10月30日，周四，期指結算日。恒指升1627.78，收14329.85；成交751.1億元。10月期指升1011點，收13719點，低水；11月期指升1517點，收14150點，一樣係低水。係咪代表反彈市完成？短線客要小心。
從十五分鐘乾坤燭睇，阻力區（R）喺14675點，即上升空間已極之有限【圖】。恒指响10676點完成1、2、3、4、5下跌浪，進入a、b、c調整浪，前浪頂喺10月14日嘅17141.05，前浪底喺10月10日14398點；依家呢個a、b、c浪，能否高出10月14日高點17141點而出現一浪高於一浪走勢，意味熊市完成？我老曹相信，由10月27日10676點開始嘅a、b、c反彈浪，最有可能响14398至17241點之間遇阻回落，仍然擺脫唔到一浪低於一浪走勢。
氹仔可以浸死人
科網股低潮喺2003年聯儲局減息至1厘後結束，恐怕呢一次唔得，理由係2001年起減息潮令美國樓價開始向上。但呢次減息潮至今，美國仍搵唔到另一個泡沫嘅力量足以替代物業泡沫嘅地位。換言之，2007年11月開始向下嘅大趨勢，最近只因股價過分低殘而出現技術反彈（即俗語所講嘅熊腳）。
10月10日至14日，響三個交易天內，恆指上升咗2744點或19％。呢次反彈由10月27日開始，可維持幾耐、升幅幾多？事後才知道。小心氹仔可以浸死人。
美國第三季GDP出現0.3%負增長，此乃2001年以來首次，估計第四季GDP亦係負增長而確認衰退。
8月15日奧巴馬支持率41%，麥凱恩42%，信貸壓碎出現後，奧巴馬支持率升至49%，拋離麥凱恩，證明衰退對執政黨不利，GE嘅CEO估計，呢次衰退期長達兩季到三季，即明年第一季GDP極有可能仍係負增長。
本月英國政府注資235億英鎊入HBOS及皇家蘇格蘭銀行，以該兩間銀行最近市價計，賬面虧損10％。週三英國財相戴理德已訂下守則，限制政府過分借貸，以免日後泥足深陷。英國政府稅收來源25％來自金融業，呢方面未來收入肯定萎縮。柏克萊已表示唔使政府幫手而自行集資65億英鎊；萊斯銀行除獲政府注資外，亦計劃向私人集資45億英鎊，透過發行新股集資，每股173.3便士（只略低於179.2便士市價），上述新股由政府包銷。HBOS市價88便士，已低於政府入股價113.6便士；皇家英格蘭成64便士，亦略低於政府入股價65.5便士。英國四大銀行股價進一步下跌，令未來集資方面更困難。10月份英國樓價較一年前回落14.6％，係1991年有調查以來跌幅最大嘅一個月（或較9月回落1.4％）。雖然10月8日銀行減息半厘，至4.5厘，而且英鎊匯價喺10月份大跌，但仍未能吸引多D投資者入市買樓，依家已有10％樓按加入負資產行列；估計11月6日英倫銀行再減息半厘。
隆巴特利率（LIBOR）即倫敦銀行同業拆放利率唔係回落咗咩？上述利率係全球銀行同業之間向對手收取嘅利率，今年4月起因銀行間缺乏互信，銀行同業唔願意向對手拆放資金（因知道對手楂咗唔少有毒債券），寧可保持現金喺手。近日隆巴特利率回落，唔係代表信心恢復，而係各銀行可直接向央行拆放。作為央行，反正都係納稅人嘅資金，唔使理會對手係咪安全，照樣拆放。因此，隆巴特利率回落唔代表基本問題解決，最後「有毒債券」一樣會吃掉銀行嘅資本。響呢段日子，各銀行仍努力出售高風險資產及令資產負債表去槓桿化（de-leveraging）。當人人銷售高風險資產（響會計上叫Level 3），加上國際會計公會要求高風險資產值「mark-to-market」，結果高風險資產價格一跌再跌，令銀行資產負債表愈來愈難睇，政府只有不斷注入資金去抵銷被「毒債」吃掉嘅銀行資本，形成政府注資沒完沒了。再加上銀行們努力去槓桿化，令銀行向非金融機構借出嘅資金愈來愈少，整個社會面臨信貸收縮。
美國政府嘅1600億美元注資計劃，主要對像係嗰D財政較佳嘅銀行，結果財政較差嘅銀行加快破產，美國境內銀行破產陸續有來。
今天垃圾債券利率較美國政府債券利率高出16％（去年6月只高出2.5％），係1986年以來最高，反映投資者仍擔心大量不履行合約出現（default），響咁嘅情況下，又點叫銀行界放心將資金借出去？
兩房成為美國政府黑洞
房利美短期內須減值最少200億美元，令公司賬面值減半；減值後如須維持借出嘅款項，政府必須再注資。擔心兩房已成為美國政府兩個深不見底嘅黑洞！為確保兩房佔12萬億美元嘅住宅貸款擔保唔使及早收回，差唔多每年美國政府都必須注資、注資再注資。最近政府已急急注資1000億元入兩房，以應付燃眉之急。從上述睇，次按危機不但未解決反而在惡化。你說怎麼辦?!
