中國要有自己品牌
8月4日，周一。恒生指數跌347.68，收報22514.92，成交490.65億元；8月期指跌487點，收報22382點，低水。
滙控（005）公布業績，純利跌咗29%，唔太差；恒生（011）亦公布咗業績，純利只升2.22%，反而有D令人失望，股價跌咗2%，收報155.4元。市場將因應業績嘅公布而作調整。踏入8月係香港業績嘅公布期，各公司因應業績嘅公布而股價有調整。
比利時富通好日子來臨
中國鋁業（2600）跌4.1%，收報7.41元，因氧化鋁嘅售價由每噸3500元人民幣，下調至200元；利豐（494）下挫3.4%，收報25.5 元；思捷環球（330）跌2%，收報80元；中石化（386）跌2.3%，收報8.1元；南方航空（1055）跌4.8%，收報3.38元；中遠太平洋（1199）跌5.8%，因波羅的海乾貨運指數連續十六天下降；鞍鋼（347）下挫5.4%，收報14.66元；馬鋼（323）跌6.3%，收報4.6 元，因政府宣布節約行動。
滬深三百回落2.38%，收報2773.15，二十六隻上升，二百六十四隻回落，因冇實質嘅利好因素，加上奧運在即，奧運嘅概念逐漸失效。
比利時最大銀行富通去年第二季淨收入8.3億歐羅（較去年同期16.2億歐羅減少49％），較十二位分析員估計嘅6.92億歐羅為多。
自去年4月宣布收購荷蘭ABN Amro銀行至今，富通嘅股價共回落咗65％。上月由Herman Verwilst取代咗前CEO Jean-Paul Votron，8月1日宣布再提升Gibert Mittler做CEO嘅特別顧問，相信富通最惡劣嘅日子漸成過去。
根據FC Universe嘅資料，美國上市五千五百多間公司中，已有二百一十六間話第三季每股純利下跌；九十七間話每股純利上升。用97除216得出負2.2比率，較今年第二季之前嘅負1.7比率更差；以標普五百為例，四十五間已話每股純利負增長，三十一間係正增長，以31除45得出負1.5（即大企業比率係負 1.5，較今年第二季前嘅負2.1較好）。
分析員喺4月1日估計今年第三季純利升17.3％；7月1日改為升12.6％；上周又改為11％；本周8.2％。其中變化最大係金融業由7月1日負4％，改為負28％。
從上述嘅數據睇，今年第三季業績展望亦唔係好樂觀。其中二線股嘅純利展望較大企業仲差。
美國經濟相信唔會出現官式衰退（即連續兩季GDP負增長），但低增長就無得避免，長達二十年嘅消費高速上升期面臨結束，加上2008／09年度財赤高達GDP嘅5％，新總統上任後，欲利用財政政策再刺激GDP增長嘅力量已極為有限。美國經濟正步入唔生唔死期。
1970年至今嘅六次衰退，美國工人生產力只上升0.8％，但去年第四季至今，美國工人生產力卻以2.5％嘅速度上升。上述嘅情況令人困擾；有D分析員認為，今次美國經濟唔係衰退只係轉移，由房地產及金融業轉咗去出口工業，理由係美元弱勢。
戰後至今嘅經濟愈來愈多元化，經濟愈來愈環球化，加上電腦普及及供應鏈嘅充分發展，搞到D存貨保持喺最低嘅水平；類似1973至74年及1981至82年因存貨滯銷，而引發經濟全面衰退嘅局面唔易再見到，新經濟（New Economy）令資訊科技設備喺各行各業被大量採用，市場對景氣嘅迅速反應令全面衰退喺理論上唔會出現。例如美國GDP增長率放緩到只得零增長，同時中國嘅GDP仍可保持8％增長；結果係美國房地產走下坡，但製造業及出口業來自中國及印度嘅需求而保持住興旺。反而人民幣升值、工資及原材料上升，令中國嘅製造業及出口業增長率放緩，同時又令中國嘅零售業繁榮。
愈嚟愈多國家加入WTO及經濟愈來愈多元化嘅結果，就係經濟再冇明顯嘅盛衰循環。取而代之係行業性盛衰及地區性盛衰（例如1997年亞洲金融風暴下，東南亞一塌糊塗，歐美卻欣欣向榮；今年歐美一塌糊塗，但原材料出口國嘅GDP仍保持高速增長）。
