10/25/2007

有機會重返50天線 　　

10月24日，周三。恒生指數最高見29997.01，形成雙頂後回落，收報29333.53，跌43.33；成交額增至1610億元。10月期指跌93點，收29388點；11月期指跌96點，收29429點，高水。恒生指數形態分析一向唔準確（四十隻股份高矮肥瘦都有，因此所形成形態，冇乜參考價值）；恒指拋離五十天移動平均數（25354點）15.7％，短期內大市須調整。以過去經驗來講，恒生指數每次拋離五十天線15％或以上，好少能夠長久維持；如再加上同RSI背馳及升幅收窄（升市愈來愈集中少部分股份身上），調整已無可避免。即可見將來，恒生指數重返（或略低於）五十天移動平均數機會極大；短期展望，大市有機會回落到26000點左右。　　江西銅（358）跌6.9％，見26.3元，因原材料價格上升，令成本增加，利潤減少，估計第四季所面對壓力更大；交通銀行（3328）跌2.11％，見12.88元；網通（906）跌6.2％，見22.75元；中國燃氣（384）升3.2％，見3.59元；青島啤（168）升2.5％，見26.55元；南方航空（1055）升4.5％，見11.62元，公司宣布第三季純利上升50%至十九億七千萬元人民幣；電盈（008）跌1.4％，見4.94元。　　

滬深A股微升0.87％，人民幣報7.4934兌1美元對出口股不利，油價下跌令中石化股價升9.4％；貴州茅台第三季獲利上升58％，令股價升2.1％，青島啤第三季獲利上升52％，股價升2.2％。

A股調整壓力正在釋放　　

內地基金經理表示，A股經過大幅上升後，估值已不便宜；雖然企業純利大升，亦無法支持股價進一步上升。上投摩根基金公司認為，調整壓力在釋放中，投資者應該對風險保持謹慎。工銀瑞信基金表示，上周受媒體報道A股與H股互換引發A股回落後，上周五至今多次衝高後回落，說明調整不僅係消息誤傳，而係家理性投資者已難接受市價。豐普信則對市場謹慎，並指出大多數中低價股早已步入調整狀態，甚至出現下降通道，升市只集中大價股身上。2007年A股整體市盈率接近七十倍背景下，進一步推高已感吃力。　　

畢非德已全數沽出中石油（857）及認為中國股市已過熱，投資者應有戒心。他認為，依家已不大可能中國搵到好購買對象。　　

南方航空自9月到10月15日止李嘉誠共九次減持，股價已由9月21日的14.76元跌至11.62元。內地A股跌幅更大，由9月21日30.5元跌至今天19.48元。市場擔心油價高企，令成本居高不下，未能補償人民幣升值利好因素。南方航空A股4月份只有1.89元，9月21日見30.5元，升幅太驚人啦，亦難怪李嘉誠9月開始減持。本港H股A股化令超級大戶如畢非德、李嘉誠、新加坡淡馬錫基金等紛紛減持。因此8月17日至今升市究竟可以維持幾耐？木宰羊。　　

小投資者常犯錯誤：　　

一、睇市唔睇股。8月17日至今恒生指數已上升50％，主因係8月20日中央宣布批准港股直通車，令中字派股份價格上升100％。呢段日子，唔少股份卻毫無升幅可言（甚至回落）；我老曹講十年以上炒股唔睇市，但仍然有咁多人犯錯。　　

二、唔理會宏觀經濟。例如1984年中英聯合聲明「草簽」中講明限制香港政府每年賣地五十公頃到1997年6月30日止。呢段日子，本港地價、樓價大升，但好多人卻唔曉投資房地產；到1997年7月1日「八萬五」政策出台，更加多人唔識避。2003年9月「孫九招」面世，好多人仍然問後市樓價點睇？2007年開始，美國有七千七百萬人按年進入六十五歲退休期，佔總人口25％，好多人仍然唔信美股2007年見頂（一如1990年唔信日股見頂一樣）。　　

三、泡沫形成初期散戶怕得要死，泡沫維持一段日子後，散戶卻忘記風險。大部分泡沫由形成到爆破通常歷時三年（例如1998年科網股，到2000年3月爆破）。內地A股由2005年年中開始上升，2007年下半年亦踏入第三年，即係已進入令人擔心時刻。我老曹亦曾犯過呢D錯誤，例如1973年1月恒指見1200點已睇淡，結果三個月內恒指升上1700點，即再升50％。1974年7月恒指見450點便睇好，但大市再跌多半年，1974年12月跌至150點才改變方向。太早睇淡或太早睇好都係死罪，Timing is everything。　　

四、不分行業全面睇好或睇淡。例如能源、金融、製造業、地產、航運業、原材料、資訊科技業，唔同行業有本身盛衰循環周期，不應一概而論。2003年至今地產、金融、能源、航運等行業表現不俗，但製造業卻在叫救命！2007年7月1日前後，中央政府取消大量產品出口退稅，鋼鐵股、鋁業股等應受打擊。　　

