2008-08-21

接管兩房利與弊

8月20日，周三。恆生指數升446.89，收20931.26，成交623.31億元；8月期指升513點，收20868點。9月期指升494點，收20775點。

滬深三百指數升7.85%，收2532.94。

花旗推介中國海外（688），估計今年每股獲利7角，升23.7％，P/E十六點二倍，目標價16.08元；和電國際（2332）估計今年每股獲利28仙，減少3.7％，P/E三十五點五倍，目標價13.35元；安徽皖通（995）估計今年每股獲利44.3仙人民幣，升34％，P/E十倍，目標價6.3元；希慎（014）估計今年每股獲利94仙，升11.3％，P/E二十三倍，目標價25.38元；嘉里建設（683）估計今年每股獲利2.22元，減少52.8％，P/E十五點八倍，目標價58.9元；騰訊控股（700）估計今年每股獲利1.348元，升48.5％，P/E四十二點五倍，目標價75元；中國石化（386）估計今年每股獲利40.9分人民幣，下跌37.2％，P/E十六點七倍，目標價11.28元。

美銀行去邊度借錢

今天系傳出港股直通車消息一周年。去年8月20日恆生指數由上周五（8月17日）收市20387點升上21595點收市，其后一直上升到10月30日嘅最高位31958點。呢個上升裂口終于喺本周二補番；滬深三百指數今天大幅反彈，但仍處熊市，冇數據支持內地熊市已完成。相信恆指繼7月16日之后出現另一只腳（熊市二期有好多只腳）。有人認為股市開始進入熊三，我老曹認為有排都未到。熊市二期往往喺你冇信心時反彈及充滿信心時回落，令你對自己嘅判斷力冇晒信心為止，家嚇距離上述嘅日子仲遠。喺熊市二期每次指數創新低系入貨訊號而唔系出貨訊號。作為投資者最需要系耐性，呢次次按危機所造成嘅傷害及復元期要較大部分人估計嘅長。

IMF前首席經濟學家羅戈夫認為，未來執笠嘅唔系中小型銀行而系一間大型銀行；根據Dealogic嘅資料，美國十大銀行喺8月份到期債券270億美元、9月520億美元、10月230億美元、11月200億美元及12月860億美元。即8至12月美國十大銀行要應付嘅到期債券有2080億美元。上周美國各商業銀行每天同聯儲局借入177億美元。未來錢由邊度嚟？

中國依家有超過五萬個地產發展商，過去几年透過大量貸款去買地；家嚇寒冬已喺深圳及東莞出現。有几多個中小型地產商捱唔過呢次寒冬？五十年代香港亦有接近一萬個中小型地產發展商，1964年銀行擠提潮再加上1967年香港暴動，數目減少到過千。七十年代初期，上市地產公司數目過百間；經過1974年石油危機，以及1982年主權回歸危機后，本港地產發展業務已集中喺十大地產發展商身上。今天生存落嚟嘅地產商就系當年過萬間公司遭淘汰后嘅強者。上述嘅淘汰賽正喺中國開始，估計最終能壯大成為大企業嘅唔多。

政治上有D人物出現后改變咗經濟大方向，例如1933年羅斯福嘅新經濟政策（NewDeal）令美國經濟進入凱恩斯時代；戴卓爾夫人及列根總統又帶嚟供應學派；1978年鄧小平嘅改革開放政策改變咗全球經濟面貌；其它好似卡達總統委任雪茄伏出任聯儲局主席亦治好咗六十年代因越戰而引發嘅美國通脹，格蛇接手后蕭規曹隨直到2001年「九一一．慘劇」后，先放棄呢個政策令通脹率死灰復燃。

今年3月金價回落理由系今年上半年印度黃金入口減少47％，引發咗一次較大嘅中期性調整。未來炒上理由相信喺房利美及房貸美被接管而引發嘅信心危機。1968年前金價每盎斯35美元系受制于美國政府；同年3月大量兌現黃金，美國政府慢慢控制唔住金價。1974年12月黃金可以喺美國境內自由買賣時，金價已系每盎斯200美元，然后又大幅回落到1976年8月嘅100美元。因為1975年起通脹率漸受控制；1976年8月到1980年1月金價再由100美元升上850美元共十二年。

2230億美元債券到期

2001年金價由252美元起步【圖】，到今年3月見1032美元，技朮上睇最低可見735美元先完成調整。會唔會好似1976年8月到1980年1月咁狂升到850美元先完成整個牛市，即黃金牛市喺2013年先結束，高位喺2000美元，理由系美國政府嘅財赤變成收支赤字，外資必需每天吸納20億美元先至可以穩定美元匯價。