投資者脫離四大情緒
做投資必須與時並進，千祈唔好出現老幹部遇上新嘅問題——唔知點好?!例如越南共產黨領袖面對7月份CPI升幅達27％，唔知點樣好，如果把利率扯上29厘，越南經濟全面崩潰；反之，唔加強控制惡性通脹，造成嘅破壞好得人驚。
今天東南亞國家互相依賴，再唔似1997年前過分依賴美國去吸收佢地嘅電子產品及紡織品，形成咗美國GDP增長率放緩，對東南亞國家打擊較1997年美元滙價轉強少咗好多；例如馬來西亞同印尼本身亦係原材料出口國，今天嘅泰國央行行長Tarisa Watanagase亦較1997年嗰位富於經驗，佢明白有信用嘅中央銀行未必係受歡迎嘅中央銀行（嚴父出孝子，名師出高徒；好嘅分析員未必受歡迎，受歡迎嘅分析員唔一定係好嘅分析員）。
展望股市，我老曹仍認為係熊市二期，極之波動，作為投資者必須好好控制自己嘅情緒，莫太喜亦莫太悲。股市必須吸啜大量嘅投資者入市，然後先至出現另一次嘅大屠殺。作為投資者必須脫離恐懼與貪念，以及希望與歇斯底里四大情緒先可以成功。每次高潮過後，舊領袖股必死亡，喺新領袖股誕生前，大市死氣沉沉。
1950 年代，美國著名嘅經濟學家路易斯最先提出2元經濟理論。佢認為發展中國家，隨着勞動力及其他資源，由傳統農業轉向工業化過程中，令剩餘喺農業嘅勞動力日漸減少；最終出現喺農村工作嘅收入及進入城市工廠工作嘅收入拉平，便會出現製造業勞工嘅成本急升，引發過度勞工密集型產業倒閉，此乃著名嘅路易斯拐點論。
自2003年開始，珠三角開始面對路易斯拐點；自1980年起，中國嘅沿海地區迅速工業化，同時來自農村嘅勞動力長期供大於求，形成1980到2003年呢批民工嘅收入喺扣除通脹後基本上冇變化（勞工供過於求，資本家點解要加人工？）。隨着長三角出現及開發中西部地區，令農村嘅剩餘勞動力有了更大嘅出路；沿海地區嘅城市化進程加快，亦提供咗大量嘅服務業職位，終於到咗2003年路易斯拐點喺珠三角出現。依家加入人民幣升值、原材料漲價及物流成本增加等因素，將加速過多勞工密集型嘅產業倒閉，令勞動力出現重新嘅分配。
內地中小企今年難捱
作為珠三角地區嘅廠家，唔好希望勞工成本重新下跌；上述係冇可能出現嘅事。應走南韓之路，由世界工廠轉型為世界設計室及世界名牌原產地，走自主創新及品牌建立嘅路而唔係低成本及廉價貨嘅路。
對中小企業嚟講，今年天氣特別凍，既有雪災又有四川大地震，毫無疑問中小企嘅嚴冬已嚟到。生產成本不斷上升，需求卻喺度下降，令成品加唔到價。再加上央行採取緊縮嘅貨幣政策，相信今年下半年同明年上半年係內地中小企嘅嚴冬，捱得過嘅日後仲可以生存及壯大，捱唔住嘅將因資金鏈斷裂而搞到停產或破產。一場極之嚴峻嘅考驗已開始。高能耗、高污染及高勞工密集嘅企業將面對淘汰，讓位畀先進嘅製造業。
《國際先驅論壇報》嘅專欄作家Howard W. French認為，過去一代嘅中國人透過克苦耐勞而取得奇迹般嘅成就，做咗好多仍喺貧困中國家嘅榜樣。不過，佢認為中國嘅模式已到咗極限。依家不但唔好再誇耀中國嘅模式，而且應擺脫過去嘅觀念，才能有更大嘅成就。中國人再唔可以透過刻苦耐勞而創造更大奇迹！過去中國嘅改革開放政策適逢全球化浪潮開始而取得莫大嘅成就，當全世界其他落後嘅國家都希望抄襲中國嘅模式時，呢個方法已行唔通。中國未來必須走自主創新及品牌建立之路。
慢慢等A股V形底
