲不跌人人有意見，有時做人真難。目前情況只有繼續走着瞧。所謂「開弓沒有回頭箭」，只有往前看，是好是壞亦要走落去，依家面對全球金融海嘯，亦已無法回頭。

美國汽油價格由7月17日4.11美元跌到感恩節嘅1.9美元，四個月內回落54％。一般美國人每年行車一萬四千哩，以每加侖行二十里計，依家汽油價格即每年可節省1400美元。油價下跌，對美國人而言刺激大於今年5月同7月嘅退稅計劃；加上股市過去十二個月跌幅逾40％，令投資吸引力大增。一來一回條數點計？未來投資環境正在改善中，但一般人反而睇淡（去年11月卻睇好）。

統計數字證明，大部分散戶最喜歡高買低賣。我老曹1967年剛離開學校之時有5000元身家，一位親戚卻有100萬元。四十年後今天，我老曹相信自己手上嘅財富已超過嗰位親戚。最大分別係佢經常患上非理性亢奮及情緒低落症，當全世界人睇好時佢亢奮，當全世界人情緒低落時佢亦低落。我老曹嘅投資策略則經常反其道而行，例如去年11月睇淡時畀人鬧，今年11月叫人「唔好睇得太淡」一樣畀人鬧，理由係我老曹並冇加入「Groupthink」俱樂部；遠離群眾，做個寂寞嘅分析員。

我老曹估計，未來經濟係U形反彈而非V形；因此只認為恒指10676點已有得守，愈多人鬧，愈證明我老曹睇法正確。

2007年10月至今嘅投資市況，係我老曹一生中少見財富消失速度咁快。雖然我老曹已採用三七分，即只用30％資金投資，仍可以喺十二個月內水瓜打狗，其他投資者傷成點可以想像，即使今天面對股票超便宜亦失去胃口。今時今日，值得強調嘅再唔係點樣保護你嘅財產，而係點樣响上落市中搵食。

學習反向思維、學習財務分析。我老曹從來唔信「畫畫吓」就可以發達；我老曹唔否定走勢分析嘅用途，但切勿將走勢講到天下無敵。世界上冇一個有錢佬係靠睇走勢發達嘅（賣走勢分析搵錢者就大把）。一如投機同投資，一般人以為揸長線就係投資、短線就係投機，觀念上完全錯誤。揸長線可以係投機（例如去年10月到今年10月），揸短線亦可以係投資（如方向正確）。投機係指喺投資之前唔做功課；如事前做足功課，响十拿九穩情況下才出擊就係投資。唔做功課，無論揸長線或短線都係投機；反之，去年11月拋空亦可以係投資，理由係拋空前已做足功課，才決定做一隻醒目嘅熊。我老曹最憎讀者問攞冧巴（自己唔做功課，如果咁都可以賺到錢真係天冇眼，蝕本則係應該。股票市場85％係輸家，咁唔小心謹慎嘅投資者又點會係贏家？）。一般人喜歡聽「誤導分析」，例如蝕本就長揸、遲早升番，而唔喜歡聽真實說話──例如止蝕唔止賺。另一句誤導係「明天會更好」！1974年7月我老曹入市後，等咗一百八十天才發現「明天將更差」！任何虧損一旦達15％便立即止蝕，No question asked！從前沙田有塊石叫望夫石，她的丈夫出海捕魚可能浸死咗，但她天天仍上山望夫歸，最後變成石頭丈夫仍不歸。作為愛情故事係好動人，作為投資者則好戇居。

英國消費信心跌至三十年內新低，11月份英國樓價出現連續十三個月回落，估計12月4日英鎊將減息至2.25厘。

奧巴馬的決定左右全球氣候

OPEC周末開會討論減產，今天油價再跌1.2％，成53.79美元。油價已到咗十字路口，如美國人願意放棄揸SUV呢類食油量大嘅汽車，改用食油量細嘅日本車或歐洲車，未來油價將喺50美元一桶或以下，同時廢氣排放量減少有助環保。美國三大車廠申請破產保護，日後改為生產慳油私家車，放棄生產食油大怪物，脫胎換骨，一樣可賺大錢。如奧巴馬為咗政治理由而作出經濟不正確嘅決定，只有令全人類繼續捱貴油。

