2007-10-22

三種策略應付高P/E　　

10月21日，周日。上周五重陽放假一天，當天日經平均指數跌291.72或1.71%，收16814點；道指跌366.94或2.64%，收 13522點。周一恒生指數點開？有人預測恒指大跌1000點（即下跌3.4％），是耶非耶？恒指見30000點已極之偏高，趁勢調整亦好正常。

純利增長係股市上升底因　　

揀股唔炒市，過去四年企業純利增長，係支持股價上升因素，亦係令股市反覆上升底因。美國企業今年第三季業績，標普五百已有22％公布，純利平均下跌14.8％；市場亦好公道；公布業績好公司股價繼續上升，公布業績未如理想公司股價才回落。根據Thomson Financial估計，標普五百全部公司公布業績後，純利係負增長，此乃美國2002年10月股市回升以來首次（事前分析界估計第三季美國企業純利可上升7.1％，依家已修正為第三季純利下跌3.7％）。根據Thomson Financial及路透社資料，分析員相信第四季美國企業純利可上升10％，明年首季仍保持上升10％；但第三季純利預測已落空，第四季又點？依家美國企業獲利能力較過去十年平均數高出60％（即家美國企業邊際利潤係異乎尋常地高），理論上未來美國企業獲利能力回落機會大於進一步上升……。過去由經濟環球化、科技進步及美元回落帶來純利高速增長期，會否因2007年第三季出現次按危機而告一段落？未來美國企業會否再次面對工資上升而影響邊際利潤率（過去十年工資升幅極之有限）？

愈賺愈心雄vs花無百日紅　　

面對高O（恒生指數平均O早已二十二倍或以上），傳統做法係適量地減持。大戶做法係長短棍，即優質股長（Long），同時利用拋空低質股（Short）做保障，同一時間做好倉及淡倉。理由係升市中優質股升得多、低質股升得少，跌市時優質股跌得少、低質股跌得多。利用「長短棍」，便唔使擔心股市大波動。但一般散戶由於資金少，好難做長短棍。隨衍生工具流行，另一方法係股市大升後（例如8月17日恒指19386點上升至10月18日 30025點），便將大部分股份拋售，再用其中10％資金買衍生工具，利用衍生工具槓桿效應（例如一比十）。如大市進一步上升，衍生工具升幅完全可抵銷賣出股份升幅；反之，如出現跌市，衍生工具下跌，但只係將股票賺得部分利潤輸掉（因大部分股份早已獲利回吐）。　　

人雖然冇預測能力，但可以有應變策略。上述三種策略因應各人處境不同而採用。一般散戶當睇好之時，往往全身投入甚至借孖展；睇淡之時，便希望100％係現金。各位睇睇畢非德，佢永遠保持一定現金在手，唔會100％投資，亦唔會100％係現金。所謂三七分（睇好時有30％現金在手，睇淡時亦有30％係股票），就係明白人係冇預測能力，仍保持30％投資，便唔會高價去追貨；反之，100％投資或100％現金，結果係決策上犯100％錯！手上有現金，隨時可以利用調整市去增加持股量，而唔會加入賤價拋售行列。Market players經常考慮係萬一所持股份回落點算？股息係另一重要考慮點，例如控（005）有4.3厘股息，一旦遇上跌市，抗跌能力便特別強。散戶心態係愈賺愈心雄，職業投資者才明白花無百日紅。過去九星期內恒生指數上54％，應適當地減持，因為白癡仔亦可以短期股市賺大錢，因為佢唔知危險，只有聰明人才知道適當時刻留有一手（1997年7月前唔少白癡仔樓市賺大錢，但到2003年卻要去燒炭自殺）。只有聰明人知道太短時間內賺太多錢係唔正常。牛市中賺得比別人多未必係聰明，只有熊市中能保存實力才證明有智慧。年輕人應學曉用衍生工具，亦要學曉「牛可賺錢、熊可賺錢，只有豬被人宰割」。

