2008-10-25

新布列頓森林會議

10月24日，周五。恒生指數大瀉1142.11，收12618.38；成交561.4億元。10月期指跌1271點，收12500點；11月期指跌1263點，收12450點。期指倒掛現象又再出現，代表後市進一步睇淡。

滙控（005）被大摩下調目標價至580便士，响香港已大跌13%，喺倫敦進一步下跌。國泰航空（293）亦跌10%，因國際航空運輸協會（IATA）公布全球航空客運五年來首次下跌，法航喺歐洲股價亦大挫。船運費率下降，令中國遠洋（1919）大跌15%。恒生國企指數大跌9.4%，收5802.71，係2006年1月12日以來最低收市水平。

全球汽車股急跌反映大衰退將至

日經平均指數跌9.6%，見7649.08，創2007至08年最低指數。新力集團受歐羅轉弱影響，目標利潤減少57%，如歐羅再轉弱，甚至會出現虧損！新力股價跌14%，見1972日圓；聲寶跌13.5%、Canon跌12.6%。豐田汽車股價跌6.4%，因公布第三季營業額出現七年來首次下降。其他汽車股如Peugeot喺歐洲跌14%，至15.40歐羅；通用汽車股價喺德國跌10%，成5.48美元；福特汽車跌4.6%，成1.91美元；富豪汽車亦跌21%，至34.3克朗。全球汽車大挫，擔心全球經濟將陷入大衰退。

英國GDP第三季跌0.5%，係十六年內首次，相信英國已步入退衰期。英鎊再跌2.5%，成1.53美元。倫敦股市一開始便下跌8%。英國係G7中最先公布第三季GDP國家，估計日本情況亦一樣。美股一開市亦大跌，因擔心經濟衰退。

美國同日圓面對拆倉潮。大摩外滙專家Stephen Jen估計，美國互惠基金、退休金、人壽保險金喺海外投資約22萬億美元，一旦拆倉威力無窮。10月1至22日美元兌歐羅已升7.7%、兌英鎊升8%、兌澳元升17%、兌韓圜升20%、兌南非蘭特升35%。唯一跑贏美元係日圓，日圓兌美元升6.6%，成91.81日圓，係1995年8月9日以來最高。

美元走強令金價進一步回落，國際金價700美元失守，見682.4美元，向我老曹估計中650美元進軍。本周金價跌咗13％；白金跌4％，成778.35美元，本周共跌16％，進一步令人擔心通縮。

南韓股市三年內首次跌穿1000點，成938.75；指數由舊年10月31日2064.85回落至今，跌幅54.5%；本周已回落20.5%。今天LG跌9.8%，Kia汽車跌14.8%。

Anglo American呢間世界上第四大礦業公司今天股價跌8.1%，成1140便士。Rio Tinto（世界第三大礦業公司）今天股價跌7.1%，成2082便士。Total（歐洲第三大油公司）股價跌7.1%，成34.77歐羅。荷蘭蜆殼石油（歐洲最大油公司）跌6.4%，成1452便士。

OPEC開會後決定每日減產一百五十萬桶，12月期油跌7.1%，成63.05美元，睇嚟向50美元一桶進軍。

MSCI World Index跌4.3%，代表本周（未計歐美股市周五跌幅）下跌8.2%／或喺今年失去咗45%！

滬深指數跌2.9%，至1781.60，係2006年10月31日以來最低；本周失去4.8%。萬科跌5.2%，保利地產跌5.4%。

美元日圓強勢維持至明年初

De-leveraging及de-risking（去槓桿化及減少承擔風險）已成為投資主流，擋都擋唔住。日圓同美元已成為全球兩大強勢貨幣，估計強勢可維持到2009年首季，愈維持得耐，對全球經濟破壞愈大。

2007年10月31日至今快一年矣。各位最痛苦事，應該係唔知點樣告訴Honey，我唔見咗好多Money！上述係大部分香港投資者今天面對問題，加上食物售價及油價仍較去年10月高50%。唔少人財富卻少咗50%，開支卻大幅上升，你說怎麼辦?!過去三十年環球化帶嚟好處已發揮殆盡，壞處卻逐漸浮現，例如國與國之間金融業缺乏防火牆，令信貸壓碎（credit crunch）無從制止。雖然畢非德叫你當別人恐懼之時貪心，但我老曹堅持响家吓環境，小心駛得萬年船。

各國政府不斷推出刺激經濟方案，但各國股市卻不斷下沉。企業不斷裁員，美國第三季倒閉數字超過八萬一千單，較去年同期上升71%；情況仍在惡化而非改善中。

响周四聽證會上，格蛇終於肯認自己任內冇好好監管衍生產品係錯誤，並同意樓價未見底前金融危機唔會消失！不認不認還須認，上述係我老曹舊年對格蛇指責。不過，今天已非追究誰是誰非時刻，而係今後「怎麼辦」？Does anyone know the way to Recovery Road？我老曹自去年3月Countrywide破產開始，一直擔心金融風暴出現，並喺去年10月要求大家响投資策略上採取三七分（即使採用三七分，到依家都幾傷）。我老曹搵唔到未來復甦之路响邊，睇落我地將步日本九十年代後塵，進入迷失新世代！我老曹唔信美國挽救計劃可奏效，再嚟一個刺激經濟計劃，相信一樣冇乜用（1990至2003年日本政府用盡種種方法刺激經濟，結果又點），依家市場已到咗anything that can go wrong, goes wrong日子。銀行、基金尤其係對沖基金，面對大跌股市及崩潰中借貸市場，只有一籌莫展。今天銀行連同業（銀行）都唔肯借錢，要佢地貸款畀中小企？你講嘢呀！今天連畢非德亦睇錯市，你又可以信邊個？一個被「金融化」美國經濟正在結束，過去透過信貸去創造財富時代完畢。唔好話股票跌價，連石油及黃金價格亦在下跌中，2008年7月起只有Cash is King！