歐洲央行11月6日估計再減息半厘，由3.75厘降至3.25厘，到時可能刺激美元匯價上升。今天美國減息後，原油價格急升7.6％或4.77美元，成67.5美元；銅價升12％，成2.0715美元一磅，都唔係良好訊號。
雷曼兄弟不但「累埋」兄弟，甚至害你全家，幾多無知散戶被迷你毒債券毒死？毒債券甚至較毒牛奶更毒，飲咗毒奶最多生腎石，只要多飲水，總有「水落石出」嘅一天。反之「累埋」兄弟迷你毒債券卻可以令唔少人唔知點過埋下半世，認真可憐。
今次減息唔係好消息
中國人行擔心中國第四季GDP增長率少於8％，過去六星期三度減息。依家內地一年期貸款利率降至6.66厘，一年期存款利率降至3.6厘。跟住美國亦減息，相信日本、歐洲及英國短期內亦減息。今天人人皆知道減息唔係好消息，唔似2001年1月嗰陣時，太多人以為減息係好消息。只有最後一次減息才係好消息，由於中國未來仍會再減息，即呢次減息並唔係好消息。內地第三季公司業績認真麻麻，東方航空（670）、南方航空（1055）蝕得一塌糊塗；中遠太平洋（1199）不但第三季純利大減，同時宣佈延遲擴張計劃以保留更多現金；中國銀行（3988）第三季純利仍升11.5％，但須為次按作大幅撥備；煤礦同鋼鐵廠面對煤價、鋼材價格下跌，第四季業績令人擔心。政府明年「保八」能否成功？目前言之過早。
沃頓商學院教授Jeremy Siegel認為，未來投資方向將由舊世界（歐、美）轉向新世界（中國、亞太區同非洲）。一如1990年資金離開日本奔向全世界一樣，未來（2010至2030年）中國、亞太區同非洲等佔全球GDP將由依家30％上升到55％；美國仍佔24％，歐洲及日本則大幅萎縮。
過去一年嘅熊市令美國退休基金失去5000億至2萬億美元市值，加上三分二美國人已無力供退休金，未來進入美股資金大幅減少期。退休人士面對更少蚊年退休，無法過舒適嘅退休生活，部分改為依賴社會保障計劃，大大加重政府財政負擔。2011年起該計劃亦因交稅人減少、支出大升而出現財赤，需要政府注資。從呢點睇，美國未來經濟前景殊不樂觀。《華盛頓郵報》報道，加州退休金響過去十二個月虧損670億美元或下跌60％，好多公務員因此唔夠蚊年喺退休後火燒旗桿。International Herald Tribune報道，今年甚至最有錢嘅美國人，亦開始減少消費。本港阿一鮑魚酒家亦宣佈推出特價套餐；本港有錢佬亦要食「套餐」？世界變矣。一直以來，美國人假裝好有錢，但響金融海嘯下原形畢露；日本人一直扮窮，日經平均指數出現十八年熊市，不過日本人仍有大把錢借畀別人去做利差交易。
《金融時報》報道估計，約4250億美元環球資金與日圓利差交易有關，一旦unwind，不但令國際金融市場受壓，同時可將日本經濟急速推向通縮。依家G7正努力去減慢日圓升值速度（另一偽裝？）！
日本繼南韓後決定造數，今後日本公司賬目唔再反映真實數字。美國公司會否放棄造數？（去年國會曾下令美國證監會響2009年年初執行：所有金融機構賬目必須真實反映財政狀況。本週三美國證監會向公眾人士諮詢意見，問應否延期執行FAS 157法案（即投資項目以市值入賬）。依家唔少賬面值1美元嘅CDO，市值只有20美仙或更低，如按市值入賬，大量金融機構都唔符合資本充足比率，必須集資或收縮借貸。美國財政部已向各銀行注資2500億美元，但遠遠唔夠。美國眾議院金融服務委員會主席Barney Frank建議「靈活」處理FAS 157法案。現實真係太殘酷，都係戴番副面具做人好D。
大量散戶一二三齊齊入市
