2007年10月30日 星期二

2007-10-31

08大勢—科技股    

10月30日,周二。恒生指數升51.32,收31638.22;成交1850.24億元。10月期指跌35點,收31737點;11月期指跌 209點,收31570點。建設銀行(939)升6.3%、工商銀行(1398)升2.3%、東方航空(670)升2.1%、中海油田(2883)升 6.1%;新地(016)跌5.9%、長實(001)跌2.7%、馬鋼(323)跌8.4%。 A股上升動力減弱  中國銀行(3988)第三季獲利159億元人民幣,較去年同期升22%。中行唔及其他中資銀行理由係受美國次按損失拖累。中國銀行35%利潤來自海外,而工商銀行海外獲利所佔比重唔到5%。中銀香港(2388)今年1至9月提取貸款減值前淨經營收入為186億元。  

滬深三百指數連續第三個交易天高收,報5596點。東方航空升10%漲停板,因第三季獲利增多一倍,達9.76億元;雲南銅業升9.6%;中國鋁業升 4%;中國船舶升4.5%。滬深A股自2005年至今走勢仲係一浪高於一浪,除非跌穿5250點,才可確認上升趨勢結束,不然只可視為調整;另一方面,自今年7月開始,滬深A股上升力量在減弱中。  

花旗推介聯想(992)(11月1日將公布季度業績),估計營業額42億美元,較去年同期上升14%;純利6000萬美元,升58%,或每股0.7美仙。由於企業界將開始upgrade個人電腦設備,呢個周期可維持到2009年,估計聯想本年度每股獲利1.8美仙,上升645.7%,O五十六倍;明年度每股獲利3.8美仙,上升106.1%,O下降至二十七點二倍;2009年度獲利每股5.7美仙,上升50.5%,O十八倍,目標價10元;聯想股價今年5月起已開始大幅上升。ASM太平洋(522)剛公布今年第三季營業額1.99億美元,較去年上升33.2%,較第二季上升9.9%;純利3.93億港元或每股1.01港元,較去年同期上升36.6%,亦較前一季度上升10.8%。  

聯想股價由今年5月每股3元升至近日8元,升幅166%;ASM太平洋由今年3月44元升至7月75元,升幅78%,之後進入整固,今天收市價61.25元。  

恒生綜合資訊科技指數由今年3月起反覆上升,近日創新高【圖】;技術上睇只要唔低於2400點,便確認一浪高於一浪走勢持續。聯想股價升幅大於ASM太平洋,理由係聯想業績大幅改善,而ASM太平洋業績一向良好。  

上半年我老曹推介建築股近月成績不俗,最近轉為高科技股中尋寶,並認為將係明年表現出色sector,因為不但恒生綜合資訊科技指數出現一浪高於一浪,中國S&P╱Citic 300 Information Technology Index今年8月亦突破阻力區大幅上升,確認內地高科技股進入上升大浪;再睇睇台灣電子股指數今年8月亦破阻力區,確認上升浪。香港、中國、台灣科技股指數同時向上,可以話優質電子股純利今年第二季已轉升,差D電子股純利相信今年第三季開始轉升,到明年相信大部分電子股純利轉升(或轉虧為盈)。賺大錢之道在於洞悉先機,而非人云亦云。

電子科技潮可維持三年  

一個電子科技潮一般可維持三年,即2007、08、09年電子股純利將轉升(或轉虧為盈),估計高潮2009年,此乃勢也。去年下半年唔少人問我老曹買乜?我老曹答曰:一、內地金融股;二、內地航空股。今年上半年有人再問我老曹買乜?我老曹回答係本港建築股及中國國企及紅籌股。今天如你問我老曹恒指30000幾點仲可以買乜?我老曹答案係高科技電子股,並相信明年進入高潮。Double或止蝕離場係近年應採取投資策略,2003年4月恒指回升至今,幾多股份提供升幅一倍利潤?如無法提供上述利潤股份,請及早止蝕離場。今天股票市場再唔係行人路(讓各位漫步),而係競技場—鬥智兼鬥眼光地方。  

