2008-10-20

全球都想套現

10月19日，周日。過去嗰個半月恒生指數出現瀑布式下瀉，事前（8月）只有乾坤燭喺8月份出現三個出貨訊號，證明乾坤燭分析大市能力超過90％所謂專家！

上周六刊出圖係乾坤燭，唔係陰陽燭。可能係我老曹首次採用乾坤燭去分析大市方向，編輯唔習慣，以為係陰陽燭，特此更正。

乾坤燭目前最適用

上周六刊出圖見到今年5月已有出貨訊號；我老曹曾強調Sell in May；喺8月份更出現三個出貨訊號，呢個係9月港股大跌理由。家吓股市喺14300點之上爭持，短期動向未明。

今天再刊出中移動（941）乾坤燭，強烈出貨訊號喺8月4日出現，聚焦點喺65.3元。

何謂一目均衡區（即日文打和點）。假如股價喺一目均衡區之上，代表只係獲利回吐；反之，如喺一目均衡區之下，只係反彈。即中移動80元水平阻力極大。乾坤燭係家吓市況下（即大升大跌）最有用圖表；反之，喺牛皮市，乾坤燭作用唔大。利用乾坤燭圖表去分析依家市況最適宜。

9月份美國汽車零售數字下降超過30％（其中富豪汽車下降50％），部分理由係通用汽車財務部GMAC，只為信用評級高出七百分者提供信貸（即只有58%美國人合格）。

過去十二個月美國約有一百萬人失業，令9月份失業率升至6.1％。估計未來十二個月將有另外一百萬人失業。嗰Ｄ商場REITs股價已重返十二年到十六年前水平；其中拉斯維加斯MGM及Trump股價更回落90％。

家吓油價高企，估計令美國人一年額外油價支出達1000億美元。

2005年約5950億美元係嚟自物業加按，2006年有6882億美元，去年有4716億美元；今年第一季有487億美元，第二季有95億美元。即利用物業加按去增加美國人消費呢條路，自今年第二季開始已行唔通。2001至07年GDP如冇物業加按因素，估計美國GDP升幅每年少於1％。後市又點睇？

貝爾斯登冇咗、雷曼兄弟死咗，以及AIG股價上周五再跌14％，見2.1美元，因政府850億美元拯救計劃唔夠，而需要1228億美元，至今已動用703億美元；甚至連高盛證券都幾麻煩。美國消費信心大幅滑落，麥芝根大學消費信心指數由9月70.3下跌到10月57.5（去年平均數係85.6）。單一家庭住宅興建量上月下跌12％，至五十四萬四千間。六十一個經濟學家對前景信心指數回落到65點。不過，股聖畢非德認為，依家係購買美股時刻，你點睇？根據《福布斯》雜誌報道，股聖至今最少投入280億美元去收購或入股。其中包括10月16日30億美元投資GE優先股（10厘息，認股價22.25美元），上周巴郡股價升5.9％，見119800美元（今年只回落16％，同期標普五百指數回落36％）；證明投資者對股聖信心十足。

七十九年前摩通及一班銀行家曾大手吸納GE，希望穩定股市，但唔成功。今年10月15日股聖亦大手吸納GE，道指由當天9301點跌到上周五8852點，會唔會重演七十九年前摩通歷史；邊個又真正能預測未來？例如美國仲有幾多間銀行會破產？全球正面對Liquidation問題，每個人都希望唔好發生喺自己身上事但泰林員工卻發生了。1973年我老曹曾問一位前輩：「假如投資蝕本點好？」佢回答：「蝕本計數。」年輕時認為呢個答案太簡單，三十五年後今天才明白真諦。面對蝕本除咗計數外，可以做得乜？因此愈快計數愈好，以免讓小蝕變成大蝕。

股聖可以喺淡市投資，但你唔得，因為你唔係世界首富；四叔唔見1000億元仍談笑風生，但你唔得，因為你輸唔起。

1989年東京地產曾好似火一般熱，當年富甲一方日本地產大王，今天連佢嗰名都記唔起。1990年加拿大最大地產公司O&Y宣布投資倫敦金絲雀碼頭，該公司當年財力達200億美元；到咗1995年金絲雀碼頭住宅，每間售價卻低於10萬英鎊。1990年前日本經濟奇迹唔知去咗邊？雖然利率已由1990年年中6.5厘一度降至接近零，仍無法阻止東京樓價回落。過去日本政府拚命增加投資，到2002年日本政府財赤達GDP 5％。日本喺每一平方里上鋪水泥係美國本土三十倍，包括將海岸英坭化，興建通往海中心小島跨海大橋及通往北海道全球最長海底隧道！1996年Shumizu株式會社更宣布計劃到月球上興建酒店，去迎接2000年日本人坐太空船去月球旅行！上周五日經平均指數收報8693點，係1989年12月日經平均指數四分一。未來美元仍可減息1.5厘先到零利率，但2007／08年度美國財赤已超過1萬億美元，估計2008／09年度財赤可達2萬億美元。其瘋狂程度同九十年代日本又有咩分別？四十年股市生涯學曉係敬畏天地，因人力不能勝天。我老曹只知喺經濟轉好之前仍繼續轉壞，例如美國中價樓，未來仍以每年9.5％速度回落。唔少金屬價格已回落50％或以上，今年3月17日至今金價已回落24％，由1032.7美元起向650美元進軍。白銀見9.35美元一盎斯（1980年1月係50美元）。恒生指數正考驗14300點支持；大氣候與小氣候，不會因人主觀願望而改變。春夏秋冬輪流交替，家吓經濟氣候只係深秋，距離春回大地仲好遠，未因歐美各國向銀行體系注資2萬億美元而改變。

