2008年11月20日 星期四

2008-11-20

可以down唔可以out

11月19日,周三。恒生指數跌100.09,收12815.8;成交389.13億元。11月期指跌142點,收12631點,仲係低水。恒地(012)跌5.4%、利豐(494)跌5.1%、中海油(883)跌2.8%;中石油(857)升0.9%,見5.65元。

滬深三百指數升6.16%,收1953.16。中信證券升6.44%,成20.17元人民幣;萬科升5.69%,成6.5元人民幣;東方航空升9.91%,成4.66元。國壽升6.14%,收21.08元人民幣;平保升4.62%,成25.6元人民幣。中石油升7.49%,收11.91元人民幣,傳內地短期將推出燃油稅收改革,推動節能和減排。國家發改委能源研究所所長、中國能源問題研究官方機構代表韓文科响「世界能源展望」發布會上話,中國正着手研究刺激經濟措施,油價亦在關注之列。依家成品油價格係高油價時期制定,未來成品油肯定會降價,但係唔可能回到三、四年前嘅水平。韓文科拒絕透露成品油價格調整嘅時間表,只係話燃油稅好快開徵。

干預導致低息但銀根緊

10月27日恒指見10676點,相信90%投資者已完成拋售,踏入11月,拋售壓力已下降。至於美股,技術上睇,道指形成雙底兼出現RSI背馳;加上奧巴馬2009年1月20日宣誓就職,美國經濟有機會响明年年中見底,而股市走响經濟之前六至九個月。

各位並冇忘記2003年沙士事件吧?2003年第二季本港GDP出現負增長0.5%,就响呢個水平,香港經濟強力反彈!部分理由係2003年第三季開始推進自由行,但並唔係內地自由行本身帶起全港經濟(因旅遊業只佔全港GDP 8%,影響有限),而係自由行恢復咗港人嘅信心。上述情況會否喺2009年重演?

去年11月我老曹係全港最大淡友之一,因港股直通車死火。到今年11月,我老曹係全港少數好友之一,雖未肯定10月27日已見底,但相信同底距離已不遠!

今年8月起,聯儲局向金融實體大量注資,令隔夜錢利率低於1厘,因過剩盈餘由8月份嘅20億美元上升到家吓嘅3636億美元。係咪代表信貸寬鬆?咁又唔係喎。銀行唔敢拆入市場資金去借畀客戶,因好嘅客戶唔想借,壞嘅客戶銀行又唔肯借。由於聯儲局干預,結果出現低息但銀根緊嘅有趣局面。

花旗推介建行(939),估計今年每股獲利44.4分人民幣,升45.9%,P/E八點二倍,目標價4.75元,理由係美國銀行將增持,持股量由10.75%上升到19.1%。

朋友告訴我老曹,今年係1967年以來第一次買滙控(005)收息回報較存錢入滙豐做定期嘅回報更高。點解會出現上述現象?相信係因為滙豐過去純利持續增長,令股價長期看漲,因此買滙控收股息較定期存款嘅利率低。咁點解2008年起買滙控收息嘅回報率居然較响滙豐做一年定存高?相信係因為風險溢價上升,投資者擔心未來滙控股價唔再係向上,先至會出現咁嘅現象。

面對次按危機、金融海嘯,Don't Get Mad-Get Rich!1974年本港出現超級大熊市並冇將我老曹擊倒,1987年股災同樣冇將我老曹擊倒,1997年亞洲金融風暴亦一樣冇將我老曹擊倒,反而日後更富貴。面對風暴,投資者可以down唔可以out!今時今日90%投資者都有損傷,有人傷重D,有人傷輕D,此乃無法避免之事,但千萬不可out!一旦out,咁就一世。人生在世,最後一場戰爭才決定勝負,未打完最後一場仗,誰知輸贏?

買入長揸及分散投資俱滑鐵盧

傳統嘅Buy and Hold策略只喺牛市中有用。但香港最大一次超級牛市由1967年開始、1997年結束;美國超級大牛市1974年開始、2007年結束。即使採用分散投資法(Asset Allocation),將財產分配喺股票、債券、商品、貴金屬及房地產項目上,希望股票跌價時可能債券、商品及貴金屬升;金價跌時可能股票升。但2008年卻出現股票、債券、商品、貴金屬及房地產無一不跌。

買入後持有與分散投資,係大部分所謂投資專家用以教投資者嘅方法,响2008年皆遭遇滑鐵盧。我老曹主張「論勢、論戰與論性」,買股、買債、買貴金屬或房地產,一切都以「當場形勢」(market conditions)而作決定。2001年買金,今年3月大撤退;2003年第二季開始買港股,去年10月大撤退。1995、96、97年投資倫敦物業,2006、07、08年大撤退。今年7月起睇好日圓及美元。一切以趨勢為依據。投資有如上戰場打仗,必須攻守有據。我老曹《論性》新書更指出性格決定一切,點樣訓練自己嘅忍耐力、點樣响逆境中保持平常心、點樣嚴守止蝕唔止賺,點樣學習寧買當頭起、莫買當頭跌(《論性》一書已印畢第四版,第五版下周一應市)。

展望未來,我地正進入信用卡危機期。今年9月止美國未付消費負債高達9700億美元,上述金額相較次按細得多,卻可以令消費市場急速下滑,令衰退由金融市場進入實質經濟。呢次問題不在貝爾斯登、雷曼兄弟、美林、高盛及大摩等五大投資銀行,而係美國運通銀行呢類信用卡經營者。美國運通、Hartford Financial Services Group、Popular Inc.、Synovus Financial Corp等八十間金融機構向美國TARP計劃要求注資610億美元,單係美國運通已要求TARP注資35億美元,另CIT Group(美國最大獨立商營貸款者)亦要求轉為銀行,並向TARP申請注資25億美元,如果美國政府唔批准,擔心商店將拒收信用卡(因信用卡公司唔夠錢找數而要拖數)。

共和黨國會議員計劃拒絕bailout美國三大汽車股,並要求佢地申請破產保護令,理由係250億美元資金只能延長三大汽車公司生存多六個月至一年,最終仍須破產。反而喺破產保護令下,三大汽車公司可重組業務,包括削減員工福利及重新同零件供應商簽約。如此一來,全球唔少供應汽車零件畀美國三大汽車企業嘅公司將受害。

依家航運業吹淡風,小靈便型船日租由今年5月22日76567美元跌至11月13日5673美元,大靈便型船日租由今年5月20日91710美元急跌至最近7555美元。最慘係好望角型更由今年6月5日233988美元一天跌至最近嘅3966美元!

