2007年9月11日 星期二

2007-09-12


滬深股市墮醉鄉  

9月11日,周三。恒生指數跌47.46,收23952.24;成交912.8億元。9月期指低水,回落116點,收23890點。  

今天蒙古能源(276)升16%,地鐵(066)升7.3%,因麥格理推介。

恒指難擺脫道指牽引  

中國8月份CPI升幅6.5%,係1996年12月以來最高,摩根大通估計中國再加息,令滬深A股回落4.7%。工商銀行挫5.6%;中國銀行挫 4.4%;招商銀行挫4.2%;民生銀行挫6.9%;萬科回落5%;北辰實業跌8.8%;中信證券跌4.5%;海通證券跌8.4%;宏源證券挫6%。滬深指數過去12個月已上升三倍,早已進入尋頂期。  廣州十三幅住宅土地拍賣,富力地產(2777)以1.8億元購入白雲區地皮,創該區歷史新高,折合樓面地價1.8729萬元一平方米。  

第二次世界大戰後,美國經濟從未出現經濟蕭條(連續兩年GDP負增長)。1982年之後,美國經濟亦從未出現衰退(連續兩季GDP負增長),未來能否做到連一季GDP負增長都冇?  

道指由7月17日14021點開始回落,技術表現十分差;紐約證交所金融指數情況更壞,不但下降軌已形成,而且早已出現一浪低於一浪【圖】。至今為止,恒生指數仍有一定抗跌能力,最終能否擺脫道指牽引,或只係時差問題(道指7月17日見頂,恒生指數9月5日24283點見頂,滬深A股9月6日 5448點見頂)?  

根據CNBC Charlie Gasparino數字,今年超過1000隻對沖基金中,仍然賺錢者只有40隻!上述數字係咪準確仍在調查中。  

在不適當時刻買入優質股,亦可隨時失去投入資金三分一到三分二,所以唔好對timing掉以輕心。8月18日美國聯儲局減貼現率,當天透過四大金融機構向市場注資超過20億美元,結果係點?過去三星期商業票據(Commercial Paper)即由企業發行,一般只有30天到90天期,作為短期周轉用卻減少2400億美元,即企業再發行商業票據方面已出現極大阻滯,只有直接向銀行借錢!銀行提供信貸相較商業票據市場萎縮講,兩者邊個影響力大?不但如此,兩個月借錢買樓利率由6.25厘上升到近日超過8厘,唔通真係冇影響?  

仲有CLO(Collateralized loan obligations),即銀行向私人企業提供按揭貸款約2500億美元,家亦面對萎縮,情況有如1990年至今日本。過去十六年日本缺乏唔係資金,而係面對信貸萎縮(錢借唔出去,因為有信用客戶唔使借錢,想借錢客戶卻信用差)。值得注意係,經濟走在股市之後六至九個月,而非走在股市之前。美國在金融方面知識較日本豐富,2001年1月至2003年6月減息潮曾阻止美國經濟進入1990年代日式經濟衰退,隨格蛇退休及去年下半年起美國樓市陷入低潮,美國經濟會否進入長期GDP低增長期?由樓市所引發次按危機,各國央行注資結果只會令新興市場股市泡沫繼續膨脹。

中央政府擔心通脹失控  

滬深A股大幅回落,係令人擔心另一訊號。過去中國人民銀行一再提升利率及提高存款保證金率,仍無法阻止股市上升,8月份中國CPI已大幅拋離人行目標通脹(3%),如人行將利率抽緊至CPI增長率之上2厘,後果會點?中國政府會否為2008年奧運而放棄對付通脹?周日同詹瑞文兄演出《富爸爸、笑爸爸》喜劇時,提到內地A股,我老曹已警告大家滬深股市已醉醉地,各位有冇收到訊號?What goes up, must come down!國家財政部9月10日公布,將發行2000億元人民幣特別國債,上述債券發行可進一步抽緊內地銀根。上述公布亦粉碎外傳在10月份中共十七大會議前唔會抽緊銀根謠傳。睇8月份CPI升幅,令中央政府進一步擔心未來通脹率唔受控制;加上內地直通車遲遲未到香港,後市國企股點睇(以O計,國企股已進入牛市第三期)?  

