2007-09-13

只許州官買股　　

9月12日，周三。恒生指數升357.90，收24310點；成交974.83億多元。9月期指升438點，收24328點。恒生銀行（011）升 3.9％，見129.5元，今年內上升22％，跑贏母公司控（005），部分理由係受《金融時報》報道話控可能合併恒生消息刺激，其次係恒生打算 2010年前中國內地成立50間分行。股聖畢非德出售9266萬股中石油（857），平均價11.473元，依家仍住9.72％股權。美國Alcoa 計劃出售手上中國鋁業（2600），每股17.26至18.27元，共8.842億元，相等於中國鋁業22.4％，集資20.8億美元，由高盛負責搵買家。《倫敦時報》報道，和黃（013）可能出售旗下3意大利，估值100億歐羅，令股價大升6.2％；長實（001）亦因此升3.9％。新地（016）大升7.1％，因傳銀行調低按揭利率，有助刺激房地產市場需求。財爺內幕消息入市？　　

美元出現第六天回落，見1.3861兌1歐羅及113.96日圓。美國房地產商協會估計，美國二手樓銷售今年將會下跌8.6％（去年下跌6.8％）、新屋銷售則下跌24％（去年下跌18％）。　　

踏入7月股市好似精神分裂，次按問題令股市大幅回落，但8月17日起各國央行入市干預，又令股市止跌回升（以恒指計更升突）。牛皮市好難搵到做 trade機會，上落市做trade機會則大量湧現，timing成為輸贏關鍵，部分人好似肥貓咁，食飽飯唔願郁，有內幕消息者則炒個不亦樂乎。連新上台財爺亦為政府增持港交所（388），係咪犯證券條例（利用內幕消息入市）有待商榷，可能係另一宗「只許州官買股」。　　

8月17日至今不足一個月，唔少與中國有關股份股價出現三位數字升幅，認真吸引。中國GDP升幅接近11.9％，而滬深指數今年升幅接近100％。內地開放個人資金自由行消息，意味內地一億個投資者可來港投資，刺激唔少國企、紅籌股升幅驚人。

中國加息改不了負利率　　

中國直接向美國出口只佔總出口20％（如包括經香港出口，亦只佔總出口30％）。出口產品中，70％係消費產品，可能受美國次按危機影響，但總的來說影響仍然唔大，反而係中國政府欲改變經濟結構影響來得大。8月份中國CPI上升6.5％，進一步加息無可避免，但加息仍改變不了依家負利率環境（利率低於CPI增長率）。中國CPI增長率幾時才重返人行目標通脹率3％或以下？　　

標普╱Case-Schiller美國房屋價格指數第二季下跌3.2％，係近二十年內最大跌幅，估計第三季繼續下跌。中國銀行（3988）公布持有 89.65億美元次按MBS，其中75.4％係AAA級（6月至8月市價跌6.8％）、21.7％AA級（6月至8月市價跌30.1％）、2.9％A 級（6月至8月市價跌44％）。次按對中國境內銀行影響相信已股價上反映。中國出口業務佔去年GDP 37％，只計美國出口則只佔中國GDP 11％。因此，美國出口增長率放緩，對中國GDP影響有數得計，除個別出口行業或機構因投資過大而產生產能過剩問題外，整體而言對整個中國影響極之有限。　　2000年科網股泡沫爆破，美國GDP增長率放緩，中國由2000年第二季開始至2001年年底連續六季出口增長率由37.8％降至6.5％、工業生產增長率由11.7％降至8.7％、GDP增長率由8.3％降至3.6％；不過，2002年起迅速反彈。呢次美國GDP增長率由2006年第一季3.3％降至2007年第二季1.8％，對中國出口增長率影響極之有限。中國GDP增長率繼續上升，主因係中國產品出口市場已漸分散到較多國家，減少對美國依賴。　　

