2008-10-22

價值投資法再受質疑

10月21日，周二。恒生指數跌281.84，收15041.17，成交506.74億元。10月期指跌100點，收15170點，高水。

今年如果你冇穿冇爛，認真恭喜晒，你嘅表現已威過好多基金經理。今年本港不但出現有毒債券，更有深水炸彈股票，股價喺一天之內可跌去五成；呢隻唔係二線股，而係恒指成分股。請問各位再信唔信價值投資法？去年10月30日中信泰富（267）每股49.9元，今天已經跌至6.52元，跌幅達到86.9%，以恒指成分股嚟講都算跌得慘重，何況中信泰富手上外滙合約要到2010年10月先完成。今年9月7日至中信泰富公布為止，恒指同期只回落23.1%，點解中信泰富股價已下跌41.7%（以停牌前14.52元計）？點解呢段日子中信泰富股價跌幅大過大市？香港政府一向強調投資市場透明度，喺呢件事上似乎透明度不足。其次，公司財務董事點解可以喺董事局唔知情嘅情況下，簽咗咁士刁拔嘅合約？此乃繼次按風暴後，另一項動搖投資分析界信心嘅事件。高盛建議沽售中信泰富，目標價12.5元，估計明年每股可恢復獲利1.33元，P/E十一倍；花旗亦建議沽售，目標價6.66元，理由係公司欠缺管理，如未來澳元回落到50美仙，呢方面虧損可達260億元；美林建議沽售中信泰富，目標價10.9元，外滙虧損令負債比率上升到危機水平。今天收市價較花旗目標價更低。

拉斯維加斯金沙集團股價今年跌87%，已同銀行重新談判投資澳門所涉及嘅409.5億港元貸款計劃，利息係同業拆息加3.5厘，為期五年，金沙長債評級只獲穆廸公司Ba3評級及標普B+評級。2015年到期嘅6.38厘債券喺10月17日見54美仙（票面1美元），即回報高達19.3厘。睇嚟金沙財政有壓力 。

上周末摩根士丹利CEO麥克同CNBC講，美國第三隻大型對沖基金短期內可能爆煲；全球金融市場點解會搞成咁？

美國政府繼夏季1000億美元退稅後，又批出7000億美元挽救銀行嘅計劃，貝南奇話需要第二個刺激經濟計劃！睇嚟美國經濟真係幾令人擔心。估計第四季GDP出現負增長；美國仲有一百間地區性銀行，涉及資產8000億美元喺未來兩個月及明年可能破產，令FDIC疲於奔命。

美國南加州住宅較一年前減價33%至35％（普通家庭住宅售價308500美元，中價樓賣505000美元）。9月份銷量較上月升65%，證明價低可暢銷。

10月20日中國國家統計局發布第三季GDP，只上升9％，除第一產業上升加快0.2個百分點外，第二及第三產業增加值均出現回落。喺咁嘅背景下，擴大內需及刺激經濟措施呼之欲出。喺11月召開嘅中央經濟工作會議上，將對點樣應付美國金融危機做重大決定，估計強調基建，尤其係加快鐵路建設去擴大內需。

估計明年中國GDP增長率只有7.3％左右，如何擴大內需成當務之急。

9月至今內地廢鐵價格已由每公斤3.3元跌至2.1元；鋁合金由17至18元跌至11元；鋼絲由每公斤57元跌至45元。9月份全國用電量只上升6.3％。

唐山外輪代理公司表示，過去一個月用十幾隻船嚟運煤，家吓只要兩三隻船已足夠。

對於降低內地住房交易稅，專家認為，咁樣不能阻止房價回落。家吓係100萬元抽契稅15000元、印花稅500元及交易登記費80元，合共15580元，如五年內出售再抽5％稅。

中國家具2000年總產值1300億元人民幣，出口35.65億元，喺去年前每年上升15%至20％，外銷上升20%至30％。製造商由2000年嘅二萬間上升到去年八萬間，家吓已進入寸步難行期，年底會更差。

世界銀行首席經濟學家林毅夫（前《信報》作者）响東京表示，國際金融危機對發展中國家影響大過發達國家；因為已發達國家可印鈔票救市，發展中國家卻面對資金流入減少及出口減少；加上糧食及能源價格上升，對發展中國家人民壓力更大。

