2008-08-23

小心非理性悲觀

8月22日，周五。滬深三百指數跌1.6％，收2404.93；兩市總成交539億元人民幣，較周四銳減30％。中國鐵建及興業銀行跌幅都超過4％，東航、國航、南航受油價上升影響，股價下調。媒體報道，「二次發售」細則仍在研究中，學界認為「二次發售」同大宗交易市場相類似，只系換湯不換藥，不能解決「大小非」解禁限售股套現嘅預期，對整個市場大大利淡。

工行純利三年倍增唔容易

工行董事長姜建清2005年上任，今年上半年工行獲利上升57％，達645億元人民幣，已超過匯控（005），成為全球最賺錢嘅銀行，認真了不起，上任三年已令工商銀行純利倍增（工行唔系銀行仔，咁大間銀行純利上升一倍并唔容易）。請記住，喺惡劣環境下吸納優質企業乃投資成功之道。中國加油！

日本央行22日公布7月份貨幣政策會議記錄顯示，日本經濟正面臨GDP增速放緩及通脹上升嘅雙重風險。今年第二季GDP較第一季下降0.6%，較去年同期下降2.4%；7月份CPI上升7.1%，創下1981年1月以來最大升幅。

花旗集團CEO到上海為當地花旗零售網點揭幕時表示，次按危機不但影響美國，而且更蔓延到全球。

英國第二季GDP同第一季比較維持不變，較去年第二季比較只升0.2％。CPI過去四個月平均升幅4.4％，超過政府目標2％一倍。英國經濟正式進入滯脹期（GDP停滯不前，CPI繼續上升）。

我老曹1967年剛喺社會做事，已發夢做百萬富翁。今天如果只有100萬元，存入銀行收1.5厘，即每日開支只有41元，點樣生活？1967年一盎斯黃金35美元，即今天嘅841美元；今天100萬元購買力只相等于1967年嘅41600元！呢個系几得人驚嘅事實。

去年8月20日港股直通車傳聞，令恆生指數喺十星期內上升55％，然后再用十個月時間將上述升幅抹掉，我地又再重返恆指20000點水平。假設冇直通車傳聞，今天恆指合理水平就系20000點。上述傳聞令投資者出現非理性亢奮后，理論上亦會引發非理性悲觀，各位宜小心。

去年8月美國次按危機爆發，一年后今天次按危機不但未受控制，反而在擴散，今年8月客觀形勢較去年8月更差。面對房利美及房貸美股價大幅下跌，兩房作擔保嘅52000億美元房貸債券點樣處理？7月30日保爾森已獲國會授權可購買兩房所發嘅債券，去增強投資者對兩房嘅信心，估計短期內保爾森會運用此權力，協助兩房解決9月30日2000多億美元債券到期嘅問題，藉此逃避被接管嘅命運。美國大選之后，將由新總統決定兩房嘅命運。

奧巴馬開始提出佢競選總統嘅政綱。佢希望將資本增值稅由依家15％提升到28％；佢唔希望延長2001至03年殊仔嘅減稅方案（2010年到期），并取消10.2萬美元FICA收入上限，即年收入10.2萬美元嘅美國人日后要多付7％稅，以及取消殊仔嘅股息稅減免措施……。換言之，奧巴馬如上台及實施佢嘅政綱，未來四年美國政府稅收可增加8500億美元，再加上提升最低工資法案對中小企業嘅打擊……。美國老左派思想抬頭去改變貧富懸殊情況，絕對不利投資者。

自古至今有兩大想法：一、左傾者認為透過政府向富人抽稅、補貼窮人，去減少貧富懸殊（所謂不患寡而患不均）；二、右傾者認為透過減稅、鼓勵投資，讓富人創造更多財富，財富多咗，人人分享到嗰份財富都增大咗，雖然貧富差距大咗，但窮人生活仍較以前好過。過去前者叫社會主義，后者叫資本主義，到今天已很難真正划分。前者著重公平分配，后者著重創造財富。

