2008-08-12

中国慎防地产泡沫

8月11日，周一。恒生指数跌25.87，收21859.34；成交575.89亿元。8月期指升64点，收21804点；9月期指升37点，收21720点，期指倒挂现象未见消除。

美国经济嘅回落期估计伸延到明年（今年下半年GDP估计只得0.7％升幅），未来十二个月出现衰退嘅机会高达51％（4月份曾估计高达70％）。估计今年嘅CPI上升4.3％，利率估计喺明年3月前唔会上升，仲系2厘。

工业股否极泰来？

7月份中国嘅外贸盈余上升4％，至253亿美元，系四个月嚟首次回升，主因系内地工厂产品报价上升10％，开始将上升嘅成本转嫁畀买家，搞到出口上升26.9％，至1367亿美元；入口上升33.7％，至1114亿元。高附加值产品好似电子产品嘅需求仍上升，政府再次增加纺织品嘅出口退税，加上原材料价格下跌，工业股系咪到咗否极泰来时刻？

上海期铜跌至八个月内最低，10月合约报56940元人民币；新加坡3月期铜报每吨7375.5美元。铜价下跌，代表全球经济进入咗放缓期。

沪深三百继续下跌5.2％，收2456.81。中国铝业、江西铜业、云南铝业、紫金矿业、山东黄金及中金黄金亦跌停板。A股已跌至二十个月内嘅低点；中信证券下跌8.6％，因上半年利润只升咗13％；北辰实业、东方航空及北京城建下跌10％。

沪深A股约六百只股份跌停板，占上市股份40％；跌幅超过5%嘅约一千四百只。虽然国资委主任李荣融表示，国有股喺相当长嘅时间内唔会大量减持，但投资者信心已冇晒，令A股P/E首次跌穿二十倍，渐同香港国企指数嘅P/E睇齐。

Thomson Reuters公布，今年1月1日分析界对标普五百今年第二季业绩估计系升4.7％，4月1日改为负2％，7月1日改为负11.5％，8月11日再改为负22.1％；理由系AIG每股蚀咗51美仙，以及房利美每股蚀咗2.54美元。至8月8日止已公布业绩嘅公司共四百四十九间。66％较估计中好、10％和估计接近及24％较估计中差；能源纯利升18％、科技升16％及必需品消费升15％；最差系金融负94％，其次系非必需消费负57％。

皇家苏格兰银行上半年蚀咗8.02亿英镑，系1960年代至今首次出现亏损，亦系英资大银行少见嘅亏损。上半年供股集资120亿英镑后，仲要为信贷拨备59.3亿英镑。不过，市场反应唔差，股价升3.2％，见240.5便士，相信最恶劣嘅日子已成为过去。去年佢与富通银行及西班牙Banco Santander连手收购荷兰ABN Amro银行，却撞啱美国次按危机，令三大银行都冇蚀钱。天有不测之风云，人生真系无常。

唔会有奥运后效应

7月16日开始嘅股市上升，只系另一反弹而唔系熊市结束；7月中开始油价大幅回落，只代表经济衰退步伐渐近，而唔系另一繁荣期开始。喺熊市中，散户可以采取持盈保泰嘅策略，静待熊市三期嘅来临；亦可喺熊市中Keepyourfeet wet（保持30％资金喺股票市场炒上炒落，以便春江水暖鸭先知）；我老曹策略系后者，唔系点知熊市结束？世上无先知，只有事后孔明；奥运效应已证明咗唔存在，依家又有人推销嘅奥运后效应亦系唔存在。奥运只系体坛盛事，既冇前效应亦冇后效应。虽然北京为咗奥运而投资一、二千亿元人民币喺配套设施上。由于北京过去嘅配套设施不足，依家只因利乘便；相对于全国基建项目嘅开支仍唔算多，股市既冇奥运前效应，应该亦冇奥运后效应。运动归运动，经济归经济。

