2008-11-25

奧巴馬難做聖誕老人

11月24日，周一。恒生指數跌201.26，收12457.94；成交350.15億元。11月期指跌31點，收12485點，高水，即係代表後市仍睇好。渣打集團（2888）停牌前跌6.4％，因公司透過配股集資18億英鎊。信置（083）跌7％、新世界（017）跌5.7％及富士康（2038）跌4.4％。

滬深三百指數跌4.33％，收1837.64。中國航空跌9.7％，收3.91元人民幣；東方航空跌8.88％，收4元人民幣；南方航空跌8.74％，收3.34元人民幣。

阿拉伯人不停買金

花旗推介白馬媒體（100），估計今年每股獲利44仙，較去年上升65.4％，P/E五倍，目標價3.2元。

Thomson路透喺11月24日調查所得，今年第三季標普五百指數純利估計跌幅18.5％（4月1日估計上升17.3％、7月1日估計上升12.6％及10月1日估計下跌4.3％），家吓只有5％公司仍未公布第三季業績；第四季純利估計上升16.6％（7月1日估計上升59.3％、10月1日仍估計上升46.7％及上周估計上升20.6％）。10月份美國PPI及CPI表現，令人重新擔心通縮出現，至於12月15及16日再減息半厘，可唔可以阻止通縮出現？

證券市場係現實同預期嘅博弈；去年11月只係港股直通車未能放行，已令恒指大跌，嗰時世界經濟仍一片繁榮；因預期心理响證券市場先行。今天美國次按危機影響尚未完全喺經濟上顯現，點解股市跌幅會咁大？亦係因為投資者已預期今後兩年嘅情況將好差；現價股市唔係反映今年11月係點，而係反映明年4月至5月係點。

上周四標普五百指數VIX上升到80.86％，係1990年有呢個指數以嚟最高；雖然上周五美股反彈，但全星期標普五百指數仍跌7％；反之，金價卻上升57美元或7％，重返800美元。嚟自World Gold Council數字，杜拜第三季黃金零售較去年同期升56％；海灣地區中，沙地阿拉伯升51％，埃及升33％，成個阿拉伯國家人民都吸納黃金。你又點睇？

據外國媒體報道，美國政府同意向花旗集團注資200億美元，購買優先股；另為佢3060億美元貸款同證券提供擔保，以增加投資者對花旗嘅信心。花旗向FDIC發行嘅優先股係作為貸款擔保費用。未來三年如冇政府批准，花旗普通股股息每股不得超過1美仙，管理層薪金及福利亦需FDIC批准，因上周花旗股價下跌60％。

上周美國又有三間銀行破產，分別係Downey Savings & Loan Association、PFF Bank & Trust of Pomona（兩者均喺加州）及Community Bank of Loganville。存款由FDIC保證，並由US Bancorp購入加州兩間銀行所有存款；Bank of Essex購入Community Bank所有存款。今年至今共二十二間銀行破產，最大係華互涉及3070億美元；Downey亦有一百七十五間分行，存款達127.8億美元，第三季虧損8110萬美元及連續五季虧損，係破產銀行中第三大。

支票銀碼最好任填

聖誕就快到，今年除咗寫信畀聖誕老人要求禮物外，唔少人都期望奧巴馬扮聖誕老人，例如bailout三大車廠。自次按炸彈爆炸後，美國經濟實在太傷，傷到連7000億美元挽救方案睇嚟都太細，最好有張空白嘅支票，銀碼可以任填（例如7萬億美元）。因一個53萬億美元CDO（包括CDS）市場爆炸了，嗰底响邊？貝南奇承認自己低估咗次按危機所帶嚟嘅影響，以為可以Contained佢。原文將喺12月1日出版嘅紐約客雜誌發表；佢終於明白房屋問題同金融系統關係相當複雜，以及好難作預測。

