2008年10月19日 星期日

2008-10-15

英美同時選擇長痛

10月14日,周二。恒指上升520.72,收16832.88;成交816.6億元。10月期指升899點,收17079點。期指倒掛現象今天消失。

港銀擠提將成歷史

响各國政府公布為存款提供保證下,香港政府亦公布為所有本地註冊銀行嘅存款提供保障,以免香港存款流失;另一方面更可吸收東南亞地區資金來港,令香港呢個國際金融中心地位又邁進一大步!香港銀行資本充足比率一向好高,安全性極高,政府所作保證只係令大家安心,令類似東亞銀行(023)被擠提嘅事件成為歷史,以後應唔會再發生。政府提出保證後,政府日後將加強對銀行監管,以免真係要納稅人賠錢,亦有助本港銀行財政上更健全。

The Selling is Over?好多人希望上述係事實,可惜我老曹睇到嘅卻係投資者已進入搵錢困難期。1982至2007年長達二十五年資產升值期結束,簡單嘅「buy and hold」策略已唔管用。至於牛眼投資法,又非一般人可掌握(時機及對象要把握得十分準)。今年投資者損失資本30%至40%比比皆是,家吓危機仍處初階,因為禍因根深蒂固,並非政府三扒兩撥可搞掂。近月美國政府所做一切,一如九十年代日本政府,只係將危機拖長,減少眼前痛苦,而非解決問題。去年我老曹已一再警告次按危機但有幾多人能聽入耳?美國人嘅揮霍習慣短期內可以改變咩?西方政府早已處於財赤,救市資金只由「熱空氣」產生,擔心恐慌穩定後,痛苦先至嚟(此謂之痛定思痛也)。

响全球股市井噴下,滬深A股跌2.56%,收1934.62,中信證券、海通證券跌停,長江證券下跌9.9%。上述到底代表乜嘢?

政府入股銀行,同向銀行購買不良資產唔同。如入股銀行,政府日後可能賺錢(如日後銀行股股價上升)或虧損(如股價回落);反之,購買不良資產卻係輸梗嘅生意!英國政府入股後,估計萊斯TSB將同HBOS成功合併,令英國政府佔合併後嘅萊斯銀行40%股權,成為最大股東(亦佔皇家蘇格蘭銀行60%股權)。呢類國有銀行存款有保障(因政府係最大股東),競爭力好大。歐盟共用1.1萬億歐羅(1.5萬億美元)去挽救歐洲地區性銀行。大摩估計,將令歐羅明年回落到1.25美元。

信貸危機來自資產(尤其股票)價格受到去槓桿化影響而回落,即使資產負債表良好嘅公司亦被拋售,因為唔少基金面對贖回潮,撲水要緊。

微軟創辦人蓋茨10月13日响哈佛商學院百年慶典上話,美國經濟正走向非常嚴重嘅衰退,美國失業率將升至9%以上。過去好多投資者抱住美國經濟永遠強勁嘅憧憬,唔現實咁認為市場可提供較高回報率,而從事高風險槓桿交易,依家紛紛蒙受重大損失。同為哈佛校友嘅通用電氣CEO伊梅爾特指出,金融系統穩定後,美國經濟仲會經歷兩季度負增長。次按貸款所引發嘅危機需要「某種形式嘅糾正」,企業唔會出現大規模瓦解,但經濟會出現下滑。

Dennis Gartman認為,呢次股市反彈維持唔會太耐,建議投資者利用反彈減持。

呢次金融海嘯對金磚四國影響亦幾大,中國股市已大跌,地產價格進入回落期,中國點樣擴大內需?印度零售業早已走下坡,加上過分依賴外資投入,最近印度盧比滙價亦受壓;俄羅斯受油價大跌影響,消費進入萎縮期;巴西係原料出口國,因此亦受影響。至於香港,星展銀行估計今年GDP只升3.8%(前估計4.4%),明年2.7%(前估計4.4%)。中國入口增長率減少,加上來自內地嘅自由行旅客消費增長率下降,香港股樓回落,亦令港人慳住荷包,都將影響明年香港GDP增長率。日本因日圓利率只有半厘,可對付衰退嘅武器冇乜,相信今年第三季已確認衰退。

雪茄伏認為,美國政府有能力阻止panic,卻無能力阻止衰退响明年出現。瑞銀嘅Larry Hatheway同Kenneth Leiw相信,美國及英國正進入深而長嘅衰退,並首次估計歐羅區明年進入溫和衰退;至於日本今年第三季已進入衰退【表】。

對症下藥vs藥石亂投

中國經濟學家樊鋼响國際高新技術成果交易會嘅資本市場高峰論壇上認為,即使有大危機,只要各國處理得好,仍可避免經濟大蕭條出現。

五百一十六年前哥倫布發現新大陸,從此南、北美洲叫做「新世界」,歐洲叫做「舊世界」。呢次由英國呢個「舊世界」教曉美國呢個「新世界」做嘢,透過政府注資銀行而非向銀行購買有毒資產,才能挽回投資者信心。因為銀行同業擔心對手嘅資本充足比率不足甚至可能破產,而唔肯將資金拆放出去。透過政府注資,同業知道對手唔會破產,自然恢復拆放.令信心危機解除。雷曼兄弟破產,受凍結資金高達3000億美元;AIG雖然冇破產,但管理嘅10000億美元資金亦幾麻煩;只有貝爾斯登被收購,令涉及嘅5000億美元管理資金冇被凍結。

