2008-10-28

日股市上演「午夜兇鈴」

10月27日，周一。恒生指數暴瀉1602.54，收11015.84（最低見10676.29）；成交568.3億元。10月期指跌1352點，收11148點，高水，短期內响10676點將出現另一支持點，反彈即將開始。
今天股票市場上演「午夜兇鈴」（Margin call），斬倉貨此起彼落，慘不忍睹。未到Halloween已上演「恐怖」電影，唔嚇死才怪！今天恒指下跌12.7%，成為2008年內跌幅最大嘅一天。

禁止拋空反促使股市下跌

淡市莫估底，呢次連畢非德亦出錯，10月17日佢認為見底嘅標普五百指數至今已下跌7%。除上述外，巴郡在2006年亦曾投資88億美元CDS，到去年上半年才大量減少，雖然係咁，巴郡今年第一季喺CDS上嘅虧損仍有4.9億美元，第二季1.36億美元。巴郡喺9月份投資50億美元响高盛，如非政府最近提供100億美元畀高盛，恐怕巴郡亦早已損手。換言之，冇人擁有水晶球，你冇，我冇，畢非德都冇！

大多人問我老曹股市何時見底？答案係Bottom Up，即見底回升之時！至今為止最低係10676.29，上升後下一次如能守住10676.29，則短期「底部」出現！
請永遠唔好想去猜測市場動向，上述冇人可做到：請Let the market tells you，讓市場做主人，唔好做市場嘅主人！

今年9月中，美國證監會曾禁止「裸空」，即無貨者唔准拋空，以保護過分槓桿化嘅投資項目。禁止拋空短期雖可減慢股市下跌速度，但到咗10月份反而變成加快股市回落嘅理由。今天連純利上升50％至100％嘅股份亦難逃一跌。

菲律賓股市今天跌12％，引發短期停市。菲律賓係繼烏克蘭之後第五個尋求IMF協助嘅國家。Banco de Oro Unibank（菲國第二大銀行）一天之內下跌19％。日經平均指數已跌至1982年11月以來低點，時光倒流二十六年？三菱UFJ金融跌11％。

10月份全球股市至今已失去11萬億美元市值（相等於2007年美國全年GDP），2008年MSCI指數下跌48％，係該指數有史以來跌幅最大嘅一年。銀行股已成重災區。

滬深三百指數今天亦出現兩年以來新低，下跌7.12％，見1654.67。「中」字頭股份如中國神華、中國聯通、中國鋁業、中國遠洋、中石化紛紛跌停，寶鋼、招商銀行、浦發銀行亦跌停，中石油下跌6％、平安保險跌7.7％、貴州茅台跌7.15％、恒源煤電、開灤煤礦、西山煤電等十八隻煤炭股跌停。地產股如萬科、國興地產、上海新梅等跌停。深圳發展銀行、北京銀行亦跌停。睇嚟金融海嘯已湧入中國。

美國次按危機源自房地產市場崩潰，美國樓市泡沫源自1997至2006年嘅瘋漲，理由係貸款機構、評級機構唔負責任，令借款人以零首期買樓，造成今天嘅結果。換言之，要次按危機停止溶解，首先要美國房地產價見底先至得，可惜現價同見底價仲有15％距離。作為普通投資者，除咗避災外，可以做嘅事好有限。請多D關心你嘅家人同你嘅健康，錢財身外物，唔好諗太多。

苦候「牛市」十八年

1932年7月道指見41.22，當年上市公司股票市價只及資產淨值一半！當時非農業失業率高達38％，農產品價格因為太低，農夫寧可讓農作物响田裏爛掉亦唔採摘，GE所接嘅電氣產品訂單只及1929年時嘅四分一，大量礦場倒閉，只有家庭生意呢類企業才能維持（即一家大細做晒），汽車、輪船連一半乘客都冇，紐約交易所每天成交股數一百七十五萬股，較1929年10月高峰時下跌85％，甚至連拋空盤都冇……上述情況應該唔會喺二十一世紀出現。日經平均指數今天已跌穿2003年5月低點，即1990年1月開始嘅熊市至今仍未結束。十八年啦，日經平均指數仍在反覆尋底，呢齣恐怖電影幾時才做完？
我老曹上月去東京旅行，在松土反屋百貨公司British Tea House內飲下午茶，同鄰坐一位曉講英文嘅日本女士閒談，知道佢1990年前曾投資日股，至今仍在等候日股「牛市」重臨。今年她七十八歲啦……响佢身上，我老曹充分感覺到older, wiser but poorer嘅無奈，但願佢有生之年真係等到日經平均指數「牛市」重臨。我老曹今年亦六十歲矣，十八年後會否坐响中環置地廣場，同陌生人講自2007年10月嘅恒生指數牛市（Touch wood，口水講過，2008年香港又怎會係1990年嘅東京）？