中共十七大10月15日北京召開，相信將進一步提升黨內民主。盎斯金價應值1050美元！　　人民幣升值、QDII、個人資金自由行都在支持港股，估計未來十二個月約有500億至1000億美元資金由內地流港，形成恒生指數易升難跌格局；反之，滬深A股開始進入令人擔心水平，中央政府一再抽緊銀根下，出現一次較大調整機會好大，會否出現此消彼長局面？有待觀察。2005年上半年A股同 H股股價差距唔大，今年上半年兩者差距超過80％；落實QDII及中央宣布內地個人資金自由行後，有關差距再收窄至60％（2003年第二季A、B股差距仍達90％，公布內地人可投資B股後，2005年上半年A、B股差距消除）。　　

1970年金價35美元一盎斯，1974年12月見200美元，1976年又回落至103美元，1980年1月見850美元。1999年金價回落到 252美元，2006年5月12日見730美元後，回落至6月14日542.45美元。由去年6月14日起金價會否進入類似1976至79年式上升？　　

1973至74年石油危機，美國透過大量發行貨幣，令經濟由1975年起復甦。但1977年起通脹率加快上升，直到1979年年底雪茄伏出任聯儲局主席，大幅將聯邦基金利率提升至1980年見20厘（三十年期債券孳息率14.5厘），才再次控制通脹率。2000至01年先有美國科網股泡沫爆破，再加上 2001年「九．一一慘劇」，引發聯儲局2001年1月起減息，2003年6月聯邦基金利更低至1厘（三十年期債息4.8厘），經濟自2002年起復甦（股市則為2002年10月），2004年6月起利率逐步正常化。同1970年代唔同，就係中國同印度成為強大生產基地，佢地吸收大部分原材料價格上升壓力，而冇將製成品提價，令CPI至今為止OECD國家升幅唔大。去年8月起美國已停止加息，後市如何？會否出現類似1978及79年金價升穿 200美元後狂升至850美元情況？冇人肯定知道結果。　　

1980年每一盎斯黃金，美國金融制度內有6966美元；2006年每一盎斯黃金，美國金融制度有38349美元。1971年自從美國放棄金本位後，市場上流通美元至今增加10倍，而美元購買力則下降96％。如由1945年美國訂下一盎斯黃金值35美元計，戰後至今美元流通量上升超過30倍，用此計算金價，

金價應該值1050美元一盎斯！　　

據Premier FoodsCEO所講，上一次食物漲價高潮係1975年，當年食物支出佔OECD國家人均收入30％；最低係2003年8月，食物支出只佔OECD國家人均收入10％。其後人造牛油花嘜加價41％，真正牛油跟隨牛奶價格上升，蘋果售價亦上升140％，麵包售價2006及07年分別上升5％至6％一年，乾意大利粉上升10％，肉類食品上升30％，即食麵亦大幅加價。對低收入家庭而言，過去三年食物漲價已構成一定壓力。

食物漲價高潮或在眼前　　

8月份中國CPI上升6.5％，其中城市價格升6.2％、農村價格升7.2％、消費品價格升8％、服務項目只上升1.8％、食物價格升18.2％、非食品價格升0.9％。8月係消費淡季，9月又點？　　

上一次食物價格上升潮維持五年（1970至75年上半年），呢次由2003年下半年開始食物漲價潮，高潮係咪眼前？　　

小麥價格已升穿9美元一蒲式耳，見9.01美元；今年內小麥價格已上升80％。　　

無論黃金、樓價、美元，都由供求因素決定。戰後美國政府一直印刷美鈔，係全球性通脹理由。1970年代大量資金湧入黃金市場，1980年代大量資金湧入股票、債券市場；1990年代大量資金湧入物業市場，形成金價、股價、樓價上上落落。投資就係決定何時金、何時股、何時樓及何時現金。近月次按危機令資金又再流入黃金市場。自從2001年聯儲局開始減息防止經濟出現衰退，令2001年9月起金價再次進入上升軌道，如9月18日聯儲局減息，唔排除金價破730美元進一步上升。從近月各國央行放寬銀根計，唔排除未來全球通脹率又再上升，金價挑戰730美元阻力，破或不破？本月內便知道。