格蛇料多數衍生產品永遠消失

有一個笑話：如果十個工程師共同努力去設計一條橋，呢條橋建成之時，一定精美、實用及省錢。如果十個投資專家建議你買某股或黃金、外滙，你最好朝相反方向走，因為佢地結果一定係錯！股市已跌咗50%以上，係咪值得投資？木宰羊。1973至74年教訓係：恒生指數由1700點跌落700點後我老曹入貨，事後發現恒指竟可跌至150點。底從來都係出現之後一個月才知道，冇人能事前成功估底（包括畢非德）。恐懼威力往往較貪念大，其摧毀能力亦往往超乎一般人估計。大部分人估2009年美國GDP仍有增長，雖然估計中增長率愈調愈低（如今估計將跌至0.5%），但冇人公開估計2009年美國經濟係負增長，一如1990年日本亦冇人預測未來衰退可維持十三年一樣；我地總希望明天會更好。周四格蛇講真話——金融海嘯有嚴重衝擊力，其破壞力之大，達到一般人唔信地步。佢認為，依家衍生產品大部分會消失及永不回來，類似佢任內十八年信貸膨脹亦唔會再出現！佢承認任內低估咗其風險，如今發現其破壞力超過咗自己想像。

末日博士麥嘉華接受CNBC訪問時話，全球經濟開始退潮，而且速度極快。西方世界政府正努力阻止，並希望重新恢復信貸增長。但我老曹相信佢地最終將失敗。

抵買唔代表可以買

今天股市內淡友較好友多出30%，單單9月至今股市已跌咗30%。恒生指數平均O進入單位數，即進入有投資價值水平。價值投資法信徒早已認為大量股票抵買，只係手上資金愈來愈有限。我老曹睇法係：股市既然可以偏高，自然亦可以偏低，抵買並唔代表可以買。請追隨趨勢（例如觀察250天移動平均線與50天線關係，以及出現一浪高於一浪後才入市）。價值投資法信徒一再被人詛咒，除畢非德外，另一位係GMO主席Jeremy Grantham，佢早喺1998年便睇淡科網股，長遠而言佢係啱，但太早睇淡而錯過1999年賺大錢日子。呢次Grantham睇好會否一如畢非德，長遠而言係啱，不過已吃咗眼虧？

美國利率好快會見1厘，之後貝南奇可以用工具已十分有限，唔通真係要揸直升機去擲銀紙？今年6月Federal Deposit Insurance Corp接管咗99億美元斷供物業，每季將增加二十五萬間住宅；至9月底止，美國每四百七十五間住宅中便有一間被接管。

AIG認為，政府提供1228億美元已唔足夠，希望再增加（9月16日政府已由850億美元增加至1228億美元，因一星期前AIG已動用其中829億美元，擔心政府呢次挽救AIG係踩入無底深潭而不能自拔。10月8日政府再批378億美元，擔心好快又會用晒，因為AIG為4040億美元固定收入投資提供擔保。响股市日沉下，AIG虧損在不斷擴大。

歐洲央行計劃再減息，而唔理會未來通脹率，估計明年6月可見2.5厘，同2003年2厘低息仲有些少距離。

南韓第三季GDP只升0.6%，出口更跌1.8%，家庭開支只升0.1%。相信南韓將成為亞太區繼日本後第二個陷入衰退國家，加上外債沉重，情況幾令人擔心。

中國政府刺激房地產計劃估計作用唔大，因為中國經濟仲係出口導向型而非內需型。

全球金融守則重新制訂

G20今年11月15日喺華盛頓開會，有人形容係二十一世紀布列頓森林會議（布列頓森林會議喺1944年召開，訂下戰後全球金融制度），代表由美國雄霸全球六十幾年時代結束，世界將由單邊主義走向多邊主義，其中三大勢力係美國、歐洲同新興國家（以中國為代表），重新制訂世界未來金融制度。法國總統指出，未來冇一個金融機構可以唔受監管；美國提出唔容許免稅天堂存在；反觀中國仲未表態。

1944年，由四十四個結盟國家在布列頓森林開會，制訂咗七百四十條規則共同遵守，以阻止三十年代美國大蕭條喺任何國家出現，並決定一盎斯金價兌換35美元，各國貨幣同美元掛鈎；另組成多邊關貿協定（即WTO前身）及IMF。上述協議喺1971年由美國總統尼克遜廢除，從此世界進入浮動滙率時代，引發1971至2007年全球通脹。美國大選後將由新總統召開G20會議，重新制訂全球各國遵守金融守則，到時全球金融市場才可穩定下來。短期而言，愈接近11月15日，全球金融愈動盪。過去世界經濟論壇（World Economic Forum）對全球經濟有一定影響力，但最近五年已冇人再尊重呢個組織，佢地提出警告冇人理會，亦係造成近期全球經濟動盪理由。現年七十歲Klaus Schwab係世界經濟論壇創辦人兼主席，佢最近提出重建世界經濟秩序，亦係觸發呢次G20响華盛頓開會理由。至於能否達成新布列頓森林式協議？木宰羊。

雪茄伏認為，美國銀行系統已破爛不堪，必須重建，才可重新獲世人信任。