2007-09-21

第一次減息係出貨訊號　　

9月20日，周四。恒生指數升146.49，收25701.13；成交1189.08億多元；9月期指略為低水，回落19點，收25668點。大成糖業（3889）掛牌較招股價升6.4％，成2.17元；中糧油（606）升7.9％，見5.22元，因半年利潤增長近一倍。國航關聯企業持有東方航空（670）11％股權，令國航（753）升13％，報11.66元；東方航空升23％，報8.65元。物美（8277）升16％，報7.89元，該公司停牌十個月，因前董事長張文忠辭職，昨天公告「沒有資產或資金」被挪用。中聯通（762）跌3.4％，成13.62元，因8月份上客量減少。美次按危機擴散到歐洲　　

今天恒生四十隻成分股中，上升只有十八隻，回落有二十一隻，一隻無變動。走勢上睇，周五股市回落機會好大。北控（392）升15％，見39.3元；嘉里建設（683）見62.35元，公司計劃向基金配股集資35.9億元。巴郡宣布再減持2800萬股中石油（857），套現3.2億元，平均每股售價 11.47元。　　

英倫銀行雖然出手保證北岩銀行所有存款，令北岩銀行股價曾一度回升，但標普調低北岩信用評級，而且家銀行界對入股北岩興趣缺缺，令周四北岩銀行股價再跌三成。睇美國次按危機擴散到歐洲情況仍未受到控制。　　

香港8月份CPI 升1.6％（7月份升1.5％），較分析員估計1.7％略少，京華山一估計香港第四季CPI可上升至1.8％。雖然豬肉價格升31.4％，雞肉、牛肉、雞蛋、牛奶皆漲價，但由於食物佔香港CPI比重唔大，所以本港消費物價指數升幅有限，第二季香港GDP升6.9％（第一季升5.7％）；8月份失業率為 4.2％（7月份為4.1％）。今時今日，香港已唔易再出現負利率環境，因為佔CPI重要比重係租金及工資，以香港環境，上述兩項上升幅度都唔會大（租金主要係指公屋租金），唔似內地CPI，食物所佔比重高，形成近期內地CPI升幅好大。中央政府今天宣布凍結中國國企所控制物價，包括零售汽油、電費、水費、泊車費等，以阻止CPI進一步上升（9月份極有可能係內地CPI升幅最大一個月，之後將回落）。8月內地CPI上升6.5％，係十一年高位，估計9月份CPI上升7％；透過凍結物價，令10月份CPI升幅減慢，明年起中國CPI增長率應進入回落期。　　

2001年1月3日美國減息，道指2月6日見11035.14後，大幅回落至3月22日9106.54，反彈至5月22日11350點全年最高，之後再跌至9月21日8062.34（受「九．一一慘劇」影響），即2001年1月3日減息後道指一個月後大幅回落。今年9月18日美國減息，跌市會否10月中出現？一般分析員今年7月睇好、8月17日卻睇淡，點解9月17日又睇好？減息0.5厘能否令2.5萬億美元市值商業票據重新恢復正常交易，又或今年開始次按危機從此消失？今天有信用貸款人愈來愈少，減息並唔會刺激有信用貸款人增加貸款。同次按有關CDO，銀行肯唔肯借蚊年畀佢地？減息另一壞處係令利差交易吸引力下降，日圓貸款成本1厘，如美國國庫券利率下降至4厘，吸引力便下降，令利差交易人數減少，日圓有機會出現強勢，甚至引發另一次unwind行動。　　

2001年1月3日減息後，道指只維持一個月升市（其後多次減息，升市亦只維持到5月22日），呢次減息道指可支持幾耐？近日反彈只係炒家入市，真正投資者反而趁機減持（8月17日入市博反彈者近日則在減持），因為第一次減息係出貨訊號。如果你地仲相信減息股市應睇好、加息股市應睇淡，我老曹無話可說。

