2007年10月1日 星期一

2007-10-01

投資者個個嚇大

9月30日,周日。國慶前夕。香港消費市場一片興旺,來自內地自由行人群到處消費,令香港售貨員「煲冬瓜」大有進步。 半導體股再被睇好  

內地通脹率十分高,尤其係食物方面正以年率18.2%速度上升。其次係美國房地產仍在惡化,存貨已達十八年內高位。不過,全球經濟上述兩大利淡因素影響下保持增長。值得注意係,半導體行業周期回升中,半導體股又開始被睇好!估計2008及09年半導體股業務進入擴張周期,各位投資者今年第四季揀股方面,應多D留意半導體股;反之,美國樓價估計進一步回落。以1989至93年為例,部分地區美國房價曾回落30%到40%(例如波士頓及橙郡)。估計2009年美國部分地區樓價跌幅媲美1989至93年次調整期。  

次按問題令今年第三季股市出現Deep V,但第三季恒生指數表現係2003年4月升市以來最好一季。10月通常係令人比較擔心月份,歷史上唔少大跌市皆由10月開始,但過去二十七年中,有二十四年第四季係上升,平均升幅6.3%。近年唯一一年唔升係2001年,主要因為「九.一一慘劇」,因此2007年第四季以升市結束機會好大。McClellan Oscillator指出,股市嚴重超買,上述唔使睇指標亦係人都知道。恒指由8月17日19386點升至9月28日27254點,短短六個星期已上升40%,任何人都知大市已超買,問題係極度超買環境下,投資者如何自處?等調整出現,抑或係繼續玩Stock picking遊戲?有人主張鎖死利潤,因為恒生指數已拋離50天移動平均數23472點,達16%,一次技術調整無可避免;加上美國批過氣大人物近期一再強調2008年經濟出現衰退機會上升。不過,今天投資者個個嚇大,股市並冇多大反應(我老曹同意2008年美國經濟增長率放緩)。高盛估計明年美國GDP增長率只有1.8%而非衰退(連續兩季GDP負增長才係衰退),而我老曹相信「黃金歲月」仍可維持。根據Thomson Financial估計,今年第三季美國大企業純利升幅只有4.3%,全年7.6%,係近五年內最細升幅;今年第四季純利升幅估計可達11%,明年第一季10%。從呢點睇,第四季美股表現應唔會太差,除技術上偏高外,冇其他問題。  

上周能源股、原材料股、高科技股表現不俗,第四季值得留意項目集中能源股、原材料股同高科技股身上。內地上次調高印花稅,曾引發市場回落,政府大為緊張,證明政府唔願意負上「打沉牛市」呢個重大罪名,相信10月中旬前後唔會有太大政策改變。  

1989年下半年日本銀行大幅提升利率,引發日股1990年大跌市,令過去十多年整個日本國家利益受到極大損害。中國政府前車可鑒,因此政策以保持金融市場穩定性、消除市場泡沫為主,例如近日個人投資直通車項目,態度亦以唔畀境外游資套利為主,只係希望借助大量國有股回歸A股市場,去消除內地股市泡沫,而唔想外資利用A股與H股唔平衡狀態從中套利。  

畢非德進一步減持中石油(857),由8.21%降至7.99%股權,係今年7月以來第四次。上一次9月13日減持4500萬股,平均價11.26元,共套現5.08億元;上周五中石油收市價14.74元。畢非德進一步減持中石油應該唔算意外。

銀價短期上升力量勝黃金  

歐羅已見1.426美元,小麥、大豆、石油、金價及唔少原材料價格創近年新高。巴西亞瑪遜唔少森林被砍伐,以便種植大豆(雖然環保團體抗議,但巴西政府認為冇理由只由巴西去保護原始森林)。12月期金上周五曾見752.5美元二十七年高位,睇有條件挑戰1980年1月21日高位875美元。一個月金價上升9.9%,過去一季上升13%;實金亦企於738.9美元,正在消化獲利貨。不過,上周存金增加3.48萬盎斯,總存量達700萬盎斯,代表非投資需求下降中;反之,白銀存貨少1.03萬盎斯,下降到1.33億盎斯,短期銀價上升力量較黃金大。長遠而言,金價有條件見1000美元一盎斯,但仍須掙扎一番。  

食物價格已有D失控,內地CPI升幅加快,人民幣利率將上升,短期內呢個趨勢唔會改變。澳洲、加拿大、歐洲及烏克蘭今年穀物收成都唔理想,令全球小麥存量跌至二十六年最低。中國食物入口過去五年上升四倍。至於點樣食品價格上升中獲利?香港股票市場似乎缺乏呢方面有效投資工具。農產品價格上升令英國農地去年上升23%,四年前英國一噸小麥只賣70英鎊,今天已達187.5英鎊;不過,由1980年至今過去二十七年小麥每年平均升幅不足2%,由此可見由1980年至今從事農業生產者日子並唔好過。《時代》雜誌估計2007╱08年度6月止小麥全球產量6.07億噸,需求6.14億噸,睇怕明年小麥仲會漲價。2005年年初至今標普商品指數上升64%,最受影響國家係中國同印度。食物價格出現牛市已可肯定。

