2007-10-11

四大天王主導全球　　

10月10日，周三。恒生指數上升341.29，收28569點；成交1537.8多億元。期指低水，只升167點，收28550點。 多元化城市需要基建　　

施政報告將最高個人入息稅率降回15％、有限公司稅率降回16.5％，令高收入人士（約七萬打工仔）受惠，並加強香港競爭力（因新加坡企業稅率為 18％）。政府未來五年計劃投資1000億元基建項目而創造二十五萬個職位，為捱十三年不景氣建築業（1994年起計）注入強心劑。地產方面，除今年4月至9月唔使交差餉外，明年首季亦可免。當然仲有其他項目，各位可睇本報報道。　　

呢份施政報告特點係強調十大建設。1997年7月主權回歸後，好多大型基建項目都無法上馬，搞到紮鐵工人開工不足而走去示威、建築工人去澳門做黑工、建築師紛紛去內地謀求發展，建築股由1994至2006年都係一浪低於一浪。睇外國國際金融中心都係多元化城市（Cosmopolitan），不但有文化事業，亦有良好基建及環保。呢幾年我老曹返上海次數增加，深深體會到上海近十年愈來愈多元化，香港過去十年基建上則停滯不前。十年香港、十年上海，兩者拍埋一比較，真係令港人汗顏。

中國成長速度四倍於美國　　

受摩根大通推介中銀香港（2388），今天股價上升2.6％，見20.4元，係2月15日以來最高。工商銀行急漲8.9％，因獲批准經營QDII。　　

花旗推介民安控股（1389），目標價4.35元；長實（001）目標價155.76元。民安乃非人壽保險公司，正迅速擴展內地網絡，今年下半年至明年將增加九個省分行，估計今年每股獲利23仙，上升66.7％，未來O十三點三倍。另一方面，根據中原地產報告，長實今年可售出超過四千個住宅單位，成為住宅樓市向好受惠者，估計每股獲利10.4元，上升52.3％，未來O十三倍。　　

麥肯錫經過六個月統計同考察，得出研究報告係，當今主導全球經濟走向「四大天王」分別係油元、亞洲各國央行、對沖基金及私人股本資金，成為全球經濟新權力核心。上述「四大天王」控制資金去年底達8.4萬億美元，佔全球金融資產167萬億美元中5％。其中一個新興力量係中國人民銀行，管理1.1萬億美元，係全球對沖基金自有資金（唔計借入資金）四分三，亦係亞洲各央行外儲備3.1萬億美元三分一。過去投資美國政府債券為主，近期逐步向風險領域擴張。其次係油元（包括政府同私人），擁有海外金融資產達3.4萬億至3.8萬億美元之間，如油價保持70美元一桶以上，每年可增加6280億美元用作投資，成為金融市場第二股不可忽視力量。其餘係對沖基金、私募基金及其他金融創新基金，去年底對沖基金管理資產達1.5萬億美元，佔英美股票市場同債券市場總交易額30-50％。上述四類資金全球資本市場發揮巨大作用，例如壓低美國長期利率，助長美國貸款大幅增長，而令住房價格及股價節節上升。呢D 資金如從一國流向另一國，可引發一個國家經濟繁榮與衰退，造成市場不穩定性。換言之，今天金融市場風險較從前大好多，但同時提供更多機會。冇人能估計上述四大力量將全球經濟帶向何方。　　

渣打銀行經濟學家格林認為，中國一年相當於美國四年，中國正以美國四倍速度成長。例如中國二十多歲孩子轉工速度，可讓你目瞪口呆，摩天大廈你成長地區拔地而起，三幾年內整個地區變到你差D唔認得。國際形勢正在此消彼長，過去美國靠四個全球化成為全球超級強國（一、全球精英集中美國；二、全球資金集中美國；三、美鈔成為全球流通貨幣；四、美國軍力可以二十四小時內到達地球任何地方）。中國1978年以一窮二白起家，係靠拚命三郎精神，最先係省吃儉用，然後將民間儲蓄變成建設資金，再開放大門歡迎外資流入成為世界工廠，為全球創造價值，中國只賺取低微報酬，利潤都被跨國公司到手。然後中國由工業走向金融，上海同深圳金融市場呢幾年迅速冒起，美國才驚覺中國已經長大啦！中國靠係數千年練出來「四小哲學」：甲、自己細小時積累能力；乙、日漸長大靠係吸收能力；丙、有力量時要包容別人，所謂有容乃大；丁、當別人感到威脅時應變能力。今天中國經濟再唔使摸石頭過河，但小心變成鐵達尼號。全球化驚濤駭浪中，仍須小心駕駛及從別人錯誤中收取教訓，例如1990年日本、台灣，以及1997年7月香港。