隨著全球20／80兩極化，世界思潮似乎重返公平分配嘅機會愈來愈大。

1990年9月11日老殊出兵中東，將伊拉克軍隊從科威特境內趕走時喺國會發表演說。佢強調一個「新世界」正在誕生——“A world where the rule of law supplants the rule of the jungle. A world in which nations recognize the shared responsibility for freedom and justice. A world where the strong respects the rights of the weak！我老曹喺電視機前曾為佢呢篇演詞鼓掌！上述正是中國人嘅尚武精神。「武」者「止戈」也，打仗目的就系為咗停止戰爭；執行「法治」、對抗「森林法則」、阻止弱肉強食。打仗目的就系為咗自由與公義，令強者尊重弱者嘅權利。

全人類重回森林法則時代

可惜2001年「九．一一慘劇」之后，殊仔派兵入侵阿富汗、攻打伊拉克，完全違背上述精神。今天俄羅斯亦以強凌弱，世界再次重返「森林法則」時代。2001年9月11日拉登炸毀嘅唔系美國人嘅Twin Tower，而系美國人「為自由而戰、為公義而戰、為阻止強者欺負弱者而戰」嘅信念。今年8月嘅俄羅斯只系步美國政府嘅后塵，以壓倒性軍力入侵格魯吉亞，將全人類重新推回森林法則時代——即強者為王。

1978年由鄧小平開始改革開放政策，加上鐵娘子及列根領導下，全球開創咗New World Order，所有國家都參與（少數例外系北韓及古巴），共建一個自由及公義世界，呢個世界系奉行法治而非強者為王）。但呢個環境只維持二十年光景；踏入二十一世紀拉登有如《黑夜之神》戲中嘅小丑，炸毀咗美國嘅信念，令美國呢個自以為是蝙蝠俠露出人性弱點，以壓倒性軍力攻打阿富汗同伊拉克報復。到今年8月俄羅斯又向全球顯示強者為王嘅森林法則，甚至北約、美國都莫奈之何。

1978至2001年9月系人類歷史上短暫嘅光輝，抑或2001年9月至2008年8月系舊世界嘅反擊戰？未來世界到底系自由與公義嘅法治，抑或系強者為王嘅森林法則時代？我老曹實在木宰羊。但金價2001年9月開始復蘇，今年8月進入上升第二波還是技朮反彈？倫敦ETF上周持金量回升到一百八十萬盎斯，代表金價一旦低于800美元一盎斯便見需求回升。我老曹建議大家可逢低吸納，但見高莫追（金價上升反映人類對未來嘅恐懼，加上巴基斯坦家嚇嘅局勢，可能再次觸發印度人買金）。

紐約大學經濟系教授Nouriel Roubini認為，美國樓市正進一步惡化，最終可令美國過萬間地區性銀行其中三分一（超過三千間）出事，因為仍有1萬億美元呆壞賬仍未曝光。美國銀行響今年7月份共接管七萬七千二百九十五間住宅，較2005年1月增加184％（2005年1月系美國最少住宅被接管嘅月份）。住宅銷售更跌至十年新低，依家樓價較去年7月再跌7.6％，由223500美元跌至206500美元；銀行次按撥備已達5100億美元。哈佛大學教授估計，將有一間大型美國銀行喺短期內倒閉。

1992至2007年美國CPI平均升幅2.6％，今年7月升幅5.6％；PPI升幅更達9.8％，估計8月CPI仍進一步上升。7月份失業率5.7％系四年新高。去年第四季GDP出現負增長，估計今年第四季及明年第一季GDP亦系負增長，即系官式衰退。有人告訴我老曹，如果佢行路似只鴨、叫聲似只鴨，咁佢應該系只鴨，唔使「官方」公布！對投資者而言，衰退早喺2007年11月開始，只系等官方承認而已。

任何事物皆相對性

牛市充滿樂觀，熊市充滿憂愁，此乃無可改變嘅現實。當年阿虫請食飯，共同研究點樣振興香港經濟，席間我老曹曾話「港人有咁耐風流，有咁耐折墮！」點知阿虫響公開場合亦口沒遮攔，結果畀市民臭罵。我老曹從此唔敢再講呢句話。

