2007-10-18

偷橋係成功之道 　　

10月17日，周三。恒生指數升344.16，收29298.71；成交1604.61多億元。10月期指升522點，收29293點。中移動（941）升3.2％，見147.9元；工商銀行（1398）升1.8％，見6.74元；中石油（857）升1.7％，見18.7元；中興通訊（763）升4.1％，見41.7元。　　

今天深圳國際（152）升14％，見1.34元，公司宣布向深圳高速（548）購入收費道路；交大科技（300）升19％，見22元，公司宣布首九個月純利大升。交通銀行（3328）停牌。大昌行（1828）首日掛牌收5.88元，同招股價一樣。

非傳統想法帶來非傳統利潤　　

四十隻成分股中，只有兩隻下跌，其餘皆上升。後市展望，恒生指數繼續27000點到30000點上落。　　差唔多所有巨大財富，都來自投資初期中小企而漸漸變成大企業者。換言之，非傳統想法才可帶來非傳統利潤，例如蘋果iPod及iPhone。　　

幽默大師Tom Lehrer被問及點樣成功，佢話係「偷橋」。其實，投資成功道理亦一樣，就係向成功投資者「偷橋」，本港大部分成功投資者便是房地產趨勢漸明顯時加入（例如1967至74年），然後一直追隨趨勢。可惜呢個大趨勢1997年結束，2003年起趨勢係細屋換大屋（即大單位住宅升幅才會大）。　　

2003年4月起另一趨勢漸明顯，就係四叔教大家唔好再炒樓，改行去炒股，而且係炒同中國概念有關股份！過去五年四叔來自投資中國概念股利潤早已跑贏房地產。四叔亦唔自私，將呢條橋公開，歡迎大家「偷橋」！　　

展望未來極度偏高股市出現調整唔奇，但大趨勢如何？中國正步入中產階級大量增加期，一如七十年代至1997年前香港，其中提供商機，真係無限。

先學睇勢再學揀股　　

英雄，時勢。好多時只係時勢造英雄，例如上升行業中（1984至97年本港房地產）獲利；只有行業不景氣時，真英雄才浮現（例如1997至 2003年房地產仍能獲利地產公司）。換言之，既要挑選行業，更要挑選管理良好公司去投資。行業向上周期，係咪龍頭股並唔重要（因為 everything goes）；但行業不景氣時，優質股同低質股分別可以好大。換言之，投資者先要學睇勢（即行業盛衰）而非睇市（後市點樣）；學曉睇勢後，應學習揀股（stock-picking）。至於學走勢，我老曹1970年已開始學，至今年已三十七年，可能資質問題，至今仍無法掌握走勢。以波浪理論為例，我老曹 1978年已開始學，至今仍唔了解。不過，連波浪大師Prechter九十年代亦睇錯市（認為道指3600點見頂），咁我地做徒弟，又點可以睇市?!我老曹早九十年代已放棄繼續研究波浪理論，自己花十二年時間仍未能掌握，唯有棄而不用；反之，趨勢卻容易好多（例如一浪高於一浪，寧買當頭起，莫買當頭跌），只要該股每一低點仍較前低點高，即趨勢仍未改變。油價最近見88美元，打破去年高位，即大方向仍向上；至於油價能否見100美元一桶？木宰羊（如果見話亦非好事）。近日油價上升理由係擔心土耳其入侵伊拉克產油區，而政治因素從來無法分析。　　

油價急漲刺激金價向上，能否挑戰830美元水平？好難講。因為家高價已令中國及印度人購金飾熱潮冷卻，金價支持主要來自投資者（或投機者）。　　

Good Sentiment Poll指數已見70.9，係2006年1月以來最高；加上恒生指數由8月17日至今升幅唔細，股市已過分樂觀。從油價、金價睇，1970年代式滯脹已在眼前。1970至79年升幅最大係油價同金價，2000年開始到2009年係咪亦一樣？上次金價由1969年起步，1974年12月出現高潮（200美元），之後回落到1976年103美元，再狂升到1980年1月850美元。2001年起金價會否重演七十年代走勢？

3G手機生產毋須再領牌　　

貝南奇講得好清楚：9月份減息半厘目的係阻止美國經濟陷入衰退，但唔會保護貸款者及投資者因自己決定錯誤而受到損傷！最近佢再聲明美國樓價不但第四季仍會回落，明年上半年亦一樣，聯儲局會繼續注意情況，必要時採取適當措施。　　

1907年美國政府無法兌現所發行美國政府債券（可兌為黃金），JP摩根聯同美國各大銀行向政府借出2500萬美元黃金，解決當年美元危機，美股迅速上升；1914年JP摩根協助政府組成聯儲局。1998年長期資本管理公司出事，各大銀行及證券商格蛇協助下，成立36億美元挽救計劃，協助長期資本管理公司度過危機，美股亦從此再升。呢次由花旗、摩根大通、美國銀行聯手組成1000億美元超級基金購入SIV資金（Structured Investment Vehicles），其中大部分係RMBS（次按債券）、CDO（貸款組合）及ABS（汽車貸款、信用卡貸款、物業貸款），上述貸款資金以短期資金為基礎，透過呢個計劃轉為長期貸款，能否解決次按危機？初步市場反應欠佳，三大銀行股價消息公布後遭拋售，反映金融市場唔睇好上述計劃，因為擔心呢批次按債券負債人未來還錢能力。根據大趨勢，美國樓價由去年8月起回落，以過去例子，好少兩三年內完成。　　

