2007-11-01

好，仲有更好！ 　　

10月31日，周三。恒生指數跌285.64，收31352.58；成交154.17多億元。11月期指低水，跌302點，收31268點。恒發售煤氣所得資金如何運用？　　

今天鞍鋼（347）跌6.2％，見28.15元，因第三季純利減少18％，見17.6億元，理由係經營成本升22％。中海油（883）跌4.5％，見16.16元，因油價回落3.4％，見90.38美元一桶。聯想（992）升8.6％，見8.73元，估計周四公布業績理想。中行（3988）升2.6％，見5.06元，因摩根大通推介。滙控（005）升1.1％，見151.5元，滙豐將部分英國信用卡業務以3.85億英鎊出售。　　

David Webb要求恒發（097）小股東投票否決將39.06％中華煤氣（003）股份出售畀恒地（012）去交換恒地股份及現金，理由係恒發响中華煤氣係最大股東，一旦交換股份後，便成為恒地嘅小股東。我老曹認為，依家恒地早已控制恒發67.94％股權，所以上述意義唔大，反而係恒發日後出售中華煤氣後點樣運用回籠資金才係重點，例如會否進一步加強內地收費公路及橋樑方面投資？

大市升降同消息本身無關　　

據Investing Intelligence.com响10月15日調查，睇好者佔62％，係三十二個月內新高，上述睇好指數同1987年10月股災前好接近，但上周五已引發美國股市出現較大跌幅（香港因上周五係假期，因此周一才大跌）。到10月26日，睇好指數仍高達56.5％，好友搵盡一切理由解釋大市點解上升，唔少理由十分牽強。股市永遠如此（請記住唔係消息支配股市，股市升降其實同消息本身無關）。加息、減息都可以成為睇好或睇淡股市嘅理由（而非加息股市跌、減息股市升咁簡單），因此周三美國減唔減息，對股市後市發展其實並唔重要，上述只係一個藉口而已。如睇A╱D線，去年 4月起A╱D線已回落，即去年4月開始愈來愈多股份股價跟唔上大市升幅，即我老曹所講嘅20╱80現象在股市出現，升市集中在20％股份身上，大部分（80％股份）跟唔上大市升幅甚至回落，其中又以二線股為主。由於係資金市，股價升降由資金流向決定，通常情況下，資金主要流向大企業股，形成指數由去年5月至今大升，但唔少股份去年5月至今仍跌。情況一如今時今日香港社會，20％人口較1997年前更富有，但80％人口較1997年前窮咗（或原地踏步）。　　

今年7月穆廸將美國七百多項次按債券降級，引發8月美股大跌；今年10月穆廸再將二千二百隻次按債券評級降低，股市卻上升，再次證明股市升降同消息關係唔大（只係藉口而已）。　　

美資大銀行創造「SIVs」（結構性投資工具），目的係將次按債券由資產負債表上剔除，變成長線投資工具（唔成功嘅投機往往變成長線投資），日後毋須按市價將次按債券市價入賬而影響銀行純利或資產負債表。1990年美資銀行指摘日資銀行咁做，依家美資銀行自己變本加厲，而美國財長卻表示支持，並成立 Superfund計劃向投資者集資添（差D由財政部印蚊年購入Superfund！）。　　

睇睇日本經濟發展，由戰後到石油危機前，製造業十分興旺；1973年石油危機後，日本紡織業、玩具業全面走弱，反而電子產品業在石油危機結束後成為日本嘅主要出口產品。再睇睇南韓，在廉價勞工時代，製造業一樣興旺；今天南韓出口產品亦係以高價電子產品為主。今年中國正由廉價生產時代走向高增值產品時代，因此相信最值得投資嘅係電子產品股（走高科技路線者）。如中國所走嘅路同日本、南韓一樣嘅話，股票市場正繼續尋找下一批「股市寶貝」。

純利高增長股份隨時跌得最慘　　

假設某股每股獲利2元、純利上升10％一年，每股市價只有20元（O十倍）；如純利上升20％一年，股價可上升到30元（O十五倍）；如純利上升30％一年，股價可見40元（O睇二十倍）；如純利上升40％一年，該股市值60元（O三十倍）；如純利上升50％一年，該股市值80元，因O可睇四十倍……。換言之，同樣賺2元，如純利升幅十分大，市價可以升到十分高，此乃所謂PEG理論，一旦純利升幅收窄，該股O又向下炒。假設今年某股每股獲利2元，較去年升50％，該股可以值80元一股；如明年只賺2.2元，較今年只升10％，該股股價便會由80元回落到22元（因2008年純利增長率只有10％），即使明年每股純利較2007年多。換言之，升幅最大嘅往往係嗰D轉虧為盈嘅股份，跌幅最大嘅則係純利由高增長放緩嘅股份。此乃點解投資者要小心明年內地A股。　　

內地樓價今年上升30％，令地產股純利急升，G（增長率）十分高，因此可支持內地房地產股股價急升；反之，人民幣過去兩年升值8％，加上工資成本及原材料價上升，令製造業純利下降（或不升），O冇增長率（G）支持，自然向下炒，呢幾年工業股又點可以有出色表現？　　

內地A股市場早已成為「股票買賣者嘅天堂」，直到明年中國GDP增長放緩、內地企業純利升幅放緩為止。上述情況1920年代在美國出現，曾令道指由60點升至400多點；亦在七十年代初期香港出現，恒指由100點升上1700點；呢次2005年起在內地出現。當然，呢個情況遲早有一天會結束，我老曹冇水晶球，亦冇興趣加入「猜謎行列」，只須嚴守止蝕唔止賺便可（即恒生指數如回落15％便要小心）。　　