日本1990年至今仍經歷Balance Sheet Recession。香港受惠於中國，1997年第三季開始嘅Meltdown喺2003年第二季停止。2006年美國開始嘅樓按Meltdown至今未見停止，更加擴散到其他國家。英國至今已有五萬間問題住宅被接管，政府動用2500萬億英鎊bailout各金融機構，國債已達5000億英鎊，私人負債1.8萬億英鎊。英國經濟已進入衰退。

美國由馬里布至曼哈頓嗰D購買500萬美元以上嘅豪宅客，似乎突然間全部失蹤。豪宅售價由去年至今已回落20％，相信到2010年才見底，售價應可再跌10%至15％。例如响紐約Park Avenue Brooks Astor十六樓、共十四個房間豪宅，今年夏季仍賣4600萬美元，家吓只需3400萬美元。不但紐約係咁，其他好似邁阿密、南加州、拉斯維加斯及鳳凰城嘅豪宅售價都大跌，未來將有七萬多個金融從業員响2010年第二季前失業，未失業者嘅花紅收入亦減少50％以上，形成豪宅變為買家市場，有D美國豪宅售價較2006年高峰已回落咗一半。

香港情況亦一樣，呢次跌幅集中喺豪宅身上；反之，普通住宅樓價跌幅只係將去年10月至今年3月嘅非理性升幅抹走。中原城市指數截至11月16日止，與2月17日比較回落22％，但豪宅冇人問津，跌幅已達29％。因過去十二個月，本港有錢人好傷，形成大量豪宅重新回流市場；愈豪嘅樓跌幅愈大。

貝南奇自去年9月開始減息，更係四年內第一次；去年好多人以為一減息就冇事，令去年9月同10月美股仍上升。去年8月聯儲局開始向銀行注資，甚至向摩通收購貝爾斯登時包底，以及向AIG提供金融補給線，但情況至今仍未改善，反而係惡化。今年9月雷曼兄弟破產消息更引發金融海嘯，10月8日聯儲局同全球央行一齊減息（包括中國人行及日本銀行），係歷史上第一次，但股市仍再下跌。10月29日聯儲局再減息半厘及發出訊號，12月16日再減息半厘。

金融海嘯已橫渡太平洋並响中國登陸。估計珠三角一帶超過一萬間工廠喺農曆新年前結業，憤怒嘅工人已上街要求收回工資；政府為咗唔畀事情搞大，已墊支部分工資。中國出口工業佔GDP 40％，如一萬間工廠關門，中央提出4萬億元人民幣救市計劃未必能保八成功（明年GDP升8％）。情況好似進一步惡化，明年再有二萬間工廠關門，佔珠三角一帶工廠總數50％；惠州嘅失業率已達20％。

內地唔少城市樓價已大幅回落，有人估計，內地銀行呆壞賬已好多，有幾多响今年12月結時入賬，則木宰羊。內地零售行業正面臨嚴冬，估計今年第四季及明年第一季將係零售業低迷期。百貨業及購物中心所面對嘅壓力較超市大；高檔商品壓力亦較中低檔商品大。睇落都幾煩。

業內人士表示，農產品第二輪救市方案快出台，並包括向內地大豆加工企業提供補貼，令中糧集團及九三油脂受惠。一、東北大豆主產區將增加收購一百五十萬噸、玉米五百萬噸及水稻七百五十萬噸，借此穩定大豆及玉米等種植面積，保護農民積極性；二、除一百五十萬噸大豆外，仍在商榷嘅有一百萬噸；新增大豆收購價每斤1.85元人民幣；嗰一百五十萬噸中，黑龍江佔一百萬噸、內蒙古佔二十三萬噸、吉林佔二十一萬噸及遼寧佔六萬噸，另外計劃向大豆加工企業提供補貼，令加工成為豆油及豆粕後唔會蝕本而略有微利。

