2008-10-27

金融海嘯唔好摣金

10月26日，周日。去年11月至今快十二個月，喺呢十二個月中，等待就係最好嘅策略（太陽陳話做空軍更佳）；依家嘅策略仲係等，雖然股聖畢非德公開叫大家入市。估計恒指14000點支持位，輕輕一捅就爆，14000點之下邊一個水平係新支持位？呢個遊戲嗰名係李小龍未完成嘅電影（即係死亡遊戲）。

焦煤價已進入塞冬。今年5及6月每噸鋼價6000元人民幣，現在已跌到3300元，10月份間間鋼鐵廠都虧本。

連雲港岸邊交貨嘅鐵礦沙價由年中每噸1200元跌到600元；焦炭由每噸3000元跌至1500元。山西焦炭聯盟宣布，由9月26日起減產50％，10月份起通過鐵路銷售焦煤價每噸減200元；通過公路銷售焦煤價每噸減300元。

中國房地產協會副會長朱中一透露，8月底全國商品房未售面積已創紀錄達一億三千萬方米。

有人形容呢次股災情況好似鐵達尼號沉沒記。因為有人信鐵達尼號係唔會沉嘅船，雖然佢撞向冰山；加上過分自信嘅船長冇即時發出求救訊號及船上太少救生艇，當其他船隻嚟到救援前，鐵達尼號已沉入海底消失矣。

道指上周五回落312.3，收8378.95，跌幅達3.6％，全周共回落5.4％，技術表現唔算太差，起碼10月10日低位7882.51總算守得住，避過Melt Down嘅出現！由雷曼兄弟出事至今，道指共回落26.6％，引發咗全球性股災。嗰D博熊市反彈者個個都一頸血；股票價值面對溶解威脅，股價下跌速度較國會審批救市法案仲快。

日股支持紙咁薄

上周五日股跌至7649點；由1990年1月起，日經大熊市至今最低係2003年5月2日嘅7603點。如本周跌穿，代表2003年5月至2007年3月日股上升只係一次大反彈，即由1990年1月開始嘅日股熊市仍繼續（真嘅熊市可超過十八年？）。從乾坤燭【圖】睇，7603點支持好似紙咁薄，擔心一篤就穿。日圓拆倉潮令英鎊、歐羅、澳元、紐元及加元齊齊跌；上周五日圓兌英鎊上升12％及兌歐羅上升10％。喺咁嘅壓力下，令日經平均指數上周五下跌9.6％。

日股大跌令印度股市回落10.96％、南韓股市回落10.6％，以及恒生指數回落8.3％，擔心滬深三百指數喺本周會否難逃一跌？分析家指出，金融海嘯已由美國擴散到歐洲及亞洲所有新興市場，近日歐洲同亞洲股市跌幅反而較美國大。點樣面對百年難得一見嘅金融大海嘯（上一次係1929年）？對前景憂慮，令VIX指數升至前所未見嘅高位，現水平股市喺度反映未來兩年上市企業純利將下降40%至50％。到底應繼續避險定係響應股聖號召——當人人恐懼時，自己應該貪心?!

股聖過去投資成績係點？佢第一次大量投資係喺1957至66年嘅大牛市，當年道指由416點升到1000點。佢喺1967年出貨後，1969年宣布解散投資公司，並退出股市；1970年5月道指一度跌至627點，但1973年1月又升回1067點。呢三年內股聖無所事事，到咗1974年12月道指見底後，1975年佢先大舉入市。呢次摸底成功，佢一直等到1987年8月先大量賣出；同年10月出現股災，提供咗另一次入市機會。其後佢較少大手買入及賣出。換言之，股聖過去入市成績，亦唔係每次皆準。令佢名成利就係1987年10月股災後一直揸貨唔賣，食盡成個八十年代到2004年嘅大牛市。

未來經濟只有兩條路

下月美國大選，相信除奧巴馬勝出外，民主黨亦將大勝。問題唔係邊個嘅政綱好，而係今年股市太差，人人都希望改變。到底變好定變壞，明年再算；家個個都想「get rid of」殊仔而唔支持共和黨。唔好以為投票係以政綱取勝，事實係唔少人投票其實好情緒化。大選後民主黨喺國會優勢將進一步上升而達到壓倒性，令美國重返羅斯福總統嘅時代（即向富人抽稅）。

雷曼事件引發全球溶解行動已由股市擴展到滙市，情況較1997年7月亞洲金融風暴更差。上次係亞洲貨幣紛紛爭相貶值去增加自己國家出口能力（向鄰居行乞嘅行為），呢次卻係全球化；由歐羅、英鎊（上周二英倫銀行行長金格及上周四首相白高敦嘅言論有意壓低英鎊滙價）、澳元、紐元及加元政府都有意壓低本國貨幣去爭取更多出口，自由經濟理論受質疑，凱恩斯學派又復活。七十年代凱恩斯學派漸走下坡，以佛利民為代表嘅「小政府、大市場」主義抬頭；八十年代更成為盎格魯撒克遜統治國嘅經濟主流；美國、英國及澳洲甚至部分歐洲國家，因為呢種學說的確壓抑通脹，喺利率下降帶動下，引發一場資產大升值潮，亦即1982至2007年嘅經濟繁榮期。喺過分寬鬆嘅金融政策環境下孕育出嚟嘅CDO市場，發展到近年已註定要出事；再次證明金融機構一定要受監管理論係正確。雖然市場系統有自我調整能力，但往往好極端（例如1929至32年）。未來經濟只有兩條路：一、喺三年內大跌（由去年10月起計）；二、一如日本出現Ｌ形經濟（唔生唔死）。