強化金融制度迎接泡沫爆破　　

日本經濟從1960年代開始起飛，三十年後到1990年泡沫爆破；日經平均指數由1982年9月至89年12月，狂升七年……。香港經濟從1967年開始起飛，三十年後係1997年；恒生指數由1989年6月5日起步，1997年8月爆破，共八年。中國經濟1978年開始起飛……。滬深指數由兩年多前 800點，升到今天5700多點（日經平均指數由1982年9月7000點上升到1989年12月39000點，只上升四點六三倍；台灣股市由1983至 90年上升二十六倍；泰國股市由1986至93年上升十二倍；香港股市由1969至73年上升十八倍；南韓股市由1985至89年上升六倍）。任何國家或地區經濟，由新興市場走向成熟前，股市必出現一次或以上泡沫化，即使成熟如美國，2000年亦出現科網泡沫。問題唔係在於點樣阻止泡沫，而係一旦爆破後阻止佢擴散而影響整國經濟。呢方面美國相當成功，日本則相當失敗，台灣介乎兩者之間。其中最大因素係金融業應變能力，日本毛病係讓地產業拖垮金融業；反之，美國金融業2000年並未受科網泡沫影響，甚至次按危機，美國金融業仍十分健全（1997至2003年香港地產泡沫爆破期間，本港金融業亦好健全）。換言之，中國政府策略唔係要阻止泡沫形成（冇一個政府可成功），而係強化中國金融制度。再以台灣為例，1983至90年股市狂漲期，政府一再壓抑樓價，因此漲幅只有二倍以上；股市泡沫爆破後，台灣樓價到1996年亦只回落20％。南韓政府更加成功，1986到91年房價只上升80％，當股市泡沫爆破後，房價跌幅僅10％；反觀日本1990至2003年樓價跌幅達70％，至今升幅有限。香港1997至2003年樓價跌幅雖然達65％，但金融制度健全，令經濟由2003年7月起迅速復甦。中國政府近年已經一再壓抑房地產；換言之，中國政府已做好股市泡沫一旦爆破所需安全措施。　　

依家A股O七十一倍（滾動O四十六點六倍），╱七點七倍（最新資產值亦達六點七倍），早已進入泡沫期。從中央政府近兩年所做措施睇，中國有能力應付股市泡沫爆破所帶來後遺症，而唔影響整體經濟發展。　　

中國8月份CPI增長率達6.5％。如要阻止資金流入股市同樓市，銀行存款利率必須高達8.5厘以上，上述係唔可能，不然人民幣價肯定狂升。估計中國CPI增長率高潮今年9月同10月，然後慢慢回落。因為中國CPI上升主要因素係食物價格升18％（豬肉升49％，蔬菜升22％），扣除食物、能源等因素，中國核心通脹率只有2.7％左右。換言之，十二個月後中國CPI升幅回落到3％以下機會好大，中國負利率期估計九個月內結束，政府亦利用A股泡沫期壯大國營企業實力（國企上市及本港國企回歸A股市場），一來可吸收過剩資金，二來國企壯大後，未來下跌幅度減少。其次係疏導資金到海外（例如 QDII），主要係利用港股去吸收內地過剩資金。最終A股何時見頂及未來調整幅度幾多，則只有事後才知曉。　　

價值投資者可能錯過8月中至今上升大浪而認為股市瘋狂，唔少人認為已進入類似美國科網泡沫潮尾段。事實並非如此，因為價值（Value）係十分抽象，何謂偏高、何謂偏低？往往事後才知道。

注意浴缸滿瀉效應　　

雖然整體而言港股已進入極高水平（O二十二倍以上），但仍然有大量股份處於偏低水平，可以用極之吸引價錢購入，咁先至係揀股技巧。　　

滬深A股今年內上升114％，H股指數今年內只升70％，即升幅計仍落後內地A股44％。由於H股由唔少外資大量持有，家H股低於A股30-40％情況會否消失就唔清楚，因為H股同A股不能互通。值得注意另一現象漸漸出現，就係所謂「浴缸滿瀉效應」，即overflowing bathtub effect（開水喉，浴缸先滿，由於忘記關水喉，最終水由浴缸流到周圍都係）。8月17日中央決定個人資金自由行後，最先滿瀉自然係紅籌國企股，然後其他藍籌股如長實、新地（016）……最後整個股市，包括大部分二線股。雖然港股直通車仲未開出，有幾多私人資金已透過地下金融活動流入香港？大家心中有數，但官方唔會正式公布。　　

點樣跑贏大市？Heritage Fund主席David Hollond（管理27億美元資金）教我地：就係非傳統增長行業中找尋增長股！多D留意產品周期（product cycles），以及公司營業額及純利上升周期。行業本身有盛衰周期（cyclical industries），例如新力推出PlayStation 3及蘋果電腦推出網上下載iPod，都引發產品周期現象，即由一個產品帶動公司營業額，然後純利上升，最後刺激股價……。例如最近CROCS推出塑膠鞋引發消費熱潮，為該公司帶來強勁營業額及純利，如此類推。　　

本周四中國人民銀行向各商業銀行再發行1520億元人民幣定向票據，以進一步凍結銀根。過去習慣係定向票據推出後一星期加息，由於十七大開會，估計呢次可能延期到11月才加息，即先等候美國減息0.25厘後，人民幣才宣布加息，以便人民幣同美元息差進一步收窄。　　

上投摩根亞大優勢基金下周發售，認購下限10000元人民幣，係業內第四隻QDII基金，其中80-90％資金將用作投資股票包括澳門、南韓、香港、印度及新加坡，而區域性基金較單一市場風險又細好多。換言之，內地資金繼續流港。　　

受信貸收縮影響，估計金融市場將漸漸平靜下來，尤其係美國住宅樓投資方面，但對股票市場影響唔大（可能反而有利，例如呢次減息，理由就係美國房地產放緩）。從8月10日公開市場利率協議小組開始擔心經濟增長放緩，到8月16日決定減貼現率，到9月份集體同意聯邦基金利率改為4.75厘，相信10月31 日亦好少人反對再減息0.25厘，因為聯儲局已改變態度，變為積極防止經濟衰退出現。　　

新昌營造（404）、第一拖拉機（038）、新創企業（1141）、訊通控股（8082）、南京三寶（8287）、中華國際（1064）、多金控股（628）、北方興業（736）、上海証大（755）停牌。