2007-09-07

主權基金牴觸藏富於民　　

9月6日，周四。恒生指數跌18.77，收報24050.40；成交額只有794.12億元。期指高水，升21點，收24071點。　　

美國最新經濟數據顯示經濟增長放緩不容忽視，次按問題本月底第三季結算，可以好大鑊。美股再次日升日跌，恒指上午低開，見23853.05，但係油價回升至每桶76美元，令石油股向好，亞洲區股市亦見有趁低吸納下回升，以台灣及南韓表現最佳，刺激港股收市差唔多原地踏步。表面上指數處於高位，好似有好多人賺錢，但實際上近月市況好似過大海買大細，碰運氣居多。呢段過山車般市況睇怕仍要持續一段日子。

內地加息預警機會大　　

藍籌股以中移動（941）與控（005）呢兩隻重磅股比較弱，與稍後恒指成分股加入新貴及調低比重有關。港交所（388）則因為內地資金自由行遲早到位，加上內地銀行QDII港股投資產品好快成為內地理財產品，細水長流格局無變，股價因而受益。地鐵（066）與九鐵合併在即，大行紛紛為其所接收鐵路上蓋物業升值計數，更加上調目標價，引來唔少追捧。　　

中遠洋（1919）等A股持續漲停板，連同上海電氣（2727）A╱H一齊炒上，令國企指數收14423點，升136點，建行（939）再創新高升 3％。市場估殊仔同胡總澳洲會面後，人民幣升值靈活性會再度調高，連溫總亦話會深化金融體制改革，推進率機制改革，暗示人民幣升值之勢持續。不過，佢提及宏調首要任務係避免經濟增長由偏快轉向過熱，收市後即見人行拿拿林公布9月25日起再上調存款準備金率0.5％，至12.5％，試圖抑制貨幣信貸過快增長，係咪會稍後公布8月份通脹上升下加息以作預警，睇機會好大。當然中央並唔寄望下月十七大前達到降溫效果，不過市場力量內地正挑戰以穩定大局為主金融政策，暫時降溫效果一般，但駱駝背上最後一根稻草遲早出現。　　

短期而言，內地加息並不足以令經濟降溫，正如美國減息亦難以扭轉美股方向，道理一致。

第三季未使擔心住　　

雖然受美國次按問題困擾，MSCI中國指數上月仍升6.5％，主要係中期業績公布理想，原材料股平均升幅12.4％、電訊股升11.2％，消費股亦升 3.1％；反之，IT股卻回落8％，睇第三季唔使擔心。不過，8月份CPI升幅聽講較7月份5.6％更高。摩根大通建議減持中國電信（728）及大連港（2880），增持紫金礦業（2899）、深圳高速（548）、馬鋼（323）、富力地產（2777）等。估計MSCI每股獲利較去年上升18％（上半年升32％）；A股上半年每股升幅更達75％，全年升57％，明年純利升幅自然放緩，但相信升幅不俗。分析界期望QII通車後，最終有1000億美元（7500億元人民幣）資金流入香港金融市場。　　花旗推介恒安國際（1044），目標價30.4元，估計今年每股獲利86仙，升24.4％，O30.8倍；亦推介中國電力（2380），估計每股獲利23仙，升8％，O16.2倍。　　

8月20日國家外管理局宣布，天津濱海新區開展業務試點，批准境內居民直接投資港股，引發本港H股大升。有人形容A股係高原上青海湖，香港卻係水平線上大海，如果直通車真係暢順無阻，到底係大海海水升至高原青海湖水平抑或高原青海湖水一下子流乾晒？上一次讓內地居民可用外幣買B股，已經令 A股市場大幅回落，如果真係畀內地居民暢通無阻咁來港買股，水向低流乃係定律也，依家A股偏高現象能夠維持幾耐？　　

《中國證券報》消息話，港股直通車業務試點將擴大到天津、北京、上海及廣州四處地方，除中行（3988）外，仲加入工行（1398）及建行；准入門檻提高至30萬元，時間表係兩個月內。香港H股有142隻，A＋H股只有45隻，紅籌股88隻。本港H股同紅籌股自8月20日起已大幅上升，去歡迎內地同胞來港高價接貨！　　

另一方面，先行一步QDII自推出以來，反應只係一般，最近受港股直通車消息刺激，情況才比較上好一D。傳中國監管機構計劃降低標準，認購下限由30萬元降至10萬元。　　小麥價格又升至新高矣，埃及、伊拉克、印度、南韓及台灣都大量購入，日本亦計劃增購，而澳洲產量可能較以前估計少24％。去年小麥價格已上升一倍，全球小麥存量降至二十六年新低。最近芝加哥小麥期貨價格8.49美元一蒲式耳。最近埃及向美國同俄羅斯購入47萬公噸、伊拉克向美國購入20萬噸、台灣購入 4.6萬噸、印度79.5萬噸、日本打算購入17.5萬噸。2007至08年小麥產量估計只有1.1480億噸，其中第三大小麥生產國澳洲受天氣影響，產量可能由2250萬噸跌至1600萬噸。

