2007-10-02

國慶港人愛國企 　　

10月1日，周一。是日國慶。唔經唔覺，香港已踏入回歸後第十個國慶，愈愈多港人愛國企同紅籌了，香港經濟亦愈來愈依賴中國經濟矣。 唔歐羅改金　　

由於美元價回落，令澳元升至十八年內高價，成88.91美仙，係1989年以來最高；紐元亦見76.09美仙，係8月9日以來最高；日圓卻回落至115.3兌1美元。日本8月份失業率上升至3.8％，係十一個月內首次，主要係更多日本女性到社會搵工做。坡元升至1997年8月以來最高。　　

歐羅亦見1.428美元。10月4日歐洲央行開會，估計維持利率不變，歐洲央行政策將由對抗通脹轉為擔心經濟增長率放緩。歐羅1999年1月1日誕生，由1歐羅兌1.19美元，一度下跌到2000年1月82美仙，之後才升到依家1.428美元（估計年底可見1.5美元）。由1999年1月起計，至今天升幅不足20％，或每年少於2％，冇乜大不了。金價上周五一度見二十七年高價745.84美元【圖】，估計年底可見1000美元，機會好大。分析界唔再建議歐羅，應改為黃金。歐羅強勢開始威脅歐洲經濟表現，相信金礦股更有投資價值。

中國主權基金影響力浮現　　

第三季金融市場有如怒海中行船，驚濤駭浪，但最終仍能駛達目的地。恒生指數由22172點起航，最低8月17日19386點，最後以27142點結束。第三季升幅22％，成為2003年4月升市以來表現最好一季，最大轉捩點係8月18日美國聯儲局突然宣布減貼現率0.5厘，將跌市扭轉。第四季又點，係咪天朗氣清？信貸市場已平靜下來，但油價、金價創近年新高，美國經濟由擴張期轉向增長放緩期，代表10月底第二次減息機會甚大。同第三季開始時唔同，當時次按危機浮現，最終引發股市大跌及聯儲局同各國央行注資，令大價股第三季表現出色，二線股表現失色。隨信貸市場平靜下來，第四季二線股會否又再抬頭？　　

香港，國企、紅籌股係第三季主角。國企指數由季初12397點回落到8月17日10253點後，以17017點結束，全季升幅37.27％。上周六中國主權基金成立，資本高達2000億美元，係全球最大主權基金，除投資30億美元百仕通外，大部分係茄殊，估計唔少將投資香港上市企業及向東南亞國家投資。國慶之後，估計將可感受到中國主權基金影響力。　　

1998年年尾納指只係1500點，由於擔心千年蟲而引發更換電腦熱潮，加上聯儲局減息，令納指2000年首季見5000點，升幅230％，泡沫才爆破。不過，2001年1月聯儲局減息亦未能阻止納指回落，2001年「九．一一慘劇」後聯儲局瘋狂減息，令地產價格上升。雖然2004年起加息，房地產仍上升，直到去年6月利率見5.25厘，下半年樓價才止升回落。相信今年9月減息，亦無法阻止美國樓價回落，一如2001及02年減息無法阻止納指下滑一樣；反之，金價卻因利率再次回落而上升，外亦因美元價回落而上升，相信資源股仍有上升空間。　　

好多人話金錢買唔到快樂，但好少人話貧窮帶來不安。自我老曹十三歲父親去世後，份不安一直維持至今，揮之不去。每天要精打細算過日子並唔好受，就係份不安一直驅使我老曹努力去賺錢，最初係努力工作（最高峰時期係同時做四份工，證券公司一份，放工後到洋行同人打英文信，夜晚同人補習英文，再返屋企寫稿）。漸漸發現原來努力工作賺唔到幾多錢，便學人投資（今天叫理財），發掘增長股或明天藍籌股，發現上述方法係除自己做生意之外最易累積財富方法。例如1970年代華資地產股係明日藍籌股，2000年國企股成為明日藍籌股。情況有D似搵未當選港姐或未紅前明星，一旦受注意，往往聲價十倍；策略係止蝕唔止賺。

