2007-09-04

交叉持股推高純利

　　9月3日，周一。恒生指數跌80.05，收23904點；成交844.2億多元。9月期指高水，升79點，收23933點。

　　今天東方航空（670）復牌升75％，收6.53元；花旗將目標價由3.35元提升至7.5元。滬深A股受東方航空股價急升刺激而大升2.3％，見5419.17，係8月20日以來最大升市。兗州煤業A股（1171）亦升10％漲停，收22.66元人民幣。唔少內地股份今天都漲停版。

　　摩根大通認為，恒生指數將上望29000點。


內地A股第三季業績看好


　　國內銀行房貸緊縮，外資銀行卻乘虛而入，高速拓展內地房貸業務，繼續提供內地房地產首置30％按揭。

　　隨著內地上市公司半年結披露結束，第三季度業績開始受市場關注。根據Wind公司統計數據，1500多家上市公司中，已有472家預告第三季度業績，其中296家預增或扭轉虧損、143家預減或虧損、33家表示唔確定。從預告情況睇，第三季度依然保持良好勢頭，純利可大升嘅估計超過12家，升幅喺100％左右，達77家。換言之，第三季內地A股純利與2006年同期比較仍十分出色。睇好嘅行業有有色金屬、採掘行業、鋼鐵業、機械設備業純利仍可上升50％，房地產繼續睇好，交通運輸、交運設備、建材等表現亦良好。第三季大部分上市A股純利大幅增長已成定局，令人擔心嘅係純利來源好大部分來自非主營業務，主因係上市公司交叉持股嘅現象非常普遍，股市火爆上升，唔少公司淨利潤增長就係靠投資收益上升來實現。如果無呢方面收益，A股純利第三季升幅好有限，上述係純利高增長背後嘅隱憂。1973年恒生指數升上1700點，理由係華資地產公司互相發行新股換取對方股份，然後將發新股換回對方公司嘅股份賣掉賺大錢。1988及89年日經平均指數點解狂升？理由係公司之間互相持股，A公司純利上升嘅理由係因為買咗B公司股份；B公司股價上升，A公司純利自然上升；反過來B公司純利上升，理由係因為買咗A公司股份……。上述情況今時今日內地A股市場重演，令A股純利郁下就上升100％或以上。

　　中信證券今年上半年獲利42.08億元，較去年同期上升442％，理由係A股股市興旺，上述純利升幅第三季仍可保持，但明年上半年能否再保持？又以國壽（2628）為例，股價去年4月至今上升7倍，未來一年純利要再升幾多，才能支持股價更上一層樓？


H股O唔可能同A股睇齊


　　過去QDII並未將A、H股差價消除，點解未來開放個人資金投資港股後可將A、H股差價消除？今年上半年A股純利平均上升67％，上述純利升幅支持內地A股高O；宣布內地個人資金自由行後，由於期望內地資金來港，令H股股價出現爆炸性上升。依家H股平均O24倍，如H股O同內地A股O睇齊，即股價可再升100％。但A股係封閉式市場，大部分A股係非流通股，能喺市場上流通嘅只佔一小部分，因此可以炒供求。H股係全流通股，80％在外資機構手中，如H股O較外國同類型股份O高，外資機構隨時可沽出H股，將資金用作購買外國同類型股份，因此H股O唔可能同A股O看齊，QDII（內地機構投資者可投資港股）唔可以，DII（內地個人投資者）亦唔可以，雖然外資證券行估計，到2010年前DII有1500億美元（約1.1萬億港元）流入香港。

　　股票短期係投票機器（受群眾心理影響），長期係評估機器（最終反映公司實際價值）。內地A股上半年純利平均上升76％，令O50倍睇嚟似乎合理，但企業核心利潤（剔除投資股票收益或同證券業有關行業）升幅有幾多？如明年上半年A股純利已不能再升76％，隨著純利升幅下降，O亦將下降……。因為今年上半年A股純利如將非主營收益剔除，純利升幅只有33％，上述純利升幅能否支持O50倍以上？

　　私募基金名稱由於內地對私有制仍有避諱，一般都唔用上述名字，改稱「產業投資基金」，可分為九大類：創業投資（Venture Capital）；二、發展資本（Development Capital）；三、增長基金（Growth-Oriented Fund）；四、併購基金（Buy out╱Buy in Fund）；五、上市後私募增發投資（Private Investment in Public Equity）；六、特別併購上市（SPAC）；七、替代公開上市（APO）；八、業務發展基金（Business Development Corporation）；九、不動產投資信託基金（REITs）……。私募基金具有以下特點一：A.投資項目主要為非上市公司（或將上市公司私有化）；B.投資期通常長達三至七年。C.積極參與被投資企業的經營管理，改善企業賺錢能力。D.發掘企業潛在價值，通過投資推動企業發展，合適時機將企業上市（或重新上市）套現，達到資本增值收益。

