2007-10-04

升市進入尾段 　　

10月3日，周三。恒生指數一度見28871點，然後以27479點收市，倒跌719.81；成交2098.08多億元。10月期指跌960點，收27255點。恒指單日波幅1600多點，係咪出現單日轉向？令人擔心。長實（001）跌7.4元，收126.9元；新地（016）跌11.9元，收127.9元；中移動（941）跌5.6元，收129.8元；港交所（388）跌11.8元，收234.8元；控（005）升3.7元，見147.7元。　　

恒地（012）宣布向恒發（097）購入手上39.06％中華煤氣（003）。　　華潤電力（836）宣布以每股23.8至24.8元配售二億股新股，集資49.6億元。今天國企指數跌3.7％，收17317點。　　

從8月20日至昨天恒生指數已上升38％，幅度較大，調整好正常。今天新興市場股市表現係咪同1999年科網股相若？

內地人大手買入港財團出貨　　

環球投資策略相信一國銀行股同該國經濟大有關係。經濟蓬勃必定刺激該國銀行股上升，反之亦然。例如日本1990年起經濟一沉不起，日本銀行股亦偏軟；今年次按出事，美國同歐洲銀行股亦受壓力。中國GDP高增長，令內地銀行股被睇好；香港1997年8月至2003年4月經濟走下坡，本地銀行股亦唔例外。2003年4月起本港股市止跌回升，本地銀行股亦重新恢復生氣。　　

WTI油價成80.32美元，但2008年期油成75.24美元、2009年72.86美元、2010年71.59美元、2011年71.03美元。格蛇認為五年期油有參考作用，以上述情況睇（期油較現貨便宜），係去年我老曹睇淡石油股理由，依家又再出現上述情況，各位點睇？　　

2005年上半年上海證券公司要聘請靚女打電話去拉客開戶口，到今天上海證券行內已逼滿人，其中一間證券公司更佔用二十層樓。過去用20萬元人民幣開戶便可獲VIP待遇，可到VIP房內買賣股票，依家20萬元開戶只當你係散戶，唔好話VIP房進不得，連經紀行職員都唔得閒招呼你。上海股民到處都係，寫字樓辦公時間一樣有人上網炒股票，茶樓餐廳內人人度交換股票心得，甚至去杭州長途火車上，一樣有人無線上網炒股票。概念來自報章、電視及財經雜誌，亦有的士司機話你知，佢十幾年前已炒過股及輸過錢，呢幾年唔敢大手買入而錯過機會，言談間一股酸溜溜。十．一黃金周，來自內地居民一窩蜂到香港炒股（一早已內地開香港戶口），形成周二恒生指數一升便千幾點，成交更高達1600多億元，佢地估計個人資金自由行遲早批准，因此買定貨等股市升。今天內地人大手買入，但本港財團卻出貨。瘋狂人生，帶來瘋狂股市。

白金鈀金或現大熊市　　

萬事得宣布利用納米科技（Nanotechnology）成功製成汽車廢氣處理裝置，令淨化器對白金及鈀金需求大幅減少。白金及鈀金最大市場就係汽車淨化器，用去每年產量70％至90％。上述消息媲美1970年代末期數碼相機面世對白銀市場影響，估計白金及鈀金將因萬事得上述發明而進入大熊市！因為新科技令汽車淨化器只需五納米（Nanometer）直徑白金，便足夠處理汽車廢氣，令汽車業對白金需求大幅減少。如白金從此進入大熊市，黃金短期亦受影響。　　

呢個世界有兩類投資法：第一類叫Value Investing（價值投資法），投資者努力找尋偏低股份，或熊市將完成時入市，耐心等候股價重返合理水平，或牛市將盡時獲利回吐。第二類係搵Growth Stock即找尋增長股，搵出邊D股份未來幾年每年純利可上升25％或以上，透過企業增長而令股價大幅上升。1997年7月前香港經濟處於高增長期（1967至97年黃金三十年），股票市場內充滿增長股。1997年後香港大部分股份變成價值股（Value Stock），即利用行業盛衰產生一起一落從中獲利；反之，中國由1978年起進入黃金三十年（係咪2008年結束則木宰羊），內地股份唔少係增長股，但亦漸近尾聲。10月份邊D行業會跑贏大市？能源股、金屬股、賭場股經過8月17日至今大幅上升，宜獲利回吐，較睇好係高科技股，大家不妨高科技項目中找尋投資對象。　　

上周格蛇向BBC表示，過去二十多年通脹平靜期（inflation tarnquillity）已結束。呢段日子，因十三億中國人民由貧窮走向小康，中國人努力生產增加出口，同時節衣縮食去累積資本，形成大部分中國人付出多、消費少。但呢段日子已一去不返，中國經濟已踏入小康期，即中國人除努力生產增加出口外，亦同時開始消費。此一改變引發2001年起原材料漲價潮，踏入今年下半年，中國經濟更由出口導向型轉為內部消費帶動型（出口退稅大幅減少或取消）……。格蛇繼續話，二十世紀初期，阿根廷人均收入較德國高，相等於當年美國人四分三；一百年後卻出現金融危機。格蛇點解今時今日提阿根廷？係咪警告美國人唔好因為二十一世紀美國GDP全球最大而自滿，一百年後美國會否一如二十一世紀阿根廷？每六十年一個甲子，由貧窮到富裕通常需要三十年，停留高峰期大約可維持二十年，衰落期卻只需十年，然後又係另一個甲子。中國由1978至2008年係經濟高速成長期，2008年開始係咪進入上上落落期？今時今日A股已處於偏高位置，但唔代表明天跌市便來臨。　　

今年第三季股市表現出色，第四季基金經理面對更大壓力，感恩節來臨前，股市會否見頂回落？10月係重要月份，至於邊一天最重要便事後才知道。雖然紅旗仍未升起，但黃色警告訊號已出現。恒生指數由8月17日至今升幅高達50％，進入應該停一停、抖一抖時段，唔少國企、紅籌股面對巨大獲利回吐壓力。中共十七大之後，估計將加強力度打擊通脹率。升市已進入尾段，必然愈升愈急。小心，小心！炒股自由行寧畀人知　　

自從港股直通車即將開通消息傳出後，唔少內地人藉去香港旅遊機會，順便開個戶口炒炒港股。以9月為例，港澳自由行遊客較平時增加30-35％，年齡三十至四十五歲，都唔係第一次去香港，而且內地有較高收入。唔少旅行社為增加吸引力，更加入考察港交所環節，不過至今仍未推出「港股考察團」，因為大部分來港炒股自由行人士都唔會參加旅行團，另一方面係國家仍未允許內地人私下炒港股，至今做法仲係「寧畀人知，莫畀人見」。　　

美國城市土地學會與羅兵咸永道聯合發布「2008年亞太區房地產市場最新趨勢報告」，最被睇好城市係上海，新加坡第二、東京第三、大阪第四、香港第五名；上海已成為未來最被睇好城市。　　

中國最新預測今年GDP增長率可達11％，連續第五年保持10％以上速度增長，已成為世界經濟增長重要發動機之一。世界銀行估計，今年中國GDP增長率為11.3％，德意志銀行則估計11.4％（明年10.2％）。據國家統計局數字，今年首八個月社會消費品零售總額56159億元，上升15.7％；8月份7117億元，升17.1％；固定資產投資上升26.7％，出口上升24％；工業實現利潤15623億元，上升37％。中國經濟高速增長，但股市係走經濟之前三到九個月。