2008-08-26

炒奧運幣苦過DD

8月25日，周一。恆生指數升712.73，收21104.79；成交556.15億元，8月期指升809點，收21190點；9月期指升813點，收21113點。過去出現嘅期指倒挂現象今天消失，恢復番正常情況，即期指較現貨略高（只能略高理由系因為9月有唔少股份派息除息，對期指揸家不利）。

工商銀行（1398）升4.3％，收5.34元，里昂推介目標價6.25元；建行（939）升3.7％，報6.19元，因半年純利587億元人民幣；網通（906）升4.2％，報21元；中遠太平洋（1199）升4.5％，報10.64元，因上半年利潤升11％；平安保險（2318）升4.9％，報53.9元，外傳佢喺度洽購廣州商業銀行；兗州煤業（1171）升5.7％，報12.34元，因上半年利潤升一點六倍。

油價下跌嘅真正原因

花旗推介和黃（013），估計今年每股獲利4.39元，較去年減少38.8％，P/E十六點一倍，目標價94元；亦推介長江實業（001），估計今年每股獲利8.83元，減少9.1％，P/E十一點四倍，目標價13.7元；大連港（2880）估計今年每股獲利21仙，與去年接近，P/E十六倍，目標價5.9元；上海電氣（2727）估計今年每股獲利25.1仙，升5.8％，P/E十點五倍，目標價4元；工商銀行估計今年每股獲利38.6仙，上升58％，P/E十一點六倍，目標價6.3元；國壽（2628）半年純利下降31.9％，至158億元人民幣。

滬深三百指數微跌0.18％，收2400.55。因內地股市重挫，午后國壽、中國平安及工商銀行股價下挫；十七天嘅奧運結束了，2006年推出嘅奧運金銀紀念幣更由奧運進入最后倒數時嘅每套30000元人民幣，下跌到最近16000元人民幣，第二批推出更跌至11000元人民幣，第三批市價10000元人民幣。炒奧運金銀紀念幣者，家嚇真系苦過DD。

港幣奧運紀念鈔亦由每張280元跌至138元，澳門幣奧運紀念鈔跌幅更由400元澳門幣跌到90元澳門幣。奧運人民幣紀念鈔跌幅最少只下跌30％，市價系每張1000元人民幣。情況有D似1997年香港回歸紀念金銀幣，香港回歸后亦跌到七個一皮。

炒奧運紀念幣者全部跌眼鏡，至于內地股市又點？期待中嘅奧運后效應周一未有現身。

近日印度尼西亞煤礦股股價大跌，例如Bumi Resources由去年6月至今回落36％（印度尼西亞系全球最大嘅煤出口國），系咪代表煤價已見頂？

油價亦由7月份每桶147美元急跌，商品價格亦大幅回落，系咪代表全球GDP由高增長期進入低增長期？根據Thomson Reuters估計，標普五百未來P/E只得十二點九倍（7月中一度見十一點六三倍），上述P/E只有1988年出現過（即股災后）。1968年至家嚇過去三十年美股平均P/E系十八點三五倍，點解美股近期P/E會咁低？上述低P/E過去只有喺高利率期才出現，但今年4月起利率只得2厘，令人擔心依家低P/E正正反映世界經濟陷入低增長期，呢個先系油價及原材料價格下跌嘅背后真正理由。

中國靠內需保GDP增長？

2002年開始回落嘅美元，踏入今年7月系咪開始止跌回升？外匯專家認為，依家美元匯價最少偏低30％；1995至2001年美元亦曾經轉強。美國銀行分析員認為，美元弱勢喺今年7月結束，因美國人唔再向海外投資，反而將資金調回美國，全球資金正回流美國。英鎊見1.84美元系2006年7月以嚟最低；歐羅見1.47美元（上周一度觸及六個月低位1.463美元）。股聖畢非德話佢過去雖然睇淡美元，但冇拋空美元，股聖一言令周一美元上升如虎添翼。

中國向世全界呈現最豪華嘅奧運會，令人有D奢侈感覺。相信呢個系任何國家（或人）脫貧后必有嘅心態（夸富心態），可以話喺無可厚非。隨著國家（或人）漸漸習慣富有，呢個心態自然收斂。1973年我老曹結婚擺酒時亦筵開七十席，家嚇望番轉頭，連我老曹亦奇怪當年點解會咁戇居？依家出席人地嘅夸富宴時，間中亦會由心里面笑出嚟；人必須經一事、才長一智。

最豪華嘅奧運會結束后，又返番去經濟；中國未來經濟的確有D令人迷惘。由出口導向型經濟轉為內需，最成功系香港；只因八十年代巧遇中國改革開放政策，令香港制造業成功轉入內地，香港經濟改為服務珠三角制造業為主；反觀台灣九十年代經濟轉型，至今仲未算成功。中國經濟最大王牌（廉價成本）慢慢冇埋，可唔可以透過內需長期保持中國GDP 8％或以上高增長？依家中國已面對能源危機、資源短缺及熟練工人供應唔足，加上人民幣升值，歐美日等國家GDP陷入低增長期，中國出口增長率肯定進入拐點，可唔可以利用內需去取代出口增長率，而達到長期GDP「保八」嘅目標？

貧富差距拉大

改革開放三十年，中國整體經濟富起嚟，卻先出現其它資本主義國家嘅貧富差距擴大問題；近年由胡錦濤提出三農政策目的系減少貧富間差距以免造成社會不安。

過去大家相信教育可以改變社會上貧富差距；第二次世界大戰后美國情況的確系咁，但到咗1980年代嘅美國、1990年代嘅日本及1997年后嘅香港，教育雖然愈嚟愈普及，但社會上貧富差距不但未見改善，反而系進一步惡化。根據哈佛大學Goldin及Katz研究，美國1947至70年代后期，教育普及令中產階級冒起，各人嘅收入不平衡系減少咗，但七十年代后期開始，收入差距又再拉闊；不但行業之間嘅差距拉闊，甚至同一行業好似律師咁，一流律師收入同一般律師收入可以有天淵之別。就以1997至2001年為例，美國最高收入10％人口收入上升49％；反之，50％中產階級人口收入同期只上升13％。即財富同收入愈嚟愈集中喺最高收入10％嘅人口手中。