私募基金趨普及化

　　過去中國政府唔歡迎私募基金。私底下唔少私募基金採用先斬後奏方式，自2001年起大量入侵中國企業；2005年開始中國證監會逐步開放市場，要求呢啲投資上報直接業務方案，但迄今為止無任何一家證券商被正式核准試點。換言之，內地私募基金操作至今，中國仍無一個專門監管部門負責規範私募股權基金嘅法律。渤海產業投資基金去年係國內第一個由國務院批准試點嘅中資產業投資基金，規模200億元人民幣，投資方向為渤海新區金融商貿業，以及空港物流、海洋及迴圈經濟、海港物流、化學工業及休閒旅遊產業為主，屬主權財富基金（Sovereign Wealth Funds），最大投資者就係中央政府。

　　一般散戶可能仍未接觸過私募基金（家下入場費最少500萬美元）。隨著投資普及化，相信好快就有銀行或證券行將入場費降低，例如近年嘅ELN（高息同證券掛鈎存款證），10萬港元已有交易（最先發行時入場費10萬美元）。至於REITs，唔少已掛牌買賣。我老曹認為，散戶係時候認識私募基金啦，佢嘅吸引力在於企業創業初期開始投資，可賺盡呢間企業由細變大嘅利潤。當然唔係所有創業都成功（失敗率達90％），此乃私募基金入場費要500萬美元嘅部分理由。此外，亦可投資有前途嘅企業，例如協助蒙牛（2319）發展成為大企業；亦可加入併購行動，將資產豐厚但獲利好少嘅企業私有化，將之拆骨出售賺取豐厚利潤。依家本港唔少二線股市價低於資產淨值好多，有被拆骨嘅條件。亦有啲企業管理層唔夠積極，私募基金入股10％至25％後，委派兩至三名人員加入董事局提升管理效率，自然刺激股價上升。典型例子係崇光百貨公司，喺日資管理下只獲微利，大劉將佢收購改組然後上市成為利福國際（1212），上述就係私募基金所做嘅嘢，分別係私募基金資本來自投資者（例如每份500萬美元籌得，而大劉則係動用自己蚊年）。

　　據了解，渤海產業投資基金試點示範效益唔係發改委想要，而係天津濱海新區去年底申請設立，然後進一步探討其發展模式。今年5月國家發改委啟動第二批產業基金試點申報方案，至今未獲國務院首肯。睇嚟中國政府對私募基金嘅態度仍有所保留，尤其係5月22日投資30億美元購入百仕通私募基金，一開始已蒙受虧損，令中央政府喺推動產業基金項目上處於尷尬境地。另一方面，設立專門部門建立監管機制已係當務之急，逃避唔係上策，面對才係正確方法。私募基金喺外國已成行成市，中國政府唔可以當佢地唔存在！

故步自封走向衰敗

　　時代不斷向前，中國人認為了不起嘅乾隆皇帝喺二百五十年前拒絕同英國通商，實行閉關自守政策，令中國錯過工業革命所帶來嘅改革，結果國人付出百年苦難，真正令大國崛起係改革開放思想。放眼世界，大至一國、小至一個企業，走向衰敗之路嘅原因係故步自封，幾多人因為嗰句「唔得嘅」而害咗一生？記得二十一歲嗰年有人請我老曹做投資經理，掌管2000萬元資金（1971年2000萬元係十分驚人嘅數字），與同學商量，都認為責任太大唔好制。再同一位老人家商量，佢嘅一句話改變咗我老曹一生。他問：「你係咪打算全心全意去做？如果係，點解要驚？萬一失敗，你最大損失係唔見咗份工，但你老闆唔見咗2000萬元！人地都唔驚，點解你咁驚？未試過點知自己唔得？」勇者無懼，即使你係大人物，內心都有一定恐懼感，尤其係面對新事物。今天回望拋空股份係咪咁可怕？衍生市場係咪引蛇入屋？ELN會否引人犯罪？私募基金係咪擾亂金融？索羅斯係咪國際大鱷？正確態度係及早立法將私募基金規範化，而非逃避。將私募基金陽光化，增加透明度，減少神秘感；一如對沖基金運作，亦應快啲規範化、陽光化。