2008-11-13

中國應擴大消費而非基建

11月12日，周三。恒生指數跌101.81，收13939.09，成交472.4億元。即月期指跌208點，收13762點，低水，後市繼續睇淡。

Tontine Associate LLC宣布，由於旗下兩大對沖基金Tontine Capital Partners下跌77％，以及Tontine Partners下跌77％，所以把兩者清盤；主因係商品價格大跌。公司仍繼續營運二十五個基金，涉及資金70億美元。基金公會估計，今年約有七百個基金需清盤，較去年上升27％。

G20會議隨時變口水會

英鎊兌美元至今跌22％及兌歐羅跌11％；周二見1.5388美元（去年11月見2.116美元）。上一次相同跌幅，令英國响1992年擺脫衰退，但呢次卻不行，主因係貿易夥伴如歐盟及美國一樣陷入經濟衰退。睇嚟要到2010年英國經濟才能由呢次英鎊貶值中受惠。10月份英國製造業經理指數出現近七年嚟最大收縮（出口佔英國GDP 40％，製造業佔GDP 15％）；理由係英國必須同低生產成本嘅國家競爭市場，令電器產品出口大減，雖然藥品出口大增，但唔少英國產品早已喺英國以外地區生產，所以未因呢次英鎊滙價回落受惠；反之，CPI卻因英鎊貶值，令入口成本大升推高未來嘅通脹率。

殊仔邀請二十個國家阿頭出席11月15日峰會，代表全球GDP 90％及包括十個新興經濟國，但奧巴馬唔想喺殊仔任內出席呢個G20會議，令G20峰會大為失色；加上每個國家代表只有十五分鐘發言時間，恐怕變咗口水會。响1992年，代表民主黨嘅克仔擊敗對手老殊後，迅速通過《訊息高速公路法案》，引發互聯網經濟井噴。互聯網及IT產品業發展亦改變咗金融同投資業運作方式，例如網上銀行及網上投資等，大量新嘅金融工具被開發出嚟。到2000年，代表共和黨嘅殊仔上台後，對貨幣及財政政策採取寬鬆態度；2003年輪到金融及投資業出現井噴。衍生金融產品透過互聯網推廣成為高增長行業，但不幸地導致今年嘅金融海嘯。奧巴馬提出嘅改變，又將帶來乜嘢？高盛前投資銀行家塔伯特出咗本書《奧巴馬經濟學》；指出奧巴馬強調係公平，佢認為共和黨喺稅收政策上過分討好富人，咁樣雖然帶嚟2003至07年嘅金融空前繁榮，但同時引發出今年金融海嘯。因此佢主張管制金融利益集團而唔係扶持；至於點樣幫助因呢場金融海嘯而失去屋企嘅窮人？奧巴馬主張增加教育、公共衞生等開支及窮人福利，令佢地有能力去自力更新。其他如環境保護及能源方面嘅策略，似乎只停留喺批評，而未能提出可行嘅解決方案。

奧巴馬能否成功解決金融海嘯所帶嚟嘅影響？根據紐約大學教授魯賓尼喺11月11日嘅最新發言，佢持否定態度。佢擔心美國將經歷一次較1974／75年或1981／82年更嚴重嘅衰退，估計一直到明年年底，失業率升至9％及GDP下降4％。相信V形反彈唔會出現，U形（十八至二十四個月）已成最樂觀估計。出現日式L形衰退機會亦唔大，但2010年復甦，而GDP只上升1%至1.5％，最多係2.5%至2.75％。因奧巴馬所繼承嘅係五十年嚟最嚴重嘅一次衰退，財赤高達1萬億美元及去槓桿化高速進行，引發信貸壓碎。數以百萬計美國家庭將陷入負資產，甚至引發通縮。利率降至接近零，仍無法阻止金融資產下跌。歐洲、英國、加拿大、日本及澳紐受美國影響較大，中國GDP增長率明年將降至6％，已係全球中最好一個。估計所有第一世界國家明年CPI升幅少於1％。

