2007-09-20

貝南奇直升機　
　
9月19日，周三。恒生指數升977.79，收25554.64；成交1387.34億多元。9月期指升1106點，見25687點。今天日經平均指數升3.7％，恒指升4％，期指升4.5％。鷹君（041）半年獲利升五倍，股價升5.7％；新地（016）升6.3％；長實（001）升7.2％；恒隆地產（101）升11％。金管局將本港隔夜拆借利率降至6.25厘，豐、中銀香港（2388）、恒生（011）、渣打俱宣布減息0.25厘。中海油（883）升12％，收報11.98元，因紐約原油升至81.57美元，遠東區成82.38元。電盈（008）升4.7％；東亞（023）升3.7％。北京控股（392）升15％，至39.3元，因半年純利上升四十倍。建設銀行（939）升4.1％，因該行上海IPO發行A股集資580億元人民幣。渣打（2888）升7％，報250.2元。

美息減至4.5厘便差唔多　　

花旗推介濰柴動力（2338），目標價75.5元。高盛推介北京控股（392），目標價38元，同時推介渣打。　　

今次係貝南奇第一次直升機周圍去擲錢，好大手筆，減息一減便0.5厘，令周二道指上升2.51％，標普五百指數上升2.92％，納指上升 2.71％。分析界估計，下周再減息0.25厘，至4.5厘，咁便差唔多矣。呢次減息時機尚未成熟，目的只係阻止次按危機擴散，一旦次按問題受控制便會停止。換言之，今年9月開始減息，同2001年1月至03年6月次唔同，上次目的係阻止通縮美國登陸，利率由6.25厘降至1厘；呢次減息時，美國 CPI增長率仍處於令人擔心水平，例如油價早由2001年每桶10美元上升到近期81.57美元，金價正挑戰去年高價730美元一盎斯水平。短期利率一旦減至十年期息率（4.48厘）水平，便已經差唔多，估計未來利率企4.5厘，對股市長期刺激十分有限，短期則令全球大部分股市上升。　　

從另一角度睇，呢次減息如刺激通脹率進一步上升，就係一次錯誤決定，只會令股市短期上升，長期反而不利，因為當通脹率上升時，可令債券價格回落，長期利率上升。所以各位唔好恰皮得太早。　　格蛇質疑聯儲局目標通脹率2厘係咪仲存在？依家核心通脹率2.1％，相信年底前可跌至2％以下。英倫銀行認為，英國通脹壓力在下降中（英國8月份 CPI升1.8％），英鎊7月24日見二十六年高位2.065美元後，回落至略低於2美元。9月17日英國財長向Northern Rock銀行所有存款提出包底，以停止擠提潮，睇英國亦有可能加入減息行列。值得注意係歐洲央行態度，佢地會否加入減息行列？如歐洲唔加入減息行列，將令美元價受壓，聯儲局未來減息空間更加有限。

醞釀滯脹須留意金價　　

呢次聯儲局不但減聯邦基金利率，同時降低貼現率，代表聯儲局繼續採取寬鬆貨幣政策，而忽視通脹或滯脹壓力；更加令人擔心係聯儲局獨立性，例如會否政治壓力下而低頭？如美元價因此下跌，便再唔係美國人出外旅行發現美金受歡迎問題，甚至唔係入口通脹上升問題，而係動搖債券持有人信心而拋售債券問題，此舉將令長期利率上升……，上述情況七十年代曾出現，唔通如今二十一世紀重演？美國滯脹局面已在孕育中，請留意金價，如金價升穿730美元，後市相信幾麻煩。同2001年唔同，當年有通縮威脅；今天無論油價、原材料價、農產品價都高位，美國失業率亦只有4.6％，減息到底係為解決問題抑或係製造問題？有待進一步觀察。次按問題將華爾街一分為二：部分企業受次按影響而走向純利回落期，財富不斷消失中；另一部分仍然不斷增長，為投資者帶來利潤，代表揀股唔炒市持續。8月份被接管房屋共243,947間，較一年前113,300間上升115％（7月份被接管房屋179,599間）。9月份減息後，被接管房屋到底係多抑或係少？好快便知道。歷史證明，減息無法刺激樓價上升，呢次亦應該唔例外。　　

美國8月份房屋動工建築數量跌至十二年新低，只有年率一百三十五萬間，係1995年6月以來最低（7月份係年率一百三十八萬一千間）。減息半厘能否扭轉美國樓市劣勢？根本上，家48％次按貸款者未符樓按資格。第二季美國樓價回落3.2％，被接管二手樓需要9.6個月時間才能賣清，股市興高采烈之後，投資者一旦冷靜下來，股市又會再下調。雷曼兄弟宣布8月31日止第三季獲利8.87億美元或每股1.54美元，較去年同期減少3.2％，仍較第二季減少32％，較分析家估計每股獲利1.47美元為佳，引發股價上升10％，見64.49美元，係2001年4月至今最大升幅一天。另外三間金融企業業績又點樣？雷曼兄弟股價自2月份起回落30％，呢次只係一次反彈。大摩獲利減少7％，至14.7億美元或每股1.38美元，較分析界估計每股1.55美元略差。依家要睇睇周四另外兩家公司宣布第三季業績係點。　　

一個波動股市，郁D便上升1000多點或回落1000多點，分析大市走勢變成浪費時間，投資策略係點樣搖擺不定股市中獲利？　　

中國股市連續第二天收低，滬深指數下跌1.1％。寶鋼下跌3.1％，鞍鋼下跌4.1％，重鋼跌4.1％，馬鋼下跌4.4％，主因係中國熱軋卷鋼價格過去四天由9月12日十五個月高點回落。不過，平安保險升7.8％，國壽升2.4％。大摩認為，美國減息唔會動搖中國加息，相信中國仲有兩次加息，而美國減息可加快人民幣升值速度。

內地煤需求持續上升　　

最令人擔心係食物價格，例如小麥、玉米及其他穀類產品都大幅上升。9月油價上升11％，係去年1月以來升幅最大一個月份，減息刺激下，油價會否見100美元？中國計劃用煤變油去減少石油入口，估計2010年中國要三十億噸煤一年。未來六個月煤需求上升8.5％，不但刺激未來煤價上升，同時將對全球空氣造成污染。　　

智富能源（1051）、北京時裝（761）、多金控股（628）、中國燃氣（384）停牌。