2007-09-27

美息下調次按利率反升 　　

9月26日，周三。中秋已過。滬深A股由於接近10月黃金周，今天進一步下跌1.72％。聽講神華A股網上申請凍結資金約1.95萬億元人民幣、網上7200億元人民幣，總凍結資金2.67萬億元，較建行A股招股所創2.26萬億元更多。

中東唔願跟隨美國減息　　

下一隻發行A股嘅將係中石油（857），依家等緊證監會下達正式批文。　　

沙地阿拉伯拒絕減息，睇嚟沙地有意將本國貨幣同美元脫鈎，令美元滙價進一步受壓。沙地手上有8000億美元、整個中東地區擁有3.5萬億美元，依家中東地區面對通脹威脅，唔願因美國房地產衰退而跟隨美元減息，因為咁樣將令中東通脹率進一步上升，上述因素會否令沙地貨幣與美元脫鈎？市場在觀察中。　　

以購買力計，歐羅已超貴，冇投資價值，現階段應否過分睇淡美元？見仁見智。　　

美元弱勢，跌幅最大係兌加元，今年跌幅17％；其次係兌澳元下跌10％、兌歐羅下跌7％、兌瑞郎下跌4.5％、兌日圓同人民幣下跌4％、兌英鎊下跌3％。換言之，除兌加元及澳元外，今年美元跌幅並唔算大，未致引發信心危機（即使聯儲局10月30日再減息0.25厘）。雖然聯邦基金利率下降，但美國樓宇按揭貸款利率卻唔跌，次按利率更上升。　　

8月17日至今，股市上升係由期望減息開始，漸漸演變成近期投機氣氛再次佔據整個股票市場，令資源股同能源股狂升、美元滙價急跌，金價更見二十七年高位……。9月結後，股市能否一直上升，維持到10月30日下一次減息？上周高盛公布上季純利升79％，同期貝爾斯登純利下跌61％；相同行業、相同環境，面對相同阻礙，點解業績分別可以咁大？我老曹再次強調揀股唔炒市。唔好畀大市升降所欺騙，世上只有兩種公司最值得投資：一、純利保持年年25％以上升幅嘅增長股：二、企業開始轉虧為盈嘅時刻。　　

雖然美國房地產走下坡，但亞洲新興市場、東歐新興市場、環球新興市場資本家毫不關心，因為對佢地影響唔大。佢地嘅生意太好，無暇理會美國房屋市場有幾壞！情況恍如1997年7月亞洲金融風暴出現，而美國經濟繼續欣欣向榮。

自由經濟制度全球擴散　　

世界銀行公布，自1978年中國開始改革開放政策並取得成功後，自由經濟制度（或中國稱為市場經濟制度）不斷向全球擴散。2006╱07年度改革最大嘅係埃及，其他依次為克羅地亞、加納、馬其頓、喬治亞、哥倫比亞、沙地阿拉伯、肯雅、中國及保加利亞，成為去年4月至今年6月改革最快嘅十大國家。如以較大新興市場排名，改革最快係中國、埃及、印度、印尼、土耳其及越南。2006╱07年度東歐及中亞細亞嘅開放程度已超過部分西歐國家，例如克羅地亞、馬其頓、喬治亞、保加利亞及匈牙利。例如前社會主義國家愛沙尼亞嘅開放程度已世界排名第十七；拉脫維亞及喬治亞响世界排名第二十五。愈來愈多企業進入呢D國家大做生意，令東歐經濟一片繁榮。非洲亦有類似情況，例如加納同肯雅開放程度世界排名第二十七，毛里裘斯更加係非洲最開放嘅國家，仲有馬達加斯加群島及莫桑比克；中東嘅埃及、沙地及突尼斯改革速度亦好快。換言之，自由經濟制度已到處開花結果；反之，香港卻漸漸落後，今年世界排名跌至第四。過去令香港經濟欣欣向榮嘅自由經濟制度响1997年後掣肘漸多。

