2007年10月7日 星期日

2007-10-08

龍捲風吹起大笨象  

10月7曰,周日。本周股市相信仍由好友主導。上周道指剛超越14000點;納指升2.9%,見2001年2月1日以來最高,羅素二千(代表細價股)則上升4.9%。美國股市資金正由大藍壽股流向科技股、增長股同二線股。  

傳統算術係「3-2=1」,但在金融市場「3-2=5」(花旗、UBS、德銀三大銀行公布第三季虧損,股市卻連升五個交易天!)。  瑞信Jay Feldman將近期數據同過去(1964年起計)每次經濟衰退前數據比較,發現只有兩個數據顯示未來經濟可能衰退;結論係美國經濟在未來十二個月內出現衰退機會低於20%。  

中央政府上周四進一步採取各項調整措施遏制中國樓價上升,相信收效甚微,理由係中國目前環境仍由負利率主導(存款利率低於CPI增長率)。摩通地產分析員Raymond Ngai指出,內地房產40%以上用現金方式出售,因此估計上周四措施只有短期壓力。內地客成樓市股市新力量  10月黃金周,內地客來港除買手表、珠寶、化妝品、參茸海味及電子消費品外,更多人來港炒股;最喜歡係控(005),其次係中價樓(二百萬至五百萬元),有32%坦言只作短炒之用,成為香港股市、樓市新支持力量。  

美國消費者信心回落。7月份美國經濟諮商會消費者信心指數112.6、 8月份105、9月份99.8。受能源價格上升影響,加上食物漲價,令出外飲食開支上升;再加上樓按利息上升及樓價回落,消費者信心回落十分正常。不過,對高消費股如Tiffany、Coach等影響唔大;對沃爾瑪、Target等平民消費股則有影響。  

9月份美國服務業增加人手十四萬三千,製造業、建造業及房地產項目減少三萬三千,其中建造業減少一萬四千人、房地產減少一萬八千人。美股對上述消息反應良好,道指升90多點。過去二十多年(1980年起計)美國GDP平均每年升3.25%,但工資平均每年只升1.6%。上述情況令富者愈富,但貧者生活質素改善速度較整個社會GDP增長率慢1.65%;近年工資增長年率更低至只有1%。過去二十幾年美國人消費仍可保持較高增長,理由係1982年至 2006年樓價上升所刺激。未來美國人再不能依賴樓價上升去提升消費能力,呢方面影響將逐漸浮現。從9月份就業數據睇,明年美國經濟增長率只係放緩唔係衰退(格蛇過去擔心係多餘)。投資策略係點樣在美國經濟增長放緩中受惠?過去我老曹曾指出,美元弱勢對港股有利,上述因素已令恒生指數由8月17日至 10月2日上升接近50%,但股價最終由企業純利及純利增長率(PEG)決定。基於2008年美國經濟增長放緩,代表企業明年純利升幅將放緩,信貸市場日漸收緊。目前恒生指數平均O二十一點七四倍,過去O二十二倍以上便進入極為偏高期,即恒指28000點以上開始出現阻力。  

八十年末期,台灣指數由946點升上12424點,三年多指數上升十二點一三倍,然後泡沫爆破。恒生指數由1971年10月270點上升到1973 年3月1774點,一年半時間內恒指上升五點三倍,然後泡沫爆破。滬深A股由2005年6月6日807點上升到今年9月28日5590點,升幅五點九二倍。如以香港1971-73年標準睇已差唔多,如以台灣標準睇仍然有排升。泡沫有幾大及維持幾耐?冇人可事前知道。1988年如投資50萬元新台幣在台灣股市,在1990年2月離開,可以變成1億元新台幣;如留守到當年10月台灣指數2560點,即八個月可失去80%市值(1973-74年港股在二十三個月內失去93%市值)。滬深A股泡沫幾時見頂?今年1月唔少人認為A股係泡沫而叫人立即離開,係唔了解泡沫發展歷史。泡沫由形成到吹脹需時短則一年半(例如香港1971年10月至73年3月),長則三年(例如台灣)。內地A股由2005年6月6日至今已超過兩年,理論上在2008年上半年或以前爆破,即未來八個月內任何一天都可能係A股泡沫爆破日子,至於係哪一天?只有做事後孔明。泡沫經濟有如龍捲風,可以將周遭東西一齊吹上半天。今年第三季起中央政府停止A股新基金發行,存量基金紛紛暫停申購;反之,QDII基金成為在理財市場走俏產品,中央政府態度令A股基金發行接二連三掛出免戰牌(唔批), QDII基金卻放行。刺激之下,本港國企指數今年第三季大大跑贏內地A股指數。以中銀穩健增長基金為例,由8月20日99.48仙到9月25日1.245 元,上升25.19%;建行(939)首款股票QDII(海盈一號)9月20日市價1.0148元。其餘仲有工行(1398)、東亞銀行(023)等 QDII今年第三季亦獲利不菲。南方QDII基金發行首天吸引資金500億元人民幣,華夏QDII基金同樣受到熱捧,海富通、嘉實基金、上投摩根QDII 產品也在緊急備戰中。據悉,針對美國、歐洲股市場QDII亦在籌備中。短期內來自內地QDII資金繼續支持本港股市進一步上升。