反覆無常係近年股市特性,例如今年2月23日至3月5日七個交易天內,恒生指數由20844點回落到18659點,跌幅10.48%,當時唔少人嚇破膽,忘記炒股唔炒市格言。至於今年7月26日恒生指數由23557點回落到8月17日19386點,十七個交易天內恒指下跌17.7%,跌幅更為驚人。每個Deep V過後,恒生指數不但升得更高,而且唔同sector表現唔同。一年內連續出現兩次Deep V,勝方得勢不饒人,殺到敗方片甲不留,因此唔排除2007年結束前恒指會出現第三個Deep V!所有傳統分析工具2007年都失效,周期(cycles)有如蝴蝶,不但十分燦爛,亦好短命,分析員都變成撲蝶者(即如何蝴蝶短暫生命結束前捕捉佢)。例如今年1、2月股市仍在炒中電(002)、太古(019)、永隆銀行(096)、生創建(113)、德昌電機(179)等;鏡頭一轉,呢類股份 2月底全部被拋售,人人改為睇好控(005);4、5月份控、東方海外(316)、富士康(2038)、裕元工業(551)等又被拋售,8月20日國企、紅籌股成為升市主力。呢類五時花六時變股市,誰擁有Midas Touch?上周四開始國企、紅籌股升幅減慢,呢幾天股市翻炒本港大藍籌股,然後新地(016)宣布配股集資110億元,相信翻炒本港大藍籌股又告一段落。今年有幾多人每sector完成上升後高價接貨?佢地不但跑輸大市,而且恒生指數上升60%情況下,仍要輸錢投資者數不在少,唔適當時候吸納被炒高股份而蝕去本金三分一投資者大不乏人。Sector investing唔係人人玩得好,唔少人因此棄權而將資金用作申請新股,去賺雞碎咁多回報。股票市場早已進入20╱80期(即每次上升集中20%股份身上,其餘80%股份唔係度漫步就係跌緊)。  

今天股市正耐心等候周三聯儲局減息四分一厘,希望透過第二次減息去重新刺激起投資者獸性,繼續8月17日開始飛身撲入市行為?!通常聯儲局第一次減息最有威力,第二次減息威力減好多,第三次減息仍有DD威力,之後減息則毫無威力可言。  

繼美林第四季動用84億美元為CDO撥備後,市傳AIG第三季虧損達98億美元,相信次按危機將一直延續到2008年,美國金融機構可見將來繼續引爆炸彈。根據Challenger Gray & Christmas報告估計,最終將有十四萬個金融職位呢次次按危機後消失。根據瑞信資料,11月份有487億美元浮動利率負債到期,將以較高利率再續約,其中284億美元負債屬次按級數,因此11月係次按危機中另一個備受考驗月份;12月則有252億美元負債屬次按級數。2008年情況好D,但仲有 1899億美元次按負債到期而要調整利率。  

歐洲最大銀行UBS宣布第三季虧損8.3億瑞郎,主要受美國次按危機影響,又係另一大銀行引爆炸彈,令歐洲銀行股股價回落,美國方面亦一樣。UBS警告第四季業績受次按影響仲係好差,第四季須進一步撥備。如UBS第四季須為次按撥備,其他金融機構又點?  

貝南奇作風有如1972年由尼克遜總統委任聯儲局主席伯恩斯,而非1979年年底上任雪茄伏,甚至連格蛇亦唔及。伯恩斯缺點係完全受制於尼克遜,今天貝南奇亦受制於殊仔,令聯儲局獨立性不足。8月17日減貼現率半厘,係犧牲美國消費者利益去補貼美股投機者……佢可能以為咁做有助2008年共和黨贏得選票,恐怕結果適得其反,小市民反而更支持民主黨上台。美國10月份消費信心下跌至99點(上月99.8),為2005年11月以來最低,足可證明。

不要吹噓成功買賣  

Johnathan Davis《金融時報》撰文,認為所有投機者失敗前,都有令人不可容忍傲慢態度,其次係失去自制能力,例如失去本金25%後往往方寸大亂。佢注意到索羅斯過去十年別人面前從來冇提及自己一次成功買賣。如果唔知索羅斯是誰,你可能以為索羅斯係金融市場輸家;反之,Johnathan Davis曾訪問D金融市場輸家,經常掛口邊係D成功買賣。Davis認為,金融市場中贏家係唔會忘記自己蝕本經驗者,輸家係D只記住贏錢日子者。例如美國大投機家Jesse Livermore,佢一生人最少破產三次,佢不但有情緒問題,而且結婚數次,最後大酒店自殺。因此Davis認為,即使你係投機界天才,都唔好為自己往績而吹噓,因為金融市場專收叻仔!我老曹度轉載Johnathan Davis分析係想告訴大家:一項成功買賣,事後不但唔好吹噓(吹噓只係顯示你缺乏安全感);而且要盡快忘記佢;反之,自己曾犯上錯誤,便一世都唔好忘記,以免重蹈覆轍。犯錯一次可以原諒,如重複犯錯,咁就神仙難救。  

日本9月份失業率出現第二個月上升,達4%(8月份為3.8%),代表7月份失業率3.6%已見底。失業率回升係咪代表2003年開始日本經濟反彈期又結束?過去十年日本工資平均回落10%,最近又再回落。  

中國國家統計局宣布,首三季城鎮在崗職工平均工資為年薪16675元人民幣,較去年同期上升18.8%;國有單位平均工資17819元,上升20.8%;其他單位16145元,升15.6%;集體單位升18%。中國工資已進入高速增長期。

沒有留言:

張貼留言