花旗今天推介工商銀行（1398），估計今年每股獲利37.6仙，上升54％，P/E七點四倍，目標價5元。大唐發電（991）估計今年每股獲利14.1仙，減少51％，P/E十七點五倍，目標價6元。鞍鋼（347）估計今年每股獲利1.477元，升41.9％，P/E二點一倍，目標價9元。安踏體育（2020）今年每股獲利33.4仙，升56.4％，P/E七點六倍，目標價3.8元。東風集團（489）估計今年每股獲利44.7仙，上升2.2％，P/E三點二倍，目標價3.6元。維達國際（3331）估計今年每股獲利13仙，升24.5％，P/E十四點三倍，目標價3.1元。

中國冇辦法jump start美國

依家通街都係棄嬰，唔少母親倒沖涼水出街之時，連baby都倒埋出去；不過，執棄嬰返屋企養之前，請問吓自己有冇咁嘅負擔能力？小心以為抵買，點知愈買愈低。
金融海嘯不但湧到亞洲區，亦湧向中東海灣國──杜拜、沙地阿拉伯等；呢D國家股市自今年8月起便大幅回落。如油價跌穿55美元，唔少中東產油國將陷入財務危機。一個建基於高油價嘅海灣國家經濟繁榮，响油價由147美元大幅回落中將倒下！唔通要真神阿拉打救先得？
全球資金湧向美國三十年期債券，上周五孳息率見3.8厘，此乃1977年以來最低。相信聯邦基金利率月底可見1厘，但亦冇乜用（1932年7月美國利率亦係1厘），因仍有四百二十萬間美國住宅未售出，相等於未來九點九個月供應量，平均樓價係191600美元或2004年水平，未來應該仲有10%至15％跌幅。

日本L形經濟長達十八年（或以上），咁2007年10月開始由美國次按危機所引發嘅經濟衰退有幾長？美國經濟前景展望愈來愈憂鬱，政府挽救計劃愈來愈無反應，金融海嘯威力正向實體經濟擴散，倒閉、失業率漸漸浮現；豪宅更面對大幅劈價亦搵唔到買家，一般人到今年9月才識驚（已遲咗一年）。對沖基金被大量贖回進一步壓抑股價，令道指本周重新挑戰7800點支持，希望守得住啦。

1997年亞洲金融風暴到98年結束，因歐美經濟仍在上升；2000年科網股泡沫爆破2003年結束，因美國樓市泡沫仍在膨脹；呢個樓市泡沫爆破後，有乜嘢力量與之抗衡？美國GDP達124170億美元，人均收入為41640美元，如此超級巨無霸、如此高人均收入嘅國家，一旦倒下，有邊個能令佢重新站起來？舊年次女架四驅車因一個月無開車令電池撻唔着，我老曹細佬揸咗架Camry嚟，希望jump start小女架車，卻唔成功，原來1800cc汽車係拖唔郁2400cc汽車電池嘅。後來豐田公司車咗舊大電池來，才能jump start小女架車。換言之，美國經濟可拖動亞洲地區經濟，亞洲地區經濟卻無法拖動美國；請中國人自量D！中國2007年GDP只有22300億美元，點樣jump start一個GDP 124000億美元嘅美國？請唔好夜郎自大。中國經濟有能力jump start香港同澳門（例如2003年下半年），卻冇力量拖動美國。更何況呢次歐洲亦出事，可以講全球所有國家聯手，亦救唔到美國同歐洲（因美國同歐盟加起來嘅GDP佔全球50％以上）。