美信貸問題不在利率高低　　

已退休格蛇話十年期債券孳息率依家通脹率環境下應該係8厘。即係話，十年債券孳息率4.5厘，係貨幣泛濫結果抑或係6萬億至8萬億美元次按證券化結果？格蛇在位十七年，一再利用減息去化解1987年10月股災、1994年墨西哥金融危機、1998年俄羅斯債券危機、2000年科網股泡沫爆破及 2001年「九．一一慘劇」。貝南奇能否同樣利用減息去化解次按危機？今天美國商業票據及次按證券化佔去整個借貸市場54％（2002年佔26％）。根據資料，今年到期次按債券已達4280億美元，能否順利借到新資金？　　

聯邦基金利率已降至4.75厘，但LIBOR係6.88厘，上述利率由市場而非政府決定，未因美國聯邦基金利率下調而下降，顯示美國信貸市場問題不在利率高低或信貸寬鬆，而在於信貸質素。美國物業專家、耶魯大學經濟學家Robert Shillen警告，美國樓價進一步回落最終將影響金融市場。由佢製作Case-Shiller房屋投資者指數技術表現欠佳。2000年前佢曾出書預測美國科網股泡沫爆破，因此聲名大噪，此乃繼格蛇認為美國住宅樓價將出現雙位數字回落後，另一位重量級人物發言。美國樓價回落，估計將令金融機構最終虧損超過 3000億美元；如樓價回落15％，將令美國家庭失去3萬億美元賬面財富。佢地係美國最大消費群，明年會否減少消費？　　

歐羅首次升穿1.4美元，成1.4064美元。呢個由十三個歐盟國家共同組成貨幣，正漸漸威脅美元國際地位，英鎊見2.0025美元及日圓見 115.44兌1美元。呢次減息到底係1998年長期資本管理公司出事翻版（事後納指上升100％），抑或2001年1月減息翻版？事後才能知道。如果係 1998年次，後市可再升50％至100％才見頂；反之，如果係好似2001年1月次，股市將於下個月見頂。今天股市已到十字路口，不知何去何從？最終支持股市升降唔係利率高低，而係企業純利增幅（或減幅）。2008年係美國總統大選年，過去例子，股市好少總統大選年回落。今天道指平均O十七倍，唔算高亦唔算特別吸引，後市仲係個別發展，我老曹暫時冇立場。道指漸漸接近7月17日高點14021點，如能升穿，可進一步睇好；反之，14000點受阻，有機會出現雙頂走勢。　　

Trade what you see, not what you think.金價已升穿去年5月12日高位730.4美元，見730.57美元【圖】，到底係兩次見頂回落，抑或金價進入另一上升周期？如以歐羅計，金價仍未破去年5月高位（可能只係因美元弱勢造成）。

財富勿向公眾炫耀　　

2002年起全球經濟有趣地方係，金、股、（美元以外外幣）、油都上升，而非此消彼長，有人認為上述只反映全球資金泛濫而已，不能持久。　　

作為社會上最富裕階級，往往因為同現實世界距離太大，而對其他人漠不關心；亦往往用「錢眼」看世界，而忘記自己對社會責任。金錢由佢地賺番來，佢地有權做惹人側目消費，而毫不理會窮人感受，例如購買私人飛機及價值不菲珠寶。當社會上80％人口仍為衣食住行煩惱（尤其住方面），上述行為令人討厭。我老曹唔反對超級富豪亂花錢（呢方面只顯示佢地愚蠢），但請勿向公眾人士炫耀自己財富（除做善事，為善可以不甘後人）。請靜靜地享受財富帶來樂趣，唔好向公眾人士炫耀自己幾富有，係作為富人最低限度應擁有品德。金錢落入聰明人手中，可以增加佢智慧；金錢落入愚蠢人手中，只增多幾份愚蠢。1997年前用紅酒漱口蠢人，或以鮑魚龍蝦做早餐傻人，最終金錢唔係離佢地而去咩？