船租急跌,理由係鐵礦砂、小麥及煤炭需求因中國入口量減少而大跌,估計明年需求增長率只有2%(今年4.6%)。瑞銀甚至估計鐵礦砂海運量明年將跌4.1%(今年七百七十五百萬噸),因中國需求急降;煤需求跌2.4%(今年二百二十七百萬噸);至於小麥及五糧,美國農業部估計下降2.9%。不但如此,分析界更指出,2001至08年世界貿易量高增長期已過,2009年起進入低增長期,即乾貨輪需求大降唔係短期,而係中長期。

債王估美國先通縮後惡性通脹

澳洲領先指數响9月份回落,代表澳洲可能已進入衰退期,估計12月2日將減息半厘,至4.75厘。今年澳洲股市下跌43%、樓價下跌8%,10月份商業信心指數跌至新低,11月份消費信心亦下跌,代表連續十個月回落,係1978年以來首次。

債王格羅斯估計呢個衰退期相當長但唔深,因政府大量注資及bailout令財赤大增,最終引發通脹;即短期形成通縮、長期形成再膨脹(Reflation)或滯脹(Stagflation)。Grant's Interest Rule Observer認為,各國央行嘅資產負債表已膨脹133%,為將來通脹做好準備工夫。過去三個月全球央行信貸上升1560%;9月份聯儲局資產負債表首次超過10000億美元,11月5日達20000億美元,年底估計上升至30000億美元。美國愈來愈似阿根廷,最終必引發美元大貶值,並令油價同金價狂升。佢估計2009年下半年美國將出現惡性通脹,即未來係先通縮後通脹。

美國勞工部宣布10月份批發物價指數跌2.8%,係過去六十多年有紀錄以來嘅最大跌幅(前一次係2001年10月下跌1.6%,受「九一一慘劇」影響而出現消費急跌);核心通脹率仍升0.4%。10月份亦係連續三個月批發物價指數回落,同期响10月8日減息半厘及10月29日減息半厘;其中能源價格下跌12.8%(上一次能源價格大跌係1986年7月,下跌14%)。

2004年2月美國核心通脹率只有1.25%,當年唔少人曾擔心通縮出現,其後係通脹回升,因早喺2003年6月之前聯邦基金利率由6.25厘降至1厘,上述情況將來可能重演。近期因信貸收縮令新增嘅貨幣唔會刺激CPI上升,日後聯儲局停止減息後六個月至九個月,通脹率將再回升。估計通脹回落期响明年第二季結束,通脹率上升期由明年下半年開始;投資策略係金價每低於700美元便收集(最低估計可見630美元),長期上望2000美元;心中估計黃金低潮喺明年第一季出現。近日各種物資價格回落(包括石油),唔係因為供應上升而係因為需求下降,估計需求下降期一直維持到明年第二季,明年下半年將因需求上升而令價格再升。依家對金價睇得最淡係對沖基金經理Hugh Hendry,佢認為雖然政府大量注資及bailout,但對經濟本身並唔會帶來任何影響(白費工夫是也)。佢估計明年美元利率將低於0.5厘,未來金價可見550美元或以下(我老曹卻唔認同佢嘅睇法)。

明年第二季擇肥而噬

我老曹估計,新需求唔會再來自美國、歐洲及日本,而係來自新興工業國。如各位認同我老曹嘅分析,請喺明年第一季開始收集資源股、拋售債券。投資大方向係新興工業國股票而非美國、歐洲同日本,即從西方轉向東方。東方經濟冒起,將重新帶動世界經濟增長,情況有如1975年日本及德國經濟冒起,抵銷美國同英國經濟下滑嘅道理一樣。呢次美國、歐洲同日本經濟下滑令通縮出現,明年下半年因新興工業國經濟冒起而重新推動經濟向上。未來中國、印度、巴西及俄羅斯等新興工業國將擔任更重要嘅角色(G20將取代G8)。

1997年係牛年,白眉董屬牛(本命年),害到港人雞毛鴨血。2009年又再係牛年,奧巴馬亦屬牛,會否害到美國雞毛鴨血?明年會否出現Capitulation中第二隻下跌嘅鞋?中國2003年起工業生產力過剩,但全球經濟仍繁榮,廠家响原材料漲價而工業產品唔加價下仍可生存(但邊際利潤愈來愈窄)。到2008年,美國、歐洲及日本皆陷入經濟衰退,再加上人民幣升值、新勞動法執行、外資公司稅率由15%上升到25%,出口退稅下降或取消,令工業生產力過剩嘅問題全部浮現,恐怕中國境內工業正面對一次極之痛楚嘅汰弱留強期(恐怕將有三分一工廠被淘汰出局)。冇人知道去槓桿化(deleveraging)可將日圓、美元推高幾多及令原材料價格下跌幾多,暫時睇法要到2009年年中才達高潮,即持盈保泰策略要一直維持到2009年第二季,到時才可再擇肥而噬。

沒有留言:

張貼留言