敲敲冷馬又如何
10月4日，周四。恒生指數跌505.96，收26973.98；成交1475.35多億元。10月期指跌242點，收27013點。投資者應明白股市嚴重超買下，一次技術性調整無法避免，經過兩天（加起來超過2000點）回落後，周五股市相信又再上升，因為市場資金太充沛啦，日圓弱勢代表資金大量由日本流出。
新濠（200）跌6.5％，見13.6元，大摩分析員認為澳門賭業較去年同期只升55％，而非事前估計75％，有D令人失望。大量賭場兼酒店陸續澳門落成，造成澳門賭博業及酒店業勞工不足。美國上市永利及金沙澳門投資好大，10月3日在美國股價亦回落9％。隨威尼斯人開業，令澳門賭增加供應量30％。澳門酒店及賭博事業開始面對激烈競爭。
今天招商局國際（144）跌5.5％，見44.5元，該公司內地五個最大貨櫃碼頭都有權益，最新數字9月份內地接單情況漸受今年7月1日起大幅削減出口退稅所影響，睇中國出口業進入增長放緩期。
太平洋航運（2343）跌5.6％，見15.16元；該公司宣布出售兩艘船，代價6300萬美元；相信乾貨業高潮已在眼前。
唔係人人可做股神
中海油（883）跌6.4％，見11.76元，係2004年5月以來最大跌幅；中石油（857）回落3.9％，見13.46元。原油價再次低於80美元，成79.94美元。
中國地產（1838）升17％，見5.89元，公司向兒童投資基金出售4.453億元股份，每股售價4.93元。
港華燃氣（1083）升4.6％，見4.58元。四叔以平均價4.497元購入1074.5萬股，令中華煤氣（003）佔港華燃氣比重由43.9％升至44.19％。
近期四叔眼光一流，但看似容易事，背後大有學問，唔係人人可做「股神」。1973年我老曹任職投資公司，同時擁有一間證券行，公司客戶中超過二百個係活躍分子（接近每天都買賣）；到1974年12月，公司活躍客戶只餘下八個。1973至74年大熊市中，炒家死亡率高達96％。散戶投資股票由 1997年7月至今十年，相信亦係損失者佔大多數、成功者只佔少數。牛市中，人人都可以成為股神，一個月賺三、四十萬元好似好容易，較返工賺得更多，但事實並非如此。投資係一半科學（事前做足資料收集）、一半藝術。事前冇一個人有十足把握，所以要分散投資及按O高低決定投入資金。我老曹經歷過1973至 74年股災、1981至82年香港主權談判、1987年10月停市、1997年7月亞洲金融風暴、2000年3月科網股……。由2003年4月至今，股市已上升四年有多，加上我老曹年紀漸大，不宜過分進取矣。何況現水平能源股、金屬股甚至內地金融股及內地房地產股股價，都已到唔係咁吸引水平；反之，半導體股漸漸見底回升，可以成為第四季尋寶遊戲對象。至於建築股，相信正進入黎明前黑暗，如「西九」上馬，一切漸漸改變，股價開始見底回升。本港建築股自 1994年起回落，到今年已下沉十四年，唔少建築公司依賴將業務伸展到中國同澳門才能生存下去，一旦政府將西九重新招標，令本港建築合約大幅上升， 2008年建築公司純利有機會回升。上述看法係咪正確？2008年才知道。其他項目咁貴今天，敲敲冷馬又如何?!
今天花旗推介恒地（012），目標價80.7元，並推介中華煤氣，以及推介深圳投資（604），目標價10元。
兩隻都係畢非德愛股：前者係可口可樂，今天股價仍較2001年低8％；後者係中石油（857），由2001年至今升幅接近七倍，可見唔同股份及新興市場威力。1990年投資戴爾電腦同投資IBM分別有幾大？答案係前者上升二百五十倍，後者變化唔大；其他如星巴克、 Crocs、Callaway Golf、 Home Depot、蘋果電腦、MCI、eBay……。選中明日藍籌股並唔容易，何況今天新興市場已非香港而內地。唔係所有二線股都可以快高長大成為明日藍籌股，因此必須嚴守止蝕唔止賺策略。可以改變你一生命運係二線股（明日藍籌股），唔係今天藍籌股，策略係「狠、忍、準」，一旦睇得準，便要忍，一如鯊魚（死咬住唔放）般狠！
次按問題靠打嗎啡針止痛