係時候提高警覺  

本港H股及紅籌股甚至大笨象控,在龍捲風威力下都變成小飛象。今年上半年我老曹曾鼓勵大家沖個泡泡浴,今天人人被眼前短期利潤吸引而忘記危險,雖然短期後市仍向上,但係時候提高警覺矣。10月底美國第二次減息前後係咪出貨訊號?請記住,群眾情緒好易走向極端,例如8月17日跌穿250天移動平均時極端恐懼,到近日漸進入極端樂觀狀態。唔好相信大學教授對經濟預測:1929年10月16日哈佛大學經濟系教授Iwing Fisher認為美國股市冇問題,今天大家都知道他只是一個書呆子。講到預測,請記住your opinion is as good as mine,即你的意見同我的意見一樣(都係垃圾),因為人係冇預測能力。A股泡沫有幾大、幾時會爆破?你唔知、我唔知,只有天知地知,甚至格蛇都唔知。不過,千變萬變最後離不開真實,就係O八到十二倍係偏低、十二倍到十八倍合理、十八倍到二十二倍偏高,一旦超過二十二倍,便必須企業純利保持高增長(例如連續幾年每年純利上升30%或以上),而上述情況通常唔能夠維持超過三年,亦係泡沫由形成到爆破好少超過三年理由。音樂教授Roger Penrose 二十年前曾講過:任何好聽旋律都由「三高一低」組成,即一個高潮後係另一個高潮,然後更高潮,接便是低潮。內地A股2005年6月起動,至於哪一天係最高潮則木宰羊。  

美元弱勢、中東局勢令人不安,大西洋颱風仍未能令11月期油企於上升軌之上,而出現喇叭形走勢,代表油價已進入派發區,有可能又一次令睇100美元一桶油價專家跌眼鏡。

唔好過分睇淡美元  

8月中開始航運股追隨商品價格大幅上升,主因係中國需要大量船隻將商品由巴西及澳洲運到中國,從巴西將鐵礦石運返中國航程遠好多,代表所需船隻亦多很多,令PHLX Marine Shipping Index由8月中到10月初大幅上升30%,最近幾天才回落多少。航運股現價又點睇?船隻供應增長率今年係5.5%,明年係4.2%,09年係 4.3%。過去曾一度擔心今年供過於求而令航運股回落,但由於中國對商品需求十分大,令8月起船租又大幅上揚,航運股止跌回升,部分更創新高。根據貨船專家Scott Burk分析,2010年供應量可增加10%,到時才係問題,並認為今年及明年仍不是問題。另一位航運專家Douglas Mavrinac卻指出,雖然新乾貨輪供應量2010年才大升,由於運油船須用雙殼船運油以避免漏油事件出現,大量單殼VCCL運油輪正改裝成乾貨輪,在未來十二個月內加入市場,因此佢認為乾貨輪可在十二個月內由目前供不應求轉為供過於求。波羅的海乾貨輪指數由2003年起步連升三年後調整,今年第三季因中國需求大增而再次上升,令8月份內地及香港上市航運股又再大升,部分更創新高,證明中國因素影響十分大。但中國出口增長率8月起開始放緩,所以航運股後市點睇?到今天已好難畀各位意見。  

美元已由1.425美元兌1歐羅回升,根據經濟學人公布「巨無霸指數」,BiGMac在歐洲賣2.9歐羅(或4.17美元),較美國3.22美元高 29.5%,即歐羅已偏高接近30%,因此歐洲人都飛去美國消費。其次,美國出口回升,美國貿赤在收窄中。最近兩星期我老曹叫大家唔好過分睇淡美元,因美國收支赤字已由去年佔GDP 6.6%到今年只佔GDP 5.5%(西班牙8.8%、希臘8.6%),假設10月31日美國減息四分一厘,會否代表美元弱勢第四季持續?但因為歐羅及英鎊已停止加息,令拋售美元改歐羅及英鎊人不多,美元所受壓力唔大,估計極限係1.457美元兌1歐羅,美元下跌空間十分有限。  

豐銀行外分析部主管David Bloom估計,明年初開始英鎊減息,因為明年英國GDP增長率只有1.7%。受高息(5.75厘)支持下英鎊將由目前2.05美元在未來十八個月跌到1.76美元。睇我老曹手上英鎊投資亦應考慮獲利回吐矣。  

1998年12月21日至今油價上升817%;1998年10月30日至今銅價上升605%;1998年10月30日至今白金價上升360%; 1998年12月14日至今瘦肉價上升351%;2001年至今金價上升255%。不過,升幅最大係鈾,2001年至今上升1870%!因到處在興建核電廠。來自中國同印度新冒起中產階級,加上2001年起美元寬鬆政策,令商品價格大幅上升。今年商品價格上升潮已由硬商品(金屬)轉向軟商品(農產品),例如小麥、玉米、大豆同棉花。點樣從軟商品價格上升獲利則比較困難,反而受影響行業唔少,例如玉米價上升已影響乙醇生產股及玉米生化股純利;小麥價上升影響啤酒股純利;棉花價上升亦開始影響紡織股純利;高油價對石油股有利,但對汽油零售業務則有不良影響。  

鑽石不但係女人最好朋友,更係男人救命恩人(唔同意?請睇《色.戒》)。商場上唔少朋友做對唔住太太事後,通常會買一顆鑽石送畀太太……。現代女性已財政獨立,加上近排在股票市場賺到錢,送顆鑽石獎勵自己亦不為過。到今天鑽石已唔需要男人送,而係女性作為表現自信之用。請努力賺錢,同時唔好薄待自己。

沒有留言:

張貼留言