2008-10-13

熊市中三個建議

10月12日，周日。過去一年證明追隨趨勢大勝價值投資法。喺股市中賺錢或蝕本最重要係Timing，而唔係評估股值有幾多？幾時買入及賣出較該股值幾多錢更重要。各位忘記咗英隆事件咩？喺泡沫期，英隆價值一再上升；一旦泡沫爆破，英隆可以一文不值。入市首辨大市方向，例如到底係Top Down定係Bottom Up！2003年4月開始Bottom Up，到咗去年10月結束，然後進入Top Down期。今年3月入市博反彈，如忘記Sell in May亦幾麻煩！恒指14000點係另一個良好博反彈期，但熊市有排未完。Bargain Hunting（趁低吸納）係極之專業行為，要有森池兄智慧先得。如你只係一般散戶，最好採用小心駛得萬年船策略，只動用本金30％去玩吓。喺熊市中保本為上、賺錢次要，因次按風暴仍未過去，家吓壞賬率已高達23％（2001年8％；上述資料嚟自雅虎新聞）。甚至摩通CEO戴蒙對前景仲係悲觀，認為未來大趨勢係向下，反彈只係微波（Curve）。

要有捨得思想

道指喺2002年10月10日見7197.49，上升至9000點然後再回落到2003年3月12日7416.64才孕育牛市；今年10月10日道指見7882點後，可唔可以同樣孕育牛市？面對道指7800點，我地可以做乜？我老曹冇水晶球，但建議如下：一、如去年10月前你已賣出全部股票，依家不妨將30％資金重投股市；二、如你早已將30％資金投入股市，睇嚟除咗觀望外，可以做嘢已唔多，不如拉將凳仔坐定定睇「投資者日記」啦。當市場出現恐慌性拋售，理性分析如孤兒（冇人理）咁可憐。你可以話個市癲咗，但1974年7月至12月我老曹理性分析曾面對冷漠，從此我老曹學到一件事——喺熊市中最大責任係保本。一如太陽陳指出，喺熊市中最好100％現金，然後做空軍（我老曹做唔到，因為仲有感情包袱）；三、喺熊市中希望係最差投資策略，例如希望大市反彈後才減持，希望嗰樣或呢樣。喺熊市中應有佛家思想——捨得。請放棄紅塵、遁迹空門。就算唔做空門弟子亦要戒貪、嗔及癡。

喺熊市中，入市容易離市難。控制你可控制事，例如止蝕唔止賺及溝上唔溝落；管理你不能控制事。熊市當前，只有Cover Up或Take Shelter。唔好畀Wishful Thinking左右你投資分析，例如今年3月入市博反彈，到5月冇及時離開英雄，家吓已去咗浩園！恒指14000點做唔做救火隊？睇你有冇水而定（水頭充足者無妨，唔係就咪搞）。投資者有種特性叫做齊齊攬住死，死咗罷就，止蝕則死都唔制。恒指喺14000點反彈，恐怕亦係小飛俠式反彈（高極有限）。

標普五百指數連續八個交易天下跌，係1996年以嚟最長下跌日子；至今標普五百指數由去年10月高位跌幅已超過40％，以及只有十七倍P/E。周五約30億股易手係1988年第三大成交量日子。能源指數兩天回落19％及油價今年內首次跌穿80美元。摩根士丹利上周五回落22％，至十二年內低價9.68美元；高盛回落12％，至88.8美元，因穆廸重新評估大摩A1長債可能影響公司所發行2000億美元債券， 但短期債券仍獲Prime 1評級；高盛1750億美元長債Aa3評級改為負面，短期長債仍獲Prime 1。倫敦同業拆放利率高企4.82厘，升0.07厘；不過，上周五花旗回升9.1％，見14.11美元、美國銀行升6.3％，見20.87美元，以及摩通升14％，見41.64美元。不過，美斯百貨跌13％，見9.92美元，以及CBS跌20％，見8.1美元，睇嚟零售股受壓。分析員估計，標普五百指數第三季純利減少7.5％（其中金融股純利減少74％），市場擔心1930年代情況出現，我老曹認為，出現九十年代日式衰退機會更大。

美國陸續有銀行出事

過去三十天澳元兌日圓回落20％，以及紐元兌日圓回落16％，因澳洲上周減息1厘，引發利差交易unwind；一星期內由81.48日圓回落至65.41日圓，跌14％；紐元由69.76日圓回落58.74日圓，跌10.3％。加元10月3日至今回落10％，係1979年1月以嚟最大跌幅，上周五回落5.4％，見1.2125加元兌1美元，出現連續七個交易天回落。油價跌11％，見77.09美元（今年7月11日仲係147.27美元），令加元冇咗吸引力。上周加拿大TSX指數回落18％。加元10月8日宣布減息0.25厘，下次開會日期係10月21日，估計仍會減息。

