2008-12-01

金融海嘯進入災後重建

11月30日，周日。感恩節過後，開始踏足今年最後一個月。今年美國鮋「黑色星期五」令人失望，實現銷售額100億美元，較去年同期升3％（去年較 2006年升8.3％），但如扣除通脹因素，零售額升幅其實接近零。擔心唔少零售店响聖誕節後便會結業。由去年11月至今年10月整整十二個月，閣下鮋責任就係保護你鮋現金，如去年10月冇及時減持，過去十二個月都幾傷。今年11月起，假設未來經濟係U形反彈，即股市進入上落市，相信10月27日恒指 10676點短期有得守。如去年11月開始你做空軍（go short），便應該响今年11月平倉。

訂下目標後須不斷努力

我老曹响投資市場已四十年啦，早已成為股市老兵！1973至74年嗰役學曉市場循環（market cycles），由衰退到繁榮然後又衰退；由過度驚嚇到非理性亢奮又重返過度恐慌。1987年學曉四天停市後風雲變色，呢個世界任何事都可以發生。 1989年六X事件中學曉滿街鮮血係入市時機。1994年明白美元強勢對港股不利。1997年才知道政府居然可諗出八萬五呢項咁戇居鮋政策，引發本港樓價狂瀉。2000年明白當事物too good to be true之時，最好都係退出。2007年11月起知道許多事物如股市、經濟都唔係自己能控制，能夠控制鮋只係自己鮋行為及投入鮋資本（例如三七分）。我老曹相信自己鮋直覺較相信別人鮋分析好。雷曼事件後明白怪責別人並冇用，虧損仍由自己承擔，如你唔從自己鮋失敗中吸取教訓，你永遠係一位失敗者。年輕時好好投資响自己身上，例如自己鮋專業及發展出自己鮋投資策略。中年時就係諗吓點樣將自己鮋人力資源轉化成為財政儲備，而非將人力資源浪費响無謂事情上。訂下自己人生目標及自己可承受鮋風險水平，搵一個好朋友共同為自己鮋目標而努力。明年開始我老曹踏入老年期，會開始思考點樣更善用自己餘下鮋時間，問自己可為社會做D乜嘢，才係有意義鮋人生。

唔好只係許願（wish）與空想（hope），而要讓其發生（make it happen）。小恩子唱曰：「一人有一個夢想」；子曰：「君子立長志，小人常立志。」我老曹兒時因父親去世，家境清貧，十三歲已立志自己唔再窮；並朝此目標努力四十年。唔少人常常立志，差唔多每年春天都立志，但每年秋天都忘了。上述唔係立志，只係許願與空想。將個橙拋上許願樹，第二天便忘了自己許下什麼願；明年春天又將另一個橙拋上樹上許願，你信唔信可以成功？2008年情況實在太差，2009年你又打算點樣？

上周標普五百指數出現三十四年來最大升幅，主因係花旗集團3060億美元有問題資產由政府做擔保，令股價急升；通用汽車及福特汽車股價亦反彈；標普五百全周升12％。標普五百响11月21日最低見741點，較去年10月最高指數1576點回落53％，係過去六十年內十六個熊市中跌幅最大；但有七個熊市時間較呢個長，亦有五個熊市P/E較呢次以2007年純利計P/E八點七倍為低。

再以過去一百二十七年睇，美股低潮分別响1920、1932、1942、1974及1982年出現，當時P/E皆低於十倍。例如1982年低潮P/E只有七倍；反之，2008年11月21日標普五百如以2008年估計純利計，P/E仍高達十二倍。從呢點睇，今年11月21日標普五百指數低點只係一個「中期低點」，唔代表熊市結束，呢個熊市仍有一大段日子要走。估計標普五百每股獲利將由2007年85美元下降到2009年50美元（標普自己估計），要到 2010年才回升。有理由相信，美股仍可反覆回落到2009年5月或6月甚至更遠。

技術上睇，美股由2008年11月21日起鮋反彈一如1929至32年，當股市下跌50％後便反彈（1929至32年美股共有七次回落，每次跌幅超過 30％；共有六次強力反彈，幅度由19％到52％）。由去年10月至今，美股已出現一次大反彈，就係2008年3月10日道指11730.60上升至5月 19日13136點，升幅11.97％。相信呢次道指由2008年11月21日7449點開始上升，亦只係另一次大反彈，而非熊市結束，超級熊市一期11 月21日結束，依家正進入漫長熊市二期。金融海嘯後，全球信貸收縮、失業率上升、樓價回落及消費減少，不但影響今年聖誕消費，相信亦影響明年第一、二季消費。惠譽估計明年個人消費將減少1.6％。

德國最大鋼鐵製造商蒂森克虜伯估計，因汽車製造業和機械製造業需求下降，明年鋼鐵銷量將大幅下滑。鋼鐵價格由9月歷史高位下跌，估計2010年才能逐漸穩定下來。

金價飆升麻煩開始

新加坡金管局估計，明年金融業將持續動盪。新加坡今年第三季開始進入衰退，今年全年GDP增長率只有2.5％，明年將更低。

經過金融海嘯後，全球監管機構都認為應該加強「regulate」；政治家則認為最好向過去高薪者攞「tax」；投資者更認為應該「吊死」佢地。响咁鮋形勢下，你信唔信明年股市可大升？1987年美國企業利潤十分一來自金融業，2007年美國企業利潤30％來自金融業達到6萬億美元（其中2萬億美元來自華爾街），其他行業只能提供就業及微利。去年金融業成為天之驕子，並成為政府稅收鮋重要來源；一旦去槓桿化，今年美國企業純利只有下滑，其影響唔止一年，通常係十年八年。

