2007-09-24

金融市場「與狼共舞」　　

9月23日，周日。9月18日聯儲局決定減息半厘，令上周美元跌1.6％，美見78.398，係1992年9月以來最低。美國政府寧可犧牲美元價都要維持「黃金歲月」！上周全球股市、外幣及原材料價格皆升。金融市場進入「與狼共舞」期（Run with the wolf），唔少股份被炒至夢幻價；股票進入「買賣」時段。另一方面，股市一分為二，有D股份現價買入，一旦熱潮過去，可令你日後貧窮；有D股份漸由過去不景氣中恢復過來，未來可為你帶來過百萬元回報。換言之，揀股已決定一切，揀到好股可帶來驚人利潤、揀衰股……仲係唔好批評別人。我老曹早已放棄利用傳統分析技巧，改為採用牛眼投資法，即資本分成幾份細份，目標係射中牛眼，博取100％、200％甚至300％回報。一旦睇錯市，便損失15－20％止蝕。例如將投資資金分成五份（錢多者可分成十份），只要其中有三幾份射中牛眼，其利潤便極之驚人。尋股方法只有六個字：就係尋找未來一年「純利大幅增長」或「純利轉虧為盈」股份，只有呢D股份才能帶來爆炸性回報。 減息高於預期應有後遺症　　

貝南奇呢次減息行動（估計10月仲有一次）應有後遺症。例如油價升上每桶84美元才回落，盎斯金價見745美元才調整，但短期刺激卻好大。9月通常唔係大市見頂月，相信高潮在10月，但要記住，依家已進入「與狼共舞」期。美國經濟已打第一個噴嚏，可能感冒緊，與過去唔同，呢次係美國打噴嚏，中國A 股卻創新高，港股變成《雙城記》（靠美國經濟者衰、投資集中內地者盛）。　　

小學書本教落：有隻小雞眼見烏雲便吱吱喳喳叫：「天要塌下來了。」鬼佬有句叫「chicken feet」（腳軟者）。今年1月內地A股泡沫論者係咪好似小雞一見烏雲便以為天要塌下來？策略投資者懂得不在泡沫中瘋狂，而係利用泡沫去壯大自己（例如沖個泡泡浴）；港股情況亦一樣，依家係咪過度投機？就算係，但經濟成長過程中，泡沫產生無可避免，此乃盛衰循環，策略投資者應學曉浪起時加入，浪退時離開，而非整天呱呱叫天要塌下來。有時一場雷雨無可避免，但雷雨過後（例如8月17日）唔係又再天朗氣清時？股市頂邊度？你我都唔知，請不要扮先知。　　各位有冇聽過小馬過河故事？有一天小馬欲過河，便走去問長頸鹿叔叔水有多深？長頸鹿話水好淺。小馬又再跑去問松鼠，松鼠話水很深。搞到小馬唔知點算好？所謂「股市專家」，佢地都以本身經驗去話畀散戶知。我老曹好反對打電話問功課投資法，小馬如要過河，必須自己去了解、研究，唔使聽長頸鹿話，亦唔使問松鼠。

波動可產生非理性高價　　

減息有如嗎啡針，暫時止住次按危機所帶來痛苦，第一針（8月17日）十分有效，第二針（上周）仍然有效，每次必須落藥重Ｄ才見效，最後都係無效，因為嗎啡只能止痛不能治病（不然1990至2003年日本經濟唔會咁差；日圓利率已由6.5厘減至0.25厘）。香港1997年8月至2003年4月亦唔會咁曳（港元追隨美國利率由6.5厘減至1厘）。減息唔係乜仙丹靈藥，不能藥到病除只係強力止痛劑而已；如果唔痛便以為大病已除，咁就大錯特錯。今年歐羅已升值7％，澳元升值10％，加元最威，升值16.5％，未來美元下跌空間仲有幾多？CCD指數（Continuous Commodity Index）上周已升至三十年內高位，金價、油價同原材料價格由8月17日起再次進入上升趨勢。技術上睇，行業性升降繼續（Sector Rotation），投資市場同過去一樣，當人們興奮之時便追求高回報，一旦恐慌又擔心失去本金。畢非德話，投資者喜歡波動，大市一旦波動，便可產生短期低價及非理性高價，總有人賺到錢！例如8月17日至今港交所（388）股價升幅接近150％。今時今日叫投資者冷靜係冇用，點樣風高浪急金融市場賺錢，已成為一般人渴求知識及技術。呢方面涉及控制自己情緒及適當地運用投資技巧，賺錢時刻往往一般人感到恐懼時、然後一般人feeling good時獲利回吐；上述方法人人皆知，但大部分人做唔到。

全球糧食能源化　　

去年至今玉米、小麥、植物油相繼出現牛市，農產品一波又一波上漲，背後原因係全球糧食能源化（糧食加工成為石油）。9月20日中國發改委提出唔再核准新建玉米深加工專案及國務院常務會議提出嚴格控制油籽轉化為生物柴油專案。玉米係中國三大主要糧食作物之一，不僅係食品同時係飼料，去年玉米添加工業用去玉米總消量26％，去年中國玉米燃料乙醇加提年產約150萬噸，已超過中國玉米產量可負擔水平。

石油和糧食關乎中國安全　　

國家鼓勵玉米加工企業走出去，例如非洲、拉丁美洲等國家，建立玉米生產基地，將產品輸入中國支持畜禽養殖業，減少國內糧食生產壓力。中國不但玉米面對供不應求，油脂行業係最早國際化農產品行業，依家大豆對外依存度約50％；80％豆油加工業外資手中，家擔心油菜籽及植物油亦面對相同問題。中國人多地少，如大量糧食用於工業專業，大大影響糧食安全。石油同糧食係中國安全兩大問題，如何平衡兩者矛盾及農民利益？係一個不得不面對大問題。