2007-09-18

搞民主宜選適當時機

　　9月17日，周一。恒生指數跌298.77，收24599.34；成交811.1億多元。9月期指跌429點，收24470點。每逢賣地，本港地產股例跌，今天亦唔例外。

格蛇講分量係唔同D

　　格蛇認為美國房地產出現泡沫，未來跌幅唔只單位數，極有可能係雙位數，並揚言聯儲局減息0.25厘甚至0.5厘亦冇用，因為問題出在次按令信貸萎縮。今天英國Northern Rock銀行股進一步急跌32％，見299.78便士，較6月高價回落52％，令英國呢間第四大貸款集團市值只有12.6億英鎊（約200億港元），美林估計銀行純利將減半。控（005）股價亦受拖累，因謠傳有興趣收購呢舊「北石」，而「北石」正洽商出售畀英國第五大銀行Llyods TSB。

　　英國房屋建築股如Barratt跌6.5％，Persimmon plc跌5.7％，Taylor Wimpey跌5.8％，睇英國樓價今年7月起亦加入下跌行列，較美國遲一年。

　　美國雷曼兄弟周二公布業績，大摩周三、貝爾斯登及高盛周四公布業績，情況如何？上述隱憂令周一美股開市回落，情況令人擔心。十七年前日本央行支持所有面臨破產日本銀行，結果冇日本銀行破產（部分被收購，代價係日本十七年信貸萎縮期），美國又點樣？美國物業市場「買賣」做法去年6月結束，英國物業市場「買賣」做法今年7月亦結束，影響又如何？

　　格蛇認為，1980至90年代中國、東歐及前蘇聯超過十億工人由計劃經濟轉向市場經濟，形成無論資源同勞動力供應充足。不過，上述情況2000年起逐步改變，首先係原材料，然後係勞工令通脹威脅重新出現，CPI加快上升令聯儲局未來減息空間有限，上述亦係近年我老曹睇法，不過由格蛇講影響力梗係大好多，道指走勢令人擔心【圖】；反之，滬深指數再升1.88％，見5498.91。恒生指數最後跟美股抑或滬深？豐上周將日本股市及中國股市降級，日本由中性轉為underweight，中國由overweight改為中性，同時將台灣及印尼股市一下子由overweight改為underweight。豐已向客戶發出保守投資策略訊號，各位點睇？四叔話恒指年底才見25000點，最近亦已接近完成。雖然技術分析未見出貨訊號，但踏入9月份投資策略轉為保守，我老曹亦同意。

　　今天恒生地產分類指數回落5.1％，係2004年5月10日以來最大跌幅。新地（016）跌4.5％，見115.6元；恒地（012）跌3.3％，見 61.05元。信置（083）同南豐發展以45.5億元投得23.8164萬方呎大埔住宅用地，同分析界估計45億元接近，信置股價回落4.6％，見 20.55元。反而華潤置地（1109）升4％，見15.1元，公司計劃動用60億元增持內地土儲。招商局（144）升2.4％，見43元，公司計劃用 16億元廣東省增持港口碼頭。平安保險（2318）升2.2％，見87.65元。依家港股有賴國企、紅籌股上升支，滬深A股幾時跳最後一隻華爾滋？

十七大後中央將力壓通脹

　　花旗推介華潤置地，目標價17.15元；中渝置地（1224）目標價11.68元；國浩（053）、豐德麗（571）有澳門概念；以及中煤能源（1898），因睇好煤價。

　　中央政府一再採取反通脹策略，但由於政策十分溫和，成效極之有限。8月份CPI升6.5％，估計仍未見頂，9月及10月極有可能見7％。人們對通脹預期繼續推動股樓上升。人民幣貸款8月份升17％（7月份升16.6％），家庭貸款升4.2％，其中買樓貸款升135.8％；78％買樓者需要貸款。流通貨幣8月份升15％（去年同期升13.3％）。今年首八個月新增貨幣750億元人民幣，相信通脹問題成為10月15日十七大黨代表大會重要課題，估計十七大黨代表大會後，中央對付通脹會採取較積極做法。

　　美國次按危機發生至今已超過一個月，問題仍未受控制，最終會否影響經濟？意見好分歧。我老曹早一年前避開任何同次按有關企業（有懷疑現金），反正值得投資對象目不暇給，點解要刀口上舐血？今年投資策略集中亞洲區（尤其係中國），但日本除外，並相信亞洲地區經濟唔受美國次按問題影響（心理因素除外）。如美國減息，香港及中國股市更係受益者。上周恒生指數升幅係亞太區中表現最出色指數，作為香港人，明知燈係火，點解仲要周圍咁摸？

　　投資者經常遇到問題係：我資本細（例如只有一、兩萬元），又點投資？1969年我老曹以五千元開始。今時今日，只要你有2萬元資本，配合良好策略，一樣可以由2萬元變4萬元、4萬元變8萬元，然後16萬元……，市場上缺乏唔係資金，而係投資智慧。回望2007年，過去八個月內有幾多股份股價上升 100％？2003至今，不足五年內，每年都有大量可賺取100％利潤股份，如果2003年你用2萬元開始，今天你應該可以擁有64萬元（平均每年賺取100％利潤）！點解大部分人唔可以？理由係冇將投資視作「漱口、洗面、擦牙」等每天都必需做事，經常劃地為牢，太多框框唔肯打破；經常跟大隊而唔肯獨立思考；未富貴已衰老（例如廿幾歲人用六十歲人投資策略，唔認同年輕人要博、年紀大才保守）；或者信走勢唔信大趨勢。至今為止，有邊個走勢派發達（賣走勢圖表者例外）？反之，利用趨勢發達者唔知幾多。

