可能話咁快就到
9月5日，周三。恒生指數升183點，收報24069.17。期指低水，收24050點，升250點。全日成交跌至891.17億元。恒指突破24000點，睇四叔望年底25000點可能話咁快就到。近日四叔頻頻扮大好友買新股成策略股東，實行win win雙贏。
講番個市，港股即日波動大，高低波幅有450多點，早段升300幾點，曾創24283.15高位，下午日股回落，大型發展商大和房屋社長警告當地房產泡沫可能形成，價格有大跌危機，加上再有英國對沖基金受次按問題影響，日圓回升，拖累恒指午市後倒跌，尾市有買盤支持重返24000點。大市高位反覆拋上拋落，入市賺蚊年唔係冇難度也。內地股蟻驚北水南流冇回頭
今天中移動（941）創107.3元新高，收市報105.6元，連同控（005）收139.7元，支持大市偏好，炒減息者追捧新地（016）亦創 109.3元高位。內地話今年天然氣會供不應求，對甲醇生產商不利，但煤炭價格肯定會企硬，中煤能源（1898）創新高收報15.52元，中國神華（1088）亦一度創新高。
睇番中國滬深指數先跌後回穩，早段擔心8月份通脹率再升，加息降溫難免。上日市場指有共109億美元新股上市帶唔少壓力，不過市場傳出內地個人資金自由行涉及層面廣，可能要睇多一、兩個月先至放行咁話，令內地股蟻大嗌咁都冇咁驚，最驚係A股之水北面來，南流H股不復回也。至於港股眼看直通車短期無望，唔少炒A╱H股溢價收窄股份明顯回吐。
投資市場永遠充滿挑戰與爭辯，恒生指數由8月17月19386點回升，漸漸接近四叔預測25000點，呢個水平，股市何去何從？面對次按問題繼續惡化，投資策略變成點樣惡劣環境下挑選良好投資對象。中央提出個人資金自由行計劃，令H股同紅籌股8月17日有出色表現，但呢架直通車至今遲遲未開出，國企、紅籌股後市又點睇？對D滿懷希望者，打擊又係點？雖然恒指創新高，但大部分股份未能重返7月26日恒指23557點時高位。恒指創新高，而大部分股價跟唔上，乃技術性轉淡訊號。自1960年開始，每次美國經濟出現衰退（連續兩季GDP負增長），都由樓市轉淡開始，依家美國樓市供求唔平衡非短期內可解決。
減息難以扭轉美股方向
雖然今年美國GDP中，房產所佔比重已較從前少好多，但美國零售業一樣感受到樓價回落壓力。何況CDO、CLO及MBS影響下，美國信貸市場進入收縮期，2003年透過聯儲局瘋狂減息而不負責咁創造出信貸擴張期，支持住2003年至今經濟繁榮，往後日子係咪要加倍奉還？有人寄望9月18日減息 0.25厘，既然2001年1月減息亦無法改變股市大方向，未來即使有三次減息又能改變咩？超過3000億美元ARMS面對重新商討利率，其壓力非輕。道指由7月17日至9月7日回落19％後，聯儲局及白宮出手救市下反彈，但唔似恒生指數出現新高，道指至今未能重返7月17日高點14021點。道指7 月17日至9月7日跌幅，係2003年3月以來最大，令美股失去1.4萬億美元市值，至今未收復所有失地。技術上睇，似反彈多於另一次上升。
油價又重返75美元以上一桶，科技股重新上升，係近期推高美股理由。油價上升來自颱風威脅，天氣永遠難測，科技股上升相信係炒落後。
7月份美國建築開支跌0.4％，係今年1月以來最大跌幅，商業樓興建亦無法抵銷住宅樓減建，以年率計只有11700億美元（住宅樓已連續十七個月減少，年率只有5340億美元，係2004年2月以來最低）。私人項目更跌0.7％，至年率8800億美元，係2005年5月以來最低。美國建築業陷入不景氣。香港更慘，自1994年起建築業走下坡以來，一直未好過，搞到唔少紮鐵工人冇工開，西九工程政府至今仲未上馬，添馬艦政府總部劃則期，啟德郵輪碼頭講十年仍未見影……，香港已浪費十年無謂爭拗上。睇睇上海，再睇睇香港，令人嘆氣，真係家衰口不停。
2007年美國唔係1998年美國，次按問題唔同長期資本管理公司！雖然我老曹唔信美國經濟會出現衰退，但無可否認威脅在上升中。過去十年美國工資平均升幅低於通脹率，消費上升有賴1997至2000年科網股泡沬及2000年起樓價上升（所謂財富效應），當財富效應逐漸消失後，2008年美國消費情況又點？美國人係全球最大購物狂，不但支持美國GDP繼續增長，亦拖動全球GDP上升（有幾多國家經濟增長來自出口產品到美國？）。
2002年起至今美元一再眨值，2002年88美仙可換1羅歐，依家係1.36美元換1歐羅。不但美元價已經大幅回落，同時美國股市、樓價均較1998年大升，會否因為9月18日可能減息，而令美國樓價止跌回升，以及令道指更上一層樓？
另一支持世界經濟繁榮功臣係日本同瑞士。根據蘇黎世國際銀行結算組織數字，日本共借出1.005萬億美元利差交易；瑞士亦唔少，共借出6780億美元利差交易。換言之，1998年至今過去十年，除美國外，日本同瑞士亦係資金供應國。問題係今時今日再借日圓同瑞郎，風險大唔大？
