小心奧巴馬震盪
11月5日，周三。恒生指數升455.82，收14840.16；成交633.7億元。11月期指升373點，收14773點，期指倒掛現象又出現。恒指由10月27日至今已上升35％，小心反彈市結束。由舊年10月從高往下望，好易感到股票便宜。但隨住企業收入減少，純利會否亦下降？如企業純利下降，股價又點能夠上升？如我地相信由1982年開始嘅超級大牛市响去年10月結束，我地便不大肯定股票現價算係便宜抑或昂貴，亦不能肯定10月份股市已見底，因為股市冇過去只有將來。
今天利豐（494）升8.8％、中海油（883）升5.8％、電盈（008）升27％、富士康（2038）升3.2％、中銀香港（2388）升17％、東亞（023）升10％，藍籌股普遍上升。
滬深三百指數上升3.91％，見1691.42，主要受外圍刺激造好。
股市同總統大選關係只有兩周
奧巴馬勝出嘅理由唔係政綱好，而係美國經濟實在太差，尤其係股市。呢點可由雷曼兄弟破產後奧巴馬民望急升證明，如大選喺2007年舉行，奧巴馬一定輸……。美國大選嘅結果，不但奧巴馬勝出，同時民主黨控制兩院，出現總統、兩院由一黨控制嘅局面，好易走向獨裁政治，令美國大左轉。小心「奧巴馬震盪」出現！各位信唔信奧巴馬上台後可改變美國樓價同企業純利方向？
情況有如今年4月馬英九上台時曾引起一連串樂觀情緒，六個月後台灣股市大跌。大氣候、小氣候不因人嘅主觀願望而改變。由1900年至今，過去百幾年歷史證明股市變化同總統大選嘅關係只有兩個星期，有D响大選前出現，有D喺大選後出現，一旦超過兩個星期，一切恢復原貌。過去二十七次選舉中，每次由共和黨轉為民主黨，股市喺兩個星期內平均升幅為零或-1％，小心美股開始回落！
財長保爾森計劃向GE旗下CIT集團提供Bailout，係首次向非銀行金融機構提供擔保，十分危險，因為呢類機構可能揸咗唔少有毒債券。CIT係美國最大商業貸款者，今年已失去四分三市值，並連續六季出現虧損，而須向畢非德求助。CIT過去嘅貸款對象係中小企，由於中小企近年出現巨大虧損，拖累CIT業績。另一間GE Capital（由Fairfield與GE合組而成，係美國最大商業票據發行機構），仲有GE Money Bank Inc.及GE Capital Financial Inc.，都係工業界最大貸款者，截至9月30日止貸出款項共335億美元（部分受美國FDIC保障）。財長決定如GE出事亦Bailout，你點睇？依家呢類機構壞賬率3％，估計明年可上升至8％。上兩次衰退高峰期壞賬率超過10％，呢次壞賬率會有幾高？
奧巴馬上台亦有一大優點，就係佢可以放手大幹，反正未來一、兩年衰嘢都可賴係上手總統留低，典型補鑊法（將原先冇咁爛嘅鑊嘅缺口進一步搞爛D才開始補）。奧巴馬可以喺2009及2010年將美國經濟搞到一塌糊塗，响2011年才開始搞好，都仍有條件連任。估計部分金融機構高層可能被控告，甚至要坐監以洩民憤。殊仔政權11月5日起變成跛腳鴨，一切已無能為力。咁搞落去，遲早動搖全球投資者對美元信心，引發美元拋售潮（令黃金進入牛市第三期），到時先至恐怖。