三十前靠打工?三十後錢搵錢　　

三十歲前一般人靠打工賺錢，三十歲以後應學習錢搵錢；更叻人四十歲以後搵人同你搵錢（開公司做生意）。由於現代社會環境變得競爭激烈，開公司做生意愈來愈難；反之，三十歲前靠打工賺錢，三十歲後學曉錢搵錢，仍然係至理名言。點樣錢搵錢？呢方面需要智慧，例如2000年科網股爆破後仲住TMT股唔肯止蝕，咁就多多錢都唔夠輸。去年下半年美國住宅樓價開始回落，唔避開與次按有關項目又可以怪邊個？總之，有智慧不如趁勢。　　

從前女人嫁人，其中一個理由係獲得長期飯票；今時今日，長期飯票愈來愈唔可靠。香港男性平均壽命七十八點九歲，香港女性平均壽命八十三點一歲，加上結婚之時通常男性大幾歲；換言之，女性仲要自己獨自生活多幾年。因此，女性需要理財知識較男性更逼切，如你六十歲前冇建立一定財富基礎，未來生活可能幾坎坷（唔好以為老來從子，今天你兒子又要供樓又要養車，又要為子女教育費努力，已冇乜餘錢照顧你）。何況年老多病，醫療開支隨年齡日增而上升，你退休金或手上財產，能否應付你到八十五歲一切開支？女性對理財知識需要較男性更大，因為在家靠父、出嫁從夫、老來從子日子已一去不返。　　

不過，今天中國女人已唔再談股票，因為股票太庸俗，佢地談藝術，例如倫敦Frieze Art Fair購買藝術品，一個不銹鋼盒裝住六千一百三十六顆手刻珠，最近以1910萬美元成交；Warhol的Green Car Carsh以7200萬美元成交；Blue Poles（Jackson Pollack最佳作品）1973年曾以200萬美元賣出，今天售價1.5億美元！畢加索名畫平均每幅售價5000萬到7000萬美元。女士們，請忘記黃金吧，甚至忘記內地A股，藝術品先至係升值最快項目！

香港大學生進入低薪期　　

今天內地大學生平均月入3000元，算高定唔算高？以香港平均樓價6000元一呎計，大學生收入12000元，係樓價兩倍；上海普通住宅12000元一平方米（約1100元一呎），大學生工資3000元，壓力較香港大學生細；武漢房價6000元（500元一呎），大學生收入2500元，算幾好；青島房價8000元（700多元一呎），大學生收入3000元，壓力唔算大；西安房價4500元（400元一呎），大學生收入2000元，應算不俗；大連房價6500元（600元一呎），大學生收入2000多元，亦係唔錯；深圳房價13000元（1200元一呎），大學生收入4000元，壓力未算大；廣東惠州房價5000元（450元一呎），大學生收入3000多元，可以話不俗；成都房價6500元（約600元一呎），大學生收入2000元；濟南房價6000元（約550元一呎），大學生收入2500元，算唔錯。以房價睇大學生收入，香港大學生已經進入「低薪期」（一個月收入只可買兩呎樓），唔及內地大學生好。　　

9月份廣州十一區一手房平均1.1226萬元一平方米，較8月份9897元上升13％。中心六區越秀、荔灣、海珠、天河、白雲、黃埔平均價高達1.4506萬元，其中天河區最高達1.8148萬元、荔灣區1.2711萬元、越秀區1.3808萬元、海珠區1.3604萬元、白雲區1.1116萬元、黃埔區8800元。郊區中，最貴羅崗區達1.4693萬元、花都7046元、南沙區7024元。高級樓盤如景新城更達2.8萬至3萬元一平方米。廣州樓價亦到一般中等收入家庭難以負擔水平。　　

中國境內銀行宣布，10月1日後對第二間物業首付由30％上升到40％，以及提高按揭息率10％去打擊中國人購買第二間樓欲望，因為8月份中國七十個城市樓價升幅仍高達8.2％，係2003年8月以來最大。政府進一步收緊內地物業投資吸引力，能否收效？木宰羊。周二開市，估計內房股有一定壓力。