聯儲局再減息無甚阻力  

《金融時報》報道,美國中價樓已由去年高期24.62萬美元一間,下跌到今年8月22.5萬美元,係2005年1月以來最低價。8月份新屋銷售較去年同期減少21.2%(較7月跌8.3%),過去兩年半樓價升幅消失於無形!廉價信貸已難求,但廉價資金仍存在,正到處搵可以獲利投資項目。美國8月份核心CPI只升1.8%,係2004年2月以來升幅最細月份,代表10月份第二次減息應冇乜阻力。而三十年固定按揭利率6.42厘(上周6.34厘),十五年固定按揭利率6.09厘(上周5.98厘),樓按息口在上升中。  

第四季已開始。第三季投資最熱門項目內地房地產股開始降溫,加上唔少高科技股已調整相當長日子,部分已進入超賣區,現階段下跌空間有限(上周五美國納指剛升穿7月份高點!),除非你唔認同黃金歲月論,即CPI微升而GDP仍然增長。行業盛衰正取代整個大市盛衰!美國人雖然面對能源價格上升及房屋價格回落,但收入仍上升6.6%,全國收入增加約7500億美元,仍可支持美國消費市場興旺。美國過去GDP增長率高D、CPI升幅低D,未來日子GDP增長率低D,CPI升幅則高D。如等候衰退日子來臨才投資,恐怕仍有排失望。  

上周五中信證券市值400億美元(嘩!),較雷曼兄弟高80億美元,較貝爾斯登高240億美元!金價用七年時間才上升150%,內地A股只需三年時間已上升五倍。內地A股連金價亦跑贏,認真犀飛利也。

大量美國投資者向東望  

大量美國投資者向東望!富時新華中國二十五指數iShares已升至五十二周內高價182.43美元,今年最低價係80.92美元,成為美國人投資中國企業最佳途徑,令唔少美國人大賺特賺。  

經濟發展到某一水平,資本收入增長往往大於勞動收入增長,形成理財較勤力做工更重要。例如1984至97年無論你點勤力,都唔及一屋在手賺得多;上述情況近年中國出現。同樣理由,1997年8月至2003年9月,無論你點樣省吃儉用,如果你1997年上半年借錢買樓,一樣逃不出負資產命運。2003年4月至今,投資股票收益肯定較老闆加人工更吸引!薪金收入佔市民收入比重逐漸下降。以我老曹為例,1967年工資收入佔個人總收入全部,1977年工資收入總佔個人收入75%(25%來自投資收入),1987年工資收入佔個人總收入50%,1997年工資收入佔個人總收入25%;今時今日工資收入佔個人總收入10%以下,投資回報反而佔總收入90%以上!愈係高收入階層,工資收入佔總收入比重愈低;愈係低收入階層,工資收入佔總收入比重愈高,形成社會財富集中度加速(雖不致貧者愈貧,但肯定富者愈富)。2003年4月到今年9月,樓市、股市上升唔少,令高收入階層過去四年財富升幅一倍或以上者比比皆是,但低收入者有邊過去四年加薪100%?!  

2006至07年大學投資方面,耶魯大學獲28%淨回報,係所有出名大學中最高;哈佛大學投資回報只有20%。耶魯大學由David Swensen主持,今年6月30日止值225億美元(二十二年前佢接手時只有13億美元),即二十二年內升值十七點三倍。哈佛大學依家投資資金349億美元,係美國學府中最大。哈佛大學1990至2005年9月30日平均每年回報21%,十五年內升值540%,即將20萬元變成120萬元。今天哈佛大學每年開支25億美元,其中一半來自投資回報。兩間大學投資成功之道在於有效資產分配,並以保本及減少承擔風險為主,值得我地學習。  

9月10日出版《論勢》,依家已經印緊第七版,多謝各位讀者支持。以財經書籍能夠取得上述成績並唔容易,出版商天窗居功不小(例如為我老曹安排接受其他傳媒訪問,包括上電視),我老曹呢次改變寫法亦被市場接受,即以寫小說方式去同讀者討論財經問題。雖然該書寫作內容80%同金融及經濟有關,但以小說形式寫出,可能令讀者感覺唔似睇財經書籍,而似睇小說多D,而且將我老曹成長所面對問題和疑惑同讀者分享。又或者只係近月股市熱潮中另一股潮流而已,一旦潮流過後,一切又再回復平靜。

沒有留言:

張貼留言