　　2000年至今單係中國概念，只要善加利用，早已賺到笑。圖表對短期分析或者有用，但中長期分析上反而阻手阻腳，睇走勢者往往因過分短視而錯失賺大錢機會。1974年我老曹輸大錢理由就係當年學曉走勢後盲目相信走勢。請問有邊D走勢圖2000年叫你從此遠離TMT股？請問有邊D走勢圖2003 年4月沙士期間叫你全面入市？請問……都係留番D面子畀D市場專家罷啦。許多玩命position都係由走勢陷阱引發。請記住，趨勢才係你最好朋友（The trend is your best friend！），唔係走勢（chart）。有智慧不如趁勢。

中國在國際間發言權漸大

　　1967至97年投資房地產，盲都賺到錢。點解？因為大趨勢向上。1997年8月至2003年4月能夠房地產市場中賺到錢者又有幾多個？呢個係順流逆流問題。

　　下月中國將派三百一十五名士兵到蘇丹達爾富爾作為國際和平部隊，同聯合國部隊及非洲聯盟共同組成和平部隊，協助蘇丹政府平定達爾富爾動亂。中國政府強調無意干預別國內政，而且呢次派出士兵大部分係工兵……。今年中國經濟已取代德國，成為全球第三大經濟體系，隨經濟實力上升，國際事務上，中國自然擔當重要角色（日本同德國亦希望係咁，但基於二次大戰遺留下來歷史問題，別國對日本同德國戒心好大，因此好難國際事務上出兵）。隨中國經濟力量上升，中國國際事務上發言權愈來愈大，呢次出兵有特殊意義，就係向中東產油國顯示中國軍事上力量，令整個中東國家日後更為親中，為中國提供穩定石油供應。蘇丹動亂已有四年，死亡人數多達二十萬，二百五十萬人無家可歸，呢次中國出兵有助維持蘇丹和平，不但贏得蘇丹政府感激，同時將整個中東國家信任贏過來！中國繼非洲之後，逐步建立對中東國家影響力。中國已真正走上「大國崛起」之路！

　　作為呢一代中國人，我老曹實在好開心。讀書時讀到，中國由鴉片戰爭開始因滿清政府衰弱無能，國民政府將佢打倒，隨之而來係大軍閥時代。北伐成功後就係八年抗戰，然後係國共之爭。到中華人民共和國取得政權卻推行共產主義，到文化大革命……，作為中國人感到十分慚愧。1973年我老曹首次踏足美國華爾街，曾畀美國人叫Japs（日本仔），真係欲哭無淚，美國人當年眼中只有日本遊客，唔信中國人有錢遊埠。我老曹一直問自己點解中華民族咁唔爭氣，連日本仔都不如?!1976年眼見毛澤東逝世、四人幫倒台，到1978年鄧小平提出改革開放，我老曹到處同人講中國有救矣！然後睇住日本經濟自1990年起下沉，中國經濟一步步強大起來。到今天中國政府國際舞台上重新有話事權，我地出國旅行再唔會被外國人誤會係日本仔。我老曹有信心人民幣遲早取代日圓國際地位，成為全球三大貨幣之一（美元、歐羅、人民幣）。從今天日本政治危機睇，日本經濟仲有排衰；反之，中國經濟仍在日益強大。值得注意係中國社會上貧富懸殊（此乃資本主義缺點）及貪污問題，如兩者受到控制，相信我老曹有生之年可真正睇到中國崛起，成為世界上三大勢力之一。

中國應逐步走向民主

　　從德國鐵血首相俾斯麥到日本明治維新，一個國家崛起初期必須有強勢領導。戰後台灣、南韓亦如此，而非乜民主。隨經濟日益發達，國家軍事力量向上，便應轉向民主制度，以免一旦出現野心家，利用國家經濟力量、配合軍事力量去侵略別國。太早搞民主，印度就係最現成例子，其他如菲律賓、印尼、泰國及南美洲唔少國家，都向大家展現太早搞民主之害。

　　以一間公司為例，第一代創辦人必須中央集權，強勢領導！到第二代如要公司進一步強大，必須搞小圈子民主（由公司主席一人領導，漸漸過渡到董事局領導）。到第三代如希望公司成為跨國企業，必須實行全面民主，由股東大會決定邊個係領導層。董事局成員應由專業人士出任。

　　鄧小平係中國改革開放第一代領導人，鄧逝世後，中國進入第二代，即江澤民時代。至於需時幾耐才進入第三代？有人認為胡錦濤應該係最後一位第二代領導人，隨中國軍事力量冒升，我老曹希望有生之年見到中國邁向民主（如2012年香港實行普選，香港未來例子可作為中國日後發展全面民主參考），以免走上過去德國同日本之路（何況中國無論人口、國土都較德國同日本大，如中國出現野心政治家，破壞力十分驚人）。中國唔逐步走向全面民主制度，別國對中國戒心將愈來愈大，便會齊齊起來限制中國經濟進一步發展。食有時，睡有時，發展民主亦有時，太早不行，太遲亦不得，時間宜剛剛好。

太陽東方升起西方落下

　　呢幾日格蛇為美國未來經濟提供幾灰前景展望，但我老曹同意格蛇睇法，相信2000年已係美國經濟見頂年。美國從1900年冒起，漸漸取代歐洲列強經濟地位，到第二次世界大戰後，軍事力量雄霸半個地球，為美國帶來五十幾年空前繁榮。2000年歐羅出現，代表美元雄霸天下日子結束，相信2030 年人民幣、歐羅同美元將出現三分天下局面，符合我老曹1978年開始諗法──太陽已從東方升起，並西方落下。

　　中國3C（8153）、禹銘投資（666）、奧亮集團（547）、正輝中國（169）、GAY GIANO（686）停牌。