2007-09-26

狂牛要歇歇腳 　　

9月25日，周二。恒生指數跌121.65，收26430.29；成交1291.7億元。9月期指跌115點，收26380點；10月期指跌111點，收26474點。港交所（388）跌2.4％，收232.6元。建行A股內地上市，建行H股（939）今天跌7.1％；收7.1元，A股較招股價高32％，收8.53元。中移動（941）升2.5％，收121.1元；中聯通（762）升4.9％，收14.56元；中國電信（728）升7.1％，收5.14元；網通（906）升3.5％，收19.46元。里昂證券把中移動目標價由110元提高至140元；雷曼兄弟亦把中移動目標價提高39％，至136元，理由係一旦政府允許購買香港上市股票，內地投資者將大量來港吸納本港上市電訊股，而且中國政府短期內將宣布電信行業問題決策藍本。

內地航空公司收購戰將平息　　

國泰航空（293）股價創下近六年最大一天跌幅，跌8％，見20.8元；中國國航（753）跌17.1％，係有紀錄以來最大單日跌幅；東方航空（670）亦出現六年來最大一天跌幅；其他內地航空公司股股價亦大跌，因為預期收購戰將平息。野村證券駐港分析師Jim Wong認為，中國政府肯定已經話畀國航同國泰知，千祈唔好搞喎新航入股。中國政府態度係利用外資入股東航去加強國內航空業競爭，唔願見到航空業出現寡頭壟斷情況。咁環境有利消費者，但不利營運商。美林證券把國航評級由「中性」調低至「沽售」；東航由「買入」調為中性；國泰評級則維持「沽售」，理由係估值已偏高。　　

每逢長假究竟應該持股抑或持貨？畢竟滬深A股指數已升至5500點【圖】，唔怕高人恐怕好少，賣貨過十一黃金周者較多，令內地A股指數跌59.28，報5454.62，跌1.08％。中國證監會日前下發「關於進一步加強教育、提醒督促工作人員自覺遵守禁止買賣股票規定的通知」，再次重申證券從業人員包括監管機構工作人員不得進行股票交易，以防範及查處利用內幕訊息買賣股票行為。證監會亦暫緩新基金審批，令資金供給大門半開半閉，如再加上基金公司QDII，市場分析認為滬深A股5500點水平有一番爭持，狂奔牛起碼要歇歇腳啦。　　

中國神華今天上網發行A股，認購價36.99元，共發行不超過十八億股A股，9月27日公布網上中籤率，9月28日公布中籤結果；繼建行後另一隻H股回歸A股。　　

三大因素將考驗中秋節後內地股市會否低倔強牛頭？一、滬深A股市成交額開始萎縮，係見頂先兆。二、連續兩個交易天下跌股份較上漲股份多。三、多數基金經理認為市場已被高估，機構投資者樂觀情緒開始下降。投資者依家環境下，不宜盲目追漲。　　

北京商品住宅及二手住宅樓價今年首八個月分別上升13.5％及10.6％。由於新開工面積和銷售面積持續下降，形成市場供需結構矛盾依然突出，9月房屋售價指數繼續高位運行。

內地大城市超高速轉變　　

2001年10月當阿殊上海浦東機場降落，坐佢專用汽車去酒店途中，佢只講一個字：「嘩！」（Wow！）相較於二十六年前（1975年佢隨老布殊出任駐中國美國大使），上海的確變化好大，上海渣打銀行Stephen Green說，每一個人都感覺到上海變緊，摩天大廈一幢幢出現，醫院收費三級跳上升，漸漸通街都係外國人；2007年如阿殊再到上海，相信更加嚇佢一跳。根據Green理論，美國一年相等於上海二點八個月；英國一年，上海三點一個月；南韓一年，上海八個月，甚至新加坡一年，上海只係六個月，上海正以超高速轉變。轉變期間，產生大量機會，同時亦出現大量新問題，其速度之快無出其右。不但上海係咁，北京、大連、廣州、深圳及其他大城市亦係咁，英國、美國轉變以年為單位，香港以月為單位，內地以日為單位。唔好話外國人，甚至香港人亦有點唔習慣內地改變速度。　　

過去煤礦第一殺手瓦斯已成為緩解中國能源緊缺狀況下一大突破口。近日山西陽泉已成功把甲烷等可燃性氣體從瓦斯中分離出來，並生產出液化煤層氣。含氧煤層氣液化技術係採煤過程中將一部分含氧煤層氣抽出來進行分離及液化，把甲烷濃度由35-50％提高到99.8％，然後液化，令體積縮小六百倍，再使用LNG（液化天然氣）運輸車將它送到氣源同用戶運輸管道上使用。含氧煤層原料價格較純天然氣低好多，保守估計利潤率可達30％。據了解，中華煤氣（003）、北控集團（392）、新奧燃氣（2688）已表示濃厚興趣。