根據奧巴馬嘅計劃，美國六千三百萬（富人）或佔交稅人士44％，响未來十年將失去大部分稅務優惠，年收入75000元到150000美元家庭（兩口子計）失去500美元稅務優惠、子女大學稅務優惠4000美元、樓按利息10％稅務優惠、撥錢入IRA 1000美元優惠。即係話，每個打工仔（年收入37500美元以上）明年稅務優惠將由家吓嘅555美元一年降至175美元，有子女攻讀大學者稅務優惠由1110美元降至175美元（奧巴馬上台後唔再延長稅務優惠已經做得到）。至於5％富人（依家交美國60.14％入息稅者）將面對龐大稅務壓力，包括資本升值稅、股息稅升上25％。
大選後美國愈來愈多限制
奧巴馬獲勝，代表全球同情窮人者嘅勝利。1982年美國透過貨幣政策一再阻止衰退出現；到咗2008年，雖然透過大幅減息及退稅，亦無法阻止衰退降臨。奧巴馬勝出後計劃推出嘅政策，將阻止未來經濟繁榮來臨。2008年已出現少見現金存款跑贏各種投資，Cash is King時代係咪已開始？例如中國生產商正面臨汰弱留強，將有數百萬計工人失業。佢地會靜靜地返鄉下耕田，還是令各城市治安惡化？美國消費出現十七年來首次下跌而且愈跌愈急。我地相信市場失去效率，而寄望公務員（或官）去挽救資本主義？大選後嘅美國將愈來愈多限制，以保護本地勞工。保護貿易主義正在抬頭，中國成為首要攻擊對象，因為美國人既無錢購買中國貨，政府亦限制中國貨入口，可能因此將世界經濟推向大衰退！Tax the rich亦將令美國人減少投資，導致美國經濟進入萎縮期。
惠譽估計，過去五年全球GDP增長率平均3.5％嘅時刻結束，2009年減弱到只有1％。信貸收縮、消費緊縮、企業投資減少，尤其係美國、歐洲及日本，三大第一世界嘅國家股市崩潰。貧窮國家亦因商品價格回落而受影響，雖然各國央行大幅減息，但作用極之有限。
達拉斯聯儲銀行總裁費希爾認為，美國信貸情況咁緊，明年美國GDP將出現零增長，但唔會出現通縮。CPI出現短期負增長唔奇（例如幾個月），全年CPI應該仍係正增長；利率好快會跌至半厘。
澳元周二再減息0.75厘，至5.25厘；澳洲開始進入自1990年初衰退後嘅另一段衰退期。澳元兌67美仙，係1983年浮動以來接近最低價，相信澳元仍有下跌空間，唔會因日圓減息0.2厘而停止。
英國近年經濟繁榮有賴全球金融市場，但國際金融市場迅速惡化，英國（尤其倫敦）前景令人擔心。响倫敦嘅花旗銀行估計，明年英國GDP將收縮1％，依家英鎊仍有4.5厘，估計未來將大幅減息去壓低英鎊滙價刺激消費。10月24日英鎊已跌至1.53美元（年初2.1美元），未來可能減稅。總之英國前景都幾麻煩。
馬來西亞明年GDP增長率改為3.5％，係2001年以來最低（前估計5.4％），財赤佔GDP 4.8％（前估計3.6％），因油價同棕櫚油跌價。馬來西亞出口主力係電子產品及原材料，而兩者前景皆唔樂觀。
Libor三個月利率雖然降至2.71厘（10月10日4.82厘），因全球政府共動用3萬億美元注入銀行及金融體系，令Libor回落，但有85％美國銀行過去三個月仍在收緊信貸，為1991年以來最緊，即利率雖然下降但更難借到錢。Libor關係住全球銀行及金融機構拆放嘅資金，涉及交易額達360萬億美元，並唔受任何國家監管。雖然各國央行注資可令利率下降，卻不能令信貸放鬆；信貸收緊反映面對嘅風險正在上升。
10月13日《財富》雜誌話有55萬億美元CDS影響全球53萬億美元GDP，家吓呢55萬億美元CDS市場响度迅速收縮，所產生嘅虧損入2008及09年賬。短期全球經濟仍無法擺脫信貸收縮嘅影響。
JP摩根大通、UBS及皇家蘇格蘭銀行（全球三大銀行）估計，明年全球金融危機進一步惡化，最樂觀估計復甦要到2010年才出現。
凱恩斯理論有錯誤之處