1930年代華爾街危機後，美國國會曾制訂一連串法案去阻止大蕭條再出現；上述法案自1990年起逐漸被取消。自由、自由！多少人假借自由之名而放蕩不羈？冇皇管嘅CDO市場自1990年起迅速發展，並帶來美國有史以來最長嘅繁榮期（1982年至今再冇出現連續兩季GDP負增長）。不受監管嘅金融業最終闖了大禍而累及全球，2007年11月起美股狂瀉，一如1929年10月，雖然政府已迅速行動，至今未能肯定可將美股股價穩定下來。股市進入Capitulation（即股價大跌及成交額大升後，出現反彈，吸引投資者入市。當購買力用光後，另一潮跌市又開始）。由於香港可能「溝上唔溝落；止蝕唔止賺」嘅諗法已普及，大量散戶至今仍楂住唔少現金。本週一匯控（005）見75港元後，便一、二、三齊齊入市。Playing the Market係危險嘅行為，股市係最唔聽話嘅僕人、最好嘅主人。如你希望控制它，你嘅虧損可以係天文數字；如你聽佢嘅話，它又會大大獎賞你。過去幾多大戶希望控制佢而付出天文數字代價？呢次亦唔例外。
金融環球化環境下，已唔易搵到避難所；美股下跌不但拖低港股，連滬深A股亦難逃一跌。美股下跌後，到今年3月金價亦下跌，7月油價亦跟住下跌，雖然彼此有時差，但一樣難逃終極一跌！今時今日係咪唔使再花時間去搵避難所，索性加入Cash is King行列，等候金融海嘯過去滿目瘡痍後，才加入重建行列？
1990年日本地產泡沫、1997年7月香港樓市泡沫爆破後，跌幅都達到65％至75％。呢次美國、英國、西班牙、愛爾蘭樓市泡沫爆破，未來跌幅會幾多？如出現上述跌幅，會否摧毀西方銀行體制？西方人唔似日本人或香港人有高儲蓄率。香港更有強大中國做後盾，令香港豪宅2003年9月起再次形成泡沫。為應付樓市泡沫，美國為首嘅西方國家利率正一步步走向零，以協助供樓者。上述行為對日圓利差交易又帶來致命打擊，引發拆倉潮，令日圓匯價大升，結果又令日本經濟再陷衰退。家嚇世界上只餘下30％ GDP仍在增長，包括中國、亞太區及非洲。
過去一年全球金融市場變化之大、變化之快，令人措手不及。全球金融市場透過互聯網早已連在一起，變成一體化了。The click of a mouse可令百億美元計資金由倫敦流去紐約、巴黎；整個社會由2007年流動性過剩走向流動性不足，未因政府大量bailout銀行而停止，反而在加速。
面對次按危機，銀行發現多做多錯、少做少錯，唔做唔錯，咁就決定唔做，收回資金後唔再借番出去，只用作減少自己嘅負債（即de-leveraging）。響咁情況下，經濟復甦便遙遙無期，未來六至十八個月更可能出現Super crash（如各國政府決定停止注資銀行嘅話）。
今年9月聯儲局將資產負債表擴大6000億美元（即一下子上升70％），並向金融體系注入1700億美元，到底能否阻止通縮出現？兩股力量正在對抗：一、去槓桿化將引發通縮；二、聯儲局拚命注資去對抗通縮。最後結果係，銀行收緊信貸而引發通縮，抑或聯儲局拚命注資而引發新一輪通脹？木宰羊。自從1933年起美國從未出現通縮，金融體系信貸收縮只引發資產價格下降，例如2000至02年，相信呢次亦唔例外，估計只令引發資產價格下跌而非通縮，但經濟則陷於水深火熱中（人們同時感覺身家少咗但物價貴咗）。
響政治領袖錯誤引導下，人們傾向相信金融危機嘅出現，係資本家貪得無厭造成（一如毛澤東時代認為農民貧窮係因大地主剝削）。事實並唔係咁。貪念人人有（窮人貪念可能較資本家更強），並非壞事，我老曹常常強調做人係要貪，但要貪得其所，千萬不可貪勝不知輸。如果唔係貪念作怪，擁有1000萬元以上嘅人都唔會再投資、再工作，咁整個社會便會死氣沉沉。呢次金融危機出現，正正係政客們對經濟無知所造成，例如八十年代美國通過幫助窮人置業法案，造成今天唔使畀首期嘅置業計劃出現。九十年代通過銀行不得歧視窮人法案，造成銀行濫借資金畀窮人置業，然後將佢包裝成CDO擲出市場，不負責任。
政客嘅崇高理想，往往由資本家付鈔去完成；反過來如資本家攻擊政府政策（例如索羅斯當年攻擊英鎊匯價），卻被打成「國際大鱷」。士、農、工、商、兵，士永遠搞搞震，闖咗禍便由商去做代罪羔羊，歷史永遠係咁。黑狗偷食，白狗當災（資本家永遠係社會上嘅白狗，政客永遠扮演社會上嘅黑狗），古今中外皆然，莫奈何。
沒有留言:
張貼留言