港人呢方面經驗已唔少，例如1973/74年恒生指數喺二十二個月內下跌91.5％，1975年起先復甦。另一個係1997至2003年，喺政府大力干預下（包括入市買股票），股市起起跌跌六年，到2003年下半年，經濟先復甦。

喺狂潮中有人提議揸金，我老曹反對。因為當財富大量蒸發後，每盎斯金價只值600美元；短期嚟講仲有下跌空間，上阻力係750美元。喺油價下跌壓力下，連農產品亦難逃一跌！今年7月開始進入Cash is King嘅時代。信貸市場開始結冰，利率下降唔係反映信貸再次寬鬆，而係信貸市場走向平靜（無論拆或借都少）。好似日本情況，財政健全嘅企業唔借錢，想借錢嘅企業財政唔健康，結果係冇人肯借。全球經濟進入衰退已無可避免，問題係深淺及長短。呢個衰退到底係深而長定係淺而短？

格蛇承認自己低估衍生產品嘅威力，佢一向認為銀行家可自行監管。換言之，政府一直冇監管衍生產品，先令家吓出現金融海嘯，政府目前連數據都冇，又點樣挽救？件事嘅起因係尋租作用。你可用1厘息借到錢，投資4厘嘅MBS（Mortgage Backed Securities），可淨賺3厘。喺樓價上升時，MBS似乎好安全，但如果樓價下跌，MBS可以一蚊都唔值；結果係害死保險商（AIG）及所有投資MBS者。家吓甚至再將利率降至1厘都冇用，因為信心已動搖，冇人再信MBS，亦冇人再借1厘息成本嘅資金去放喺4厘息MBS身上。買樓者喺借唔到錢嘅情況下，樓價點止跌回升？

自從1971年美元進入浮動滙率後，美股大熊市有三次。一、1973年4月至1974年12月，標普五百指數回落43.4％；二、2000年8月至2003年2月，標普五百指數回落43.7％；三、1929年9月至1932年6月，標普五百指數回落84.8％。分析家相信，呢次次按危機威力超過1973年石油危機及2000年科網股泡沫爆破，但相信唔會重演1929年華爾街大危機。最後跌幅幾多？讓市場自己話畀你知。

克仔前經濟顧問Nouriel Roubini（近期名氣大盛，因2006年7月起佢已預測美國將進入衰退）喺接受CNBC訪問時話，美國將有兩年經濟負增長期（唔係兩季，係兩年），較上一次長三倍；佢接受《每日電訊報》訪問時估計，八千隻對沖基金中有25%至30％將消失，其中唔少係投資新興市場，令新興市場股市跌幅較美股大（呢個情況已出現）。

外滙市場屍骸遍野

亞太區股市成為新一輪下跌重災區，例如日經平均指數已接近2003年最低位。南韓、澳洲及香港以至整個亞太區皆出現重挫，金融海嘯已由北美洲吹到歐洲，然後到亞洲。美國同英國皆紛紛減息，但匈牙利卻將利率提升到11.5厘及羅馬尼亞提升到10.25厘。東歐國家正面對外資大量撤離，明年經濟增長率估計由10％降至零！再次證明外資靠唔住。

Thrivent Asset Management（管理700億美元）嘅Michael Binger認為，金融市場已由估邊間銀行倒閉，改為估邊個國家破產。

MSCI指數已十分接近2003年8月；全球股市喺一個月唔夠嘅時間內冇咗10萬億美元市值或三分一總市值。新興市場平均跌幅係47％（約6600億美元）；標普五百指數中超過二百間公司公布業績，純利平均較去年減少23％；美國汽車銷售係二十五年內最差嘅一個月。亞太區股市喺過去八星期中有七星期係下跌，MSCI亞太區指數已跌至2004年5月前最低。以指數成分股計，中信泰富（267）喺一星期內下跌65％係最大，因喺外滙投資上蝕咗接近20億美元。澳元成為重災區，上周五兌日圓下跌12.7％，見57.75日圓；兌美元下跌8.3％，見61.88美仙，係1976年11月宣布貶值17.5％以嚟最大一天貶值。澳元兌日圓已係八年內新低，兌美元係五年內新低，理由係包括商品價下跌及日圓利差交易。紐元上周回落9.1％、土耳其里拉回落12.7％及南非蘭特回落9.4％，外滙市場亦屍骸處處。