中小企難突破天花板　　

1997年7月後，全世界進入stock-pickers樂園，無論幾時都有鑽石等候你去發現，亦有黑炭搞到你污糟邋遢。雖然大摩羅奇認為2008年美國有50％機會進入衰退（我老曹仍然唔信），但唔影響揀股心情。2000年起嘅跌市亦有資源股可揀，何況今天全球多咗幾百萬甚至幾千萬個資本家？美國打噴嚏全球經濟傷風嘅時代過去矣，世界進入各有各精彩時段，例如金價由8月低位650美元到最近升穿730美元阻力；而美國樓價至今年7月止過去十二個月回落3.9％，8、9月加速下滑。美國8月份二手樓銷售只有年率五百五十萬間，下跌4.3％（7月份年率五百七十五萬間），係2002年8月五百三十六萬間以來最差，以及係連續第六個月回落，相信9月份會仲差。投資策略係繼續避開同美國次按有關嘅股份。　　

市場開放初期係一片充滿活力嘅樂土，大、中、小企業齊齊欣欣向榮，例如1950至70年代香港及1980至90年代中國。隨着經濟進一步發展，種種苛刻條件出現，漸漸形成一個低矮嘅天花板，中小企業只能响呢塊天花板下掙扎求存，只有大企業才能打破呢塊天花板進一步成長。進入1980年代，香港只有少數企業能發展成為今天嘅大企業，1970年代至今無數中小企業，有D被淘汰出局，大部分仲喺呢塊低矮嘅天花板下生存。進入2000年，內地情況亦一樣。　　中小企業嘅毛病係只能為底層消費者提供質優價廉嘅產品，要達到呢個水平往往令毛利率下降（微中取利），令中小企業冇足夠利潤空間去為產品創新，因為創新响探索過程中有太多不確定因素，係中小企業負擔唔起嘅成本。因此，中小企業只能從穩定嘅客戶身上獲得訂單，咁樣又局限咗產品嘅毛利率，中小企業亦支付唔起昂貴宣傳費，令自己嘅產品被更多消費者認識。中小企業管理層亦好難跳出傳統概念，例如佢地唔相信產品零售價與生產成本關係唔大，而喺產品方面創新，大部分仲停留响供應價廉物美產品嘅想法，而非創新產品。　　

上述就係點解股票市場上充滿二線股嘅理由，因為能突破呢塊低矮天花板而成為長期增長股者少之又少，但並非完全冇。投資最大吸引力就係喺眾多二線股中尋找未來嘅藍籌股。上述係二線股維持純利長期保持年率25％速度上升嘅不二法門，令其擺脫做二線股嘅命運成為高增長股，並漸漸成為大企業。　　內地三十一個省、市、自治區，今年應屆大學畢業生稅前收入平均為24852元一年，較去年嘅每年26758元下降7.1％。專業服務業跌幅最大，下跌13.1％，降至37473元；其次係製造業，下跌9.2％，至17530元。升幅最大係快速消費品行業，上升20％，至20493元；耐用消費品行業上升9.6％，至18089元。　　

大城市對大學生嘅吸引力下降，京、滬、深、穗四個城市對應屆生嘅吸引力由上年度54.1％下降至本年度39.3％；反之，杭州、南京、成都、天津嘅吸引力卻由4.9％上升到12.2％。隨着起薪點下降，大學生希望一畢業便月入3000元人民幣者迅速減少，開始由企業前途去思考自己嘅出路問題。上海應屆大學畢業生好D，稅前收入平均起薪點由去年39813元下降至今年39774元，跌幅微不足道。

學歷與成功關係唔大　　

隨着教育普及，1970年代大學生响歐美已唔再係乜嘢天之驕子，香港到1990年代大學生起薪點一直停留响月入萬餘元水平，唔再上升。近年上述情況喺內地出現，內地大學生畢業後搵份月入3000元人民幣嘅工作已有困難。教育普及結果令大學生唔值錢，但卻係好事。　　

記得1990年代梁兄哥同我老曹講：「香港大學生亦買唔起樓。」我老曹回應係：「點解大學生應該買得起樓？」今天內地大學生面對相同問題：內地大學生買唔起樓，理由係近年內地樓價大升，內地大學生薪金卻下跌（簡單嘅供求定律而已）。學歷再唔係決定該人係咪有用嘅唯一標準，係好事唔係壞事。睇吓社會上嘅成功人士，都同本身學歷關係唔大。我老曹唔明白今天父母點解仍要千方百計送子女入名校也！