全球升市應屬大反彈
從資金市場角度睇，8月17日開始全球升市（少數例外係中國同香港），極有可能只係一次大反彈，而非另一升市開始。經此一役，銀行貸款市場地位又再上升，反而商業票據市場可能面對萎縮期。值得注意係，市場不乏資金，只係借貸方面開始收緊，上述問題並非減息可以解決。1990年日本唔得， 1997年8月香港唔得，2007年8月美國又點樣？
中國經濟卻面對過熱，CPI進一步上升將推高利率，但信貸仍然寬鬆，能否阻止樓價及股市上升令人存疑，中國經濟繼續向泡沫化推進。
2001年起中國開始大量入口原材料，引發天然資源大牛市；2006年起中國開始大量入口農產品，係咪另一次天然原材料翻版？過去一年豬肉價、雞價、雞蛋價、牛奶價、小麥價、玉米價都急升，食物價格上升對高收入家庭影響唔大（食物開支佔每月總開支比例唔高），但對低收入家庭影響好大（月入10萬家庭食物開支較月入1萬家庭多唔到幾多，月入10萬家庭買錢可能係6000元，佔總開支6％；月入1萬家庭買錢可能係3000元，佔總開支 30％），因此中國人感受到CPI升幅好大，但OECD國家感受唔到。高通脹壓力令中國經濟進一步過熱機會十分大。
小麥價已創1973年以來新高，俄羅斯作為全球第五大小麥出口國，6月份已追隨第六大小麥出口國烏克蘭大幅削減出口稅，鼓勵農產品出口；阿根廷亦減少養牛，以便將土地種植農產品。雖然係咁，受惡劣天氣影響及新興工業國如中國、印度等對農產品需求，展望食物價格後市仍係易升難跌。
另一問題係中國同印度工業化後，面對缺乏乾淨水問題，農產品卻需要大量水去生產，缺水及水價貴反過來又限制農產品產量。
樓市升跌純看供求關係
中國宏調以來，人行六次提高法定存款準備金率、四次提高存貸利率，但全國房地產價格依然愈升愈有。再睇睇美國2004年6月至去年6月加息十七次，利率由1厘加至5.25厘，美國地產繼續上升；反之，過去一年美國停止加息，美國樓價反而止升回落。 我老曹過去四十年觀察香港樓市起跌，最基本因素只有一個─—供求關係。1960年代炒地皮潮過去，唔少地產公司倒閉，供應減少；1970年起股市興旺，支持1970年代初期樓市興旺；1973至74年股市大熊市，又再壓抑樓價，直到1976年起內地難民大量湧港，樓市又再上升；1982年中國宣布 1997年7月1日收回香港主權，引發移民潮，樓價又再下跌；1985年4月1日中英聯合聲明限制土地供應，為香港帶來十三年樓市興旺期；1997年白眉董推八萬五政策，樓價如食瀉藥；2003年9月政府取消賣地政策改用勾地表，土地供應減少，樓價又再上升。
中國正面對城市化，人口從農村大量向城市轉移，係七十多個城市住房供不應求基本因素，除非利率加至十分高（例如1981年本港般加至22厘），不然溫和加息根本起唔到作用。要真正解決低收入人口住房問題，應學習香港政府提供公屋而非居屋（政府有責任解決人民居住問題，但冇責任幫人民置業）。居屋政策絕對係與民爭利，應該讓社會上20%至30％低收入家庭入住公屋，作為社會福利其中一項（一如政府有責任提供醫療服務畀20%至30％低收入家庭，如果向全體港人提供接近免費醫療，咁做政府遲早破產）。
根據中國人民銀行發布「二季度中國貨幣政策執行報告」披露，上半年全國房地產開發投資完成金額9887億元，較去年同期升28.5％。國家發改委及國家統計局調查顯示，第二季漲幅最大城市深圳升14.3％、北海升12.5％、北京9.5％、蚌埠8.9％、成都8.5％、石家莊7.5％、西安升 6.09％，連青島亦升5.5％、大連升5.2％，可以話全國城市樓價皆升。
為解決低收入家庭住房困難，政府將全國擴大廉租房覆蓋面。香港雖然樓價貴，但有35％低收入家庭住公屋，平衡高樓價壓力。
香港住宅市場分布100平方米以上（俗稱豪宅）總供應量只有8萬多間，佔私人物業市場總供應額7.5％；其餘100多萬間係100平方米以下普通住宅，另有10％人口住居屋內，35％住公屋。依家香港除豪宅供應量唔足夠，其餘項目早已達致供求平衡；反觀內地最逼切需要係類似香港公屋同居屋。
今時今日，內地大城市住宅樓價北京平均1萬元一平方米、上海1.2萬元以上、深圳1.4萬元、武漢6000元、青島8000元、西安4500元、大連 6500元、太原5000元、石家莊4800元、天津9000元、廣東惠州6000元、成都7000元、濟南6000元。一般大學生月薪3000元，30 歲左右有五年工作經驗者6000-8000元，1萬元以上算係高工資。香港一般大學生月入1.2萬元，普通住宅樓價一平方米4萬多元。如以大學生收入同樓價比，內地樓價仲未及香港貴。
東南國際（726）、新創（1141）、長遠電信（110）、中國林大（910）停牌。
沒有留言:
張貼留言