內地中金公司首席經濟專家哈繼銘認為，美國雖然唔會出現大蕭條，但已陷入V形衰退。次按危機未走到盡頭；金融機構已披露嘅損失只係冰山一角；商業信用瀕臨破產；美國住房價格由2006年頂點回落40％左右先見底，即未來仲有15％下跌空間。

雖然政府動用7000億美元救市，但金融業受到更嚴格嘅新監管體制影響，銀行亦唔願放貸。依家仲喺度重建資金，估計美國將有五年低迷期，甚至出現失落十年嘅L形經濟衰退。

長期通脹降臨

1989年12月日經平均指數38916點，今天日經平均指數幾多點？日本中央銀行過去十八年嘅努力結果，除咗提供短暫繁榮外，始終再唔可以改變日本經濟大方向。有人認為，日本銀行九十年代減息太慢，令情況陷入無法挽救期，美國聯儲局去年9月已行動，估計今年10月底減息至1厘，結果又點？家吓道指正在遠離去年10月14093點，每一次反彈後，引發更大嘅拋售。

至今為止，只有兩次經濟情況同家吓嘅情況相似。一次係1929年華爾街；另一次係1989年日本嘅東京。從各國央行嘅反應睇，我老曹相信，呢次次按危機係另一次1989年日本嘅翻版，而唔係1929年華爾街。

凱恩斯學派又大量回朝，自由經濟學者又再失色，未來再次返回官僚控制經濟時代、赤字擴大時代、通脹率回升時代、利率向上時代及濫發鈔票時代。換言之，通縮只係短期現象，長期通脹將重臨（但不宜太早睇通脹）。

近日股市反彈，因VIX見81.2新高，吸引炒家進入市場，恐怕事後又證明太早入市；因為令人失望嘅消息陸續有嚟。如你有錢不妨吃喝玩樂，請唔好太早進入金融市場，恐怕回落期至今只完成三分一。投資市場仍布滿地雷，一唔小心便踩中一個。

股聖為投資而投資

股聖畢非德上周五發出入貨訊號。如你好似股聖咁揸住大量現金，亦不妨買番D；股聖一生人為投資而投資，甚至連佢老婆亦離佢而去，D子女同佢嘅關係唔好，只有投資股票先為佢帶嚟生活滿足感。

股聖指出，二十世紀道指由66點升到11497點。喺呢段日子，投資者買股票仲係輸嘅多、贏嘅少；踏入二十一世紀，道指至今只喺11497點反覆，投資者成績又點？道指去年10月至今已經回落38％及標普五百指數跌幅大於40％；去年高位至今日經平均指數更回落49％，MSCI世界指數回落44％。

古語有云：「牛市中嘅贏家係賺得最多嗰位，熊市中嘅贏家係輸得最少嗰位。」一旦熊市來臨，我老曹嘅投資策略以持盈保泰為主；一般投資者往往喺熊市中冇咗40％或以上嘅財富；各位要小心你嘅財富。

今年美國大選已100％可預測結果，令人擔心估計中嘅奧巴馬震撼又喺度醞釀緊。

最後仲係點清理CDS問題。雷曼手上1400億美元CDS，只有600億至800億美元已清理；至於AIG、「兩房」、華盛頓互惠、美聯銀行、皇家蘇格蘭銀行及富通等手上CDS仲清理緊。仍大量持有CDS者包括摩通、花旗、美國銀行及其他二十五間國際知名銀行，估計佢地持有15萬億美元CDS。CDS市場近日已迅速萎縮至45萬億美元（主要係價格回落），過去一年冇咗（或清理）20萬億美元CDS，大約完成清理工序三分一。市場進入Capitulation（有條件地投降）。90％分析員相信，美國喺十二個月內經濟將進入衰退期；更多普通人認為，今年起我地已進入衰退期。

美樓價難上升

喺次按支持下，2004年美國人住宅擁有率已達69.2％，2005年8月起住宅成交額已回落，但價格繼續上升，到去年美國四分三家庭已完成置業，即樓價回落除咗價格因素外，另一個需求因素已大幅減弱。利率重返1厘都無法刺激置業欲。

