2007-09-03

無懼已可成功一半

　　9月2日，周日。8月股市乃典型牛、熊共舞，無論跌幅或升幅都令人感到詫異，其速度之快、幅度之大，可以話嚇你一跳；9月又會點？恒生指數係咪向 25000點進軍？美元利率係咪由5.25厘減至4.5厘？好多人將7月開始信貸收縮期誤為資金減少期。兩者表面上相似，其實唔一樣，今時今日市面上資金仍然十分充沛，來自中東油元及來自中國熱錢仍十分多，但次按問題引發信貸收縮亦同時出現，恒生指數平均O17倍，唔可以話貴；反之，國企O24倍以上已進入牛市三期。但短期資金繼續流向紅籌、國企。另一方面，二線股遭8月洗倉後，以基礎分析睇，可用「便宜」兩個字去形容，即現今股票市場同時存在偏高、合理及偏低股份（但偏高股份短期唔一定回落、偏低股份短期唔一定上升）。

信貸收縮並非缺乏資金

　　8月道指升1.1％、標普500指數升1.2％、納指升2％；上周五阿殊認為次按問題對整個經濟整體影響十分溫和，同時強調政府唔會為次按出問題財務機構提供援手，只會協助個別供樓有困難家庭。去年12月止美國有750萬個次按貸款者，借入14000億美元（Center for Responsible Lending組織提供資料）。估計約有200萬家庭因次按問題可能失去住房。波浪理論作者普切特（Robert Prechter）9月份投資通訊中話，美國樓價已連續下跌十個月，係1930年以來最長一次連續下跌。上述情況只有九十年代日本曾出現過或1997年 8月後香港才出現過；佢擔心美國一如九十年代日本或1997年8月後香港，正逐步走向通縮仲唔知道。佢話，1920年美國最先回落係房地產，然後才係商品價格，1929年才係股票，甚至9月18日美國聯儲局減息作用亦唔大；這點可由1990至2003年日本或1997年8月至2003年4月香港情況可以證明。日本減至零利率後，地產及股市仍繼續下跌（2003年年中香港亦減息至1厘，樓價同股市一樣下跌）。最近二十年普切特多次睇錯市，影響力已大減，但亦有人認為智者千慮必有一失、愚者千慮必有一得，壞鐘每天都有兩次係準。日本錯失由1985至89年年中政府一直抗拒日圓大幅升值而濫發日圓，結果引發信貸泡沫，1989年6月至90年6月日本銀行收得信貸太緊而篤穿泡沫經濟。香港金管局亦犯上類似錯誤，1990年初美元因減息造成大量資金湧入香港，為抗衡港元升值，金管局提出負利率政策（結果香港冇出現真正負利率，但1990至97年本港利率大部分時間低於通脹率，出現變相負利率環境，一如近年中國）。1997年7月亞洲金融風暴，對沖基金炒港元貶值，金融局用挾息政策將利率推高至兩位數字，令本港信貸快速收縮，引發經濟進入通縮期。有了日本同香港例子，各國中央銀行努力避免再犯相同錯誤，當7月26日次按問題引發全球股市急跌時，各國央行聯手救市，避免九十年代日式經濟或1997年8月後港式經濟其他國家重演。普切特估計，美國進入通縮暫時睇機會唔大，但唔排除有呢個可能性。雖然貝南奇講話並冇顯示9月18日一定會減息，只係話會提供足夠流動資金維持市場秩序。各位不妨諗諗如果9月18日美國減息而歐洲央行繼續收緊銀根，另一次美元弱勢又會開始，呢種形勢對美國長期發展不利。假設9 月18日聯儲局減息0.25厘，10月再減0.25厘，日後再減0.25厘，結果又會點？依家兩年期債券利率4.13厘、十年期債券利率4.53厘、證明市場資金充沛，只係信貸進入收縮期（信用欠佳者借唔到錢，信用良好者大把人想借錢畀佢）。

　　商品方面，今年所有商品指數過去十二個月係零增長；反之，農產品價格卻上升45％，商品價格已見頂（雖然未回落），今年8月以後係咪又到工業股尋底日子？至於農產品全球需求穩定上升（尤其係中國、印度等國家），但供應極受天氣影響，我老曹從來唔預測農產品價格，因為過去三十五年冇一次睇得準。

日本經濟復甦能力仍弱

　　日本自1990年開始進入經濟回落期，相信2003年已見底。今天日本銀行呆壞賬已處理，日本通縮壓力逐漸減退，地價唔再下跌（部分已回升，例如東京），失業情況已大大改善，但政府無法取得大多數，形成弱勢領導，令改革進行緩慢兼有困難；日本經濟好大程度上依賴零利率政策及日圓弱勢提供增長，情況有如久病初癒病人，連站起來亦感吃力。

　　日本戰後經濟增長建基於強大出口能力，至今為止日本出口企業世界上競爭力好強，令日本產品風行全球，但日本金融業卻相當落後；企業之間互控結果牛市中可誇大企業利潤（因所持有企業股價上升產生利潤），熊市中卻蠶食企業利潤（因所持有企業股價回落，蠶食企業其他方面利潤）。面對問題企業，決策層採束之高閣政策，以為時間可慢慢將問題淡化而非即時處理，唔及時止蝕係日本企業另一問題，結果大企業內出現「望窗一族」（職員返工天天望住個窗口睇街景冇事做）。附屬機構中唔少「殭屍」，公司已無法正常運作，卻仍然存在。過去日本零售業缺乏效率，有人計過，產品由生產商到消費者手中，必須經過幾十間公司層層剝削。結果一件成本10元產品，必須賣200元才有錢賺（因幾十間公司從中取利），令日本人均收入37000美元仍然食得唔好、住得唔好、穿得唔好。隨市場開放，外資企業入侵，提升整體零售業效率，令成本10元產品只賣100元，引發日本通縮，結果整個日本零售業在過去十五年出現大倒風。

　　換言之，我老曹只同意日本經濟2003年見底，但認為日本經濟復甦能力仍然相當弱。

選股策略追贏家沽輸家

　　將來唔係過去延續，希望唔係一個投資策略，只要投資回報保持每年15％，資本每五年倍增一次。1967到97年只要係睇大市，已可發達，因恒生指數由64點升到16800點，上升262倍；但1997年至今卻必須選股方面表現出色才可，過去十年恒生指數共上升43％（跑輸定期存款回報），要有出色表現，必須選股正確（Equity Concentration）同時採用三七分，即恒生指數O18倍以上，只投入30％資金；恒生指數O十二倍以下，投入資金佔總投資金額70％。咁樣一來，跌市來臨時，閣下只投入30％資金；升市出現時，閣下卻有70％資金股市。如閣下仲一味估底及估頂，結果往往決定錯誤；其次係追逐贏家，沽出輸家，盡量購入表現出色股份，放棄令人失望股份。

　　社會並唔獎賞勤力人，只獎賞有眼光、有勇氣人。勇者無懼，做人必須無懼面對失敗（只要唔係一敗塗地）、無懼面對成功（成功都要怕？真，90％人內心深處係害怕成功）、無懼批評（每個人都會受批評）、無懼貧窮、無懼新科技、無懼學習新事物、無懼感到自己愚蠢、無懼犯錯（只要係小錯而非不可挽回大錯）、無懼承擔責任……。你可以咩？只要將恐懼從心裏挖出來拋掉，你已成功一半。