上周各銀行向聯儲局借入短錢高達4375.3億美元，即平均每天向貼現窗借入990億美元，由經紀信貸戶口借入820億美元。睇嚟通縮已無可避免，因為連聯儲局亦唔可以用咁速度長期提供信貸。大趨勢係The world wants its money back（全世界都想套現）！

銀行繼續唔敢借錢

英國帶頭注資銀行，而唔係美國財長保爾森提出7000億美元TARP，令情況好一Ｄ，例如可令銀行增加番Ｄ股本去恢復借貸能力；反之，向銀行購買不良貸款TARP計劃，面對美國房地產價格仍在回落，清理完畢不良貸款好快又再出現；喺咁情況下，銀行根本上無膽再將資金借出去。問題係政府注資係以優先股形式，大部分需喺一定時間內贖回，以免令納稅人有嚴重虧損。喺咁情況下，銀行雖然生存，但需要負擔高昂資金成本（優先股股息）及必須累積資金，以便及早向政府買回優先股。銀行喺可見將來，一樣唔敢大量增加借貸。咁政府購買普通股又點？既唔使支付高昂成本（優先股股息），亦唔使擔心日後贖回。問題係家吓金融服務活動領域早已出現供過於求，呢Ｄ環境係令美國金融業發展創新產品理由，出現專門尋租情況（為咗增加銀行收入，而經營對經濟冇實質貢獻業務）。過去三十年金融業响美國GDP比重上升一倍或佔標普五百指數純利40%以上。喺面對日後金融活動萎縮情況下，銀行股投資價值喺邊度？

即無論政府採用邊一種方法都有某方面缺點。結果令1981年起，全球增加信貸趨勢，變成全球減少信貸期，引發通縮。不過，上述已係解決次按危機中最好方法。

世界最大對沖基金之一Highland Capital Management上周四宣布，基於重大虧損，計劃關掉兩個基金。根據Trim Tabs Investment Research資料，9月份投資者贖回430億美元對沖基金。Highland Capital Management管理TPG最高峰有160億美元，資金到今年9月已減少26%，被關掉兩個基金分別只管理15億美元資金，估計未來十二個月可售出其中40%資產，將錢退畀客戶。上述情況非Highland Capital Management獨有，面對基金贖回潮，部分基金被迫關閉，而引發更大拋售潮，結果又再引發更大贖回潮，周而復始咁令股市面對好大拋售壓力。

係咪好似日本九十年代咁進入失落新世代？其實早喺日本之前，拉丁美洲喺1979至86年已出軌；再遠Ｄ好似美國1930年及歐洲1910至20年，亦曾出現十年失落新世代。

上一次超級大熊市喺1973／74年：當年我老曹係二十幾歲小伙子，今天已屆退休年齡六十歲。比較後生一代好少經歷過1973／74年，面對近期瀑布式下瀉股市，唔知點應付。

東方勢力將崛起

股聖認為，長線而言，股市可睇好。如閣下喺1973年不幸投資港股，要到1981年年中先打和。1980年如投資黃金，今年才賺錢。

過去一年，大量財富已轉移了（唔係消失咗）。唔少喺西方消失，財富已轉向過去一年採取持盈保泰投資者手中。西方進入沒落期，下一輪應係東方勢力興起，因乾坤大轉移已開始。

2001至07年經濟繁榮由美國消費者大量增加信貸所帶動；每年消費超過收入1％、2％、4％及5％。今年只係冇繼續增加信貸（仍未進入減少信貸期），但股價已大幅回落；進一步拋售需有壯士斷臂勇氣，或可利用股市反彈先減持（如你仍然將超過30％資金投入股市話）。我老曹擔心呢個衰退期不但深而且長，跌市仍未完成，只係進入風眼，可能有片刻寧靜等候實質經濟轉壞（股市已行先六個月）。除非你有股聖智慧先可做Smart Shopping，如果唔係就學我老曹咁袖手旁觀啦，因為路仲係好滑，一唔小心便跣親；加上我地大都冇智慧，只有趁勢，唔好見到一條禾稈草就以為自己有得救。