2008-11-21

切勿睇得太淡

11月20日，周四。10月27日恒指由10676.29開始反彈，係咪已於11月5日15317點結束？至今仍未肯定。今天恒指再跌517.24，收12298.56；成交446.17億元。恒指已回落前升幅61.8％，如周五止跌回升，大市仍有機會見底。11月期指跌438點，收12197點，代表周五反彈機會極大。

樓市料明年下半年見底回升

受全球金融海嘯衝擊，香港地產股响今年跌幅超過45％，部分跌幅更超過75％；資產淨值折讓也超過50％（即未來本港樓價甚至再下跌30％，地產股現水平一樣有得守）。我老曹認為，香港中小型住宅（豪宅除外）抗跌力應較以往強，理由係：一、依家供樓利息便宜；二、新樓宇供應有限，估計跌市將喺明年第二季完成，明年下半年出現止跌回升機會極大；三、本港上市地產開發商過去幾年都冇加大收購土地嘅力度，手上可開發嘅土地儲備有限，冇一間需要賤價賣樓。2008年唔同1997年，當年香港炒樓風氣甚盛（中產階級一般揸住三個單位，一個自住、一個出租、一個用來炒）；2008年中產階級除自住外，擁有另一個單位作出租者已唔多。最近嘅炒風由去年10月開始，今年5月結束，前後只有八個月，以此計算，樓價低潮如非今年12月就係明年2、3月（如恒指喺10月27日見底，樓價低潮就喺12月；如恒指明年第二季見底，樓價低潮亦將喺明年第二季）。

去年11月我老曹曾警告——勿睇得太好，今年11月我老曹再警告──勿睇得太淡。一般所謂專家，家吓十個之中已有九個睇淡，一如去年10月通街都係股神。今天連美國正牌股神畢非德亦被人down-grade！

今天日經平均指數下跌6.9％、南韓Kospi指數跌6.7％、台股跌4.5％、新加坡跌3.4％。滬深三百指數跌1.06％，見1932.43。

美國10月份CPI較9月份跌1％，甚至核心通脹亦回落0.1％（雖然仍較去年同期上升3.1％）。美國經濟又再面對通縮威脅，令道指下跌3％。五年前美國面對通縮威脅，被格蛇同貝南奇聯手擊退（上次策略係2003年年中將利率降至1厘），依家又面對相同問題。貝南奇相信，美國陷入通縮嘅機會唔大。

東京柏克萊資本公司分析員Kyohei Morita認為，日本正步入通縮期，估計2009年7月開始。由於日本銀行無法再減息以對抗，只能眼白白睇住通縮明年降臨。

英國第二大地產投資基金British Land佔倫敦金絲雀碼頭11％權益。估計上述項目截至今年9月30日止只值1.12億英鎊，較上季下跌40％，主要受雷曼兄弟公司破產事件影響。

仲有三十五天就係聖誕節。上周公布嘅美國10月份零售跌2.8％（其中汽車減少5.5％、零售減少2.2％，汽油扣除價格下跌亦減少1.5％），係連續第四個月下跌。上述情況只有响1974年才出現過，唔通呢次係1973至74年翻版（去年10月消費信貸升500億美元，今年10月消費信貸升5億美元，即借錢消費已較一年前減少90％）？

2005年透過物業再按揭用作消費嘅資金6950億美元，佔美國當年GDP 3％；2007年已下降至4700億美元，佔GDP 2％；2008年第一季係487億美元，第二季95億美元，第三季又點？失去每年來自物業再按揭嘅資金支持，美國消費市場會點？11月16日嘅調查報告顯示，今年聖誕節計劃增加消費嘅人佔10％（去年25％），減少消費嘅人佔59％（去年32％）。

美汽車業唔值得救

格拉咸教出本世紀最成功嘅投資者畢非德，令價值投資法揚名四海，例如P/E、市價與賬面值關係、派息率（Price／Dividend Ratio）等等。到咗今年，價值投資法信徒卻一再撞板。從前畢非德先生代表成功嘅投資者，但今年佢嘅投資表現又的確幾令人失望，尤其係9月份佢接受《紐約時報》訪問時話相信係買入嘅時候，9月25日佢用咗50億美元投資高盛，家吓賬面損失47％；10月1日投資30億美元响通用電氣，賬面損失37％；仲有9月30日前買入八千三百萬股Conoco Phillips，依家跌幅亦超過30％。