十七屆三中全會開會期間，山東省棗莊市山亭區徐莊鎮土地合作社，以一千七百二十三畝土地承包權向當地農村信用社成功抵押貸款45萬元人民幣。隨後中央財經領導小組辦公室副主任、中央農村工作領導小組辦公室主任陳錫文明確表示，把土地承包權、住宅基地及農民房產作抵押係唔現實嘅。喺中國社會主義下，應避免農民失地、失業及失住房嘅情況發生。其後十七屆三中全會決定，農民所有土地承包權及住宅基地使用權都係農地使用權，用作抵押貸款响法律上係唔允許；農民只能作小額貸款，最高30萬元人民幣。一如城市居民第一套房不能被銀行收回，因此農地及住宅基地不能被信用社或金融機構收回。喺咁嘅條件下，銀行對農地抵押貸款冇興趣，因農地係集體所有，土地承包權只能向信用社作小額貸款抵押而不能收回，以免農民失地。換言之，呢D貸款只能喺內部進行，而不能由金融機構提供，因唔准收回土地，以防止道德風險及土地由農民手裏流失。

銅價隨時見1美元

銅價由今年5月每磅4.27美元回落到11月期銅以1.571美元結算，12月期銅見1.579美元，跌幅都幾大。倫敦存銅上升至二十八萬三千一百二十五噸（7月3日係十二萬二千五百噸），明年上半年全球經濟如果仲係衰退嘅話，估計期銅明年上半年可見1.33美元（呢個係1988年1月銅價），最悲觀估計可見1.15美元。1993、1997及2001年銅價見底時，只係生產成本75％。如參考以往情況，唔排除銅價可見1美元。

John J. Hamre係Center for Strategic & International Studies主席，佢擔心資產價格貶值情況同九十年代日本近似；日本至今已完成十八年衰退，而政府財赤更係OECD國家中最高。美國財赤2008／09年已達1萬億美元，奧巴馬上台後亦嘆巧婦難為無米炊；因為殊仔上台後，過去八年政府一再增加開支及減稅，令明年1月20日奧巴馬上台後，能夠動用嘅資源已極之有限。蜜月期過後，股市恐怕又再出現另一次惡性拋售。

《論性》一書已有八千本出街，第五版將喺本周二供應市場。部分讀者認為賣得好貴，我老曹都知道。因各位每買一本書，其中10元係我老曹版稅，用作資助農家女技術訓練學校之用。協助農家女兒到城市謀生前，提供基本訓練，我老曹一毫子都冇落袋。

活着就會發達

喺《論性》一書中提及「寧作瓦存、不作玉碎」；活着係唯一真理。點解今時今日我老曹仍可在此也文也武？因為1974年死唔去。點解1978年鄧小平可提出改革開放政策？因為喺1966至77年嘅文革中佢死唔去；喺財富五百中，唔少美國富有家族能夠今時今日富有，理由係佢地喺1929年華爾街危機中、兩次世界大戰中及1974年石油危機中死唔去。長遠嚟講，只要你活着，財富日積月累後，你就可以發達（複利作怪）；任何時刻都係安全第一，唔好豪情壯語；活着係唯一真理。今天全球所有恐龍已唔存在，反而「小強」一直生存至今；地球上有一天可能冇晒人類，但仍然有「小強」，因為佢地最懂得活着係唯一真理。

今天我地必須重申貧窮係咩？六十年代香港所謂貧窮係每天工作十小時都賺唔夠錢養妻活兒（當年我老曹屋企一家四口，每天買餸錢係五毫子）。今天所謂貧窮，係指不能帶家人去泰國遊埠、女兒冇錢學彈琴或者阿仔買唔起個人電腦，但每天買餸錢係50元。

香港咩叫低薪？係指月入5000元或以下；响內地，唔少農民每年收入唔足3000元人民幣。今天香港窮人屋企內有雪櫃，而內地窮人係食唔飽、仔女冇學返及病咗冇錢睇醫生。

幫助窮人改善生活唔係政府責任。今年香港窮人嘅生活條件响1968年前被視為有錢人。政府唔可以為咗增加本身民望而濫用資源；God help those who help themself。作為窮人應加倍努力，政府可以向佢地提供援助，但千祈唔好養懶人。政府應為社會提供安全網，而唔係吊床（畀人偷懶）。至於最低工資立法，根本上幫唔到窮人，反而害死佢地。