我老曹早已一再指出，次按問題仍會糾纏落去直至2009年，但整個經濟則唔受影響。股價波動、美元弱勢、美國房地產繼續回落乃大趨勢，新興市場至今繼續免疫，甚至有D瘋狂。8月20日至今，本港H股簡直係本世紀最佳賺錢之地（七星期內國企指數升70％）！但須避免沾手：一、同次按有關企業；二、內地汽車製造業；三、所謂納米科技公司；四、健康食品行業。可睇好行業：甲、基建項目；乙、內地電訊股；丙、環保行業；丁、能源行業。　　

3G時代手機標準制取消，即任何工廠都可生產手機再毋須向政府領牌，形成手機生產方面競爭激烈。上述領牌制度2005年2月起實施，目的係阻止無秩序競爭，冇生產牌照者只能生產「黑手機」（即暗中生產，或借用其他工廠牌照生產）；一旦取消放行，對手機生產商而言面對壓力更大。　　

1970年代香港進入繁榮期後出生一代同我地戰後出生嬰兒，最大分別在於退休心態。戰後嬰兒經歷1950、60年代香港貧窮期，視工作為神聖而願為工作放棄很多（例如假期，部分人甚至願意放棄正常家庭生活）。反而1970年代才出生者卻希望四十五歲前退休去享受生活，並希望能夠物業市場或股票市場上make a short-term killing，好多人亦因此1997至2003年陷入負資產陷阱；佢地過分重休閒，甚至工作生涯中亦唔肯為工作而放棄長假福利。　　

作為戰後出世嬰兒，無權批評繁榮期出生一代，佢地亦不應批評我地呢一代（例如已經咁有錢仲咁努力工作，係愚蠢行為）。總之大家係兩代人，童年因經濟環境不同而心態各異。我地呢一代較重視金錢報酬而甘心放棄閒暇，1970年代出生者更重視閒暇及家庭生活。上述不涉及錯對問題，只係生活態度唔同而已。

西藏蟲草引發全球蟲草熱　　

追求健康已成為現代人生活一部分。科學家實驗室利用白老鼠所做實驗得出答案：人類平均壽命應該係一百六十歲，而非八十歲！換言之，今天人類大部分係「中年早逝」，而非「死於老年」，只因生活中有幾大要訣冇遵守：A、三少一多（少油、少鹽、少糖、多做運動，例如每天三十分鐘或步行一小時），最好由三十歲開始。B、Less is more。例如只吃七分飽及每星期少吃一餐，原來短期飢餓可引發身體自我修補器官輕微損傷能力，令自己更強壯。C、身體鈣去錯地方。年輕時人體正常吸收鈣去建立強健骨格；三十歲後身體處理鈣方面唔再如以前般有效率，結果令鈣血管壁內沉澱，令微絲血管唔再似三十歲前咁暢通（中醫叫氣血運行得唔好），許多毛病由此開始，例如腦部由於無法獲得充足養分供應，記憶力開始走下坡（人類腦活動能力由三十歲開始逐步減慢），視力漸走下坡由四十歲開始（眼睛因無法獲充足養分而走下坡），骨骼因不獲充足養分而失去吸收鈣能力；五十歲開始出現骨質疏鬆現象。如呢段日子仍拚命飲奶，不但無助骨骼吸收，反而令更多鈣去唔應該去地方，例如加速血管壁硬化而引發高血壓。過去為研究夜盲症，溫哥華Peter Pang醫生利用中藥理論，向夜盲症病人提供西藏蟲草及從魚油中抽取Omega 3畀病人服用，結果發現夜盲症病人十天至三十天內情況大大改善。上述引起其他醫藥集團注意而進一步深入研究，結果發現四種草本植物有呢方面功效： fenugreek（印度人用調味劑）；gymnema sylvestre；Konjac mannan（魔芋甘露，主要產自中東一帶）；nopal cactus（胭脂仙人掌，生長南美洲一帶）。如將四種草本混合畀血糖偏高人士服用，兩星期或以上可見到血糖明顯下降30％、54％甚至84％（因人而異）；如服用六個月，不但血糖下降，連高血壓、膽固醇、三脂甘油酸亦漸恢復正常；如服用超過六個月，連骨格亦漸漸強壯起來，甚至記憶力改善。到底呢四種植物內會有乜成分，令人體可恢復處理鈣能力，令鈣唔再停留血管壁而被骨骼吸收掉？依家芝加哥大學正進行深入研究。相信不久將來，將可為人類搵到如何活到一百三十歲而擁有六十歲左右健康狀況。家已證實西藏蟲草加魚油中Omega 3長期服用可令血管壁軟化同時強壯骨骼（係咪延年益壽則有待進一步研究）。上述消息令近年西藏蟲草售價狂升十倍，引發全球蟲草熱。