今天美元見1.4447兌1歐羅（一度見1.446美元兌1歐羅），英鎊見2.073美元兌1英鎊（1992年1英鎊兌1美元），兌加元更係1960年以來最低，兌澳元接近二十三年最高。大量熱錢繼續通過非正常途徑進入中國內地，估計今年二、三季流入中國嘅熱錢達2500億至3000 億美元，而且至今仍繼續流入，目的在套利（例如博人民幣升值、博內地房地產升值及博內地A股升值）；唔少透過地區合法財務公司進行，與嗰D跨境業務正常嘅企業進行交易，將非法進入轉為表面上合法進入。今時今日資金進出中國其實已相當方使，運作方式也很成熟，流入方式千變萬化。其中最常用係提高出口產品價格 10％，再以預付貨款方式進入中國。上述資金主力進軍內地高端住宅和其他豪宅市場，因此令中國外滙儲備急升，並增加人民幣升值壓力，形成內地地價今年翻四番。　　

中石油發行A股凍結嘅2.57萬億元人民幣今天解凍。內地A股已一連三天炒上去迎接呢筆資金，今天A股保持上升，上海股市成交金額回升到1400億元以上（早兩天不足1000億元）。　　

另一方面，資金亦流入香港，金管局拋售46.5億港元去阻止港元進一步升值，因此港股今天回落，相信只係獲利回吐而已。　　

波士頓諮詢公司估計，中國擁有100萬美元金融資產（即唔包括自住物業）嘅家庭數量由2001年十二萬四千戶上升到去年底嘅三十一萬戶，全球排名第五，僅次於美國、日本、英國和德國。中國千分之一家庭掌控全國41.4％財富。全球擁有100萬美元金融財產嘅家庭共九百六十萬戶，佔全球家庭總數0.7％，控制金融資產33.2萬億美元，佔全球家庭金融資產總數33.9％。私人銀行服務在中國剛起步，估計到2011年中國擁有「百萬美元」金融資產嘅家庭總數達六十萬九千戶。　　

德國年初將VAT提升到19％去應付國家福利開支，情況有如1990年代中期日本經濟剛由衰退中恢復，政府立即加銷售稅，將經濟再次打沉嘅情況接近。政府從不創造財富，只係將財富重新分配（同時在分配過程中將部分財富浪費掉）。窮人值得同情，但在西方社會，「窮人」嘅定義由法律決定。在美國一家四口，如果年收入少於8.1萬美元便叫做窮人（即63萬港元一年）。窮人家庭可以擁有兩架汽車及因食物供應太多而體重接近二百五十磅，只要一家四口年收入不足8.1萬美元便被法律介定為「窮人」，可以同政府攞福利。在美國何謂有錢人？只要年收入20 萬美元以上就係「有錢人」，因此須畀多4％稅，扣除稅項、社保開支後，富有家庭餘下資金只有10萬美元。如果佢要供樓、供車的話，生活水平肯定較美國窮人家庭仲低。在美國，所謂富人同窮人嘅分別（一家四口計），在開支上只係多1.9萬美元一年。大家或者明白點解近二十多年西方社會經濟呆滯不前嘅理由。

股市從來不是理性　　

我老曹小學時讀英文，先生要念「good、better、best；bad、worse、worst」，譯做中文變成「好、更好、最好；壞、更壞、最壞」。但據英文嘅真正意思，「好」有幾個層次，「壞」亦有幾個層次。記得去年聖誕節前新城財經台訪問，叫我老曹為唔少人認為「偏高」嘅A股講幾句話，當時我老曹話如你上到IFC十八樓，便以為好高，你知唔知IFC有八十八層高？上述戲言我老曹早已忘記，反而前天馬時亨局長响我老曹面前提起。太多人投資見好即收，而忘記good之後仲有better甚至有best！在我老曹9月出版《論勢》一書中有提及，最近被波浪大師許兄轉載上網，就係1973年1月恒生指數1200點，便自以為好高收割離場，點知兩個多月後恒指見1774點再升50％。1974年7月恒指跌至450點便以為好低，點知六個月後見150點再回落三分二。今年上半年我老曹亦寫咗篇文章：太早睇淡係死罪。張立兄認為，世上「術士」多，只要隨便睇幾本有關書籍便懂得「術」，但曉「數」者少。「術」中最難掌握便是「數」，例如「亢龍有悔」係人都識，但知道哪一天才「有悔」卻相當難。盛極必衰你我都識講，但哪一天才衰你知唔知？我老曹就唔知喇。我老曹自認較一般分析員高一皮嘅理由，就係知道自己唔知，同時肯承認自己唔知。一般分析員最大缺點就係唔肯承認自己唔知而扮先知，結果從恒指20000點一直睇淡到現在，去年12月就話內地A股係泡沫，講咗十一個月卻見泡沫不斷擴大，卻無法告訴別人哪一天泡沫才爆破。我老曹1973╱74 年一役之後早已告戒自己「淡市莫估底，旺市莫估頂」。Things are going to get a lot better before they get best!又或者話：同志們！Cheer up！The worst is not yet over！近日唔少人同意去年底我老曹嘅分析：「一個泡沫由開始形成到爆破，通常需時三年」（請記住唔係一定係三年，只係一般可維持三年）。唔少人指摘股市非理性上升，我老曹1968年年底入行至今快三十九年矣，請問股市幾時有「理性」過？股價從來唔係偏高就係偏低，往往在Boom & Bust之間來回擺動。如希望在股票市場尋求合理價，上述行為本身已經不合理。因此，有智慧不如追隨趨勢。