五、人云亦云，欠缺獨立思考能力，忘記20╱80定律（社會上只有20％人口成功）。如果你睇法獲得唔少朋友支持，請放棄。因為贏家永遠係少數。例如2003年4月有幾多人睇好港股？2003年9月有幾多人睇好本港房地產？到2007年第四季有邊個睇淡港股同本港房地產？經濟同政治唔同，政治係大多數一邊贏，經濟卻相反。摩根士丹尼首席分析員羅奇（Stephen Roach）提出五個肥年之後，全球經濟將面對困難。佢認為，八十年代開始經濟全球化已帶來不平衡，未來（2008年）隨美國消費者消費力下降，各種有形無形貿易障礙將出現，令1980年起全球出口雙位數增長時代結束；其中最受影響係亞洲區國家。中國GDP增長將由連續五年雙位數（2007年首九個月11.5％）下降至未來五年8％，令依家過熱中國經濟進入冷卻期。Victor Niederhoffer最近《紐約時報》批評中國藝術品天價，令人想起1989年日本人用天價競投梵高《向日葵》油畫及1979年原材料高價時澳洲財團奔達出高價購畫事件。今年中國藝術品以天價出售，係咪出貨訊號？

放完煙花之後就散場　　

所有學習弧線（Curve）Trader都知道乜叫做拋物線上升及乜叫做爆炸性上升（Blow up）。上述走勢出現理由係Trader利用大量槓桿去產生，一旦完成爆炸性上升，燦爛便歸於平淡（好似放完煙花之後散場一樣）。次按危機可以因聯儲局減息一次（或兩次）而消失咩？科網股泡沫爆破後，亦唔係一次或兩次減息可以解決，更何況次按危機。　　

樓價可升可跌，主要睇人口增長率及經濟增長率而定。例如日本人口近年增長率接近零，GDP增長率似有若無，便唔住過去十七年日本樓價。香港面對1997年7月亞洲金融風暴兼「八萬五」房屋政策，樓價亦唔住；2003年7月中央批准內地人來港自由行；加上2003年9月「孫九招」，本港樓價又再欣欣向榮。美國2007年起進入退休高峰期；加上GDP增長率進入放緩期，美國樓價後市又點睇？　　

成功投資由你將雞蛋放邊度決定。1997年7月係放海外；2001年係放黃金上；2003年下半年重返香港；呢兩年自然最好集中國企、紅籌股，未來又如何？　　

轉弱美國建築市場令Caterpillar股價回落，引發上周五道指有較大跌幅，周一港股亦回落（其實香港剛好相反，建築市場在轉強中）。周二港股已收復失地。海外傳媒報道第二大石油出口國俄羅斯財政部長阿列克謝．庫德林認為，依家油價過高，油價攀升原因係產油區出現衝突；上述現象只係暫時，長遠而言，油價可能下降到每桶60美元。上述言論令油價由10月18日90美元回落。9月份美國汽油消耗量較2006年同期減少0.3％，係近年少見；加上OPEC已同意11月1日起唔再每天減產五十萬桶，令下月供應量同過去一樣。短期油價好快回落到70美元以下一桶（過去二十年有十三年油價第四季回落）。9月28日止美國原油存量較五年平均數高9.3％，都係阻止油價進一步上升因素。　　

「反向貸款」已批准超過六十二歲業主可出售自住物業後仍住該物業內，資金可用作度過餘生而唔使付物業升值稅。做上述貸款要多付2%保險溢價、多付2％手續費及每月服務費25-35美元。相信除冇仔女人士外，六十二歲做「反向貸款」者唔多。　　2001年1月至2003年6月聯儲局減息，令美元自2002年1月至04年6月回落。2004年6月加息至06年8月宣布唔再加息，美元價由2006年下半年起又再回落。　　

今天人民幣首次升穿7.5兌1美元，並進入減息期，美元價自然繼續弱下去，估計2008年年底前見7兌1美元。2005年7月至今人民幣升值10.5％，分析家估計，人民幣仲有15-20％升幅。美國財長保爾森今年12月訪華前，估計人民幣仍然上升。　　

「九金十銀」現象今年冇上海及深圳樓市出現，上海樓市成交量高潮係6月，其後一直在減少，本月15日止成交量較9月同期減少10％，主要受提高首付及加息預期等不利因素影響。雖然成交量下滑，但平均樓價卻上升。10月首十五天平均成交價12007元，較9月同期10507元上升14.7％，主要受「王子晶」第一批房源平均售價4.5萬元一平方米影響，將平均售價扯高（上述並冇反映上海樓價升幅）。深圳方面部分二手房因無法獲貸款或貸款額減少而令成交萎縮，觀望氣氛較濃，交易進展緩慢，唔少業主轉售為租，第三季開始樓市交投已靜下來。　　

上海市外經貿委10月22日公布今年首三季新批外資房地產項目六十個、涉及資金19.46億美元，較去年同期減少19.5％。代表今年外資流入上海房地產已減少；反之，訊息產業、電腦服務及軟件業較去年同期升42.4％，金融服務升28.7％、物流升5.5％。

全球農產品漲價窮人受害　　

俄羅斯宣布凍結食品價格10月15日水平，包括麵包、芝士、牛奶、雞蛋及植物油直至年底為止；另考慮將小麥出口稅由11月1日起從10％上升至30％。9月份俄羅斯植物油價格升13.5％、牛油升9.4％、牛奶升7.2％。中國亦計劃凍結部分食品價格。希臘、約旦、孟加拉、摩洛哥政府宣布大幅削減食物入口稅及向食物提供補貼，甚至日本（接近冇通脹國家）9月食物售價平均上升10％。食物佔貧窮國如阿富汗家庭總支出70％、佔新興國如中國家庭總支出30％、佔OECD國如美國等家庭總支出10％。今年小麥、牛奶、大豆、玉米、米、咖啡等皆大幅上升，農民已多種食物減少種植棉花及玉米，中國政府已對豬肉、牛奶等提供大量補貼，以阻止進一步漲價。全球農產品漲價，農夫生活會好一點，但依賴食物入口貧窮國人民卻受害，此乃過去多哈會議至今談判進展不大理由。