房利美有1200億美元債券喺9月30日到期；房貸美有1030億美元債券喺9月30日到期，兩房短期內要借到2230億美元支付上述嘅債券先可逃過被接管嘅命運。JP摩根資產管理日本公司計划減持兩房債券。

周二房貸美優先股（票面5.57厘）成交15.3厘（6月30日成交7.77厘）；房利美優先股（票面5.5厘）成交16.4厘，6月30日成交7.83厘。換言之，9月30日前兩房可能被接管。

鄧普頓資金管理公司主席MarkMobius認為，商品只進入調整期，除非中國及印度陷入經濟衰退，商品牛市先死亡；否則遲早將商品價格推至新高。RoyalLondonAssetManagement分析員RobertTalut認為，未來五年供求雙方都好大，形成商品價格將大上大落，再唔系以前嘅直線上升。

中國每年有二千五百萬人口由農村搬向城市；每年有一千五百萬中國人進身中產階級。由農村搬向城市令收入上升三倍；每年新增一千五百萬中產人口令消費行業保持興旺。

四川災后重建未來三年需要三億七千萬公噸水泥，以及三千七百萬噸鋼鐵（去年中國全國出產水泥十三億三千萬噸，鋼鐵四億八千萬噸），費用大約一萬億元人民幣，地震移平咗四川二千九百萬方米建筑物，上述因素保証未來三年內地水泥廠及鋼鐵廠開足工。中國已成為全球最大資源需求國，佢支持住油價、鐵礦沙價、煤價、水泥價甚至銅價。如果由咁嘅角度睇，今年3月金價及7月油價回落可能只系大調整而唔系熊市開始。

難論未來商品價

從另一角度睇，1999年科網股市值占美國所有上市公司總市值6％。科網股泡沫爆破卻可令美國股市一直跌到2002年10月；去年8月次按只占美國証券化按揭貸款14％，爆破后威力會點？科網股令美股回落咗兩年半，次按危機結果又會系點？

2006年第三季美國收支赤字系8440億美元（以年率計）相等于GDP6％，即每天需34億美元資金淨流入才可抵銷。2006年第三季美國房地產改變方向，一年后引發次按危機。美國消費者自1994至去年連續十四年每年消費上升3.5％（反而收入每年只上升3.2％），令儲蓄率跌至零以下，系大蕭條后首次有咁長上升周期，理由系樓價上升及股市反復上升。美國樓價2006年第三季及美股今年11月改變方向，而今年第二季起消費升幅放緩，呢個調整期又要几耐？

商品價格今年7月見頂回落定系調整后再升？唔系依家下結論嘅日子，只好見步行步。

樓價隨時崩潰

美國周二公布，7月份新屋建造較一年前減少11％只有九十六萬五千間，獲批新合約減少17.7％只有九十三萬九千間。房利美再跌2.3％，收6.01美元；房貸美跌5％，收4.17美元；AIG跌5.9％，收20.32美元；雷曼兄弟跌13％，收13.07美元；零售股Saks跌8.3％，收10.29美元。美股新一輪跌市由8月11日開始，房利美及房貸美股價已下跌91％及92％，后者更系1989年以嚟最低。美國12萬億美元房貸中，42％由兩房擔保即5萬億美元；其中3萬億美元由美國大金融機構擁有；其余外資擁有（包括中國政府）。兩房CDS利率較國債高3.3厘，即每1000萬美元負債每年要多付33萬美元利息，如果政府接管可令美元匯價受壓及金價又再上升；如果唔接管可引發美國樓價大崩潰。

Case-shiller房屋指數另一研究員KarlCase嘅數據，住宅投資如果占GDP5.5％便快見頂，少過GDP3.5％便快見底。2006年美國人喺住宅投資占GDP5.5％，今年第二季已下降到3.1％，KarlCase認同格蛇明年上半年美國樓價見底論。反之，Oppenheimer分析員MeredithWhitney接受CNBC訪問時話，未來買樓者需真正付20％首期，令唔少人失去做業主嘅資格；加上Countrywide唔再借錢畀人買樓，房利美及房貸美嘅樓按利率已升咗唔少（雖然聯儲局減息3.25厘），去年銀行提供9000億美元做房貸，但今年只能提供1000億美元；所以佢認為樓價應進一步回落。

英國投資者拋空英國七大上市建房公司，例如BarrattDevelopment、Persimmon、BorisHome及RedrowPlc等，金額達8.65億英鎊，相等于上述七間公司市值嘅19％，系咪又有D過分睇淡？

今年7月英國二千個最大慈善基金捐款較去年7月前少咗6.55億英鎊，只得88億英鎊。五分一英國人承認今年捐款唔及去年。