去年11月起股市回落，反映未來經濟弱點及環球金融市場唔穩定；到咗今年10月13日起股市已進入重要支持區；反之，真實世界經濟弱點卻逐漸浮現。油價由7月份回落50％以上，因油組計劃減產而反彈，但12月石油期權以50美元成交者大增，即唔少人賭明年油價見50美元。

過去銀行努力發展出嚟嘅影子銀行業務（例如Swaps及Derivatives），家吓大受其害，存款戶大量提款。喺政府保證存款安全後，存戶大量提款情況停止，但CDO或次按ABS價值仍在萎縮中。1991年起美國樓價上升，到2006年結束，估計Overbuild一百三十萬間。今年8月止，供應總數係四百三十萬間，相等於十點二個月存貨，需四年時間先完成消化。去年美國家庭總負債已相等於美國GDP，未來美國GDP將面對幾季負增長。通貨收縮期已開始；基本金屬價格已Back Down To Earth。

依家响世界相信好少人曾經歷過1929至1933年，施瓦茨女士係少數例外，佢同佛利民喺1963年共同寫成A Monetary History of the United States一書，認為係貨幣政策失誤，令1929年華爾街危機轉化為大蕭條。美國現任聯儲局主席貝南奇以呢本厚達八百八十八頁嘅書為藍本，希望阻止華爾街危機重演。施瓦茨女士認為，政府唔應該挽救決策上出錯嘅機構，只應減少系統上嘅風險（換言之，佢唔認為英國政府挽救銀行計劃係啱嘅）。佢認為，呢種做法只會延長衰退期，而唔係解決問題（我老曹完全同意佢嘅論點），家吓嘅做法只係頭痛醫頭而已。

英國政府提出注資銀行計劃，到底係暫時麻醉定係萬全之策？G7聯手再次水浸金融市場，長遠嚟講唔係引發高稅率，就係再次引發通脹。1907年10月摩通當年已70歲，喺去聖堂期間，電報不斷咁送到。首九個月佢已挽救咗八千零九十間公司，當United Copper Co.無法挽救下，便引發危機。家吓嘅情況亦一樣，各國政府必須繼續挽救所有銀行，因為只要有一間唔救，另一場危機又再爆發！去年10月至今全球股票市場冇咗20萬億美元市值；美國物業市場過去兩年失去6萬億美元（未計其他國家物業）。家吓嘅政府挽救銀行計劃，又可以捱幾耐？呢場各國央行同Mother Nature之戰，最後贏家會係邊個？

聯儲局減息後果難料

油組10月24日喺維也納召開緊急會議，計劃減產去令油價喺70至90美元之間穩定落嚟。分析家指出，即使油組每天減產一百萬桶，仍無法阻止油價回落；油價低於70美元，即重返去年8月前嘅水平，到底代表D乜？去年8月起，各國濫發鈔票，令油價、金價及原材料價格出現極大波動，點解油價又再重返去年8月前嘅價格？呢點值得各位三思。

低通脹令聯儲局有條件再減息，10月28至29日聯儲局或者把利率降至1厘，重返2003年年中至04年年中嘅水平，亦係戰後以嚟最低息期。呢一次會唔會好似2003年一樣咁刺激經濟復甦？要諗清楚先再回答。

貝南奇雖然熟讀歷史（佢主修華爾街大危機），佢希望透過干預去改變現實，結果為自己寫下歷史上另一頁。

明尼蘇達州嘅聯儲銀行總裁史登（佢亦係今年美國央行貨幣政策投票委員）喺密芝根科技大學表示，呢次回落較九十年代初期嘅波斯灣危機嗰次更差。受金融市場史無前例嘅問題困擾，美國GDP增長率未來數年都受局限。估計失業率將上升及對貨品、服務需求下降，情況較1990／91年度S&L危機大。睇你以邊種數據為主，1990／91年度嗰次溫和衰退（軟着陸）共十二至三十六個月。美國經濟增長放緩期由去年年中已開始，至今已超過十二個月，令人感到鼓舞係能源及商品價格今年7月見頂，聯儲局少咗一份憂慮（唔少人估計月底再減息半厘）。