美国纽约大学斯特恩商学院经济学教授努里尔．鲁比尼指出，今次次按危机美国付出嘅代价可能达到3万亿美元，相当于美国GDP嘅20%以上。虽然已发出咗重大危机爆发嘅讯号，但至今大家仍未能真正认识危机嘅严重性，依家破产仍局限喺金融业，距离第二阶段仲有距离，未出现大规模嘅企业破产及失业率上升。过去二十五年，美国经济喺信贷泡沫滋养下，增长日子已一去冇回头。个个希望炒股炒地产发达，家吓美国五千一百万间住宅中有八百万间已资不抵债，已失去自己嘅房子，如楼价跌幅扩大到30%，将有二千一百万个家庭冇咗间屋，到时就真系大灾难。

强项系捕捉大浪

入咗行四十年，我老曹发现赚大钱机会大部分唔系嚟自拣股（stock picking）而系嚟自大浪（Big Wave）。1969到73年我老曹蒙查查咁赚咗50万元，理由唔系我老曹晓拣股，而系咁啱遇上恒生指数由不足100点升到1774点嘅大浪。1974年7月至12月我老曹输畀森池兄嘅理由先系拣股经验唔足；我老曹当年买和记企业，由7元跌至1元令我老曹嗰50万元变咗10万元；森池兄却买和记地产，因为有15厘股息跌幅只得10％，令1974年12月佢嘅身家幸保不失。依家森池兄更系拣股专家，接近凤凰无宝不落，而我老曹仲醉心喺捕捉大浪（强调有智慧不如趁势；宁买当头起、莫买当头跌；止蚀唔止赚等）。

捕捉大浪系我老曹嘅强项；至于拣股则系我老曹嘅弱项（相信同自己嘅性格有关，我老曹欠缺森池兄嘅精挑细选性格）。但过去嘅成绩亦唔错，例如逃过咗1981 -82年嘅大跌市；1984年7月《联合声明》草签限制港府每年卖地五十公顷，我老曹认为三个政府（中、英及港）逼港人买楼发达；又好似1987年10月股灾我老曹亦能逃过。1989年六四事件后才重新入市；1997年投资英国，最近卖埋最后一间物业；2001年睇好黄金、资源股及货币（如澳、纽及加元），以及去年10月喺港股直通车谣传下再度减持港股。

1984年买楼，甚至唔识拣，到咗1997年亦可赚十五倍；反而喺1997年下半年买楼，任你点叻，2003年4月最少蚀咗50％；1990年曾劝王增祥先生放弃日股，因为「势」不在「我」；去年10月我老曹放弃喺英美嘅投资，因为上升趋势完成。

1801至1831年英国钢铁及煤产量每年上升5％，到1900年英国系全球最大嘅工业国；依家仲有乜嘢系英国生产嘅？1890年美国由农业走向工业，1929年美国货渐营销全球，依家除咗高科技产品外仲有几多工业制品喺美国生产？1978年中国走改革开放路线，去年中国成为世界工厂；然后……每一个国家都有佢嘅工业黄金三十年，但希望永远高速增长系冇可能。英国、美国、日本及中国都冇可能。工业完成黄金三十年后，经济便逐步走向大量消费期，英国及美国都系咁；日本人因为1990年前喺物业及股票市场蚀咗太多，搞到消费市场无法壮大，形成咗依家唔生唔死嘅局面。

由1801到2000年整整二百年，英国及美国喺发明、科学、制造业及金融业等一直领先而获得全球惊人嘅财富；不过，随之而嚟系财富减少期，最先系英国（第一次世界大战后已开始），依家系美国（科网股泡沫爆破后开始）。中国工业黄金三十年已结束，正过度到内需型经济后，进入另一繁荣期。英国由1800年开始到第一次世界大战爆发，繁荣期约一百三十年先退位让贤由美国取代；美国繁荣期由1890年开始到2000年见顶，约一百一十年；中国1978年开始至依家只行咗三十年，即最少仲有七十年繁荣期？未来唔系无风无浪而系波涛汹涌；如各位像我老曹一样，相信大浪理论，便应「任凭风浪起，稳坐钓鱼船」。未来投资宜集中喺东方而唔系西方。