普及教育的確曾令社會人口人均收入普遍增加，例如美國今年（扣除通脹）人均收入系1900年嘅六倍。隨著普及教育完成，社會又返番去過去情況：即收入及財富漸漸集中喺10％人口手中。依家成為一個律師后，收入只系一般，除非你系十分出色嘅律師。依家成為股票分析員收入亦一般，除非你系一位好出色嘅分析員。再睇中國嘅情況更令人擔心，因為中國未完成全民普及教育；即國民人均收入未全面提升前，卻一早出現咗貧富差距兩極化。上述嘅情況過去喺東南亞國家及拉丁美洲亦出現，最終可引起社會不安。反而美國、日本及香港雖然亦貧富差距擴大，由于人均收入普遍已達一定水平，社會仍比較上安定。

小心駛得萬年船

今天喺美國、日本及香港接受大學教育甚至碩士及博士，亦不能保証閣下可以成為高收入人士，隨非你系出類拔萃。美國最高收入10％人口收入升幅系大部分人收入升幅嘅三倍，咁樣落去10％最高收入人口同大部分人收入比較，差距自然愈嚟愈大，最終引發經濟不景氣。

去年系危機年（crisis），今年系投資者小心謹慎年（caution）。

Jeremy Grantham去年首先用慢動作火車相撞去形容次按危機；換言之，過去一年發生嘅事好似物理定律，例如火車司機企圖重新控制火車，其后因沖擊力令車卡一個接一個互相碰撞甚至出軌。喺經濟層面上，信貸突然收緊令銀行一間接一間出問題，然后阻礙經濟活動令企業純利增長放緩。情況就好似車卡，最先系后面一卡撞上嚟；然后再后面一卡撞上后面一卡，然后再撞上嚟。每次碰撞后以為危機已過咗，結果又有一卡撞上嚟令股市又再跌至低位。

去年第四季最先系美國GDP出現負增長，今年第二季出現GDP負增長系歐洲及日本，第三季極有可能系英國。

七十年代后期最先系鐵娘子結束咗英國政府大量開支時代，令通脹率慢慢受控制；其后引入貨幣學派，令英國進入一段低通脹經濟擴展期，擔心隨住貝理雅首相下台而結束。美國由雪茄伏出任聯儲局主席開始，八十年代列根出任總統解決美國滯脹問題，美國經濟重新恢復高增長。克仔任內再令美國赤字收窄，到殊仔上任利用財赤，令美國經濟喺2000年后繼續增長，但到咗家嚇已千瘡百孔。貝爾斯登出事后房利美及房貸美又面對壓力。7月15日起美國証監會禁止「裸空」令油價急跌，以及KBW商業銀行指數回升37％（仍較去年高價低47％），下一步又系點？Resolution Investment Management Ltd.嘅Stuart Thomson認為，信貸壓碎（credit crunch）不但未過去而且喺度惡化。高盛証券分析員Binit Patel認為，占全球GDP一半國家已面對一場衰退，自貝爾斯登事件十年期債券息率由3.31厘升上3.87厘，估計年底見4厘，因各銀行都喺度增持現金；銀行與銀行間之互信好低。奧巴馬強調改變（change），明年起美國經濟肯定出現大改變，問題系變好定變壞？小心駛得萬年船，今年作為投資者請記住呢句話。



世事改變速度實在快得驚人；去年10月經濟仲系過熱，今年未到9月已寒風陣陣，美國經濟面對三個頂頭風──樓市、信貸及高油價；大部分美國金融股去年至今跌幅由50％至90％。

中國、印度、巴西及俄羅斯合稱金磚四國，佢地每年可產生七千萬個中產階級人口（美國人口只有三億、歐盟略超過三億、日本一億二千八百萬），即全球中產階級人口正以年率10％速度增加。正喺度將全世界變成一個極大消費市場，上述仲未計東歐、中東及東南亞嘅中產階級人口亦喺度涌現。可唔可以抵銷歐美日及英國嘅經濟低增長期？1990年起日本GDP進入低增長期，并冇影響其它國家。今年起美國同歐洲GDP進入低增長期影響卻好大，因歐美系其它新興市場最大出口對象，情況有D似1997年7月亞洲金融風暴，因美元轉強，削弱咗亞洲地區出口競爭力一樣。

油價終于由7月18日嘅147美元回落，美國經濟三股頂頭風其中一股已減弱；至于信貸危機相信喺9月底前兩房問題應有定案；最后只余下樓市呢股頂頭風。最終問題必須解決，作為投資者需要嘅系耐性，例如1982年9月中國政府宣布，喺1997年7月收番香港主權、到1984年7月中英雙方簽訂聯合聲明，時間上總共二十三個月。

1997年7月亞洲金融風暴到1998年9月東南亞亦開始解決，需時十四個月。

2000年3月科網股泡沫爆破到2002年10月納指止跌回升，需時三十一個月。

去年11月開始嘅次按危機，最終必須解決。問題系要几耐，同埋點樣收科。

冬天嚟到，春天仲會遠咩？如大家已及時止蝕、冇溝落，唔系只著條泳褲過冬季，便可以耐心地等；可能系明年第一季，又可能再長一D，但春天一定會番嚟；反之，只有一條泳褲就凍死都未天光。