小麥漲價麵粉貴過麵包　　

日本政府已宣布國內小麥10月1日起加價10％，日清即食麵宣布1990年以來第一次加價，由10日圓升至20日圓，1月1日起生效。呢回真係麵粉貴過麵包？　　

澳門威尼斯人賭場第一周新客突破50萬（8月28日開幕日人數達17萬），睇外界擔心澳門酒店住房率同賭客滿率應該唔成問題。澳門逐步由賭埠變成購物區，真正拉斯維加斯式賭場開始出現（即係一家大細去度假地方）。　　澳門移民局效率繼續令人失望，成為澳門發展旅遊業最大阻力。香港到澳門水翼船只需一小時，但過移民局卻需要一小時，輪候的士通常又需要半小時。澳門政府效率根本上追唔上澳門賭業發展，停留1999年前水平。　　

澳門豪宅已升至8400元一方呎，澳門政府應設法改善出入境效率及交通情況（假期去澳門等的士會令人好洩氣）。　　反觀上海五年前出入境情況仍然令人不滿，街上等的士（尤其係下雨天）會令人發誓以後唔再去上海，東方航空（670）誤點如家常便飯……。不過，上海情況每年都見改善。今年上半年去上海出入境效率已接近香港，街上等的士雖然唔及香港，但可以接受（例如等十五分鐘）；上海航空服務水平已同港龍分別唔大，令我老曹心思思下半年得閒又會去上海，甚至有興趣投資房地產。　　睇澳門移民局效率必須迅速提升，澳門的士情況再唔改善肯定趕客（唔通叫遊客行路咩），或可向澳洲悉尼學習，建立單軌市區電車。　　

今年香港再獲「全球經濟最自由地區」美名，分數更高達8.9，第二係新加坡8.8、第三紐西蘭8.5、第四瑞士8.3、第五加拿大8.1、英國 8.1、美國8.1；令人奇怪唔係愛沙尼亞排第六（或第八，因為第五名有三個國家）8.0，然後係澳洲7.9及愛爾蘭7.9。德國排第十八（7.6）、日本排第二十二（7.5）、法國五十二、印度六十九（6.6）、中國八十六（6.3）、巴西一百零一（6）、俄羅斯一百一十二（5.8）。經濟上最唔自由地區或國家大部分非洲。經濟繁榮有賴經濟自由而非民主制度，呢點好多人搞錯。香港至今有自由，至於民主卻極之有限；反之，印度有民主而經濟自由（近十年已改善好多）仍排名六十九，甚至法國經濟自由度亦只排名五十二。中國排名八十八，代表可改善空間好大，例如唔少行業由國企壟斷，而非自由市場決定勝負。　　

我老曹一生人見過三次股市（或物業）價格極廉期：第一次係1967年香港暴動，當年自己剛中學畢業加上家貧，眼見銅鑼灣豪宅（約3000方呎）售價 12萬元，而冇錢買，只有嘆奈何。第二次係1974年12月石油危機之後，恒生指數跌至150點，當年我老曹亦係大輸家，眼見恒生指數平均O6倍亦冇膽再買。第三次係1982年中國政府宣布1997年7月收回香港主權，恒生指數跌至600幾點，呢次唔同喇，手上有D錢兼有信心……。我老曹一生人亦避過三次輸大錢機會，第一次係1987年10月股災，張立兄話我老曹知佢此役一鋪清袋，情況較我老曹1973至74年更差；第二次係1997年8月本港樓市大倒風；第三次係2000年科網股泡沫爆破。

國窮民富勝過國富民窮　　

中國投資公司管理層包括樓繼偉、高西慶、張弘力、謝平、胡祖六等，仲有一位來自人行高層，注入2000億美元資金，來自中國財政部、央行、社保基金及國際知名投資行例如高盛。其發展方向借鑑新加坡政府淡馬錫發展基金，向全球投資但不涉政治。　　

新加坡淡馬錫主權基金1981年創立，當年擁有資金50億美元，今天已發展成為市值1400億美元主權基金，過去二十五年出色表現，家已成為北京、東京、中東國家模仿對象，紛紛成立主權基金。作為基金管理者，淡馬錫基金可以講十分成功，過去二十五年平均每年回報率9.5％（同期全球CPI升幅每年5.3％）；何況該基金投資主力美國、歐洲同日本，反而唔可以投資新加坡（以免與民爭利），國際間表現好似私募基金而唔涉及國家主權，以免染上政治色彩。九百員工來自世界各地，新加坡政府只派出一名官員加入十三人組成董事局。　　

雖然係咁，如各國紛紛成立主權基金以國家財力去投資，對私人投資係咪真係冇影響？有待經濟學家呢方面作深入探討。我老曹想法同「藏富於民」有所牴觸；我老曹希望「國窮而民富」（類似美國），而非「國富而民窮」（類似中國）。呢類主權基金應否大力發展？見仁見智。