恐難再成救經濟妙藥

中國10月份出口只上升19.2％（9月份21.5％；去年全年25.7％），入口上升15.6％（9月份21.3％；去年全年21.3％）。入口往往走在出口之前，即代表明年中國出口增長率進一步減弱，相信係最近政府提出4萬億元人民幣刺激方案背後嘅理由，希望增加內需（加快基建項目投資）去保持2009及2010年GDP 8％增長。剛結束嘅廣州秋交會，十七萬四千五百個買家只落315.5億美元訂單，較去年減少15％。利好消息係10月份CPI升幅只有4％（9月份4.6％，2月份8.7％），代表中國仍有減息空間。

10月份全國發電量按年下跌0.46％，係1999年以嚟首次衰退。今年1至9月全國發電量升9.9％及用電量升9.67％，一D高耗電量省份如廣東、山東及江蘇最先出現負增長，亦係近十年少見；9月發電量只升3.4％，10月更出現負增長；例如中法合資東風雪鐵龍公司宣布裁員一千名員工；奇瑞汽車、長安福特及江淮汽車等傳出裁員消息。沿海地區工廠倒閉，導致民工失業返鄉潮已唔係咩嘢新聞，而係每天發生嘅事。政府估計，加大鐵路投資可創造八十萬個職位，但相對製造業裁員潮只係杯水車薪。

過去三十年，基建項目投資年增長率平均20％，較GDP升幅大一倍，過去三十年新建超級公路三萬里，估計到2020年達五萬三千里（美國亦只有四萬七千里。美國接近所有成年人有車牌，中國只有十分一人有車牌，中國公路係咪已進入overbuild？有D窮省份超級公路因冇車行，農民用嚟曬榖物）。去年中國出口1萬億美元產品，佔全球總出口量9％，喺呢個水平下，未來中國出口增長率有幾多？呢次中國動用4萬億元人民幣投資微利房、水利、能源及機場，其中7000億元人民幣興建新鐵路。中國家吓已係世界第四大經濟實體，大量投資基建可令中國响硬件上漸漸追上美國、日本同歐洲。

明年1月1日生效嘅增值稅轉型改革：
一、企業新購進設備時唔再採用退稅方法，而一如原材料咁採用直接抵扣，並喺全國推行，取消地區及行業限制，以鼓勵新投資；
二、房屋建築物汽車遊艇等不動產不能抵扣。生財工具如新機器、機械及生產設備才可扣稅。上述不限進口或國產，一律採直接抵扣；
三、過去小規模納稅人按工業及商業分別適用6％及4％徵稅率，明年起一律改為3％，將大大減少中小企業稅務負擔；
四、增值稅由1994年訂為13％，明年提升到17％，令礦產品成為唯一面對加稅行業；金屬及非金屬礦產價值稅一律由13％恢復到17％，以保護資源。

自鄧小平1978年提出開放改革政策後，每次中國面對經濟增長放緩，政府就大力投資基建，其後經濟便復甦。投資基建似乎成為對抗經濟衰退嘅靈丹妙藥，往往藥到病除。呢次中國振興經濟方案，係咪另一次靈丹妙藥？如睇睇日本1990年至家吓亦大力投資基建項目，包括興建海底隧道至北海道或跨海大橋到海中心孤島，卻不能振興日本經濟。過去三十年中國一直處於基建不足嘅情況下，當道路建成及交通發達，自然帶動經濟向上。因此過去每遇經濟衰退，由國家帶動嘅投資基建項目，全國經濟好快又好起嚟；反之，日本基建已相當發達，1990年再投資基建變成浪費資源，例如係咪值得花幾千億美元興建通往北海道嘅海底隧道？或花幾十億美元興建跨海大橋通往海中心孤島？依家中國應擴大嘅唔係基建項目，而係消費。中國人消費只佔GDP 40％（美國80％、日本68％、台灣73.3％及香港90％），中國問題係儲蓄率太高，消費不足。由1990年起，中國人消費佔GDP比重不但冇上升，反而一直下降，呢個情況不但產生大量外貿盈餘，令人民幣升值打擊出口，同時造成流動性過剩，引致去年嘅股市大牛市最後變成大熊市。