中国嘅困难系点样化解制造业头上嘅「达摩克利斯之剑」？人民币升值、取消或减少出口退税、中外企业税制统一为25％、新劳动合同法保障产业工人嘅最低工资、严格执行环保条例及中央三农政策等都系合理措施。只系咁样一嚟中国制造业必须告别廉价优势，进入产业升级期。九十年代嘅台湾及东南亚就系避唔开「达摩克利斯之剑」，而令经济从此冇进步。1978年开始嘅中国改革开放政策，提供咗三低一高嘅有利环境（即低劳动成本、低地价及低税率，从而产生咗高利润）畀制造业。1989年六四事件后，中国政府为咗迅速恢复经济繁荣，更任由人民币贬值；令台湾、南韩、东南亚及日本厂商亦入嚟。2003年加入WTO后，全世界嘅厂商都嚟咗，令中国嘅制造业出现咗过分挤逼，大鱼吃小鱼嘅生态出现；内地资源不胜负荷，只好向外入口，带动咗全球原材料价格上升。到今年中国已渐接近恶性通胀嘅边缘，CPI唔受控制咁上升。今年起人行及早实施银根紧缩政策及人民币升值兼加息，喺通胀洪峰下，依家都仲未有造成广泛泛滥（A股由去年10月起大跌；内地房地产价格亦步入回落期）。

品牌不是用广告建立

我地要搞清楚，唔少成本系企业本来就要承担嘅，只系中国政府为咗刺激GDP增长而冇严格执行。例如工人嘅人工、福利及环保；出口退税原先系应付1997年亚洲金融风暴嘅临时措施，结果此一措施却维持咗十年先修正。外资企业15％（内地企业35％）亦系唔公平竞争，已实施咗三十年。最初嘅目的只系为咗吸引外资，依家外资太多要逐步取消，亦系正常。

八十年代香港弃制造业而万马奔腾咁走向房地产，作为一个城市嘅后遗症已咁多（例如1997年7月房地产泡沫爆破后嘅六年衰退），再睇睇英、美依家嘅苦况，以及1990年日本房地产泡沫爆破嘅后遗症。中国如果任由上述嘅事件喺境内重演一次，真系非常士刁拔（1990年嘅日本系无知；1997年7月嘅香港系士刁拔、去年嘅美国系故意。如中国政府继续任由内地房地产赚取较其它行业更高嘅利润真系好士刁拔，冇得救）。任何国家或民族唔可能只靠房地产升值去发达，日本、香港、英、美及中国都唔得；楼价太高对国家或地区长期经济发展必造成重大隐忧，此乃我老曹一直反对香港实施联汇制度嘅理由。可惜香港政府至今仲执迷不悟。

买楼可以发达？如果你用黄金响公元前429年喺罗马置业（当年罗马帝国进入全盛期），揸住一千年后仍未归本；跟住系欧洲社会进入黑暗时期。而我老曹阿爷嗰辈喺战后返番中国发展，只留低我老曹父亲喺香港守业，家族所付出嘅代价亦唔想提（因睇错大方向系投资上嘅死罪）。

依家中国制造业缺点系冇自己嘅品牌（甚至未能成为世界品牌；因缺乏原创技术，一切核心技术都系入口）。冇R&D支持下，中国品牌点样打入世界市场？唔少人仲话品牌系用广告建立嘅。广告固然重要，但建立品牌背后嘅力量系R&D，广告只系辅助性质。有咗自己嘅品牌，产品边际利润才可提升，才可化解「达摩克利斯之剑」。台湾及东南亚国家九十年代起经济唔可以再创新高，就系台湾及东南亚国家嘅品牌无法打入国际市场，理由系佢地相信广告创造品牌；反而南韩却能建立国际品牌，理由系喺强大嘅R&D下出现咗创新技术。最终中国经济可唔可以逃出台湾及东南亚嘅框框，好似蚕蛹化蝶，更加精彩？就睇呢几年矣。