通用汽車主席1953年1月响國會上發言：「What’s good for the country is good for General Motors.」作為1941至53年通用汽車主席，佢曾為美軍提供大量機動設施，並响1953年獲總統邀請出任國防部長，正是「得勢一條龍」。同樣係通用汽車嘅CEO，今天卻要到國會乞求bailout，不然通用汽車便要走上破產命運。面對高油價威脅（雖然7月份起油價已由147美元回落到53美元），你仲有興趣買食油量大嘅SUV咩？面對金融海嘯，三大汽車廠能否繼續蝕本賣汽車，然後喺分期付款中賺取利息差？純經濟角度睇，美國汽車業係唔值得救（至於政治理由則不在討論範圍）。通用汽車CEO瓦戈納本周仍坐價值3600萬美元嘅私人飛機去華盛頓國會（私人飛機每飛一次耗油2萬美元，如改坐航空公司經濟位只需288美元，坐頭等亦只需837美元）。福特CEO穆拉利架私人飛機便宜D，只值2800萬美元，佢住喺西雅圖而非底特律，因此每周五晚上坐私人飛機返屋企，然後周一早上又飛回底特律返工！佳士拿CEO納爾代利亦擁有私人飛機，呢次亦係坐私人飛機到華盛頓國會……。三大汽車公司嘅高級職員亦可享用公司飛機；例如福特汽車便有八架公司飛機供高級職員享用（包括接家人去度假），情況有如AIG（有公司機隊，唔係一架而係一整隊！當政府向AIG注資850億美元，AIG高級職員仍坐私人飛機去度假）。

信貸泡沫爆破後，須調整嘅何止美國同英國樓價，好多項目都需要下調，例如高級餐廳消費及奢侈品。eBay計算所得，响美國家庭內可搵到總值3200美元其實並唔需要嘅物件（例如買入後只用過一次甚至從未用過嘅，可以放上網拍賣）！相信香港情況更甚，本港女士平均每人擁有超過十個手袋，只有其中兩三個經常用，其餘七、八個只用過一次或兩次……；男士們平均有十套西裝，亦只有其中兩三套會成日穿……。上述物件嘅作用只有一個目的，就係「炫燿性消費」（Conspicuous Consumption）。

經歷過1974年熊市打擊後，我老曹同妻子有一個協議：就係每月生活開支不得超過每月薪金收入。大部分人日常生活所需其實唔多，但欲望則無窮。三十三年過去，我老曹一直嚴守呢個規定，即家庭開支只可來自薪金收入，投資回報則留作「不時之需」，因為呢方面收入來源太唔穩定。上述規定限制咗我老曹嘅個人欲望，而令家庭一直過住好簡單嘅生活──既無華衣美服，亦無豪華房車，甚至出國旅行亦好少。有時諗番：有幾多人將生活所需與個人欲望混淆不清？例如美食唔一定係鵝肝、魚子醬，好多時餐蛋公仔麵亦好美味，尤其係肚餓之時。有朋友曾請飲過價值數萬元一枝紅酒，老實講，我老曹唔識貴在哪裏?!亦坐過朋友過百萬元嘅保持捷跑車，但我老曹仲係喜歡坐的士，因為夠方便。生平最怕上朋友嘅遊艇，因我老曹唔愛水上運動，上咗船都唔知做乜好。

金融從業員面對供應過剩

2008年快將過去，今年真係令人難忘。美國五大投資銀行：雷曼破產，貝爾斯登、美林被收購，大摩與高盛改為商業銀行。未來次按危機風暴過後，金融市場將同以前唔一樣。政府新加入嘅監管條件將陸續出台，過去大量利用槓桿恐怕難再出現，部分有問題嘅金融工程（financial engineering）亦唔會再應用。保險公司如非被重組就係被整固，未來金融行業再唔係利潤特別豐厚嘅行業。大量對沖基金消失，亦令金融從業員面對供應過剩（一如2000年科網股泡沫爆破後電腦軟件人才嘅命運一樣）。

至於房地產失去金融業槓桿化支持，又冇金融工程協助，會否再出現由1994至2007年式上升？唔排除重返九十年代以前嘅模式。

美國銀行CEO劉易斯周二响底特律經濟學會上話，美國經濟肯定進入衰退，最早復甦2009年年中。過去美國樓市好景喺建基於政府補貼及極低利率，未來上述情況唔會再出現。

歡迎各位進入Great Unwind時段！過去一年全球股市減值30萬億美元，相等於美國兩年GDP，未計美國房價減少5萬億美元，仲有公司債券大減值。1987年起格蛇透過寬鬆信貸製造多個泡沫，當信貸泡沫爆破後，此法已唔可行（今年9月24日聯儲局資產10萬億美元，11月14日已上升到20萬億美元，不足兩個月增加10萬億美元信貸，仍無法支撑起股市）。好多人認為信貸咁快速增加，一定會出現通脹，但今時今日卻出現通縮，因為聯儲局創造信貸嘅能力唔及信貸市場萎縮速度。物業、汽車、消費市場銷售額均大跌。

資本主義制度一如民主政制，並唔完美，但卻係人類最有效運用資源嘅方法。資本主義制度令人有選擇工作嘅自由、响乜嘢地方做工嘅自由，以及何價買入何產品嘅自由（唔少人因此响高價接貨），亦讓有才能嘅人可以才能交換金錢。最近由於過分自由而變成狂野繼而闖禍，並非資本主義制度有問題，而係政府對金融市場缺乏監管造成泡沫。

泡沫爆破後調整期有長有短，只要社會仍尊重資本主義制度，最終有一天我地會再次由衰退走向繁榮，只係呢一次較以往幾次都長。