我老曹話1967至97年可以揸貨賺錢（Buy and hold）；甚至喺1973年3月1700點時入貨，只要有耐性，揸到1997年恒指見17000點時出貨，仍可賺十倍。1997年起，賺錢嘅方法係放眼世界及胸懷祖國。既可喺1997至2000年3月外國科網股身上賺錢，亦可喺2000年起內地資源股身上賺大錢。今年喺2008年，時光永遠唔會倒流，未來賺大錢嘅機會喺邊？唔使灰心，It is still a Wide World of Great Opportunity，但機會唔喺美國亦唔喺西方國家，而喺中國嘅中產階級冒起。美國只得三億人口，歐洲區亦差唔多；日本得一億二千八百萬，三個加埋亦只得七億；中國卻有十三億人口，再加印度嘅十億，兩大國二十三億嘅人口正由貧窮走向小康，再由小康走向中產；仲有東歐、中東及東南亞等。中國經濟正由出口及製造業為主，急速轉向內部消費。我老曹預測一個V形反彈遲早喺內地出現，今天只係耐心等候股市嘅V底。我老曹喺1974年7月恒指460點時入市，而唔係喺12月150點，令我老曹後悔咗一生。因此，內地Ａ股唔好太早睇好，點樣捕捉早唔會早遲唔會遲嘅機會呢？9月我老曹將喺研討會上同大家分析，請留意本報嘅廣告。後市展望係油價跌破100美元同升穿200美元，可產生兩個唔同嘅2009年。因此，需要D時間觀察。我老曹嘅想法係Invest because of China, but not in China！（投資係因為中國，但唔係投資中國。）
一如Peter Bernstein所言劃時代嘅改變將會出現。例如1929年、1966年及1982年，舊嘅投資方法漸漸死去，新嘅投資方式出現。未能了解潮流嘅改變者喺1929年股市大危機中沒落，由新生一代取代；1966年未能了解通脹來臨威力者亦被淘汰；1982年信貸膨脹嘅時代來臨而冇好好利用者亦出局。今天我地正面對東西方地位改變，東方冒起而西方下沉嘅新舊交替期。西方嘅經濟面對樓市泡沫及信貸危機而陷入綿綿不絕嘅衰退期（情況好似九十年代嘅日本）；東方經濟正進入脫胎換骨期，逐漸由出口及製造業改為內部消費，未來二十年中國嘅GDP仍可保持每年6％實質增長！至於滬深A股熊市可能喺2008年年底或 2009年上半年結束，並進入漫長嘅牛市，因為未來有三億至五億嘅中產階級人口喺中國出現，2008及09年只係青黃不接期。
參考2000年3月至02年10月嘅美國科網股爆破後共有三次反彈，升幅超過20％，一次升幅超過30％；依家嘅港股熊市出現第二期大反彈仍有排搞。喺熊 市中只能追求零到3％嘅回報率，以持盈保泰為主（除非你拋空），直到經濟衰退真正出現時才全身投入。短期而言利用熊市二期中嘅反彈賺少少。直到熊市完成 日，先係賺五倍到十倍利潤嘅時候。
IndyMac Bancorp上周五申請第七章（破產保護令），正式由政府接管及清盤還債，估計債權人可收番50％投資（存款10萬美元以下者唔受影響）。外國股市愈來愈Ugly，因進入漫長嘅減債期。
國務院辦公廳關於深入開展全民節能行動通知各省份開展十大全民節能行動：
一、除咗特殊公務車外，各級行政機關、社會團體、事業單位及國有企業公務車按牌號尾數每周少開一天；星期一至星期五停開公務車牌於尾號分別為1、6；2、7；3、8；4、9；5、0。其他嘅單位及個人參照上述嘅原則，每周少開一天車，更多選乘公共交通工具。
二、公共建築夏季嘅室內空調溫度唔可以低過攝氏二十六度；各廈室內空調溫度唔可以高於攝氏二十度；三層樓以下原則上停開電梯，非高峰時減少電梯運轉台數。
三、合理開放和關閉路燈，試行間隔開燈；娛樂場所嘅霓虹燈要減少用電。除重大慶祝活動，一律關閉景觀照明。
四、鼓勵消費者購買節能產品認證標誌嘅空調及冰箱等家用電器；鼓勵使用節能燈及環保型小排量汽車。
五、嚴格限制生產、銷售及使用塑膠購物袋，提倡改用布袋、菜籃子，以及重複使用環保購物袋。
六、提倡唔使用一次性嘅筷子、紙杯及簽字筆等等；酒店唔主動提供一次性嘅洗漱用品，限制過度包裝。
七、除非重大外事活動，其餘公務活動一律穿便裝。
沒有留言:
張貼留言