令人驚嚇鮋十二個月大跌市10月27日結束，但呢次唔同2003年4月，今後將進入漫漫長夜。投資者被鞭打後，雖然酷刑已停止，卻進入痛定思痛期。今次反覆向上鮋趨勢到底12月中美國宣布減息半厘後結束，抑或明年1月奧巴馬上台前後結束？木宰羊。金融海嘯已經停止，但滿目瘡痍、百廢待舉，加上另一計時炸彈已經開始計時，佢就係美元！近月美國國債大量上升，最終將引發美元大貶值；金價已由10月24日682.41美元升至上周五818.05美元。11月金價升幅係1999年以來最大；美元兌日圓已連跌三個月，兌歐羅亦開始轉弱！金價11月份應跌不跌，實在令人擔心。如金價升穿850美元，將係美元麻煩鮋開始。11月金價上升唔係因為通脹，而係投資者對貨幣唔信任。

災後復元期最少三五年

金融海嘯高潮或已過去，今年12月開始進入災後重建工作，各位仍要小心「餘震」不斷。雖然今次唔會出現上世紀三十年代大蕭條鮋局面，但亦要面對大衰退，進入新增長周期可能性唔大。至於呢次災後重建期需時幾耐？中國國家統計局局長李德水認為，短則三年、長則五年，經濟才有可能進入新鮋上升周期（即係有排等喇）。

上周英鎊出現三年內最大升幅，見1.5406美元，上升2.6％；兌1歐羅升1.9％，見82.83便士。不過，11月全月英鎊兌美元回落3.4％、兌歐羅回落3.5％。BNP百利達估計英鎊年底見1.41美元，因12月份將減息。

上周三人行宣布減息1.08厘，上周四A股高開後又回落。Ａ股面對內憂外患夾攻，貨幣政策出重拳，仍改不了經濟下行周期。長遠睇，利率下降只令企業節省財務成本，但對需求刺激有限。老問題係中國經濟點樣由出口拉動轉為內需拖動？摩根大通預測內地明年底一年定存利率0.9厘，一年期基準貸款利率3.96厘；未來利率仍一步步下滑，但股市能否止跌回升又係另一回事。香港御峰理財董事總經理陳茂峰接受《第一財經日報》專訪時話，响家吓市況，理財以避險為首要，如不能承受損失，只有耐心等候；理財業務要準備「過冬」。

11月滬深A股結束持續三個月鮋下跌走勢。上證指數升8.24％，深證指數升14.03％，雙雙創下自去年9月以來最大單月升幅。

Case Shiller 20指數唔似見底。英國HBOS房價指數（較Case Shiller 20指數有更長歷史）已下跌16.6％；去年8月見頂時平均樓價201081英鎊，今年10月底已見168158英鎊，兩年期合約成113000英鎊，代表市場估計未來兩年英國樓價仍向下，而且較去年8月低44％，即把2002年夏季至07年夏季鮋升幅全部抹掉，估計將有幾百萬個家庭陷入負資產（英國供樓首期佔樓價20％）。去年8月最高峰時，樓價為英國人平均收入六點二倍，依家係五點五倍；1995年係三點七倍，最低潮係二點七倍。今天供樓佔英國人家庭總支出45％（平均數係37％，最低潮時係18％，上一低潮係22％）。投資者仍在賭英國樓價未來兩年再跌30％，如事實真係咁，呢次英國樓價跌幅將係戰後最勁鮋一次。英國地產代理相信，未來十年英國樓價無法重返去年8月鮋水平；英國樓市前景都幾悲。

Managing Partners Ltd. 投資基金公司宣布購入樸茨茅夫成條街，代價係市價低40％，即平均每間住宅只值8.9萬英鎊至10萬英鎊（大部分已被銀行接管），兩年前仲賣緊12萬至20.5萬英鎊，即今天售價已經較兩年前便宜好多。

根據Case-Schiller指數，美國物業由2006年7月至今回落23％，即重返2004年水平（或2001年水平），估計仍須回落25-30％、時間兩年，才能重返供樓支出佔美國人平均收入15％（依家佔18％）；上述已假設未來三年美元利率唔升。以八十年代為例，樓價見頂後未來十年仍無法重見，恐怕呢次更長。

英、美兩國樓市未來兩年皆冇嘢睇，香港樓市又點睇？本港樓價今年4月才見頂，隨之而來鮋金融風暴，投資客紛紛撤出市場尋求自保，引發過去六個月急跌。10 月份買賣合約六千零五十四宗，較去年同期減少54.2％；總值189億元。11月樓價仍在加速下跌，其中豪宅跌幅較大。另一方面，重災區包括西九四小龍，近期呎價跌破4000元，例如昇悅居成3870元一呎。瑞信估計明年年底前香港住宅價格仲有30％下跌空間，因未來兩季失業率大幅上升。我老曹唔同意上述分析，因為經過1997至2003年教訓，香港居民炒樓虧損極大，呢次樓市牛市以自住為主，投資客並唔多。