繼花旗及UBS之後，德國銀行宣布次按上虧損高達22億歐羅，令第三季出現虧損3.5億歐羅，公布後股價反升2％。次按風暴所造成損失逐漸浮現，但中央銀行注資及減息下，恐懼感漸漸消失，市場平靜落，但唔代表問題已解決，只係打兩口嗎啡針傷口止痛而已。經過8月同9月，市場內廉價信貸不再，但因中央銀行注資而產生廉價資金，令市場繼續運作落去。上述只係短期現象，因央行借出資金遲早收番，即十二個月後市場須面對信貸收緊所帶來影響。花旗、瑞信、UBS、德銀之後，仲有幾多間銀行次按風暴中有損失？仲有D二級銀行所受影響有幾大？受呢次次按風暴影響而出現虧損，未來銀行界貸款策略如何？美林相信，未來十二個月銀行信貸方面將逐步收緊，整個程序需時十二個月，市場才感受到壓力。
美國GDP增長率放緩（但唔係衰退），而且日子好長。1980年1月美股仍上升8％，雖然美國經濟正步入衰退期。根據多年經驗，我老曹已唔再相信股市係經濟晴雨針（例如話股市走在經濟之前）。2000年首季美國股市亦狂升，未見到2001至02年即將出現經濟軟陸期。股市早已失去預測能力，與經濟關係變成互動（Interactive）。
北岩已失去76％市值，上月由英倫銀行出手挽救，依家找尋緊合適買家，家總市值只有6.39億英鎊，O二點三六倍。該公司1850年成立，係英國金融業呢次次按危機下受打擊最大機構。外傳JC Flowers有興趣收購。
第四季恒生指數亦須消化8月17日至10月2日升幅（恒生指數共上升50％），28000點附近需要一度較長日子消化，並趁機思考一下2008年邊D行業受惠？第四季通常係反思及前瞻日子。
今天六大中央銀行可以改變整個世界經濟，而美國聯儲局及歐洲央行係獨立運作，理論上唔受政府影響；另外兩間係中國人行同俄羅斯中央銀行，完全聽命於政府；介乎兩者之間係日本銀行同英倫銀行。佢地決定可以左右全球資金流向，甚至改變整個世界經濟環境。例如今年8月份就係各國央行聯手入市，令次按風暴平靜下來。
英國房地產9月份回落0.6％，平均每間賣19.85萬英鎊，但第三季全季比較仍較去年同期升10.7％。自英鎊利率見5.75厘後，英國樓價止升回跌（較美國遲一年），十二個區中只有兩個區回落，就係北愛爾蘭較去年第三季回落3.2％，以及英國北部回落2.1％，倫敦第三季仍升2.3％。從今年9 月起，英國物業亦進入漫長回落期。
今年黃金周中國人主要去邊？答案係二線城市淘樓熱。以廣東省為例，惠州、中山、江門、肇慶、清遠、河源等二線城市，到處都係睇樓人群。隨交通網絡日漸發達，珠三角「二小時生活圈」形成，即大城市附近二小時車程地區都出現買樓熱；加上大城市內首付提高到40％，更多人向鄰近二線城市進軍。
黃金周前，A股係以2008年估計純利O四十三倍交易，雖然今年A股純利平均升幅可達31％，點睇都係算貴（但貴唔係睇淡理由）。中國經濟保持高增長，利率低於CPI增長，令A股繼續上升，今年8月20日以後更刺激本港H股狂升，因中央將批准個人資金自由行。中國政府正努力為A股做冷卻措施，包括讓本港國企回歸A股市場去吸收市場內過剩資金，並以QDII（讓內地基金及金融機構投資港股），即利用本港H股去拖慢內地A股上升速度。如參考1980年代台灣股市泡沫爆破前曾出現兩次大調整，第一次調整幅度39％，第二次26％，到1990年2月指數見12495點才正式爆破。原來「狼來了」理論亦可應用於泡沫經濟！今年首季唔少專家認為A股出現泡沫，相信只係第一次狼來了；5月份加股票印花稅係第二次狼來了；至於第三次狼來了係咪2008年？冇人事先知道。如參考香港1997年樓市泡沫爆破理由，八萬五房屋政策只係藉口，真正理由係負利率時代結束。1990年2月台灣股市泡沫爆破，理由亦係負利率時代結束。有一天中國CPI增長率回落至利率水平以下，存款利率再次提供實質利率，形成資金由物業市場同股票市場重新回流銀行存款，就係A股泡沫爆破時刻。QDII令內地資金可見將來繼續流港，港股直通車雖然一再延期，最終仍會開出，令H股同A股差距進一步收窄。
內地A股年底可拋空
年底A股市場引入期指，內地A股亦可拋空，即2008年起將進一步增加A股供應量，代表中央政府利用種種方法去減慢A股上升幅度同速度，以便日後泡沫爆破後下跌幅度及速度亦同樣減輕。
日本政府1989年6月前唔理會泡沫形成，1989年6月至90年6月大幅加息及抽緊銀根，恢復日圓實質利率，引爆日本地產及股市泡沫，後遺症十分多；反之，台灣政府事前做好多，1990年2月台灣股市泡沫爆破，但對台灣經濟所造成傷害唔大。中國政府近年做法亦一樣，就係做好一切預防措施去迎接未來泡沫爆破日子來臨（歷史上冇一個政府可以阻止泡沫形成及爆破），令日後中國泡沫爆破後帶來最小損失。
真樂發（1003）、雨潤食品（1068）、中建電訊（138）停牌。
沒有留言:
張貼留言