好多人把三十年代開始嘅美國經濟復甦歸功於凱恩斯。七十年代芝加哥大學研究結果得出結論，美國三十年代開始嘅經濟復甦，與凱恩斯理論無關！凱恩斯响1936年General Theory一書中認為，價格下跌由投資情緒改變引發（例如股市及樓價），而令商界投資減少，引發失業率上升，帶來經濟衰退。不過，政府可透過增加貨幣改變人們對資產及房價未來回報嘅預期，而重新刺激資產價格上升，帶動商界投資回升，失業率因此下降，經濟恢復繁榮。凱恩斯假設消費需求推動經濟向上，帶來就業率上升，因此政府應鼓勵消費、刺激企業增產、帶動就業，達致經濟繁榮。
據芝加哥大學研究所得，呢招响封閉社會可能可行，但响開放社會只會帶來入口上升、貨幣貶值，最終令利率上升，反過來壓抑資產價格回落及實質工資下降。七十年代就係最明顯例子。
最近一年，貝南奇不斷增加貨幣供應，一樣無法阻止樓價及股市回落。凱恩斯响暮年同佢嘅朋友Friedrich Hayek講，佢計劃重整自己嘅理論，修正過去錯誤，並同意創意（innovation）先至係創造財富的根源。政府嘅介入只會限制創意及降低創意質素，帶來經濟衰退；因為個人一定較政府更了解自己嘅需要，企業一定較政府更會管理資源，小政府一定較管制多多嘅大政府好，市場經濟一定較管制經濟好。只係過分自由才會帶來狂野，社會需要嘅係有彈性、恰如其分嘅監管，讓創意發揮最大功能，而不致引發金融溶解。
金融創新價值不應否定
1987年10月股災後，香港社會上唔少人士提出關閉期交所，當年我老曹大力反對，理由係期指交易有其存在功能，我地唔應該因為期交所監管不力而關掉佢。今天回望，香港如果冇期交所協助，香港國際金融中心地位可以建立咩？估唔到今天，當衍生產品出事時，又聽到呢類保守而智慧有限者嘅聲音。金融海嘯嘅出現唔係衍生產品本身有問題，而係政府缺乏監管。這有如冇交通規則之下，任由汽車响馬路上橫衝直撞嘅道理一樣，如因此否定汽車嘅功能，係咪食古不化？銀行發展創新產品不但方向正確，而且應獲政府鼓勵及支持而非打壓，只係政府應制定有關法例去監管，而非愛理不理。
鐵娘子同列根相信佛利民嘅主張係啱嘅，佛利民亦反對不受監管嘅資本主義。甚至克仔、貝理雅上任後，亦繼續跟隨列根及鐵娘子嘅路線，同時令九十年代及二十一世紀嘅英國及美國經濟繼續繁榮。人類不能因飛機失事而廢除飛機，而應喺失事後搵出失事根源，改良飛機性能，令乘搭飛機變得更安全。同樣理由，衍生產品出問題後，應諗辦法改良而非全盤否定其價值。冇金融項目上嘅創新，何來1982年至今嘅經濟繁榮？
第二次世界大戰後，德國Ludwig Erhard提出，喺重建德國經濟嘅同時，亦要求企業對社會有更多責任，成為近年德國經濟繁榮嘅奠基者。不過，東、西德合併後，德國經濟增長進入放緩期，部分理由係西德企業須對東德負上社會責任，而令純利不前。德國2007年人均收入33800美元，仍未超過美國人均收入41640美元，反映要求企業承擔更多社會責任代價，可減慢企業賺錢嘅增長率。當企業負上社會責任，自然減少對利潤追求。Social Market Economy可否改良今天嘅資本主義？極富爭議性！
奧巴馬獲選後，再唔係克仔式走中間路線，即加入「有民主黨特色嘅列根主義」。1992年佛利民嘅主張仍係主流，但今天响金融海嘯下早已人心思變，自由放任主義（Laissez-faire）人人知道唔可行，但同時要小心過猶不及所帶嚟嘅惡果。奧巴馬上台，係咪噩夢嘅開始？
沒有留言:
張貼留言