中國進入「三權分立」時代　　

1997年7月1日香港主權回歸後，港股漸漸一分為二，唔少香港行業早1994年開始回落，更多行業自1997年7月回歸後不振。另一方面，內地國企尤其係資源股及內地零售股等，漸漸成為近十年內本港股市生力軍……。今年8月內地宣布批准個人資金投資香港後，更進一步將港股市場一分為二。上周五美股大幅回落，周一港股會點樣反應？過去五年國企股可用表現一流去形容，未來五年又點睇內地經濟？現任領導層已掌權五年，這批領導層不但經歷文化大革命洗禮，亦睇住1989年六四事件後國家官員貪污腐敗情況一再惡化，明白長此下去最終必引發社會不安。2002至06年一連串農村經濟改革，以及2007年為農村子女提供九年免費教育，並將醫療福利制度擴大到農村……。上述做法已令內地犯罪率近年唔再上升（保持2002年水平，每百萬人口中只有三十五人犯罪）；煤礦工人死亡率亦由2000年每一百萬噸煤有十七人死亡，降至2006年三點八人死亡；貪污情況2002至06年間亦有改善（但搵唔到數字去說明）。有人話十七大之後小胡時代才正式開始。由大舊江出面全力支持小胡，以及李鵬任職人大後，帶唔少官員加入人大，大大鞏固人大對政府監察能力，唔再係橡皮圖章。有人戲言中國進入三權分立時代（三大勢力互相制衡：即人大、共產黨及政府之間互相制衡）。如從呢點睇，中國未來五年係樂觀。　　

10月通常都係變幻多端，加上10月19日係股災二十周年，香港股神亦只話睇30000點，當你面對恒指30000點，一D安全措施都唔做，邊個可以幫你？畢非德教訓：投資第一條係唔好蝕本；第二條係唔好忘記第一條。　　

美國三大銀行組成SIV（Structured Investment Vehicles）去應付次按危機。過去用物業做抵押商業票據總市值1.2萬億美元，7月至今大跌後，市值變成8880億美元（即已失去3120億美元市值）。大銀行計劃利用1000億美元SIV去阻止次按危機惡化（除房地產商業票據外，另有汽車商業票據、信用卡商業票據、企業商業票據……），最後能否成功？格蛇已作出批評。商業票據大部分二百七十天內到期，加起來總市值係計劃中SIV十到十五倍，即係用4％資本去頂住100％次按。當然，大部分次按都唔會變成壞賬，但最後壞孩子有幾多？　　

1990年孖展負債係320億美元，2000年科網股高峰期係2780億美元，相等於股市總值2.9％。2002年低潮回落至1340億元，今年7月上升至3810億美元，相等於股市總值2.4％，較一年前上升43％；8月份減少500多億美元，係咪另一次孖展借貸減少期開始？上周五美股下跌，二年期美國國庫券孳息率跌至3.78厘，係2005年9月以來最低。芝加哥利率期貨市場反映10月31日美國聯儲局減息四分一厘機會高達92％（上次減息半厘係 9月18日，聯邦基金利率降至4.75厘）。

日圓未來九個月看漲　　

利差交易吸引力下降，令美元兌日圓由10月12日117.2日圓跌至上周五114.51日圓。金融市場估計，未來九個月日圓仍將向上；今年第四季至明年上半年日本銀行可能需要加息兩次。上述分析令上周五日經平均指數跌1.7％。日圓強勢影響日本產品出口，但同時可令日本石油入口便宜D。現任日本銀行行長明年3月退休，估計佢退休前會宣布加息四分一厘，以免被人指摘佢利用低息去壓低日圓價。新任行長上任後亦須加息四分一厘去建立個人威望。即未來九個月日圓價看漲。　　

今年9月止美國民主黨已集資1070萬美元，共和黨只有875萬美元，即至今為止民主黨有更多資金去應付明年總統大選，意味明年民主黨勝出機會甚大。以兩黨集資能力預測明年誰勝出，準確性往往超過民意調查。如明年希拉莉勝出，分析界認為不利美股前景。　　

10月25日起內地銀行存款準備金率再上調0.5％（上一次上調係9月25日），即中國內地銀行存款準備金率達13％，係解放後最高水平。中國海關總署表示，9月份中國出口增長率及貿易順差增幅有所放緩。1月至9月累計貿易順差為1856.6億美元，比前八個月貿易順差增幅減慢2.1個百分點。人行宣布9月止國家外儲備金額為14330億美元，上升45.11％。9月份外儲備增加250億元，同比多增91億元。央行貨幣政策委員會提議進一步加大宏觀調控工具力度。G7會議後，七大工業國一致要求人民幣加快升值速度，睇人民幣升值壓力在升溫中。