2007-10-29

賺錢容易保本難　　

10月28日，周日。本周主題係聯儲局減息後市場會點樣反應？市場已假設周三92％機會減息四分一厘，而減息半厘機會只有8％。不過，三個月銀行同業拆息高企5.01厘，反而二年期息率卻只有3.77厘，短息大大高出長息，可以講極唔正常。坡元兌美元升至1.4523坡元兌1美元十年新高，係 1997年7月以來最高；零吉特亦連升七個星期，係5月以來最長上升日子，依家係3.346兌1美元，甚至南韓圜亦上升，只有港元唔升，令上升力量集中股市。 大部分投資者跑輸大市　　

今年十個投資者有八個跑輸大市（今年恒指上升52％，你投資成績又點？）。事實上，大部分股份股價升幅弱於恒生指數，超過十分一股份更今年低價牛皮。國企股情況有D似1997年8月前紅籌股，直到1997年8月泰銖貶值，到1997年10月恒生指數大幅回落。今年8月港股直通車令H股及紅籌股大升，另一理由係8月17日聯儲局削減貼現率。　　

炒周三美元減息，令市場對大部分壞消息冇乜反應，似乎只要減息一切冇問題。世界真係咁理想？美元兌歐羅已跌至新低，相信11月8日歐羅利率唔變，仍係 4厘。12月期油一度見92.22美元新高，相信同華府上周宣布制裁伊朗決定有關；加上土耳其與伊拉克庫爾德族人衝突，睇油價見100美元、金價見 850美元一盎斯預測正在逐漸實現中。伊朗唔係伊拉克，80％中東石油要經伊朗控制波斯灣海峽出口，伊朗人民教育水平相當高，武裝力量相當強；加上政府態度類似1930年代日本軍國主義（對自己國家軍力過分自信），如美國向伊朗開火，肯定係另一場經濟災難，恐怕到時油價唔止100美元，而係125美元甚至150美元。未打敗伊朗前，擔心美國經濟已陷入衰退。　　

畢非德成為全球第二（或第三）首富，方法係令財富每年上升22％。過去五年相信本港唔少人財富每年升幅大於上述巴仙；不過，畢非德格言係唔好輸錢，恐怕記得人漸少。1997年神童輝亦曾賺幾十億元，但忘記畢非德格言，最後一敗塗地。中國人智慧「創業容易守業難」；我老曹投資智慧係「賺錢容易保本難」！「九次好彩唔夠一次失敗」（用1萬元本金，每次賺100％利潤，九次好彩後變成512萬元，但只要一次失敗已可令你一無所有）。

高位買北控有機望鄉　　

股市狂躁症耐唔耐便發生，1997年紅籌熱下北控（392），1997年8月29日市價係64.75元，十年後今天仍未重返家鄉。北控所犯錯誤係周身刀冇張利，從事行業太多但冇一行做得較別人出色（多元化而非專業化），直到董事長衣錫群上任後，才糾正北控過去多元化發展，集中向能源及基建手。今年4月兼併北京燃氣後，9月傳出併購首創集團。首創以水務、房地產及金融為主，2004年曾提出回歸A股卻唔獲批准，近年發展唔錯，自然唔希望併入北控旗下。最終兩間國企會否合而為一？由政府決定。近期北控股價已因此而大升，1997年8月高價入貨者可能有望鄉一天。上周畢非德叫投資者中國企業股投資上小心，佢自己亦賣出所持中石油（857），理由係短期升幅太大（夏季至今升值一倍），依家市值已達4400億美元，漸漸接近艾克森石油（市值5080 億美元）；艾克森O只有十三倍，其餘十間西方石油公司O十倍，而中石油O二十倍，即最少偏高50％。上海寶鋼市值420億美元，較美國鋼鐵公司市值大三倍，但產能卻一樣。國壽（2628）市值2450億美元，係Metlife市值五倍。