利用煤層氣增能源供應　　

中國煤礦爆炸70-80％同瓦斯有關，如採煤前先將煤層氣抽走，用作生產甲烷，可大大降低爆炸事故。美林證券估計，中國呢方面蘊藏量達三十萬億立方米，係美國三倍，過去一直冇好好利用煤層氣，利用新技術不但可降低煤礦爆炸機會，增加中國能源供應，亦可成為煤礦另一額外收入。　　

2008年神華集團建設世界上第一條煤直接液化工業生產線，三個專案投產，年產能十四萬三千二百噸。到2020年全國煤變油年產能達五千萬噸。中國煤資源儲值一萬億噸，可供一百年使用，如大規模將煤炭轉為成品油，只可供三十年使用，勢必令國際煤價上升，因每生產一噸成品油，消耗達四至五噸煤（神華集團消耗三噸煤）。煤係另一不可再生能源，係咪值得大量用作生產成品油仍係疑問。何況煤開採及燃燒過程中對生態同環境嚴重污染，如每年八分一產煤用作生產成品油，可令全球煤價飛升，重演「生物能源」問題（例如刺激玉米價格大升）。　　

今夜明月人盡望，但今時今日人月兩團圓卻愈來愈困難；一來樓價貴，買樓結婚唔容易，女仔肯嫁畀男人愈來愈難，除非你要求唔高，近年結婚人數一年唔及一年，因為單身女性屬自我享樂型，她們為享受生活而主動選擇單身，較已婚女性更熱中消費。一般都接受過良好現代教育，好有性格，工作能力突出，唔少從事IT、廣告、貿易、媒體、金融等，有一份收入不菲工作而且年輕，對新生事物充滿熱情，賺錢觸覺敏銳，生活節奏快及要求高。　　

以上海為例，女性單身貴族中89.94％有大學程度。佢地唔係唔想結婚只係唔肯為結婚而結婚。對佢地而言，結婚要放棄東西太多，寧可唔結。上述趨勢上世紀八十年代首先西方國家出現，九十年代風氣吹到日本同香港，二十一世紀亦吹到上海、北京、深圳、廣州等城市。佢地買單身公寓、開私家車、請私人健身教練學瑜伽或學跳拉丁舞……。佢地賺錢目的係為花錢，係近年理財產品重要客戶。據上海調查所得，63.2％女性單身貴族一旦有錢，第一件事係買房子，成為購房主力（較單身男士多一倍），因為擁有一間房子心頭上等同自尊、獨立及安全感，現實方面代表經濟獨立。消費上，佢地係名牌忠實消費者；服飾、面膜及化粧品、跳健身舞做瑜伽、游泳方面，佢地都捨得花錢，有D更參加花藝班、茶道班去雕琢自己，寓教於娛樂，陶冶性情過程中增加自己魅力。調查顯示，49％單身女性貴族曾參加過上述各項活動，其中20％更經常參加。部分年輕單身女性更喜歡結伴到酒吧，目的唔係識男仔而係享受處氣氛。

女性單身貴族極為吃香　　

今天女性單身貴族追求美貌與智慧並重，結婚反而變成可有可無。咁樣一二十一世紀男生都幾麻煩，睇得上眼女性單身貴族，人家未必睇得起你；唔似工業時代通街工廠妹，男性好容易搵老婆。訊息社會職業女性收入分分鐘超過男性，眼光較男性好，品味較男性高，希望現代女性嫁畀你已不能單憑口甜舌滑，而需要才華。例如對潮流認識、對品味要求及擁有過人賺錢能力。　　

美國一份市場調查顯示，1979年女性商務旅客佔總數1％，因此酒店服務唔重女性。2005年女性商務旅客已佔總數40％，酒店如無法提供滿足女性要求服務（例如美容、健身及各種各樣酒吧），可流失40％高消費客戶！首飾業60％係女性自己買畀自己，只有40％係男性買來送畀女性；女性貴族已成為首飾業主要客源。　　

上述趨勢對社會長遠影響係人口出生率愈來愈低，死亡率亦愈來愈低，形成人口老化問題。上述趨勢亦係利率長期處於低水平（更多資金用作投資）及理財業務愈來愈蓬勃理由。