只系任何事物皆為相對性而非絕對性，1997至2003年嘅憂愁，帶嚟2003到07年嘅歡樂，2007年11月又開始哀愁嘅日子。

今天已冇人同我老曹爭拗系咪熊市，大部分人都認同香港股市已進入一個Secular bear market，雖然有反彈卻冇上升。響熊市中賺錢如逆水行舟，我老曹一向主張響熊市中宜持盈保泰，至于博反彈最好留畀專家，如自己技癢，最多只動用全部資金30％。

跌穿前低點唔代表熊三來臨

美股由7月15日至8月11日嘅夏日戀情結束（香港嘅夏日戀情更短，只有一星期，7月15日開始，7月22日已結束）。隨之而嚟嘅系三次打風，吹到本港投資者人仰馬翻。至于金屬及能源超級牛市系咪已喺今年3月及7月結束，抑或維持十三年，有待下回分解，今年港股贏家系嗰D肯Sell in May and go away者。熊市第一期由2007年10月30日31958點開始至2008年3月18日20572點結束，跌幅35.62％。熊市二期中最大一次反彈系5月5日26387點，然后進入漫長熊市二期下跌浪（一浪低于一浪）。最近跌穿3月18日低點20572點，唔代表熊三來臨，只代表熊市二期浪頂系5月5日26387點，響可見將來恆指再無法升穿26387點。熊市二期變幻莫測，除咗出現最大一次反彈（3月18日至5月5日）有一定可預測性外，其余波浪再無法預測了。呢段日子，我老曹通常行使「忍」字訣。

美國由1982到2007年長達二十五年嘅財富創造期系咪到咗告別篇，一如1997年7月香港？當年我老曹撫心自問，過去三十年由只有5000元身家嘅窮小子變成今天嘅小富，到底系自己努力嘅成果，還是時勢造英雄？當年我老曹曾提出「黃金三十年」論，但有几多人聽得入耳（不然亦唔會有咁多家庭陷入負資產嘅深淵）。我老曹認為，「三分努力、七分天意」，1968年如非誤打瞎撞入咗股票呢個行業，又如非父親早死令自己陷入少年窮，1967年可能已去咗加拿大讀大學。1969年如非自己冇錢拍拖希望寫稿賺外快，便唔會認識山木兄…。1997年如非面對人生交叉點，而作出投資倫敦嘅決定，便逃唔過一劫，2000年又何來資金投資黃金、資源股及其它？2007年9月面對港股直通車嘅消息又再出現困惑，四大銀行點解只有中國銀行有份？全國咁多大城市點解只系天津？中央政府點樣控制內地資金淨流出？港股直通車壓力下，A股豈不是將大跌？再加上美國次按危機爆發，我老曹便決定「三七」分（即70％改揸現金，只留30％股票）。到底系另一次幸運抑或系分析時勢嘅眼光？我老曹亦搞唔清楚。今天嘅擔憂（二十五年美國財富創造期結束），系咪杞人憂天？

成為「策略投資者」

1997年起我老曹已放棄價值投資法（Value Investing），理由系咁多大行研究，自己仲有乜真知灼見？因此唔再相信Buy and hold策略。其后漸漸相信動力投資法（Momentum Investing），背后理念系相對強勢（Relative Strength）便擇肥而食。當金價跑贏股市、當資源股跑贏大市時，只買強勢項目（外國叫牛眼投資法）。2006年6月起內地A股轉弱為強，便投資紅籌、國企；2007年10月內地A股轉強為弱，便放棄紅籌、國企。賺快錢唔賺慢錢，賺大錢唔賺小錢（Fast and big, not slow and small），賺錢速度太慢及太小，寧可唔賺。賺快錢及賺大錢嘅力量來自知識與分析，when to buy, what to buy, How much to risk, when to sell.（何時買入、買什么、風險多大、何時沽出。）如今我老曹已成為「策略投資者」。