由此可見,同業拆放最緊要係知道對手唔會破產。英國呢次係對症下藥,美國卻係藥石亂投。

不過,CDS市場仍在萎縮,上周五止總市值已下降到50萬億美元(一個月前係63萬億美元)。由於CDS唔係銀行存款,唔受政府保證,當政府宣布保障銀行存款後,反而引起更多機構拋售CDS改為存款,令CDS市價進一步下滑。換言之,政府注資銀行及為銀行存款提供擔保,只能恢復銀行同業拆放市場正常操作,但CDS危機持續,未來買樓再唔能夠獲次按協助,令美國樓價繼續下滑。

1992年8月19日日經平均指數曾由14194點反彈至1993年嘅24000點,其後喺14000至24000點牛皮,2000年終於14000點失守,下跌到2003年4月7600點,才結束日股熊市。後市展望,道指由7880點反彈,情況有如1992年8月日經平均指數,完成反彈後將進入一段十分長日子嘅上落市(日本長達七年),最終7880點失守,才完成整個美股熊市。2007年10月信貸泡沫爆破時,有兩大可能性:一、1929年10月嗰次因政府太遲入市干預,而令股市狂瀉到1932年,此乃華爾街大危機,由1933年起美國股市開始復甦。二、九十年代至2003年4月,日本响政府不斷支持下,令調整時間十分長,痛苦期共十三年。長痛、短痛任擇其一,英、美兩國同時選擇長痛,雖然令股市短期(道指7880點)獲支持反彈,但日後應進入漫長牛皮市。向本土銀行注資嘅行動雖阻止股市恐慌性拋售惡化落去,但唔代表問題解決。

上周五美股VIX升至76(正常情況只有30),代表股市早進入極度恐慌;加上上周五成交達一百一十六億股,大量分析員(包括我老曹)認為股市短期嘅底已搵到。納指由去年10月至上周五跌幅為前升幅(2003年4月起計)嘅76.4%,係Filonacci中表現最弱,代表由2007年11月開始嘅拋售潮已完成,進入Bargain Hunting期。上周五MSCI世界指數平均P/E只有十倍,為1982年以來最便宜;MSCI歐洲平均P/E更只有八倍,係1987年9月以來最低;反之,標普五百P/E仍係十六倍,未算便宜,估計完成上落市後,美股响未來日子仍再跌40%。CDS市場將進一步萎縮,CP(商業票據)市場亦萎縮,甚至信用狀(Letters of Credit)亦受影響,令未來國際貿易量萎縮;再加上日圓利差交易拆倉,未來世界將面對流動性萎縮!危機(Crisis)仍然存在,只係恐慌(Panic)被制止。近日股市雖然反彈,最終將因經濟陷入不景氣而引發另一次拋售潮,到時整個超級大熊市才告完成,時間十分長。

油價由150美元下滑到77美元,下跌50%,亦完成第一階段拋售,進入反彈期,估計最高可接近100美元才再引發另一次拋售,最低可見50美元,才完成「1、2、3」調整浪。

波羅的海指數今年5月至今跌咗77%,代表未來世界貨物嘅貿易量將進入萎縮期。

官僚取代自由市場制度

上周五美股低點只係一個中期底部,本周開始大量bargain hunters湧入市場,令本周全球股市大升。各國政府大量動用納稅人嘅錢入股銀行股,呢筆數日後點清還?!這將令明年全球經濟陷入衰退。

踏入二十一世紀,港人已進入Soft Depression期(輕輕的憂鬱)。港人曾面對1997年下半年樓市下跌、2000年科網股泡沫爆破,2007年8月至今又嚟一個次按危機,今年起高消費、高槓桿比率時代結束;甚至係西方領導嘅時代結束,東方正在冒起!未來新世界秩序正在形成!加強監管、控制、干預已成為天公地道嘅事,官僚漸漸取代自由市場制度;喺高官領導下,事情似乎愈搞愈糟。因泡沫由形成到爆破有一定軌迹可尋,過去高官製造次按泡沫,卻唔容許泡沫爆破後遺症出現,可以咩?我地正面對Centralized Manipulation所產生嘅悲劇後果。

T. Boone Pickens响1997年6月離開石油事業,開始自己嘅事業生涯,以朋友嘅3700萬美元資金開始創業,到1998年5月已失去2400萬美元,1999年1月只剩番270萬美元;但到2000年卻升值到25200萬美元,其後一帆風順!佢投資嘅天然氣,不但美國電力公司用作發電,亦有巴士公司用作能源。依家佢改為大量投資水項目,估計未來亦可成功。T. Boone Pickens成功之處係當佢已失去投入本金95%時仍肯捱落去!好多時最黑暗時刻就係光明嘅開始,每一個成功者背後都有一萬個失敗者,成功與失敗往往只差一線,就係喺最困難日子裏你係咪願意繼續捱落去!

沒有留言:

張貼留言