會考十優狀元年年有,金融市場炒手最難求。過去十年被視為「出色基金經理」只佔總人數20-25%,或四個之中只有一個。值得注意係,牛市中大部分基金經理成績都幾好,只有熊市中才知邊個基金經理表現出色。例如1997-98年熊市中能夠不敗基金經理只佔總人數10%,2000年3月至 2003年4月情況亦一樣。幾時應該睇好而進取?幾時應該睇淡而保守?講就容易做到卻難。70%投資者失敗理由就係最唔應該睇好時睇好、最唔應該睇淡時睇淡。  

賺錢只係一種技能,透過學習再獲得,而非乜天分。只要有足夠動力,加上一定的努力便可獲得。賺錢主要透過智慧而非勤力,例如在每一次失敗經驗中吸取精華,重新站起來再嘗試,唔需要特別聰明或特別勤奮甚至特別幸運。例如你有冇耐性等候一個機會出現?有冇學曉止蝕唔止賺?或靜靜地等候財富自動增加?  

香港由1950、60年代貧窮社會進入1970、80年代小康;到1997年7月1日主權回歸前的富裕社會,再經歷過亞洲金融風暴將香港社會分裂成為20╱80。善於理財者1997年7月1日後財富繼續增長,經過十年時間(以年率15%計),今天家財係1997年7月四倍,成為香港富裕階級。不善理財者過去十年面對工資(或薪金)零增長,部分更負增長,如不幸持有自住樓宇,樓價1997年8月至2003年7月回落65%後,雖然過去四年回升唔少,但今時今日仍只及1997年8月60%。呢80%人口組成香港大多數,加上存款利率低收益少,唔少人生活水平已無法重返1997年上半年水平。  

20%善於理財者因財富過去十年上升四倍,打跛腳唔使做,生活仍然好好,用係名牌,住係豪宅,食係稱心滿意食物。反之,80%不善理財者卻面對身水身汗仍冇啖好食,唔少人住宅上損失唔少,有些人面對十年凍薪(或加薪極少),對社會愈來愈不滿。退休人士面對低利息時代,生活亦唔好過,偏偏呢個時候香港面對退休高潮(戰後出生嬰兒大量步入退休年齡)。至於投資,7月26日至8月16日急跌、8月17日至今急升,唔嚇死才怪。香港進入富裕社會後,勞動要素及資本要素收入分配中地位嚴重失衡。工資(或薪金)收入佔香港人總收入比重大幅下降,80%人口仍然靠工資或薪金作為主要收入來源,面對生活環境係日做夜做都生活得唔好。另外一D人因投資有成,已經可以火燒旗桿。香港會否有一天走上東南亞國家之路(貧富兩極化,最後令社會出現不穩)?財富過分集中小部分人手中問題,正在香港社會上浮現,至今仍冇妥善方法解決。

次按問題明年將惡化  

同樣係消費者,年入40萬元或以下家庭,消費極受經濟盛衰影響;反之,年入120萬元或以上家庭消費,經濟影響不大。換言之,消費力愈強,家庭消費行為愈唔受經濟盛衰影響,一旦經濟轉劣,最先受影響反而D服務年收入40萬元家庭行業;反之,高消費及低消費行業不受影響。估計第四季美國CPI增長率低於2%;如無意外,未來應有兩次減息空間。但次按問題在明年不但唔會轉好,反而會進一步轉壞。美國住房價估計在2009年前亦無法轉好,美國失業率估計由目前4.6%上升到4.8%或5%,後市點睇?Bad market, good stock picking,你能否做到?

沒有留言:

張貼留言