中國出口優勢繫於當年投資基建

過去三十年，中國通過成為世界工廠，輸出大量廉價商品，達致中國過去三十年GDP高速增長。如今全球面對衰退，對中國商品需求自然放緩，未來點樣保持中國GDP高速成長？珠三角地區工廠面對倒閉潮，內地股市由2007年10月17日高峰5891點回落到2008年10月27日1654點，下跌72％，房地產銷售亦節節下滑，點樣令中國GDP响2009年仍有8％增長，以便創造足夠就業機會，去消化就業總人口上升需求？1998至2000年，中國抵抗亞洲金融風暴嘅方法係提供出口退稅，投資道路、港口、機場等建設。透過擴大出口及投資基建拉動中國GDP增長，當年美國同歐洲經濟仍然繁榮，此法十分成功。今天中國嘅出口競爭優勢，部分與當年投資基建有關。
呢次又如何？今天中國基建除鐵路外，其他已上晒軌道。同1998至2000年形勢唔同嘅係，當年歐美經濟仍然繁榮，呢次卻同時陷入衰退。中國出口退稅部分恢復，影響唔大，但2008年起外貿企業都面對稅率由15％上升到25％所帶來嘅威脅。

過去東南亞國家或地區經濟經過高速增長三十年後，仍能保持經濟繁榮嘅國家地區只有香港同新加坡，兩者皆走向金融服務業發展，香港服務中國，新加坡服務東盟國（以印尼為最大）。中國未來卻不能仿效香港同新加坡，因為中國人口係香港、新加坡加起來嘅一百三十倍，係不能依賴金融服務業為生，何況金融海嘯後全球金融業進入萎縮期。

中國同日本經濟最大分別係：中國係國富民窮；日本剛相反，係國窮民富。中國政府十分富有，唔少上市大企業、政府係最大股東，但人民仍相當貧窮，2007年中國人均收入只有1700美元，只較菲律賓好DD（1190美元），甚至唔及泰國（2750美元）。响咁嘅情況下，點樣擴大內需？反之，日本人均收入35390美元，係全球高收入群，但日本1990年至今仍然無法透過擴大內需去保持日本GDP高增長。理論上，中國2007年結束GDP高增長期，並一步步下滑，情況同九十年代嘅台灣及南韓相似，而非香港同新加坡。

過去準確預測同時從中獲利嘅索羅斯，佢曾預測1987年美國股災、1992年英鎊危機及1998年泰銖貶值，而被冠以「國際大鱷」稱號。今年1月23日佢曾預測──長達六十年嘅西方經濟超級繁榮期喺2008年結束，雖然政府努力挽救，但未能阻止「黑天鵝」飛近。標普五百指數今年10月較去年10月低46.7％，唔少政府正以國家信用去擔保銀行存款嘅安全性，但次按危機影響仍沒完沒了。大摩亞洲區主席羅奇認為，次按危機對金融機構所造成嘅直接損失已顯現65％，但對經濟嘅影響只顯現咗20％而已。

內地股市出現冰火兩重天。去年10月前熱火朝天，今年10月又冰過冰雪。今第三季中國GDP增長年只有9％，第四季正忙於保八（8％增長率），明年恐怕連8％增長率都冇，因明年出口增長率大幅放緩，內需增長率亦唔大。

中國政府已出招撑樓市，後市點睇？中原地產項目總經理黃韜認為，內地樓市年底前繼續降價應毫無疑問，呢個趨勢唔會因為有樓市政策而改變。泰盈置業總裁黎振偉認為，中國樓市調整唔只係政策，而係經濟調整引發，因此不能光靠政策而回升。廣州市同創卓越房地產投資顧問公司總經理趙卓文更認為，年關過後，唔係痛苦嘅結束而係開始。唔少已簽約及付訂嘅買家，正要求銷售員延期交易，一方面為省下0.5％契約稅，同時希望享受較低貸款利息。對大多數開發商而言，新政策反而令佢地收唔到錢，要等到11月1日新政策生效後，才有機會收錢。有人擔心用房貸救樓市反而將內地銀行放响唔安全嘅地位（萬一未來樓價跌幅大於20％點辦？）。從整個經濟大勢上睇，內地樓價調整唔係一兩年嘅事，開發商早準備三、四年嘅調整過渡時間。睇嚟內地房地產寒冬不但未過去，反而只係剛開始。