日經平均指數上周回落24％、澳洲ASX200指數回落16％、恒生指數回落16％，以及新加坡海峽時報指數回落15％，喺一星期內MSCI亞太指數回落17.8％或冇咗6萬億美元市值。

全球金融市場風聲鶴唳，除日圓進入牛市外無一幸免。美國Meridian Bank及Main Street Bank上周又被接管，即今年內美國共十五間銀行倒閉，令FDIC疲於應付。8月FDIC公布，有問題銀行共一百一十七間，即陸續有嚟。

美國地方政府債券已回落四周，家吓三十年期利率5.71厘，較聯邦政府債券利率高出1.57厘。令人擔心美國地方政府Munis好快出事，相信最先係加州，佢已計劃向聯邦政府借70億美元。

全球金融市場面對兩大壓力：一、缺乏短期資金（依家主要依賴各國央行提供）；二、去槓桿化。

贖回基金拖累道指

9月美國互惠基金被贖回722億美元、股票基金435億美元及債券基金238億美元。10月至上周五互惠基金被贖回493億美元，其他方面數字未出。富達旗下管理基金今年平均損失32％，最出名麥哲倫基金跌44％。上述情況令投資者大量贖回基金，令道指上周五最低見7882點。

分析家估計，美國第四季及明年第一季GDP出現負增長（即衰退），係分析家首次公開估計衰退將出現。

美國外貿赤字收窄3.5％，因原油、汽車、電腦及電視入口減少，令入口減少2.4％及出口減少2％。IMF估計，明年OECD國家GDP增長率只有0.5％，係1982年以嚟最細，美元4月至今已上升12％。

英國富時一百指數上周五回落8.9％，收3932點，全周共回落21％，係1987年10月以後最大跌幅。英國同美國上周股票市場冇咗40000億美元市值。HBOS回落19％（一度跌28％）、皇家蘇格蘭銀行回落25％及巴克萊回落14％，傳涉及持有雷曼兄弟股份；滙控（005）宣布由其他地方調來7.5億英鎊注入英國支行，去增加一級資本比率。喺正常情況下，一級資本比率係喺9％至10％叫做健康。資本充足比率喺7％至7.5％已足夠；皇家蘇格蘭銀行需投資100億英鎊才可將一級資本比率提升到10％（花旗集團分析）；巴克萊動用50億英鎊才達10.5％水平。滙控喺香港大把水，調D水去英國已搞掂。其他英國銀行可能要政府注資。

今年3至4月，海外投資者借內地樓市低迷之際，四處尋覓優質項目。當時本報評論員認為佢地太早入市。家吓雷曼已破產，而雷曼喺2006年開始進軍中國房地產並持有鴻隆控股（1383）13％及綠城中國A股7.44％（最近公布已減少至6.65％）。摩根士丹利更早喺2003年起進軍中國及本港物業，近期亦由買家轉為賣家。九金十銀不再，中國房地產出現近年最冷黃金周。甚至香港《文匯報》亦認為今年10月內地房產已跳過深秋，直達寒冬。

廣州房管局官員認為，廣州房價大跌可能性唔大，因今年政府唔再供應限價房地塊。今年土地供應只有二點五平方公里，而唔係計劃中四平方公里。

內地新政策活化農村經濟

上海試驗農村土地轉包、出租及入股方式，令農民可以喺市場上自主或委託流轉土地。去年上海農戶承包地流轉面積達一百三十四萬三千畝，佔延包總面積53.7％。三種形式為轉包、出租及入股，其他包括互換係希望能防止地方政府變相侵佔農民承包土地，使土地流轉喺陽光下進行。

《南方都市報》認為，農村土地使用權證改革，可喚醒農村30萬億元人民幣資產。令農民有資產作抵押向銀行借錢完善土地管理，亦可明晰農村耕地及住宅地分野。給農村居民發房產證及土地使用證；家吓中國有七億三千萬農民，人均住宅三十方米，平均造價住宅係每方米600至800元，價值13萬億至18萬億；耕地十八億畝，以每畝6000到16000元計，約值20萬億元。上述政策可將農村經濟搞活。

中國國家統計局公布，第三季度全國企業景氣指數128.6，較第二季下降8.8；較去年同期下跌16.1。上市公司景氣145.6，較上季回落18.5，其中工業企業較去年同期下降17.63％。剔除石油加工及電力則上升36.27％。

旅遊業營業額上升15.46％及利潤上升3.2％；發電行業利潤下降93.6％。上海商品房9月成交量下降74％、深圳下降3％、蘇州下降6％及廣州下降16％，「九金」情況並未出現。