明年11月响哥本哈根召開嘅第十五屆全球環保會議，認為全人類如唔改變依家嘅消費習慣，到2012年地球將走上不歸路。全球氣溫可上升攝氏六度，引發全球氣候大災難。奧巴馬如真正關心環保，請唔好支持美國三大車廠生產怪物，以免2030年發生地球氣候大災難。今天低二氧化碳排放汽車响技術上已發展完善，美國人因為汽油太便宜，才繼續浪費汽油及污染大氣層，一如三大汽車巨頭仍然坐私人飛機返工一樣咁浪費。

政治家係講一套做一套嘅人，領袖亦係講一套做另外一套者。分別係政治家無論佢講乜嘢，但總係做錯；反之，領袖甚至講錯咗仍然做對。例如羅斯福同列根係領袖，而尼克遜及殊仔卻係政治家。至於奧巴馬係政治家抑或領袖？唔在乎佢講乜嘢，而在乎佢上台後所做嘅事响事後證明係啱係錯而已。

全球最大商品基金BlackRock World Mining Fund認為，未來幾年商品價格仍然低沉，包括馬來西亞嘅錫到南非嘅白金、澳洲及巴西嘅鐵礦砂甚至煤（如美國汽車工業進入重組），BlackRock估計商品價格低迷最少維持三至五年。

Deleveraging嘅威力令原材料貿易失去信貸，只有大量拋售套現，造成過度供應及減產。估計未來經濟係Ｕ形，即股市已見底，但經濟繼續往下沉，而復甦可能係三幾年後嘅事。世界唔會出現大蕭條，但衰退難免。揀股遊戲今年11月又開始。

今年感恩節嘅禱告：感謝上帝，今天自己不但仍然健康，而且still solvent！不要叫我們受到試探，仍然相信揸現金，直到最惡劣日子已成過去。亦為政府代禱，希望他們明白派錢不能令經濟復甦，只有改善營商環境及提升市民教育水平，才是達致經濟繁榮之本。月有圓缺，天有陰晴，經濟有繁榮有衰退，願做官的明白──大氣候與小氣候不因你們派不派錢而改變，浪費納稅人嘅血汗錢去提升自己民望係罪。願上天憐憫他們，因為他們不知道自己在做什麼！阿門。

切勿點燃心中火柴

1982年開始嘅信貸擴張期到2007年10月結束，前後共二十五年，未來調整期有幾長？一年？你信唔信？雖然股票跌市香港可能喺10月完成、美股喺11月完成，但未來牛皮市相信十分漫長。漫漫長夜做乜好？

今年5月「投資者日記」突然暫停刊出兩天，事因收到內地親戚通知，內地政府正在拆掉我老曹爺爺嘅房子。自1950年同母親離開中國後，我老曹曾返回上海多次，但寧波則一次都未返過去。2008年5月係我老曹首次返鄉下，眼見祖屋已被政府拆咗一半，與政府官員交涉（因已冇屋契），才得知祖屋原來佔地六百五十平方米（都幾大）。我老曹離開祖屋五十多年，對其已冇乜印象，唯一記得係自己三歲嗰年，唔知同爺爺爭拗乜嘢而被母親關入柴房（祖屋係燒草及柴煮飯）。我老曹（當年係小曹也）唔知從邊度弄來一根火柴，為咗同爺爺鬥氣，居然想放火燒屋；幸母親及時發覺，將火救熄，並將我打至半死。如非母親及時制止，我老曹可能喺1950年已將爺爺建成嘅祖屋一把火燒掉。

其實每個人內心深處都有一根火柴（或叫心魔）而不自知。七十年代我老曹打工嗰間投資公司，當年生意已做得很大，但老闆唔知為乜嘢，忽然跑去美國遊埠而唔理公司死活，剛好遇上1973年3月股災，結果公司嘅投資一敗塗地。過去幾十年，亦眼見唔少朋友曾擁有幸福家庭，但丈夫忽然狂賭或結識另一異性，搞到翻天覆地。去年唔少上市公司高層忽然玩起Accumulator，累到今年公司損失慘重。人好多時就係咁非理性、頑固不冥、思想狹隘。當年我老曹仲細，為咗同爺爺鬥氣（今天已忘記鬥乜嘢氣），居然想一把火燒掉佢辛苦建成嘅房子。今天我老曹時常提點自己──千萬不要燃着心中嗰根火柴（心魔），因為佢可以毀掉你一生所有。千萬不要因一時衝動而做出一生悔恨嘅事。