真正問題係消費

消費、投資及儲蓄三方面都要均衡。開放改革三十年後嘅中國係咪應鼓勵投資而壓抑消費？咁樣做好易走上日本之路。中國人過分強調節儉係美德，响農業社會係正確，但响工業社會係唔正確。如人人節儉，產品便滯銷、工廠裁員及社會出現不景氣；反之，產品暢銷、工廠大量擴充及社會出現繁榮。

大摩嘅亞洲區總裁羅奇認為，美國人需要增加儲蓄，而中國人同日本人需要增加消費，才可挽救呢場金融海嘯。

內地專家建議提高個稅起徵點，可拉動消費性內需。「十一．五」規劃將個稅起點由800元調高到家吓嘅2000元。今天月入2000元點可以算係富人？應該大幅提高到5000元先合理。
中央財經大學稅務系黃樺教授表示，依家消費者購買一套房產證未滿五年出售要徵收5％營業稅，以及個人賣房所得淨收入要繳納20％個人所得稅，呢個係令內地二手房無法活躍嘅理由，未來應下調以刺激二手房交投，從而活化房地產買賣。

一個經濟繁榮期一般可維持三點四至三點七年，一個衰退期可維持十三點一個月至十八點五個月（只有喺大蕭條期才維持四十三個月），由去年10月起計至今，已有十三個月衰退期，有三分一機會恒生指數喺10月27日見底；最大機會恒生指數喺明年3月或4月見底，即共衰退十八點五個月。

令經濟再度繁榮嘅方法係投資回報超過利息回報，令工商界重新借錢投資，直到通脹率上升，令利率升至某一水平，工商界決定唔再借錢投資為止。點解去年9月至今減息，但股市去年10月反而回落？就係因為企業獲利率急跌，包括開支上升及消費者減少消費。所以話第一次減息係出貨訊號，最後一次減息先係入貨訊號（但邊次係最後一次？木宰羊）。

彭博訪問五十九位經濟學家後得出嘅結論係，佢地估計今年第四季GDP下降3％，明年第一季GDP下降1.5％，擔心呢次衰退係近七十年內最後一次，較1990年嗰次長，甚至較1981／82年嗰次長。

估計明年標普五百獲利不但唔會上升15％而係回落15％，令標普五百指數喺未來再下跌20％或更多（極限35％）。金融市場虧損將達1萬億至2萬億美元。不但次按受影響，連Prime Mortgages亦受影響，例如商業樓宇、信用卡、汽車貸款及學生貸款。換言之，今年11月起未來六個月，股市仍係下跌機會大過上升。商品價格再回落20％，金價可見650美元，美元响明年年初開始回落（由強轉弱），但未來半年Cash is King。

1929年9月道指381.17，要到1954年11月先升穿，共二十五年；1966年1月18日道指升穿1000點，要到1982年11月先再升穿，前後共十六年；去年10月開始回落嘅道指，到幾時先打和？

美國要重建信用

作為分析員最好對幾何（geometry）有D認識，以便了解嗰D圖案所象徵嘅意義，亦應該有D玄學根基，以便了解人類內在嘅小宇宙。唔少佛教寺內供奉嘅曼陀羅便是用得道高僧嘅舍利子造成。今天美國經濟核心就係信用（credit）；透過信貸可產生林林總總嘅金融產品，推動美國經濟向上；換言之，信用對美國經濟好似曼陀羅對佛教。今天全人類都質疑美國嘅credit，因而產生信貸危機，主因係過去CDO唔列入資產負債表內而唔受監管。理論上，要重建金融信心，首要項目就係令全人類對美國credit重新信任，而唔係由政府Bailout或向大銀行注資。因為credit先係整個西方金融制度嘅曼陀羅。

人無信不立，國無信不張。一個人冇咗信用必一事無成，一個國家冇咗信用，社會必亂七八糟。列根成功嘅地方便是响八十年代重建全球對美元信心。明年嘅奧巴馬能否重建全球對美國嘅credit？Mark to market會計制度係咪痛苦？答案係，但有助重建世人對美國企業嘅信心。從兩年債券與十年債券息差睇嚟，美國經濟前景繼續令人擔心。美國房地產市場第一隻鞋已掉落嚟，幾時第二隻鞋再跌埋落嚟。