中石油貨比貨乏吸引力　　

中國寧波加油站0型號油供應又再告急，每輛車一次只限入十公升柴油（十公升只能行四十多公里）。由寧波開去蘇州，大旅遊巴需油一百公升，即必須十個加油站加油先掂，認真唔方便（因汽油零售價受政府限制，唔准隨便加價）。點解國企股咁貴？因為內地市民資金唔可以投資海外，加上A股市場流通量少（例如中石油88％股份由政府擁有，呢次A股上市數目只佔總流通量2％），雖然中石油所生產石油大部分須國內按政府官價出售而非市價，O居然較美國同類型股份高一倍，如果貨比貨，中石油吸引力唔及艾克森，只因市場流通量少而製造中石油極高價（已超值50％）。上述情況唔會長期維持，至於可以保持幾耐？冇人事先知道。1990年日本企業市值唔係冠全球咩？今天又點樣？　　2000年2月18日電盈（008）見28.5元，即今天五合一後142.5元，上述股價亦係因當年股份流通量少造成，自電話公司股份變成電盈後，股價便散晒。潮起潮落，不知淘盡幾許英雄好漢，捕捉呢類cycle從來唔係易事。猜測呢類cycle何時完結，連畢非德亦做唔到，何況我地？只知一旦大勢不在，例如柯達菲林亦可急挫60％、蘭克施樂可跌64％、麥當勞曾跌59％、可口可樂曾跌68％、迪士尼曾跌84％……。上述都係曾經一時大藍籌。換言之，大勢仍在股份股價可以十二個月到二十四個月內上升一倍、兩倍、三倍甚至更多；一旦大勢已去，無論乜大藍籌股一樣可跌至四腳朝天。因此只能論勢、趁勢、順勢，千萬不可逆勢；有勢不妨駛盡?（賺到盡）。　　

世界經濟再次步入滯脹期（stagflation）。上一次係1966至82年，當時香港經濟係新興市場。呢一次由2000年開始，估計維持到 2016年，中國經濟係新興市場，香港經濟已變為成熟市場。原材料漲價，加上新興國家工資上升，令各行業之間出現此起彼落盛衰周期。美國PPI（生產商價格指數）今年2月份升幅達年率15.6％，但CPI（消費物價指數）升幅只有3.2％。生產成本上升15％，而產品售價只升3.2％，結果係生產商利潤減少，漸漸零售商利潤亦縮窄（因無法將租金、薪金上升壓力轉嫁畀消費者）。生意淡薄，不離賭博，資金流入樓市及股市，甚至囤積原材料去賺錢，進入發達容易、搵食艱難時期（以2007年為例，只要睇個市，隨時個個月出雙糧；反之，希望老闆加薪5％難矣）。1966到82年曾出現1973年石油危機、股市大跌，1980年油價高企令1982年經濟出現衰退。1980年伊朗危機令油價升上45美元（相當於今天100美元）。2000年至今美股已經歷科網股泡沫爆破，擔心我地會否一步步走向1980年伊朗危機？　　

Countrywide第三季虧損12億美元或每股2.85美元（去年同期獲利6.476億美元或每股1.03美元）；上周五股價上升32％，見 17.3美元，仍較高價45.28美元低65％，係咪真正轉勢仍未肯定；公司估計第四季每股獲利25至75美仙，並估計2008年美國住宅售價仍跌 6.7％。　　

分析員Thomas Atteberry（First Pacific Advisors LLC分析員，該公司持有唔少Countrywide股票）擔心Countrywide主席對前景估計仍過分樂觀；美林證券分析員Kenneth Bruce卻調升Countrywide評級。撈底係十分吸引行為，只係大部分撈底行為事後都證明係錯。　　美林證券因CEO可能離開，上周五股價升8.5％；美林今年股價已下跌29％。分析員相信，美林次按問題仍未完全曝光，唔建議吸納，估計第四季仍須撥備40億美元。　　

穆投資者服務機構將CDO評級再降低，跟住係標準普爾。睇美國次按問題仍未完全解決。

市交易相對股市公平　　

今年手機生產商面對困難係手機日漸商品化，一如過去手提電腦商品化後，無論乜品牌售價都好接近。中國手機生產商如華為及中興通訊（763）可用西方競爭者五分二價錢，生產性能接近一樣手機，令手機品牌優勢漸失。消費者點解要多付一倍以上價錢去購買功能相同手機？結果引發手機零售價大跌。所有手機生產商必須以「中國成本」去生產，先至有利可圖。　　

日本9月份CPI較去年同期降0.1％。日本CPI已連續八個月下降，相信10月份CPI可回升0.1％，因食物價格及出租車價格上升。物價穩定對企業利潤不利，此乃日股欲升乏力理由。　　

炒股抑或炒？市中，65％人賺錢；股市中，只有20％人賺錢。理由係市交易相對公平，市場透明度高，反而股市易受機構投資者及大戶操控，較市複雜好多。　　

每年5月到6月中都係內地A股出現大改變日子。過去十八年有八次高或低點都呢段日子出現，例如大牛市由2005年6月6日開始，以及今年5月30日因交易印花稅問題而引發大調整。　　

全球金融市場則每年10月中到11月中有極大變化，例如1987年10月19日美國股災及1997年10月香港金融風暴；10月23日一天內恒指下跌1211點，28日再跌1621點，令9000點失守；今年10月恒指則創新高。